شرح صحيح البخاري ـ المجلس الأول

[هشام الريدي]

كم كانت سعادتي أن أجد مشاركة تطلب البدء في هذا الموضوع
أن أجد شباب يبحث عن مثل هذه الموضوعات
على العموم هي بداية مشرقة إن شاء الله..
أنا هحاول إن شاء الله اتكلم بلغة عامية علشان الناس كلها تتواصل معانا..
هحاول أبسط الموضوع على قدر استطاعتي إن شاء الله..
والمهم جدا إن احنا نحاول نتعلم دروس لنطبقها في حياتنا..
نحول الكلام إلى فعل.. لأن اللي بينقصنا فعلا كمسلمين هو أن نطبق الإسلام..
بسم الله نبدأ..
مين هو البخاري ده اللي بنسمع عنه كتيير
البخاري اسمه محمد.. وأبوه اسمه إسماعيل.. وجده اسمه إبراهيم وجد جده اسمه المغيرة
يعني لو عملناله بطاقة هنكتب في خانة الاسم
محمد إسماعيل إبراهيم المغيرة
كان أبوه "إسماعيل" من العلماء اللي العلم عندهم مش مجرد ثقافة.. ومعرفة.. ودكتوراه
مكنش مجرد راجل مثقف في عصره..
لا .. لا .. كان من العلماء اللي بيخافوا انهم يعصو ربنا في أقل شيء.. بيسموهم الورعين..
يعني هو كان عالم ورع..
بيطبق كل معلومة اتعلمها في حياته.. بسموهم العاملين
يعني هو كان عالم ورع.. عامل.. تقي
كان يبعد نفسه قدر الإمكان عن الشبهات رغم انه كان من أثرياء عصره..
بص معايا في الموقف ده وقلي ممكن تتعلم منه ايه:
دخل عليه عالم من علماء عصره في وقت موته.. بيقول أحمد بن حفص: (دخلت على إسماعيل عند موته فقال: "لا أعلم في جميع مالي درهما من شبهة").
وبعدين يكمل أحمد بن حفص ويقول : "

فتصاغرت إلي نفسي

".
أخي .. أختي.. محمد بن إسماعيل أبوه أطعمه طعام حلال.. فبارك الله له في علمه.
فإن كنت مسئول عن أسرة.. تعلم من هذا الدرس
إذا كنت عايز ابنك أو بنتك تطلع ذات علم.. فاحرص على إطعامهم كما أطعم إسماعيل ابنه.. حلال ليس فيه شبهة
يعنى ايه مفيهوش شبهة..
يعني لو حسيت للحظة ان مكسبك ده ممكن يكون فيه مليم حرام يبقى ده مكسب فيه شبهة.
هو ده الدرس اللي انا حابب إن احنا نتعلمه النهارده
حاول ان يكون مكسبك حلال بنسبة 100%
يا ريت أسمع آراءكم في المجلس ده
وعلى أساس آراءكم إن شاء الله هكمل
وعلى فكره أنا بحب جدا النقد.. انقد زي ما انت عايز
لأن ده هيفيدني شخصيا
وإلى اللقاء في المجلس القادم إن شاء الله
سبحانك اللهم وبحمدك نشهد أن لا إله إلا أنت نستغفرك ونتوب إليك
هشام الريدي

[game010]

اكيد عندك حق لان ما بنيا على باطل فهو باطل

فى انتظار المذيد..

[حَرفُُ هجآءّ]

السلام عليكم

المكسب الحرام سبب فى عدم قبول الدعاء

وذلك لان العبد يتغذى بالحرام ولأنه يلبس الحرام ويأكل الحرام هذا جزاء من تغذى بالمحرم

اشكرك على الموضوع الرائع

جزاك اللة خير )) علي ماتقدمة يديك ولسانك وجوارحك من خير ...وكلمة طيبة ...