ثقافه ولا سخافه

[أميرة الأحلام]

السلام عليكم ورحمة الله وبركاته

موضوع النهارده غريب شويه وهو واضح من العنوان

بس هو شئ موجود في حياتنا وبنشوفه للاسف كتير

الخلط بين الثقافه والسخافه

يعني مثلا ً نبقي بتتكلم في موضوع جاد وتلاقي صاحبنا أو صاحبتنا تستظرف دمها

نبقي قاعدين وتلاقي اللي جاي بدل ما يقول السلام عليكم يقول هاي أو بنسوار من باب الثقافه

نبقي بنتكلم لغتنا الجميله العربيه اللي المفروض نتمسك بيها وتلاقي اللي بيقطع

كلامنا ويعمل مثقف ويقول وات ( what ) أو سوري

الأمثله كثر ولكن أترك لكم نقاش الموضوع

هي فعلا ً ثقافه ولا سخافه ولحضراتكم وجهة نظر أقدرها

والسلام عليكم ورحمة الله وبركاته

بقلمي

أميرة الأحلام

*

[قلـــــــــــــــــم]

اكيد سخافة وهيافة


ربي يسلم قلبك

موضوع ممتاز

دمتِ بود وتقدير

[حياتي ذكريات]

السلام عليكم

انتي عارفة أفتكر مرة كنت قاعده مع صحباتي وجت زميلة

لينا فقالت هاي فردت عليها واحده وقالت عليكم الهاي

انا عصبت جدا والله ولا كأننا مسلمين وقمت كلمتهم ومن يومها

وهما بيقولو تحيه الاسلام .. سوري والحاجات دي قولي بقت منتشرة

جامد جدا وصعب انك تقنعي حد يقولها انا ساعات بتكلم مع ناس

والله ما بفهم منهم حاجه بيتكلمو عربي على خليط من الانجليزي

زي ما بيكونو يقسمو كلامهم جملة عربي والتاني انجليزي

تعلم الانجليزية مش غلط لكن لما تكوني مع عرب زيك فيها ايه

لما تتكلمي عربي وبعدين كمان الفرانكو اللي انتشر حاليا شجع

اكتر الناس على انهم يكتبو انجليزي دايما ويتكلمو بيها

اللغه العربية لغه القرآن ولازم الكل يفتخر بيها مش يخليها على جنب

تسلمي على طرحك يا أميرة .. كل الشكر ليكي يا قمر .. خالص تحياتي

[ماتركس]

السلام عليكم ياا اميره الاحلام
تسلم ايدك علي مووضوعك بجد
عارفه ياا اميره ذكرتيني في يووم كنت عامل موضوع زي ده
ودخلت عضووه عارفه قالت ايه والله مكنتش مصدق اني في نااس كده
قالت ايه الموضوع ده عادي خالص ده حريه اني اقووال هااي ومشهااي
شووفتي خلاص النااس مبقاش عندهاا مباادي للدين الاسلامي
نسيوو والتهوو في الدنيااا
بس نصر ربناا قريب
والله تحيه الاسلام افضل من اي شي
وتسلم ايدك ياا اميره بصراحه موضوع في وقته

[elmoshaxa]

الموضوع فعلا يستحق النقااش يا ااميره
بس انا من رايى ان ال بيحطوا كلمه عربى على كلمه انجلش دى
الهدف مش انه يعنى اللغه العربيه على جمب ممكن يكونوا عاوزين يبقوا ناس هاى يعنى
اهه حاجه جديده وخلاص
ولا انا غلطاانه؟؟

[تانيا]

يا جماااعه سيبوهم يقولو اللي يقولوله
بجد لو يعرفوا الغرب ازااى بيعتزوا بلغتهم وبيحبوهااااا مكانوش يفكروا يعملوا كده
وبعدين فعلا انا بيستفزنى جدااااا لما حد بيبقى عامل موضوع للنقاش وتلاقى ناس داخله تهرج
منتهى الاستظراف والسخافه

[ra7a]

موضوعك مميز اكيد انا بتخنق لما يكون الموضوع جدى ومهم ويجى يقعد يستظرف دمه
ويقعد يهزر حاجة مزعجة جدا
تقبلوا مرورى

[βзήŦ ℓǻẑĨήǻ]

اه طبعا عندك حق كتير اوي مننا بيقع
في الغلط ده وبيقول انجليزي في معظم كلامه
لان لغتنا العربية جميله جدا وكفاية انها لغة القرأن الكريم
وموضوع الانجليزي ده بيختلف من شخص لشخص
يعني فيه ناس بتتمنظر كده بالانجليزي
وفيه ناس اتعودت عليه غصب عنها
وفيه ناس بتضطر ترد علي اللي بيكلمها بالانجليزي بانجليزي زيه
وكده
وموضوع التهريج بئي والاستظراف في المواضيع الجاده
دي بتبئا حاجه تخنق واخر هيافه
معلش طولت عليكي
موضوع جميل اوي ومميز

[kota 96]

بصي مقدرش أقول ثقافة أو سخافة
لأن في ناس بيقولوا كده لأنهم أصلا من مدارس لغات أو عاشوا بره كتير فبيكون كلامهم ملخبط انجلش على عربي كتير فمقدرش اقول سخافة لأنهم غصب عنهم بيتكلموا كده
أما بأه لو واحد حافظ كلمتين وفي كل مكان يقولهم على اساس انه مثقف يعني دي اللي يتقال عليها سخافة مش ثقافة

[محمد الشريف]

اللغة العربية هى أصلنا وتراثنا وثقافتنا الأم وهى لغة القرآن الكريم

وليس غريب أن نتعلم ثقافات إلى جوار ثقافاتنا ولكن العيب فى الفرنجة

التى تغلب على ثفافاتنا من قبيل التباهى فما ليس له خير فى لغته ليس

له خير فى غيرها ولو تعاظم مستواه فيها فنبينا صلى الله وعليه وسلم

عربى ووطننا عربى وعادتنا وتقاليدنا الأصيلة عربية ولن نقبل بغير المحافظة

على أصلنا وهويتنا العربية ، حتى منتدانا وهو عربى نلاحظ التباهى فيه بذكر

التوقيعات غير العربية وعلى قولة أحد الأخوة المشاركين فى هذا الموضوع

أن الأجانب أنفسهم غيورين على لغتهم فلا يستبدولونها بغيرها وتلك سمة فيهم

تميزهم مقارنة بنا فى الافراط فى لغتنا .

ولا حول ولا قوة إلا بالله

مع تقديرى للموضوع