سلاح الاختلاط.........

[bona]

الاختلاط وما ادراك ما الاختلاط انه سم قاتل ...

انها دوامة لا تنتهي ..

انها خطوات لا تنقطع الا علي ابواب النار ..

استخدمه الشيطان سلاح فتاك

للتبرج والزنا واطلاق البصر والكذب و القتل في بعض الاحيان وفي عقوق الوالدين وإن شئت فقل هو بوابة الذنوب الاولى ...

انا مش هتكلم عن الاختلاط .. عامة لكن نكمل كلامنا عن المواصلات ...

المواصلات ما يحدث فيها ليس اختلاط فحسب ولكنه ان شئت قل إنتهاك للحرمات وبيع للاجساد بثمن بخس ألا وهو 50 قرش .. او ربع جنيه ....

هذا ما اقوله عن واقع نعيشه ...

الواحد دلوقتي ممكن جسمه يكون لاصق في جسم بنت أخرى فقط ب 50 قرش .. يابلاش

واعلم من مرضى النفوس الذين تأخر عليهم سن الزواج من لا هم لهم ولا شغله ولا مشغله غير انه يلف في المواصلات هو اصلا مش رايح في حته لكنه بنص جنيه ولا بجنيه ياخدله دورين تلاته .. جنب النساء ..

الله المستعان .. ( ووالله لا اتكلم عن توقع فانا اعرف من الناس من يفعل هذا )

حديثي اولاً موجه للنساء ثم للرجال ثم للاخوات الملتزمات ...

فنبدء ببسم الله إلتقاط بعض المشاهد ونذكر بأذن الله وتوفيقه بعض الحلول ثم نسمع من الاخوه الافاضل الحلول المقترحه ..

موضوع النساء والرجال في المواصلات ده طامه كبيره سواء بقصد او بغير قصد ..

بقصد يعني : الانسان اصلا منكوس الفطره يبقي قاعد جنب فتاه .. وميبعدش نفسه عنها ولكنه مستمتع بمعصيته هذه ... وساعات بتكون البنت نفسها عادي مش فارق معاه وراضيه بما يحدث ايضاً بقصدها او بمعني اصح بخبثها ... ودول زي صاحبنها الي بيلف في المواصلات وهو مش رايح في حته ..


بغير قصد : يعني اصلا مش في دماغها .. بالنسبه ليها ده ضروره .. هي لا تحب ان يلمسها مخلوق ولو اقترب منها في الشارع احد ولمس شعره منها ممكن تعمل ليه فضيحه بجلاجل ..

لكن المواصلات دي ( من وجهه نظرها او نظره ) ضروره

فمفيش مشاكل انه التصق بها ... او غير ذلك مما لا يرضى به الله ..

يا جماعه الموضوع خطير وفيه انتكاس للمفاهيم .. عارفين . مش احنا نتريق علي الرجل الي ميرضاش حد يلمس مراته ولكنه يرضي بالكوافير انه يمسح شعرها ويشتغل فيه ؟؟ والرجل واقف برا يمنع حد من الرجال يدخل علي مراته ليه ؟ يقولك ممنوع دخول الرجال عشان هي مع الكوافير جوا لدرجه ان بعض الكوافيرات تمنع العريس نفسه لدخول عند زوجته عشان هي مش فاضيه اصل في واحد بيلعب في شعرها ..

الله المستعان . ده واحد منكوس الفطره والمفاهيم .


كذلك ما يحدث في المواصلات بنت لا ترضي مخلوق يلمس جسدها بل وربما تكون ملتزمه لا تصافح الرجال بيدها فسبحان الله .. تظن ان المواصلات تعتبر ضروره بالنسبه ليها ..

وهي بالفعل لا ترضي بما يحدث بس يظهر عليها تعبيرات مكتوفه الايدي ...

ليه يا اخت مكتوفه الايدي .. ؟

يقول لسان حالها ...

انا لامه نفسي علي الاخر بس الرجل ده هو الي تخين
او تقول انا اعمل ايه الكراسي صغيره ؟
او تقول انا طلعت نفسي قدام وهو المفروض يرجع ظهره ورا
تقول هو مش لامسني اوي .

نقول . يعني ايه مش لامسك اوي ؟

تقول .. يعني دي حته صغيره ..


الواحد بصراحه مش عارف يقول ايه الواحد بيشوف حاجات بيكون هاين عليه يصرخ في وسط الميكروباص

انا حديثي مش عن الولاد والبنات الي مش كويسين الي فاكر نفسه في غرفه النوم ومقضيها مع صاحبته وبعد ما تقوله يابني عيب يقولك دي خطيبتي ياعم الشيخ ..

لا لا لا انا مش بتكلم عن دول خالص انا بتكلم عن ناس مش في دماغها المعصيه .. وممكن تكون اخت او اخ ملتزمين لكنهما يظنان ان لمس جسد من لا يحل له ضروره طالما مش بقصدي او طالما دي مواصلات او طالما اصل مستعجل او طالما مفيش مكان او طالما هي راضيه ..

زي مره كنت في مواصلات وفي مكان فاضي جنبي وكانت واحده عايزه تقعد فقمت ليها قالتلي خليك ده هيكون في مكان فاضي كده .. قلت ليها لاء بلاش عشان تقعدي براحتك وفضلت انا واقف جه واحد ربنا يهديه بعد ما انا قمت وراح لازق جنبها .. فبقول ليه حضرتك ده مكاني وانا سيبته عشان هي تقعد براحتها قالي انت مالك اصلا

قلت ليه هو ايه الي مالي في حاجه اسمها دم هي مش عارفه تقعد وانت عاجبك انك قاعد جنبها كده ترضاه لمراتك ...
فقلت للست انتي راضيه انه يلزق فيكي كده .. قالتيلي يعني هعمل ايه يعني هقوله قوم ؟

قلت لا حول ولا وقوة الا بالله .. قلت ليها خلاص براحتك ..

فلاسف الناس شايفه انها بقت ضروره .. وانه عادي


مره واحده وامها جايه تقعد وفي جنبي مكانين وروحت وقفت
فالست قالتلي قعد يابني وقفت ليه قلت ليها معلش يا حجه عشان تقعدوا براحتكم قالتلي يبني اقعد احنا قاعدين كويس فالبنت بتقولها هو مش عايز يقعد ليه يا ماما قالت ليها معلش اصله شيخ .. وكاني مثلا عندي جرب عشان كده مش عايز اعديهم ...

وغيرهم واحد وبنته ( المفروض رجل ) وبنته بتاع 22 سنه والذكي لما جه يقعد هو طبعا حابب يقعد جنب الشباك فخلي بنته تقعد جنبي وهو قعد جنب الشباك فقلت ليه ممكن تخليها هي جنب الشباك .. قالي يابني دي زي اختك عادي ... قلت ليه لاء مش اختي وكانت البنت بتاع 22 سنه .. قالي بطلوا التشدد ده بقا .. روحت نزلت من العربيه خالص وكنت انا المكسوف والله ..

فالموضوع بجد خطير ولازم نلاقي ليه حلول ...

الاخت الفاضله الي مستخسره .. تدفع نص جنيه زياده وتحفظ عرضها وجسدها وانها تحجز نفرين بدل نفر واحد ؟؟ وتقعد براحتها ..

الاخ الفاضل الي شايف ان الوضع عادي انه يجلس جنب فتاه متبرجه كانت او منتقبه وهو منشكح وفاكر انها ضروره ... اذكركم بقول النبي صلي الله عليه وسلم ..

لأن يطعن في رأس أحدكم بمخيط من حديد خير لهمن أن يمس امرأة لا تحل له ( صححه الشيخ الالباني )

فيا اخوه بارك الله فيكم أعرف ان الموضوع موضوع ايمان
حتى وان كان ما بيد الحيله
حتى وان كانت هي راضيه
حتى وان كان المكان ضيق
حتى وان كان انت تخين او هي تخينه

يا جماعه بارك الله فيكم هذه الاعراض التي تنتهك في كل ثانيه في مواصلات مصر ...

ابوس ايدكم بالله هذه الاشياء تؤخر عنا النصر

اشياء ممكن نشوفها صغيره ولكنها عظيمه

قد قال النبي : فزنا العين النظر ، وزنا اللسان المنطق ، والنفس تمنى وتشتهي ،والفرج يصدقذلك أو يكذبه )صحيح البخاري )

يا اخوه مجرد النظر اليها زنا فكيف بلمسها ؟


طيب عرفنا قد ايه الموضوع خطير ..

تعالوا نشوف الحلول ..



الحل المقترح بالنسبه للبنات ..

1- اياكي ثم اياكي تركبي عربيه تكون فاضيه مفهاش غير السواق والتبًاع ( يعني الرجل الي بيلم الفلوس ) كم من حالة خطف وزنا حدثت بسبب ذلك حتى ولو انتي منتقبه دلوقتي مبقتش تفرق ناس كتير شايفين المنتقبات ( بنات مش محترمين وبيداروا ورا النقاب ) فلو سمحتي اركبي عربيه بها ركاب غيرك ويا حبذا لو نساء غيرك ..

2- هتركبي العربيه عادي لو في بنت اقعدي جنبها بيحيث يكون * جنبك ناحيه البنت وجنبك الاخر ناحية الشباك او جنب ناحية البنت والجنب الاخر في بنت بردو ...

3- بلاش تجلسي وتكوني علي الممر يعني يكون عند جنبك بنت والجنب التاني ممر يمر منه الناس اثناء الطلوع والنزول لان ده بيسبب احتكاكات سواء قاصد او غير قاصد .. وهذا من الخطء الكبير ..


4- لو المواصله فاضيه شويه وقعدتي لوحدك ومش جنبك حد ادفعي نفر واحد لقيتي حد هيطلع قولي للسواق لاء خلاص انا هدفع نفرين

خايفه من الاحراج وهمتك عاليه وخايفه علي مصلحتك اعتبري الدنيا غليت واعتبري ان كل مواصلاتك غالية الضعف وادفعي نفرين في كل مواصلاتك الا المترو طبعا .. وده ليه فايده كبيره انك هتقللي من الخروج وده يساعدك علي القرار في البيت

5- الاخت الفاضله متسمحش لحد من القاعدين ورا يخبط علي كتفها بحجة انك توصلي الاجره للسواق ( هتقولي طيب واعمل ايه في المتخلفين الي بيخبطوا علي كتفي ) ... لو عايزه الحل عشان الله يبقي متقربيش ظهرك للمسند الخلفي واطلعي قدام سنه ... بحيث انه يعطي للاقرب لايده مع العلم بفضل الله ( ان الغير ملتزمين من الرجال يستحوا انهم يخبطوا علي ظهر فتاه ) ولكن العكس صحيح للاسف

6- الاخت الفاضله الملتزمه صاحبة الدين والعفه والتي تخاف من العقوبه وترجو الثواب وترجو ان ربنا يرزقها زوج صالح زيها ... وانه يتقي الله فيها .... ولقت ان مفيش اي مفر من انها لازم تجلس جنب رجل وانها مش عارفه تدفع نفر تاني ومش عارفه تتصرف خالص ... انصحها ان تتقي الله وتقول ( علي جنب ياسطي )


طبعا ونصيحتي ... للاخوات الفضليات ان يتقوا الله في انفسهن ولا ينسين امر الله ... ولي معهن حديث بإذن الله عن استشعار عبودية القرار في البيت التي فقد كثير من الاخوات احساس ان القعاد في البيت ده طاعه مستمره بعداد حسنات شغال لا يقف ( اذا احتسبته )

اقول لهن عليكن بالعفاف قدر المستطاع ... ونقول

1- القرار في البيت
2- لو ضروري اوي انك تنزلي وخلاص مش عارفه تمسكي نفسك ( يبقي مع حد من محارمك رجل طبعا )
3- لو محدش من الذكور عندكم فاضي يبقي عليكي بإحد نساء العائله الكريمه ينزلوا معاكي

4- لو مفيش تتصلي بواحده صاحبتك ...

( بس في نقطه خطيره هنا اياكي ثم اياكي ثم اياكي انك تكوني خارجه وتتصلي بأخت قاعده في بيتها وتقطعي عنها عبادتها ( القرار ) وتجريها معاكي الي الفتن بمعني : متبقاش اخت قاعده في بيتها وانتي تتصلي بيها وتقوليلها ... بالله عليكي يا فلانه انا نازله تعالي معايه .. لاء ده غلط ... سيبيها في طاعتها ( القرار في البيت ) ....

انا اقصد شوفي اخت اصلا بتروح الكليه زيك .. وامشوا مع بعض طالما طريقكم واحد يعني اقصد واحده اصلا ربنا ابتلاها بخروجه زيك وكفي عن سحب الاخوات من بيوتهن ... للخروج ...





اما الاخوه الافاضل وياريت الاخوات بردو يعرفوا بردو بعض الاشياء دي ..

الاخ يتقي الله عز وجل ويعرف ان الي بيعمله في بنات الناس هيلاقيه في زوجته وبناته

فنقول :

1- لما توقف الميكروباس ولقيت مكان واحد جنب واحده حتى ولو سنها كبير ( بالله عليك بلاش ) تركب ولو انت بقا رجل جدع واخ من الاخر بلاش تركب وتقول انا هبعد نفسي عنها لان كل الناس سواء في الميكرو او في الشارع مش شايفين الحدود بين جسمك وجسمها بس شايفين انكم اتنين جنب بعض والشيطان بقا يلعب دوره .. ( ويقول بس الشيخ مقرب نفسه ازاي منها وعاملي شيخ ابن ال...
فبالله صحيح انت معملتش شيء غلط وربنا يعلم انك ملمستهاش بس بردو الاخ الملتزم لازم يحافظ علي شكل الاخوه ...
والله انا اكتر من مره اشوف اخ قاعد وبيكون شكله سيء جدا وهو قاعد جنب واحده حتى ولو ملمسهاش .. ولو عايز تنزل بأسلوب لطيف ارجع للجزء الاول من موضوعنا وشوف ازاي تنزل من الميكروباس باسلوب كويس ..


2- الاخ الفاضل قاعد في الميكروباس مفتح يعني ايه .. وركزوا كلكم معايه في الحته دي .. عارف اني رغاي بس معلش استحملوني


ركز يابني انت وهو عشان الفكره الي هقولها خطيره ومجربه :

دلوقتي انت قاعد في الميكروباس مفتح يعني ايه ..

يعني لو مثلا انت قاعد وانت شايف ان في الكنبه الي قدامك قاعد اتنين ستات وراجل ... والوضع قدام مش مريح كده ..
وانت جنبك مكان فاضي ..

هنا تقول للرجل ما تيجي تقعد هنا عشان النساء تقعد براحتها .. ( ساعتها هيتكسف ويرجع

طيب لو انت بنت جت تقعد جنبك .. ساعتها بقا تروح ضارب عينك في الميكروباص كله بسرعه .. وتشوف هل في حد قاعد غلط تقومه وتقعدها ويجيي جنبك

يعني واحد قاعد جنب نساء قدام ..

تقول الاخ الي قدام يجيي يقعد هنا ويخلي النساء تقعد جنب بعضها ..

يبقي كده ضربت راكبين بحجر .. انقذت نفسك وعفيت النساء الي قاعدين قدام ..

وهكذا تحاول بقدر الامكان تنظم انت الميكروباس بحيث تبقي ماشي مش بس انقذت نفسك لاء كمان ظبط الناس كلها وده صدقوني سهله وانا مجربها كتير وبتحس من الناس بنظره احترام وساعات ممكن تلاقي احراج بس صدقني انت الصح والي بيحرجك بيكون اتحرج من نفسه ...


3- الاخ الفاضل لو حس ان الدنيا قفلت ميقعدش بردو يقول ( على جنب ياسطي )


4- بردو الاخ الفاضل ميكنش مثلا رايح مشوار ويروح متصل بواحد لا بيه ولا عليه ويقول ليه تعالي معايه المشوار الفلاني ... طيب ليه تخرجه من بيته الذي قال النبي وليسعك بيتك وتخرجه الي الدنيا ممكن اغاني ممكن عينه تقع علي فتاه
فانا اقول للاخ .. انك تاخد حد معاك غلط من اكثر من ناحيه اولاً ممكن يفتن هو بسبب هذا المشوار ثانيا هتقعدوا ترغوا مع بعض ...
بس في نقطه مهمه لو انت شايف في نفسك انك مش بتعرف تتقي الله وانت لوحدك وبتقعد عادي جنب النساء وانت لو حدك اقول ليك لااااااااااااااااااااااااااااازم يكون معاك حد في مشاوريك عشان تكسف منه ... ( مهمه جدا هذه لا تنسوها )


شيء مهم وبيقطع قلبي خاص بموضوع الميكروباس والاختلاط فيه ولاهميته هذكره في موضوع منفصل .. ( بعنوان نسائهم حل لنا ) ان شاء الله

اخيراً اسئل الله لي ولكم العفاف

واحنا كمسلمين ... وملتزمين مينفعش نرضى بالواقع الخاطئ ..
نحن قوم إبتعثنا الله ليخرج من شاء من عبادة العباد لعبادة رب العباد
يعني في الاصل احنا جايين علي واقع فاسد ولازم نغيره من اول وجديد

فبالله امر الاختلاط في المواصلات ده فظييع وانا لي رجاء خاص عند اهل الدين ومن ظهر عليهم الدين ان يتقوا الله في دينهم

الواحد بيتألم لما يشوف منتقبه وراضيه بإن فلان يلصق فيها
أو واحد ملتزم ويرضى بإن فلانه تلصق فيه ..

بالله بالله أبوس ايدكم ... نراجع نفسنا
وفي النهايه اقول هي أعراض ثمنها 50 قرش .. من يبيع عرضه ؟ ومن سيشتريه ؟؟


فَسَتَذْكُرُونَ مَا أَقُولُ لَكُمْ وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ [غافر : 44]


نسألكم الدعاء بظهر الغيب وننتظر بإذن الله اقتراحاتكم وتجاربكم .. والحلول المقترحه

[فتاه النيل]

جزاكى الله خيرا

وجعله فى ميزان حسناتك

اللهم اهدى شباب وبنات المسلمين

دمتى بحفظ الرحمن

[سنايبر مان]

صدقتى في امور نسينها وفيها فساد عظيم والناس من التعود اصبحوا لا ينظرون اليها
بمنظرها الحقيقي وبصراحه المفروض يكون فيه ضوابط بحيث يكون القسم الخلفي للنساء
والامامى للرجال تستطيع وزارة المواصلات بتطبيقه وحل الفوضه الموجوده

فعلا استغرب من الناس دى مسوى فيها غيور وشهم ويطلع بالاخير نص كم بمعنى يرضى

بمواقف ان تلمس احد من عرضه وفي مواقف يقوم الدنيا ولا يجلسها

المفهوم الجديد واقصد مفهوم التطور ينتهك الاعراض بدون ان نشعر

لو انى ابتسمت لبنت بالشارع ممكن انضرب فيها من اخوها او زوجها ولكن صاحب

المحل يوزع ابتسامات ويدلعها بالكلام والاستاذ مناسبه الوضع مش كلنا غرباء ولا ايه؟


الله المستعان

ربك لا يصلح ما فيى قوم حتى يصلحوا مافي انفسهم

مشكوره والله يجزاكى خير بجد لفت رائعه منك بطرح موضوع حساس

واصبح مثل السرطان عندما ينتشر بالدم والعياذ بالله

[razan]

جزاك الله خيراا يا بونا

فعلا موضوع هادف جداا

[bona]

مرسيه جدا ليكي يا فتاة النيل
وليكي يا رزان
ولاخي القناص
جزاكم الله خير

[البرنس رامى]

اللهم اهدنا وأهد بنا وأهد لنا وأهدى شباب المسلمين أجمعين اللهم أمين


اللهم اهدى شباب وبنات المسلمين أجمعين اللهم أمين يارب العالمين



أثابك الله وسلمت يمينك

[طِيشْ !]

مرسي يا جميل علي الموضوع

[bona]

مرسيه يا رامي وليكي يا love girlياقمر
مشكورين عالمرور الحلو

[قلم بلا حبر]

الموضوع جميل يا بونا وان كان منقول بحكم ان الكتابه بصيغة المذكر وانا عارف انك انثى لكن اهمية الموضوع تجعل من نقله امرا مميزا بالطبع

العنوان استوقفنى ,,, بالذات وانا عارف ان الاختلاط الكلام فيه ضئيل جدا بسبب ان

مفيش حد بيتكلم عنه الا احنا بحكم اننا دارسى جامعة الازهر ,,, واللى حصل فيها مظاهرات بسبب محاولة الاختلاط ,,, وانا كنت فى الكليه والقسم اللى حصل فيه ده وهو كلية الهندسه قسم العماره

عموما الاختلاط مش قضيه بقدر ما هو مشكله مجتمعيه قبل ان تكون دينيه

قديما كان الاختلاط مرفوض قطعا وكانت وسائل الحد منه متاحه سواء بفصل الفتيات فى مدراس خاصه

والنهى عن خروج المراه الا فى حارت معينه ,,, وكلنا نتذكر ثلاثية نجيب محفوظ

الا ان الوضع اليوم مختلف تماما

كاتب الموضوع لا ادعى بأنه اخطا فى عرضه بقدر ما حمل طرفين هم فى الاساس لا علاقة لهم بالمشكله سوى انهم ادوات فيها

فيا عزيزى تكدس المواصلات العامه هو امر قد يجد البعض فيه ضالته من التحرش الا انه بالنسبه للكثيرين نافذة الامل لديهم لكسب الرزق

ولا تخبرنى عن المقترحات التى تحدثت عنها التى لاتمت للواقع بصله

فهنالك الكثير من الاسر التى يضطر فيها الطالب ان يحضر ثلاثة ايام فى اسبوع لتوفير نفقات الانتقال ,,,, فكيف تخبره بان عليه دفع اجره زياده

وواضح ان الموضوع قديم بعض الشئ لانه لم يعد هنالك مواصله قيمتها 50 قرشا ,,, سوى ان تكون فى اول الشارع وتريد ان تذهب الى صديقك فى اخر الشارع (( حتى هذه قد يكون ثمنها جنيه واحد ))

لذا فمحاولة الابتعاد عن الواقع فى حل مثل تلك المشكلات تجعل من المشكله مجال لعدم المبالاه من قبل اصحاب المشكله من الشباب والفتيات

اما اذا استخدمنا المنطوق الصحيح لحل المشكله لاستطعنا الوصول الى مكمن حدوث المشكله الا وهو الاذدياد المطرد فى تعداد السكان وانكماش الرقعه السكنيه التى نحيا عليها فى مصر ,,,, ثم التقصير من الدوله فى ايجاد بدائل لتوسعة تلك الرقعه ,, فلا اعتقد ان اقامة مجتمعات سكنيه جديده لا يوجد بها خدمات اداريه او تعليميه او اقتصاديه او وظيفيه قد يكون هو الحل

نحن فى حاجه الى اللامركزيه

نعم هى الحل لان الضغط الواضح الذى تشهده وسائل النقل وخاصة فة محافظتى القاهره والجيزه لهو نتيجه طبيعيه لتركز اغلب المصالح الحكوميه والجامعات فى تلك المحافظات بما فيها حلوان وجامعتها

اذن دعونا لا نلقى باللوم على ادوات ليس لهم ذنب الا فى الحلم والتطلع الى مستقبل اجمل ولن يتأتى هذا المستقبل بدون الحصول على الشهاده الجامعيه (( وان كانت اصبحت دون جدوى هى الاخرى ))

لكن على كل الشاب والفتاه لم يتخيرا هذا الوضع بارادتهما ,, ولننظر الى تجربة مترو الانفاق فهى اجدر بالوقف على نتائجها

فهذا هو تدخل الدوله ,,, والذى يعين على القضاء على مثل تلك المشكلات

اما ان نخاطب اناسا كل همهم ان يجدوا قوت يومهم بان يدفعوا اجر شخص أخر

او موظف قد حارب من اجل الوصول الى مقعد حتى يستطيع ان بلحق العشاء فى بيته بعد تأخره على الغذاء واخباره بان عليه الانتقال من مكانه ,,, فاظن ان رد فعله لا يمكن احتساب مقداره

دعونا نتطلع الى الواقع ونستخلص منه الحلول حتى لا نكون بعيدين عن هموم الناس

والا فسيظل كلامنا هو كلام النخبه الذى لا ينظر اليه احد من العامه

خالص التقدير لكى

تحيااااااااااااااااااااااااااتى""""""""""""

[همس الروح]

الاختلاط سلاح ذو حدين فهو مفيد عندما

تكون الفتاة ملتزمة بدينها وتعرف ما لها وما

عليها وتعلم أن الأختلاط يقوم على الاحترام

وليس على الصداقة وهنا سوف يقوي

الاختلاط من شخصيتها

ويزيد خبرتها في الحياة

وأعتقد ان المبالغة بالاختلاط هو الخطر فأنا اعتقد انا

علينا ان نبين لأولادنا الحدود التي يسمح بها الدين

للتعامل بين الجنسين واعتقد انه علينا اولا ان نربي

انفسنا تربية اسلامية صحيحة قبل ان نربي اطفالنا تربية

تقوم على فهم تعاليم ديننا فهما صحيحا وان نربي فيهم

وفينا الحياء وبعد ذلك اعتقد انه يصبح من الاسهل

التغلب على مخاطر الاختلاط


شكرا لكي أختي الفاضلة

موضوع قيم

وهام جدا في مجتماعنا


دمتي بخير


مع ارق المني


وعاطر تحيتي