يوميات فى الغربه

[princess73]

يا جماعه ايه رأيكم كل واحده او واحده عايشين فى بلد غير بلده يدخل يحكيلنا عن تجربته
و انا هاكون اول واحده تحكيلكم كتير اوى اوى عن غربتى اللى مش بتخلص و مش هتخلص
يعنى كل واحد يحب يشارك يقولنا ايه سبب الغربه ؟
كان عندك كام سنه لما سافرت ؟
بقالك كام سنه؟
اوصف البلد اللى انت فيها!
ثقافة المجتمع ايه؟
عادات الناس ايه؟
ايه اللى عجبك هناك؟
ايه اللى مش عاجبك هناك؟
الموسيقى بتاعتهم عامله ازاى؟
لغتهم ايه؟
بتقضوا وقتك هناك ازاى كل يوم؟
اصحابك جنسياتهم ايه؟
الجو عامل ايه؟

[princess73]

انا هابتدى باول جزء علشان التشجيع
انا مشيت من مصر و انا عندى 20 سنه يعنى من 17 سنه(
اخويا كان عايش فى امريكا و انا كنت هاموت و اسافر امريكا
بابا ما كانش موافق فخلصت جامعه هنا كلية الاداب قسم الاجتماع و قلت لبابا انى عايزه ازور اخويا
و طبعا سافرت لاخويا و ما رجعتش مصر تانى ههههه
طبعا بابا و ماما كانوا هيموتونى لانى قدمت على الجامعه هناك و درست سنتين و بقيت مدرسه هناك
بقى ساعتها عندى 23 سنه و طبعا الزن على الجواز بقى مخلصش
المهم نزلت مصر و اتجوزت جواز صالونات لواحد و خلاص ربنا ياخده هههه
المهم سافرت تانى معاه لامريكا علشان شغلى و هو طبعا انا بالنسبه له كنت فرصه زهبيه يعنى اخد الجنسيه بسببى و اشتغل كمان و يعنى من غير دخول فى تفاصيل طلع عينى و عين اللى جابونى
المهم الحمد لله اتطلقت منه و اتمريت فى شغلى هناك و كنت مخلفه منه طفلين و اخدهم و هرب الى يومنا ده و الحمد لله
ده مش موضوعنا لكن خلال شغلى فى امريكا قابلت جوزى حبيبى و هو مش مصرى لكن دنماركى و اسلم الحمد لله باقتناع لاننا كنا مجرد اصدقاء و بس و كان بيستغرب عاداتى اللى هى عدم الشرب و طبعا لما كنا بنسلم انا كنت الوحيده اللى مش بتبوس و تحضن هههه هاستغرب و بدا يسألنى انتى بتعملى كده ليه؟ و لما رمضان كمان ابتدى كنت بالنسبه له زى اهل الكهف يعنى كنت متراقبه يا جماعه هههههه
المهم رجعنا مصر انا و هو فى محاولة انى اشوف اولادى و اعرف مكانهم و ما عرفتش لانه طليقى هرب تانى و تالت و ربنا ينتقم منه بقى
المهم عشنا فى مصر سنتين و جوزى ما قدرش يستمر هناك لاسباب كتيره هاقولكم عليها بعدين
المهم احنا دلوقتى استقرينا فى الدنمارك و عندنا بنتين ربنا يحفظهم لينا
و هنا بقى هابقى احكيلكم عن مغامراتى بس لما حد فيكم يحكيلى عن غربته