تلخيص بعض حلقات برنامج *@* لماذا محمـــد ؟؟ *@* الدكتور حازم شومان

[Liverpool 1892]

الحلقة الحادية عشر
**@** عام الحزن **@**
(و ثبت رسول الله ساجدا)



يبدأ عام الحزن...و أول الأحزان موت أبو طالب عم الرسول اللى اتربي في حضنه من وهو عنده 8 سنين...نصير رسول الله

يخرج ابو طالب من الشعب وهو عنده 80 سنة...محطم صحيا...آخر 3 سنين فيهم أكل ورق الشجر...و بعد 6 شهور خروج من الشعب يموت ابو طالب..

ليه ربنا يخلى أبو طالب يموت دلوقتي؟؟

لو كان أبو طالب فضل لحد ما النبي إنتصر, كان الناس قالوا إن النبي إنتصر بسلطان بشر!!...إنما النبي ما ينفعش ينتصر إلا بسلطان الله..


ليه يموت ابو طالب و خديجة دلوقتي يارب؟؟ خديجة كانت سنده جوه البيت و ابو طالب كان سنده بره البيت؟؟

عشان ما يبقاش ليه سند غيرك يارب..عشان ما يبقاش في قلبه غيرك...عشان التمكين خلاص قرب يا محمــد بن عبد الله..

* * * *

الرسول يسمع إن أبو طالب بيموت يروحله ويقوله : "يا عمّاه قل لا إله إلا الله, كلمة اشفع لك بها عند الله يوم القيامة"
و النبي خلاص قلبه هيتفطر...

يقوله: لولا أن تعيرني قريش لأقررت بها عينك!!

يُعيرك قومك؟؟؟ هتدفن تحت التراب يولع بيك قبرك وتقول تـُعيرك قريش!!! قريش هتنفعك بإيه؟؟؟


يجي أبو جهل بسرعة و يجي صناديد قريش أول ما يسمعوا إنه بيموت و الرسول عنده, يقولوله: مت على ملة عبد المطلب...مرعوبين أحسن أبو طالب لو أسلم بني هاشم كلهم هيسلموا!!....و آخر كلمة يقولها: بل على ملة عبد المطلب!!

و يموت كافر...ده قدر من عند الله...اللى يملك القلوب ربنا مش محمـد...محمد عبد, لايملك القلوب..

إزاى أبو طالب يموت كافر؟؟ بعدما حمى النبي الحماية الرهيبة دى و نصره بماله و مركزه؟؟؟
عارفين ليه؟؟

أول حاجة عشان كلمة : "لولا أن تـُعيرني قريش"!!

الناس...الناس هتعملك إيه؟؟..ياما ناس ضاع دينها بسبب منظري و إعتباري ووجاهتى و مركزي!!

تاني حاجة بسبب ابو جهل اللى كان صاحبه...الصحبة السوء ضيعت أبو طالب...الصحبة السوء خلت مصير أبو طالب في الآخرة في بركة نار في جهنم تغلى منها دماغه...يسيل مخه على رجليه و العياذ بالله...خلته يلبس نعلين من نار في جهنم..

عشان الناس تعرف إن الصحبة السوء يا جماعة دى قضية مصير...اصحابك دي قضية مصير...دى قضية جنة أو نار...دي قضية إنتى عايزة ربنا ولا مش عايزة ربنا...

أبو طالب يضيع و يدمر مصيره بسبب صحبة السوء و الناس هتقول عليا إيه!!!

* * * *
يموت ابو طالب عميد بني هاشم و تطلع مخالب قريش و تتحول قريش لوحش رهيب مع رسول الله صلى الله عليه و سلم..

و يصدر قرار بطرد فوري لمحمد بن عبد الله من مكة....طب اروح بيتي أجيب دابة...لأ...طب يجيب أكل من بيته....لأ....طب يجيب مال من بيته...لأ

في عز الأحزان وفي عز موت الأحبة...

و يطلع الرسول...

و يطلع الرسول في رحلة من الرحلات التاريخية...في صحبة شمس الصحراء الحارقة وهو رايح وهو جاى....يطلع رسول الله 90 كيلو متر لحد الطائف تانى بلد في المركز بعد مكة...لوحده معهوش غير زيد بن حارثة...

يطلع النبي في شوال و خديجة لسه ميتة في رمضان...مافيش تراجع...مافيش إستسلام...مافيش توقف لأى سبب من الأسباب...

و يطلع على الطائف...متخيلين الآلام اللى كانت في طريق الطائف؟؟؟....آلالام جسمه وهو لوحده...و الجوع....و العطش...و الحر الرهيب...الآلام النفسية وهو مطرود من بيت الله الحرام...

وهو ماشي كل قبيلة يقابلها يدعوها إلى الله...وهو في الحالة دى عنده قدرة إن يتكلم لسه عن ربنا و يدعو إلى الله!!! الله أكبر!!!

يا فخرنا إنك رسولنـــــــــا

ولا قبيلة وافقت....ترفض...يدعو اللى بعدها...ترفض....يدعو اللى بعدها!!

ده انت لو كلمة واحد في الدين كلمة و كسفك تقعد طول اليوم مش قادر تشوف قدامك!!

الرسول أخيرا يوصل الطائف...و أول ما يوصل يروح للرؤساء بتوعهم و يبدأ يكلمهم...أول رئيس من رؤسائهم يقوله : أما وجد الله غيرك ليرسله!!!

يروح لواحد تانى يقوله: انا ما أكلمكش اصلا...إن كنت نبيا فأنت أعظم من أن أكلمك...و إن كنت كاذبا فأنت اقل من أن أكلمك!!!

9 أيام يلف على بيت بيت ...على نادي نادي...على مكان مكان...

و بعد 9 أيام يلموا الأطفال و الشباب السفيه و العبيد و يجروا ورا الرسول عليه الصلاة و السلام في مشهد يخلده التاريخ...بيحدفوه بالحجارة و يرضخوه بالطوب...و كل اللى على قلب النبي (يَا لَيْتَ قَوْمِي يَعْلَمُونَ)

و يزيد الألم...

* * * *
و ربنا يحنن عبد من العبيد في الطريق بتاع الطائف اسمه عداس يجيب للنبي قطف عنب و يقعده تحت الشجرة....النبي يجي ياكل يثني على الله ويقول بسم الله...

عداس يقوله : هذا الكلام لم اسمعه هنا ...فيقوله : "من أين أنت؟؟؟"

يقوله : من نينوى.

يقوله : "بلد أخي يونس"؟؟؟

يقوله: ما أعرفك بيونس؟؟؟

يقوله: "إنه نبي و أنا نبي"..

يقوله: أنت نبي!!..و ينكب عداس على رجل رسول الله صلى الله عليه وسلم يبوس في رجليه!!

رجليه النبي اللى مليانة دم من الرضخ بالحجارة!!...لما النبي يستحمل ضرب رجليه بالحجارة عشان الدعوة...ربنا يبعتله اللى يبوس رجليه!!


الرسول دلوقتي يا جماعة في أشد موقف مر عليه في حياته...

يرجع ماهوش عارف يدخل مكة...مطرود منا هنا...و مطرود من هنا..



لمتابعة باقي الحلقة

[Liverpool 1892]

الحلقة الثانية عشر
**@** فإنك بأعيننا**@**
( رحلة الإسراء و المعراج)



الليلة مع رحلة الأفراح..

الليلة مع جايزة ربنا لرسول الله بعد رحلة الطائف..

اطلع يا حبيب الله لو كل البشر آذوك...شوف ملايكة السماوات هيفرحوا بيك قد إيه؟؟

اطلع يا حبيب الله شوف مُلك أمتك في الآخرة...شوف جنتك...شوف نهر الكوثر اللى هتسقي منه أمتك..

اطلع يا رسول الله لو في الدنيا مش عارفين مقامك...شوف اللى في السما عارفين مقامك إزاى..

و تبدأ التاريخية.....للعرش..

تبدأ الرحلة و النبي نايم في الحرم المكي...في عز عام الحزن....ينزل جبريل من فوق سبع سماوات على النبي في الحرم يشق صدره و يطلع قلبه يغسله بميه زمزم....ليه؟؟؟

لأنه هيطلع أعظم عبادة...المناجاة...مافيش بينه و بين الله إلا حجاب النور...عشان يستعد للطلوع في رحلة المعراج..عشان قلبه يستحمل اللى هيشوفه..


جبريل يجيبله البُراق عشان النبي يركبه...مخلوق يا جماعة خطوة رجله مد البصر...من البرق سرعته رهيبة!!

عشان تعرفي ربنا يقدر يحل مشاكل حياتك كلها في سرعة قد إيه؟؟؟

دلوقتي يا رسول الله هتطلع في السما..لكن الأول سيدنا جبريل ياخد النبي عليه الصلاة و السلم في رحلة الإسراء الأول للمسجد الأقصى..

يا جماعة هما رحلتين...رحلة من المسجد الحرام للمسجد الأقصى هدفها " إمامة الرسول في الأرض"...و رحلة من المسجد الأقصى لعرش الله هدفها " إمامة الرسول في السماء"..

ليه يارب المسجد الأقصى تودي النبي ليه؟؟؟

عشان ربنا يحمل الأمانة في رقبتنا..أمانة فلسطين و القدس في رقبتنا..

ليه يارب المعراج للعرش يكون من المسجد الأقصى؟؟

عشان ربنا يعرفنا قيمة القدس اللى احنا مفرطين فيها..قيمة فلسطين..

* * * *

النبي يركب البراق يروح للمسجد الأقصى, يربط البراق قبل ما يدخل!!...يربطه ليه هو هيهرب يا رسول الله؟؟؟

الرسول قمة الربانية و قمة الواقعية

و بعد كدة يصطف الأنبياء كلهم يا جماعة...مين اللى هيطلع يصلى بيهم إمام؟؟

جبريل يقول للرسول : تقدم يا محمـــد!!


الرسول يُذهل...أنا أؤم دول؟؟؟...أنا أؤم إبراهيم خليل الرحمن اللى ربنا خلى النار برد وسلام عليه..إزاى؟؟؟
أؤم عيسى كلمة الله اللى ربنا أحيا له الموتى ...إزاى؟؟
أؤم موسى اللى ربنا شقله البحر..كليم الله...إزاى؟؟
أؤم أعظم ملائكة السماوات...إزاى؟؟


و بعد ما خلص صلاة بيلتفت وراه... "فإذا النبيون أجمعون يصلون معي"...هو إيه اللى حصل ده؟؟

اللى حصل ده هو تسليم قيادة البشرية من الأنبياء جميعا لرسول الله...كل نبي سلم أمته للرسول...و الرسول سلم الأمم في رقبتنا يا جماعة...الأرض في رقبتنا ....عملنا إيه؟؟

يخلص الرسول الصلاة يفاجئ إن في ملك جاى يسلم عليه....الملك ده مين؟؟؟....ده مالك خازن النار!!

طب و إشمعنى خازن الله؟؟؟....لإن الرحلة دى تفريح لقلب الرسول عليه الصلاة و السلام...خازن النار لما يسلم على حد يبقى هيسلم منه...يبقى سلامة من عذاب الله و من النار يا رسول الله

* * * *
الرسول قبل ما يطلع السما جبريل ورّاه في المقابر بتاعت الناس مشاهد رهيبة...

شاف سيدنا موسى بيصلي في قبره يا جماعة...الرسول انبهر بقلب موسى..إيه الشوق لربنا ده؟؟

الرسول يشوف ناس في قبورهم ضوافرهم من نحاس...قاعدين يخمشوا وجههم و صدورهم..بيلطموا...بيقطعوا لحمهم!!
دول مين يا جبريل؟؟
هؤلاء الذين يأكلون لحوم الناس و يقعون في اعراضهم..

يا اللي الغيبة على لسانك دايما...اتقوا الله!!...هتقطعوا لحمكم تحت التراب..

الرسول عليه الصلاة و السلام يشوف ناس يتجبلهم مقاريض من نار...يتقرض بيها شفاههم و ألسنتهم..
دول مين؟؟

دول خطباء من أمتك يأمرون بالمعروف ولا يأتوه...كلمنجية...بتوع كلام!! مش بتوع تنفيذ!!

الرسول عليه الصلاة و السلام يشم ريحة رهيبة...الريحة دي إيه؟؟ قبر تحتنا؟؟

لا ده قبر في مصر...ده ريحة قبر ماشطة بنت فرعون و أولادها...

الماشطة اللى لما فرعون عرف إنها آمنت بالله أيام موسى..جبها هي و عيالها وجاب برميل زيت مغلي موقد عليه النار...هترجعي ولا لأ؟؟....قالتله "ربي وربك الله"...قام راميلها أول عيل من عيالها وهو بيجروه من إيديها...وقدام عينيها يحطوه في الزيت المغلي يرموا ابنها يدوب لحمه قدام عينيها...ياخدوا التاني...ها؟؟....."ربي و ربك الله".....و التالت و الرابع....لحد الطفل الرضيع...هترجعي ولا لأ؟؟.....ابنها محطوط على الزيت المغلى ...واقفة مش قادرة...ربنا يسيبها معقولة!!!

معقولة يارب هتسيبها بعد التضحية دى؟؟؟

يـُنطق الغلام يقولها: يا أماه اصبري...إنك على الحق..

و يترمى الغلام و تترمى الماشطة....و يتجمع عظمهم في كيس واحد من فرعون...يدفنوا في حتة في مصر الله اعلم بيها...

يشم الرسول النهاردة ريحة الماشطة ليه؟؟؟

لسه حزين على سمية يا رسول الله اللى قتلها أبو جهل؟؟....لسه حزين على ياسر اللى إتقتل من غير دية...لسه حزين على شهداء الإسلام يا رسول الله؟؟؟

* * * *
يا رسول الله يلا...المعراج هيبدأ...رحلة السماوات هتبدأ يا جماعة...

اركب البـُراق يا رسول الله...

[Liverpool 1892]

الحلقة الثالثة عشر
**@** من يبايع رسول الله**@**
( بيعة العقبة)




ينزل النبي عليه الصلاة و السلام من رحلة المعراج...بعد ما شاف عبادة الملايكة في السماوات...وكل همه إن أمته تعبد الله في الأرض كما تعبده ملائكة السماء...

ينزل النبي بعدما شاف الجنة...و كل همه ماحدش من أمته يتحرم من الجنة....ينزل النبي بعدما شاف حجاب النور...و كل همه إن أمته يتكشف لها حجاب النور و تنظر لوجه الله سبحانه و تعالى..

ينزل النبي وكل همه في الـ 3 سنين الجايين دول إنه يلاقي حد ينصر الدين...

من يبايع رسول الله؟؟

الدعوة وقفت خلاص يا جماعة...ماحدش راضي يخش الإسلام...و ماحدش راضي يسمع عن الإسلام.... و التشويه الإعلامي ضد النبي و الصحابة بقى رهيب في جزيرة العرب...

لو انت مكان الصحابة و القبائل سنة 11 مكية في عز الأزمة....هترضى تبايع رسول الله؟؟؟؟

يا أمة محمد من يبايع رسول الله إنه يعيش حياته عشان قضية فلسطين؟؟؟

من يبايع رسول الله إنه يموت شهيد على اعتاب الأقصى بإذن الله؟؟

من تبايع رسول الله إنها تربي أولادها يطلعوا زى الصحابة؟؟؟

من يبايع رسول الله إنه يسخر مواهبه و طاقاته و حياته لنصرة دين الله؟؟؟

يبذل الرسول مجهود رهيب في (منى) في مواسم الحج بتاعة الجاهلية...و العرب كلهم موجودين....النبي كان آخر واحد بيسيب (منى) يا جماعة بعدما كل الناس تمشي و كل الناس تعزل

النبي لما مايلاقيش حد يكلمه....خلاص يمشي صلى الله عليه و سلم


أبو لهب يا جماعة كام بيمشي ورا النبي في كل مكان...وكان عنده 65 سنة و مع ذلك هيموت عشان النبي ما ينتصرش...أبو لهب يا جماعة بذل مجهود قاتل...كان هو و ابو جهل بيبدلوا نبطشيات في اسواق (منى) عشان النبي ما يبقاش ساعة لوحده يدعو الناس وهما مش موجودين...

حاسين إن الإسلام لو طلع وجودهم هينتهي تماما!!

واحد يقول رأيت رسول الله في (منى) يمر على قبيلة قبيلة وهو يقول: "قولوا لا إله إلا الله تفلحوا"...فمنهم من حثا على رأسه التراب...و منهم من بصق في وجهه...و منهم من سبه سبا شديدا...حتى انتصف النهار..

و الرسول مكمل ما بيقفش...و تنزل سورة يوسف اللى إتظلم من القريب قبل الغريب...اللى اتظلم من إخواته زي النبي ما اتظلم من أعمامه..و بعد كدة ربنا مكـّن ليه!!

* * * *

وبعد كدة ندخل في مرحلة خطيرة جدااا...العرض على القبائل...النبي دلوقتي يا جماعة هيلف على 26 قبيلة...النبي يبذل مجهود رهيب...يروح لبني حنيفة عشان ينصروه و يبايعوه....يردوا عليه أقبح رد رده العرب!!

يروح لقبيلة عشان يبايعوه...رئيس القبيلة ينزغ الدابة بتاعة النبي...يقع النبي على الأرض عليه الصلاة و السلام يتلوى من الألم و الكفار واقفين يضحكو حواليه...

أكتر حاجة باهره الواحد في النبي...إن النبي ما وقفش...ماكانش في حاجة بتوقفه...مشاكل أو إعاقات منزلية...

و تنزل سورة النحل...اللى من اسمها عن النحل اللى بيلف على ألف زهرة عشان يجيب معلقة عسل صغيرة...أوعى يا محمـــد تبطل...طوف على ألف قبيلة...أوعى تنام....لف على الدنيا كلها عشان توصلهم الشفاء...توصلهم الشرع...توصلهم الدين و الإيمان و القرآن...

الكل رفضك يا رسول الله ليه؟؟؟...مش عشان مش مقتنعين عشان خايفين...إحنا مش قد ابو جهل و ابو لهب...إحنا مالنا بالمشاكل و إحنا مالنا بوجع القلب!!

كل القبائل دى ندمت بعد كده!!!...كل القبئل دى يا رسول الله هتجيلك في عام الوفود بعد فتح مكة...عشان تـُسلم على إيديك..

* * * * *

في آخر يوم في (منى) وخلاص الناس بتمشي....النبي عليه الصلاة و السلام يلاقي ستة شباب واقفين اكبر واحد فيهم عنده 21 سنة....آخر يوم في منى و الناس بتعزل و الناس بتمشي خلاص....ما تيأسوش يا أمة محمـــد ما تعرفوش الفرج هيجي إمتى!!

الرسول يبدأ يكلمهم...أول مرة يشوف الإنطباع اللى على وجههم ده...أول مرة يشوف الإشراق اللى على وجوههم لما سمعوا....النبي يحس إن دول فيهم أمل!!

6 من المدينة المنورة....فما قاموا إلا وقد اسلموا و بايعوا رسول الله...

أخيرا يا جماعة جات اللحظة اللى النبي بقاله 13 سنة بيدور عليها..



لمتابعة باقي الحلقة

[Liverpool 1892]

الحلقة الرابعة عشر
**@** رحلة الهجرة**@**




تبدأ أحداث الهجرة العظيمة...بصدور الأمر للصحابة كلهم إلا النبي عليه الصلاة و السلام....إنهم يسيبوا المال و الأهل و الوطن و البيوت و البلد و يطلعوا على المدينة المنورة...

الصحابة هاجروا واحد واحد مش مجموعات...لإن من خطورة الهجرة ماكنش مفروض حد يعرف يا جماعة إن الصحابة هيهاجروا...

أول واحد هاجر كان أبو سلمة...خد مراته أم سلمة و ابنهم وطلعوا...و هما طالعين إكتشفتهم الأرصاد بتاعة مكة...طلع قومه و قومها...قالوله إنت رايح فين؟؟؟ واخد بنتنا و رايح فين؟؟؟

هات مراته دى بنتنا...شدوا منه مراته...قام أهله غاروا إزاى ياخدوا ابنهم...هاتوا سلمة ابننا...فضلوا يشدوا الطفل قصاد بعض لغاية ما كتافه إتخلعت قدامهم...

و ينطلق أبو سلمة يهاجر لرسول الله صلى الله عليه و سلم!!!...و الطفل مع قوم ابوه بيصرخ من إنخلاع كتفيه...و الأم قلبها مخلوع على جوزها وعلى ابنها!!

و تفضل أم سلمة تحت تأثير هذا التمزق الأسري في سبيل الله...تطلع كل يوم لحد المساء تعيط و تبكي بكاء مرير على جوزها و على ابنها لحد ما يرحموها و يدوها ابنها...و تطلع تهاجر لربنا لوحدها..

وهي في الطريق للتنعيم يشوفها عثمان بن طلحة وهو لسه مشرك....ياخدها يوصلها لغاية مدينة رسول الله!!...ألف كيلو متر عشان الأخلاق....عشان المرؤة..

و ممكن الواحد دلوقتي يبقى معاه عربيته و ماشي ...يشوف إخوانه و يشوف المسلمين واقفين على المحطات مش لاقين مواصلات...مايفكرش يوصل واحد!!

* * * *

انت سيبت إيه عشان ربنا؟؟؟ ضحيت بإيه عشان ربنا؟؟؟

الصحابة في الهجرة ضربوا امثلة من البطولات ماحصلش حتى في الغزوات يا جماعة...

مكة كانت هتجنن...قريش كانت هتجنن..نعملهم إيه؟؟ نمنعهم إزاى؟؟؟ نقف في وشهم إزاى؟؟؟

يبدأ الرعب القاتل يملى قلوبهم..الصحابة هاجروا...و محمــد لو هاجر بعدهم هتبقى كارثة...محمــد لو هاجر و اتلموا في المدينة هتبقى مصيبة....عمرهم ما هيسيبونا ولا هينسوا اللى عملناه فيهم...


و يجتمع المشركين في دار الندوة...و يقرروا لازن نتصرف مع محمد؟؟؟ نعمل إيه؟؟؟

واحد يقول : إحنا من كل قبيلة نجيب شاب راجل من اشرافهم و يكون قوى و معاه سيفه و يحاصروا بيت محمد و يهجموا عليه وهو خارج...يقتلوه و يدبحوه و يقطعوه...عليه الصلاة و السلام

يجوا يقولوا الدية!!...هيبقى الدم اتفرق بين القبائل...فهيحاربوا مين!! و بني هاشم هيقفوا في وش مين!!!

و التنفيذ الليلة...

و ينزل جبريل على الرسول صلى الله عليه و سلم....يأذن له بالهجرة من الله...وفي مخطط لقتلك!!

الموضوع بقى معركة وقت...الدقيقة بقت تساوي حياة أو موت دلوقتي يا جماعة...يا ترى النبي هيعمل إيه؟؟؟

أول حاجة يعملها الحبيب رسول الله يقوم طالع على الكعبة يفضل يطوف حواليها و يبكي عليه الصلاة و السلام....الرسول عارف إنها آخر مرة هيشوف فيها الكعبة...آخر مرة هيمكث في مكة ...ليه؟؟

لأنه عاهد الأنصار إنه هيعيش معاهم..

و إنتى بتطوفي حوالين الكعبة افتكري....إن تمن طوافك حواليها كان حرمان النبي منها...

* * * *

تبدأ الرحلة الرهيبة...تبدأ رحلة المطاردة...

اول حاجة يخرجوا من الباب الخلفي لبيت ابو بكر عشان الرقابة اللى على الباب الأمامى...ثاني حاجة في عز الحر الرهيب...ثالث حاجة يمشوا عكس إتجاه المدينة...من شارع اسمه أجياد دلوقتي...

و يطلع النبي عليه الصلاة و السلام مع سيدنا أبو بكر....24 ساعة متواصلة لا نوم ولا أكل ولا شرب...لازم يسبقوا قبل ما مكة تعرف...

و أول ما المشركين الصبح يكتشفوا إن رسول الله صلى الله عليه وسلم مش في مكانه...ده مش الرسول ده على بن أبي طالب!!

يجن جنونهم....محمـــد خرج من بين إيدينا إزاى؟؟؟...بعدما حصرنا البيت بتاعه بالسيوف إزاى يخرج؟؟؟....بعدما قفلنا مخارج و مداخل مكة؟؟؟

يروح يجيبوا سيدنا علىّ و يجرجروه للحرم....و يفضلوا يعذبوا فيه عشان يقول على مكان النبي...و ما يقولش!!!

و يتم تعيين مكافأة فورية 100 ناقة= مليون ونص

للى يجيب محمـــد حيا أو ميتـــا






لمتابعة باقي الحلقة

[ماتركس]

اشهد ان لاالله الا الله
اشهد ان محمد رسول الله
بارك الله فيك يا لفير بووال وجعله في ميزان حسناتك يارب

[ڪــــبرياء الروح]

اللهم صلى على محمد وعلى آله وصحبه أجمعين