ابـــــنـــك بــــقى صـايـــــــــع !!

[dr.mishmisha]

السلام عليكم ورحمة الله وبركاته


الزمان : سنة 1980
المكان قهوة فايد
الحدث : اكتشاف محمد افندي ان ابنوا بقي صايع


عبد العال افندي : سعيدة يا محمد افندي .
محمد افندي ( و ابتسامة النهار علي وجهة ) : سعبدة مباركة يا عبد العال افندي .
واحد شاي علي ميه بيضا يا سيد لعبد العال افندي .
خير يا استاذ عبد العال و صلني انك عايزني .


عبد العال افندي : و الله يا محمد يا اخويا الموضوع ميطمنش .
محمد افندي : ما تتكلم يا عبد العال يا اخويا قلقتني .
عبد العال افندي : ابنــــــــــك بقي صــــــــــــــــــايع يا محمد افندي .
محمد افندي (وكاد قلبه ان يتوقف ) : ايه يا عبد العال بتقول ايه ابني سمير بقي صايع
عرفت ازاي رد انطق ريح قلبي .
عبد العال افندي : ابنك لسه شايفه و هو ملموم علي شلة الصيع قاعد علي قهوة و بيشرب


شـــــــــــــــــــــــــــــــــــــــــــــــــ ـــــــــــــاي
محمد افندي : ايه لأ قولي ان ده مش حقيقي ابني انا قاعد مع صيع و علي قهوة و بيشرب شاي
يا خسارة تربيتي فيك يا سمير يا قلبي اللي هيقف من الزعل يا سمير ..
و تطلع فين القهوة دي رد يا عبد العال .


عبد العال افندي : دي القهوة اللي ورا بيتكوا يا محمد افندي .
محمد افندي : كمان قليل الحيا قاعد علي قهوة ومش مكفيه يقوم يقعد ورا بيتي قوم وريني تطلع فين نهاره اسود ..
عبد العال افندي : يلا بينا بس اهدي كده و صلي علي النبي .


سك علي الشاي يا سيد


و راحوا الاتنين القهوة اللي سمير بيقعد هو و شلة الصيع عليها .


محمد افندي : ما شاء الله يا استاذ قاعد علي قهوة و بتشرب شاي انا عملتلك ايه عشان ده كله
دخلتك كلية الحقوق و دفعتلك دم قلبي و ادي اخرة صبري عليك قاعد علي قهوة و بتشرب شاي
يا فضحتي وسط الناس اداري وشي فين من الناس يا سي سمير
قدامي علي البيت .


دي كانت الحالة ايام التمنينات


وكانت كلمة صايع تعني فيها الشاب اللي بيقعد علي قهاوي و يقف علي ناصية الشارع مع اصحابه
ولازال هذا التعريف عند البعض


*******************************


الزمان : 1995 .
المكان : قهوة فايد .
الحدث : اكتشاف الباشمهندس محمد ان ابنه صايع .


الدكتور عبد العال : صباح الخير يا بشمهندس محمد .


البشمهندس محمد : صباح النور يا دكتور عبد العال ازي حضرتك .


في تليفونك الاخير قولتلي انك عايزني في موضوع كده .


دكتور عبد العال : و الله يا بشمهندس الموضوع خطيير .


البشمهندس محمد :خضتني يا دكتور حصل ايه ؟


دكتور عبد العال : ابـــــــــــــــنك بقي صـــــــــــــــــــــــــايع يا بشمهندس .


البشمهندس محمد: ايه ازاي يا دكتور ارجوك فهمني
هاتلي ميه بسكر يا سيد ..


دكتور عبد العال : عينة الدم اللي اديتهاني امبارح
اتضح ان ابن حضرتك ماشي في سكة بطالة اليومين دول بياخد ابر ولازم يتعالج .


البشمهندس محمد : اه قلبي همووت قلبي هيقف انا عملت ايه في دنيتي عشان يحصلي كده يا فضحتي وسط الخلق .


دكتو ر عبد العال :اهدي يا بشمهندس و صلي ع النبي في قلبك كده ان شاء الله هيخف و يبقي كوييس


البشمهندس محمد : انا معرفتش اربي يا دكتور انا هقتله هموته واريح نفسي هي دي اخرة تعبي و تربيتي البيه بقي صايع


ودا كان مفهوم صايع في اوائل التسعينات و كانت مشهورة بانتشار المخدارت المحقونة في الاوردة
و النوع ده اختفي من زمان


******************************




الزمان : 2008
المكان : برده قهوة فايد
الحدث : اكتشاف المعلم محمد انه ابنه صايع .


عم عبد العال البقال : سلاموا عليكم معلم محمد .


المعلم محمد : و عليكوا السلام عم عبد العال واحد شاي يا سيد لعمك عبد العال .


ايه يا عم عبد العال هريتني ميزدات يا راجل كنت عايزني في ايه ؟


عم عبد العال : الموضوع كبيير يا معلم .


المعلم محمد : فيه ايه يا عم عبد العال هتقلقني ليه .


عم عبد العال : ابــــــــــــــــــــــــــــــنك خلاص بقي صـــــــــــــــــــــــــــــــــــــايع يا معلم .


المعلم محمد : يألف نهار ابيض يألف نهار مبروك و عرفت ازاي يا عم عبد العال قولي و فرحني .





عم عبد العال : كنت مروح لقيته واقف علي ناصية الشارع و ماسك في واحد و مدغدغه بسأل في ايه
قالولي ان ابنك سمير كان واقف و بيلاغي واحدة و جه شاب من اللي هما فرافير
عايز يكلها منه راح ماسك فيه و ضربة و الف من ادخل لابنك و ضرب في الواد فرفور.
و الناس تحكي وتتحاكي في ابن المعلم محمد الواد بقي صايع ولافف و يبرم دماغ التخين


المعلم محمد : الحمد لله اهو دا اللي كنت بتمناه من الدنيا الواد يكبر و يبقي صايع ولافف و محدش يعرف يضربة علي قفاه
اما اقوم اباركله



**********************************



بعد الصياعة ادب مش هز اكتاف


كلمة صايع لم تعد لفظ خارج


ولكن اصبحت دليلا علي قوة وذكاء صاحبها



السؤال بيقول


يا تري كلمة صايع بتمثلك ايه ؟

[قطره الندي]

اولا ميرسي ليكي يادكتور مشمشه علي الطرح المتميز

واهني نفسي باني اول من يرد علي هذا الموضوع الجميل

وثانيا ارد بقي علي سؤالك

كلمه صايع في رايي

انها الولد اللي مقطع السمكه وديلها وكل يوم مع بنات

وبيضرب حقن وبرشام وبيشم اكيد

واللي مش فالح في دراسته وبياخد السنه في عشره

واللي كل يوم واخدها كعب داير

بس كفايه كده

تقبلي مروري

[خالد بهي الدين]

أختي الفاضلة

ستظل هذه الكلمة تعنى سوء أخلاق من تطلق عليه ولكن مع الأسف عند قلة ما زالت تراعى الأصول والأخلاق في تربية أبنائها

ولكن

ما سبب تحول هذه الصفة إلى صفة يفخر بها البعض سواء لأنفسهم أو لأبنائهم بل ينموها فيهم ويحرصون على أن تكون من صفاتهم

في رأيي أن هذا بسبب ما نعيش فيه من فوضى في حياتنا

فالجميع على إقتناع بأنه لن يحصل على حقه إلا بالدراع فقط

الجميع يعلم أنه لا يوجد مكان للضعيف في مجتمعنا

يعني لازم تكون صايع عشان ميضحكش عليك وتعرف تاخد حقك

مثلا لو واقف في طابور العيش ومكنتش صايع هيجي الصايع و ياخد دورك

لو رايح تقضى مصلحة و مكنتش صايع وقلبك جامد هيتقلك فوت علينا بكرة

و الأمثلة كثيرة

فلهذه الأسباب يفرح الآباء ويطمئنوا على أبنائهم إذا كانوا صيع عشان غير كدة مش هيعرفوا يعيشوا

أشكرك على موضوعك