شرح صحيح البخاري ـ المجلس الثاني

[هشام الريدي]

استقبل منزل الحديث والتقوى والثراء العريض طفلا صغيراً.. هو محمد بن إسماعيل
وبعد فترة قصيرة توفي الأب.. توفي مصدر العطف.. وده كان التحدي الأول اللي قابل حياة البخاري..
ولكن ربنا عوضه بأم تقية عوضته عن عطف الأب وزادته بحنانها.. وتركز فيه آمالها..
حددت هدفها.. مستقبل ابنها.. فوجهته إلى الكتابة والقراءة والقرآن الكريم والحديث الشريف..
وهنا يتضح دور الأم.. الأم الواعية.. في بناء مستقبل.. ليس مستقبل طفل.. بل مستقبل علم وأمة.. علم الحديث

كتاب صحيح البخاري

.. يعتبر أول كتاب جمع فيه الأحاديث النبوية الصحيحة..
يعني لما تلاقي حديث مكتوب في البخاري متشكش فيه أبدا..
اسمعه وكأنك تسمع النبي صلى الله عليه وسلم يتكلم
على العموم هذه الأم ساهمت في بناء هذا البنيان ـ البخاري ـ
وما إن وصل البخاري إلى العاشرة يعني حوالي الصف الرابع الابتدائي عندنا كده.. حتى ظهرت عليه علامات الذكاء بصوره حيرت أساتذته ومشايخه..
كان له شيخ اسمه محمد بن سلام البيكندي يقول: "كلما دخل علي هذا الصبي تحيرت والتبس عليَّ أمر الحديث ولا أزال خائفا"
بص وشوف إزاي ذكاء البخاري كان بيخلي أساتذته يخافون منه ومن علمه..
كان له أستاذ تاني اسمه الداخلي: فقال يوماً"سفيان عن أبي الزبير عن إبراهيم النخعي" والكلام ده وهو بيشرح للتلاميذ بتوعه
يعني كان بيعلم التلاميذ إن سفيان سمع من أبي الزبير حديث وأبو الزبير سمع من إبراهيم النخعي..
فقال له البخاري وكان عنده 11 سنة يعني سنة خامسه ابتدائي: أبا الزبير لم يرو عن إبراهيم النخعي..
يعني التبس يا شيخ عليك الأمر الزبير بن عدي ولا أبا الزبير..
فنهره الداخلي الأستاذ..
فقال البخاري : ارجع يا شيخي إلى الأصل
يعني أرجو انك ترجع للمرجع الأصلي واقرأه..
فدخل الداخلي إلى خزانة الكتب الخاصة به ثم رجع فقال: طيب والصح ايه يا محمد
قال البخاري: هو الزبير بن عدي عن إبراهيم..
قال الداخلي: صدقت..
هكذا كان البخاري في طفولته
وده درس يتعلمه المعلمين.. إزاي يعطو لتلاميذهم الثقة في النقد والإضافة.. وإن ممكن المدرس يغلط.. والتلميذ يصحح له دي حاجة مش مستحيله يعني..

وبصراحه أنا مش عايز أطول عليكم
وإلى مجلس قادم إن شاء الله
يا رب متنسوش النقد اللي انا بحبه جدا وتعليقاتكم اللي هتضيف لي وللموضوع إن شاء الله
سبحانك اللهم وبحمدك أشهد أن لا إله إلا أنت أستغفرك وأتوب إليك
هشام الريدي