ايه رائيك فى الكوسه....

[حَرفُُ هجآءّ]

السلام عليكم ورحمة الله

الواسطه ..بين قوسين الكوسه......انت تعرف ان معظم المجتمعات العربيه بقوم على الواسطه

يعنى لو فكرت معايا كدا

فى الشارع ....وفى الحى ؟...والجامعه .....والدوله ......معظموو مبنى على الكووسه

يعنى لو انت رايح تجيب عيش وعارف صاحب المخبز ...هيديك اول واحد ....؟

ولو انت رايح تركب اى مواصلات ..وعارف صاحب التاكسى ..هيركبك انت الاول ..ولو حتى فيه ست عاجزه....؟

لو انت فى الجامعه .... مثلا فى الكليه ...ممكن تجيب 70 من 70 فى الشفوى والعملى لو تعرف فراش فى الكليه ...؟؟

طيب ليه ميكنش الناس كلها زى بعضها ....؟؟

الموضووع كبير فعلا ,,,,ومحدش عارف الحل ايه

هل الضمير هو الى غايب ..ولا احنا الى مقصرين فى حق نفسنا

ولا اننا ملناش حد نتسند عليه غير ربنا ....مش عارفة

انا حابة اطرح شويه اسئله ..وياريت الكل يجاوب عليها

انت ايه رائيك فى الواسطه ...؟؟

انت فعلا وبصراحه ..عندك واسطه..؟؟

تتوقع كدا ..كام نسبه الواسطه فى بلدنا ..؟؟

هل المنتدى بتاعنا دا ..فى واسطه ..اقصد بين المشرفين والاعضاء ..؟؟

لو عندك واسطه ...بتستغلها .علطول ...ولا فى الظروف الصعبه ..؟؟

ايه اكتر موقف حصل ...واتمنيت انك تكون عندك واسطه...؟؟

ودى قصيده لقيتها فى احد المنتديات عجبتنى جدا

للكوسه ف بلادي شئون
لو تعرف واحد ف الشرطه
راح تخرج من أجدع ورطه
والراجل اللي انت ظلمته
تلاقيه متلقح مسجون

أو تعرف شخصيه كبيره
شغاله ف البنك مديره
راح تاخد من غير ضمانات
كام قرض بمليون مليون
وهروبك طبعا مضمون

ويا عيني لو تعرف نايب
ف المجلس مش نايب خايب
راح تبني أبراج وهميه
أوراقها مظبوطه أكيد
وفلوس الناس المهريه
حتجيلك م الجيب للإيد
بعديها تروح المستشفى
وتقيد نفسك مجنون
أحكامك تسقط ف ساعتها
بعديها ترجع موزون

ويا عيني لو تعرف شيخ
فجنابك طاهر عل طول
وصيامك طبعا مقبول
وإذا فرضا حبيت تتجوز
تتجوز من غير مأذون

وإذا ساكن ف عماره جديده
وحبيبك راجل مسئول
فسيادتك من غير ما تقول
يركب لك فورا تليفون

ولو انت عندك عربيه
ونمرها سوده بنسرين
حتعدي أجدعها كمين
وحتكسر أوضحها إشاره
ماهو نمرك سوده جباره
ولا تعرف أيتها قانون

ولو انت بتعرف فرّان
أو واحد بياع جرنان
راح تاخد طلبك وحتمشي
من غير ولا دوشه ولا دور
والناس الغلبانه حتاخد
طلباتها بعدك وتغور

ماهو كله غيرك بيهون
ولو انت زميل الحلاق
راح تحلق اولها زبون

وإذا كنت بتعرف دكتور
حتعيش متطمن مسرور
وحتسلك ف لجان الشفوي

ومجال تعيينك موفور
وحتطلع فالتليفزيون
بالبدله وفيها الببيون
تتكلم وبكل بساطه
عن شرف المهنه المدفون

لكن لو شاعر غلبان
قلت اللي ف نفسك علطول
حيقولوا مين قال لك قول
ويهاجمك مليون دلدول ياريت اشوف ردود جريئه ومشاركات متميزه منكم

[اميره الحب والعذاب]

هههههههههههههههه
القصيده تحفه
بصي يا قمر هو ده حال البلد طبعا في الوسطه الاولي وهي انك تعرفي حد
والوسطه التانيه (كل سنه وانتم طيبين)يعني 10 جنيه في جيب الموظف
والا مش هتعملي اي حاجه في الزمن ده وهتفضلي يقلولك فوتي علينا بكره
وطبعا اهم وسطه بقي لو كنتي بنت وذي القمر وماشيه بتدلعي ساعتها هتلاقي الكرسي وكبايه الشاي كمان
والموضوع يخلص قبل متكمليها
طبعا العيب فينا بقينا بنستسهل كل حاجه وعايزيم كل حاجه واحنا مكنا ومش عايزين نتعب
كل واحد ليه وسطه في مكان لو رفضها هتلاقي ان الوسطه انتهت تماما
بس كل واحد عايز كل حاجه سهله
عارفه لو رفضنا هنتغير بس مش هينفع انا ونتي وتلاته واربعه هنبقي ذي الي بينفع في قربه مقطوعه
لازم كلنا نتغير
تسلمي يا قمرايه
اميره العذاب

[عاشقة الهدوء]

السلام عليكم اختى ورحمة الله وبركاتوا

شوفى ياحببتى دلوقتى انتى بتتكلمى فى زمن لا تعليق عليه
حطى بقه خط احمر تحت كلمة لا تعليق يعنى دى حاجه مش جديده


فى زمن كلوا كده كلو ماشى بالواسطه والكوسه ويابخت بقه الى ليه


واسطه فى الزمن ده احنا بقه ياحببتى وسطتنا ربنا سبحانه وتعالى


تسلمى حببتى على موضوعك المتميز

[dano]

السلام عليكم ..

الاخت عاشقة الهدوء ... اوفت بالمعاني الي كنت ابا اقولها ..

بجد .. حطي خطر احمر على كلمة لاتعليق .. احنا في زمن الواسطة ..

يعني بجد دلوقتي مفيش حاجة تمشي من غير واسطة الا قلة يعني ..

ويعني في ناس مايكنش عندهم اي واسطة .. يعني حياتهم بتوقف ..
يكونوا عايزين حاجة ومهمة بالنسبة لحياتهم .. بس بيلاقو ان الناس هناك بتمشي بالواسطة .. هما هيمشوو ازاي .. ؟؟

يعني والله مسالة لو فتحنا باب النقااش مش هيخلص فيها .. لانو بجد بقينا في زمن الواسطة ..


وفقك الله لما يحبه ويرضاه ..

مشكورة على الموضوع الرائع ..

[حياتي ذكريات]

السلام عليكم

والله يا اسيل دولوقتي الناس كلها بقت تتعامل بالواسطات

عايزة وظيفة .. عايزة مصلحه .. عايزة اي حاجه بواسطة

تلاقيها معاكي على طول ..

هو بصراحة ظلم جدا للي مش معاهم واسطه عشان تلاقيه

يتعب ويجتهد وفي النهاية ما يحصلش اللي عايزه

لكن اللي معاه واسطه كل حاجه بتيجي عنده بالساهل كده

نرد بقى على الأسئلة

انت ايه رائيك فى الواسطه ...؟؟

أسوأ حاجه انتشرت اليومين دول وفي مصر انتشرت جدا بجد

انا بنزل مصر بفاجئ ان الناس بتتعامل كتير اوي بالواسطات

فيه ملك من ملوك السعودية قال في مرة

انتصرنا على كل شيء الا الواسطة ..

وعنده حق في كلامه لان الواسطة كل يوم يتزيد عن التاني

ومش بتنقص وده دليل على كمية تعامل الناس بالواسطة


انت فعلا وبصراحه ..عندك واسطه..؟؟

بصي انا عندي كتير ناس من العيلة اقدر منهم اني امشي

ليا مصلحة او طلب او اي حاجه .. بس الحمد لله مش بحب

ووالدي كمان مش بيحب يتعامل بالطريقة دي ومعودنا على كده


تتوقع كدا ..كام نسبه الواسطه فى بلدنا ..؟؟

ياه كتير اوي بجد .. انا كتير اعرفهم في مصر بيتعاملو

بالطريقة دي .. كفاية اني اول ما ببقى لسه في

مطار مصر بلاقي شغل الواسطات بدأ يشتغل


هل المنتدى بتاعنا دا ..فى واسطه ..اقصد بين المشرفين والاعضاء ..؟؟

لا بصراحة ما شفتش هنا خالص حكاية الواسطة دي بين

اي مشرف وعضو الحمد لله


لو عندك واسطه ...بتستغلها .علطول ...ولا فى الظروف الصعبه ..؟؟

بصي افتكر اننا ما اتعاملناش بواسطة الا مرة واحده بس وكنا مجبرين

على كده .. كان اخويا في مركز السفارات وكان اسمه اتكتب خطا في جواز

السفر او حاجه زي كده .. وما انتبهناش على الاسم الا قبل سفرنا بكام يوم

فكنا لازم نخلصها اخويا راح يعدلها لقى مليون طابور واقف وزحمة قام رجع

اليوم التاني نفس الحكاية وكل شوية المعاد يقرب راح اخويا متصل

على واحد من العيلة ليه منصب وكلمه راح مدخله على طول وخلصلنا الاوراق

ما افتكرش اننا اتعاملنا بالواسطة غير المرة دي بس وكنا في موقف صعب جدا


ايه اكتر موقف حصل ...واتمنيت انك تكون عندك واسطه...؟؟

لا والله ما جاتش في بالي الحاجات دي خالص

بس دولوقتي لو سألتي اي شاب هيقولك بعد ما اتخرج

عايز واسطة شغل وخلاص


تسلمي يا اسيل على طرحك الرائع والمميز

زي ما بتعودينا منك دايما

تقبلي خالص تقديري

[خليكـ معايا]

موضوعك جريء .. و افكاركـ جريئه .. وردي هيبقى جريء ان شالله ههههه


موضوع الكوسه ده بجد مزعج انا عن نفسي جربته وشفتوه محدش حكالي

احكيلي موقف حصل معايا ..

انا زي مانتي عارفه يالجامعه لسه بعكـ !!!!

فمرة كنت عند عميده شوؤن الطلاب عاوزه اخلص اوراق بتاعتي
قعدت اسبوعين بستنى عند باب المكتب من 8 الصبح لحد 3 بعد الظهر
وانا واقفه وكاني بشحت منها
كل ما اقول لسكرتيرة عاوزه اقابلها تقولي ساعه كمان شويه معها مكالمه وشويه لسه ماجاتش وشويه هيا مش فاضيه لو عاوزه تستنيها كتير استني ؟؟؟؟؟؟؟
وعنيها بتقول خدي الباب وراك احسن !!!!!!!!
وعالحال ده اسبوعييييييييييييين
وانا بشوف بنات بيجوو بعديه ويخلصو ويمشوا وهاتك احضان وبوس وسلمي على ماما
وبابا بيسلم عليكي << اصلو دكتور بالجامعه ؟؟

وانا بموت من الغيييييييييييييظ ليه كده ليه التفرقه دي محنا كلنا طلاب وجايين بالنظام عاوزين نخلص اوراقنا ونشوف محاضراتنا ؟؟؟
نعمل ايه علشان نخلص
نبوس الايادي والا لازم هيا تعرف ماما والا بابا علشان نخلص ؟؟؟


انا مش قادرة انسى الموقف ده ابداااا مع انو مر عليه كتير يجي سنه بس والله من كتر ماكنت واقفه ومش حاسه دميوو رجليه !!


المشكله انو بابا كمان ليه <<< في الكوسه بس تصوري مش عاوز لنا نستغلها قال عاوزنا نعتمد على انفسنا
طب والناس الي بشوفها معديه من قدامي بتاخد دوري وانا احق وعندي كوووووووووووسه !!
مش عاوزني استغلها ليه ؟؟؟


انا مش بأيد الواسطه الي تحرم الواحد من احقيته في اي شي ؟؟
بس اما تكون جاي من الصبح وبتستنى زي الخلق والنهايه تفضل اخر واحد وانتا بامكانك تلفون صغير للمسئول الي اكبر منها وتتقضي مصلحتكـ؟؟؟


الكوسه دي بتعمل تلبك للاوضاع في المجتمع اوووووووووووووووى
فلو تنفع البطاطس << الاخلاق الحلوة يكون احسن وتكون خاليه من تانيب الضمير







تقبلي مروري وقلبتي المواجع انا حاسه رجليه بتوجعني هههههههه

[شاعر واسير الحب]

اشكرك علي موضوع الكوسة

احيانا الكوسة بتكون كويسة لانهاكوسة محشية وبتظبط اي واحد علي طول اذا عاوزيشغل او يخرج اوراق ومدام الموظف مد ايه خلاص الشغل كدا لا ينفعل الا بالكوسة او الرشوة وكلاهما حرااام

انت ايه رائيك فى الواسطه ...؟؟

غلط لانها بتاخذ حق الغير

انت فعلا وبصراحه ..عندك واسطه..؟؟

عندي واسطةجامدةجداا الاعتماد علي الله وبتوفيق الله

تتوقع كدا ..كام نسبه الواسطه فى بلدنا ..؟؟
ما تعديش ربنا يلطف

هل المنتدى بتاعنا دا ..فى واسطه ..اقصد بين المشرفين والاعضاء ..؟؟
الله اعلم
هي مش واسطة مجاملة شوية لومشرف كتب موضوع الكل بيرد علية ولو عضو اللي كتب لا يوجد مشاركة من المشرفين ( مجاملة )


لو عندك واسطه ...بتستغلها .علطول ...ولا فى الظروف الصعبه ..؟؟
لا ولا احب ذلك لاني ان اذهب لاحد واطلب منه المساعدة واحيانا بيتهرب

ايه اكتر موقف حصل ...واتمنيت انك تكون عندك واسطه...؟؟

في الثانوية النتيجة كل اصدقائي عارفوها من الكنترول كان اكثرهم اباؤهم معلمين وانا لم احصل عليها صبرت وكانت النتيجة احلي بمجموع اعلي وربنا عوضني

اشكرك

وربنا يبعدنا عنهم وعن اهل الاوسطاء والوسطي

[ميدو العثل]

أسيل العثل

موضوع الواسطه موضوع حقيقي
ومافيش اي حد بالعالم الا والواسطه لها معه حكايه
ولو قلنا عن الوسطى حكايات مش هايكفينا المنتدى ولا المنتدي اللي جنبنا في الشرح والتمحيص
فالواسطه اصبحت غاية كل انسان سواء على قدر المسئوليه او لم يكون في يوم على قدرها
فهناك في التعليم من يكون مجاميعهم عاليه جدا وعلشان الواسطى يتم زحزحته ليحل محله صاحب المجموع القليل
وايضا بالعمل يكون هناك اختبارات واختيارات وصحيان بدري لحضور تلك الاختبارات ووضع الامال لشغل الوظيفة التي ستنجده عن مد يده للسؤال وكي يطعم اولاده او على الاقل يكون نفسه ونجد الواسطة بقدرة قادر تزحزه من مكانه ويحل محله انسان غبي لايفقه باصول الشغله اي شئ
فالواسطه اصبحت نافع ومنتفع والعجيب والغريب ان الواسطه اصبحت تتبادل مثل النقود بين الناس فانااليوم عملت ليك واسطه مجانيه فلابد من ان تقوم انت غدا بعمل واسطه مجانيه مثلها ومن هنا تجد ان الواسطه دين وهم وغم وكرب لايمكن ان تزحزحه عن كاهلك طول حياتك
واذكر ان احد الاشخاص تقدم لاحد المسئولين كي يتوسط له بعمل باحدى الوزارات المهمه والتي تمنح رواتب كبيره مع حوافز ودفع للمسئول 40.000 جنيه تخيلوا المبلغ المشكله ان صاحبنا جاب المبلغ من بيع قطعة ارض كان ابوه بيزرعها وياكل منها اخواته وامه وحاطتت عليها امل انها هاتستر بناته أي اخوات صاحب الوظيفه الذي تقدم لها بالواسطه
وبعد ان شغل الوظيفة غلط المسكين وذكر لزميل له انه تعين عن طريق واسطه دفع لها مبلغ 40.000 جنيه .. وعلم المسئول بالقصه فدعى المسكين لمكتبه وقال له هذا ايصال بمبلغ 40.000 جنيه التي دفعتها لي لكي تعمل فقد تم تسديدها للحزب كتبرع منك ، اما عن شغلك فانت اصبحت مفصول
وبالطبع فالمسكين اصبح من غير عمل ومن غير الـ 40.000 جنيه ومن غير الأرض

تحياتي بكل ود

[حَرفُُ هجآءّ]

اقتباسالمشاركة الأصلية كتبت بواسطة اميره الحب والعذابهههههههههههههههه
القصيده تحفه
بصي يا قمر هو ده حال البلد طبعا في الوسطه الاولي وهي انك تعرفي حد
والوسطه التانيه (كل سنه وانتم طيبين)يعني 10 جنيه في جيب الموظف
والا مش هتعملي اي حاجه في الزمن ده وهتفضلي يقلولك فوتي علينا بكره
وطبعا اهم وسطه بقي لو كنتي بنت وذي القمر وماشيه بتدلعي ساعتها هتلاقي الكرسي وكبايه الشاي كمان
والموضوع يخلص قبل متكمليها
طبعا العيب فينا بقينا بنستسهل كل حاجه وعايزيم كل حاجه واحنا مكنا ومش عايزين نتعب
كل واحد ليه وسطه في مكان لو رفضها هتلاقي ان الوسطه انتهت تماما
بس كل واحد عايز كل حاجه سهله
عارفه لو رفضنا هنتغير بس مش هينفع انا ونتي وتلاته واربعه هنبقي ذي الي بينفع في قربه مقطوعه
لازم كلنا نتغير
تسلمي يا قمرايه
اميره العذاب

نورتى يامى
بصى انتى عندك حق طبعا
مش واحد ولا اتنين
لازم يكون الكل
بس فين الضمير بقى غايب
كل واحد بيحلل لنفسه اللى بيعمله مهما كان غلط

[حَرفُُ هجآءّ]

اقتباسالمشاركة الأصلية كتبت بواسطة عاشقة الهدوءالسلام عليكم اختى ورحمة الله وبركاتوا

شوفى ياحببتى دلوقتى انتى بتتكلمى فى زمن لا تعليق عليه
حطى بقه خط احمر تحت كلمة لا تعليق يعنى دى حاجه مش جديده


فى زمن كلوا كده كلو ماشى بالواسطه والكوسه ويابخت بقه الى ليه


واسطه فى الزمن ده احنا بقه ياحببتى وسطتنا ربنا سبحانه وتعالى


تسلمى حببتى على موضوعك المتميز

الحمد لله احسن من اى واسطه
ميرسى على كلامك الذى لا غبار عليه