هل انت بوجهين .. ؟ .. لا تنحرج تعالى حط رأيك بصراحه

[انسان بسيط]

السلام عليكم ورحمة الله وبركاته


انا هدخل في الموضوع على طول


ليا حوالي 15 منتديات ما بين اجنبي و عربي

شفت فيهم ناس كتيييييييير و اتعرفت على ناس كتييييييييير

لقيت في النهايه ان غالبية المنتديات بتتشارك شئ مميز جدا هوا ان فيه عدد كبير جدا من اعضاء المنتديات بيكونوا بوشين

وش بيوروه لكل الناس في المنتدى بتاعهم و وش تاني بيتعاملوا بيه برا مع الناس خارج المنتدى


فتلاقي جوا المنتدى كل الاعضاء اشخاص كاملين مكملين لا عيب فيهم



سبحان الله


تحط اي موضوع و تطلب ردود تلاقي كل الناس جاينلك عاملين فيها كل الثقافه و كل الاحترام و كامل الاخلاق

تلاقيهم بيكرهوا النفاق و مع كده تلاقيهم برضو بيجاوبوا على موضوعات تافهه بعبارات المستفاد منها ان الموضوع خرافه و تحفه و مالهوش زي خاصة لو كان الموضوع رجالي بترد عليه انثى او انثوي بيرد عليه ذكر
او كان موضوع لمشرف قسم او حد من ادارة المنتدى




تلاقيهم بيكرهوا الكذب و مع كده جرب و اسأل اي حد انت بتمضي يومك ازاي النهارده هتلاقي نص رده انو بيقرا قرأن او بيزور ايتام و بيعمل كل الصالحات و النص التاني هيتكلم فيه عن ناس تاني مش بتعمل كده
و في آخر رده هيحط نصايح و كأنو هوا بئا الاستاذ الاوحد



تلاقي الناس في المنتدى بيستنكروا اوضاع كتيره ولو اتعرفت عليهم شخصيا و صادفك و لو موقف واحد من المواقف اللي استنكروها دي هتلاقيهم بيتعاملوا مع الموقف ده عادي و مش بعيد يشجعوه



هات بنت و اسألها عن رأيها في الحب بصراحه في المنتدى هتلاقي ردها دايما انو الحب شئ جميل لكن لازم يكون في اطار شرعي و يكون في مكانه مش في المنتدى و لو ساعدتك الظروف و بقيت ادمن او سوبر ادمنستريتور و قدرت تشوف رسايل الاعضاء هتلاقي نصها ما بين حب و بين عتاب الاحبه بنات و بنين المنتدى

** انا طبعا مقصدش المنتدى ده ** لأني اصلا عضو جديد لسه معرفش اي حد او اي حاجه فيه


هات اي حد في الاعضاء و اسألو بتودي فلوسك فين هتلاقيه يا عيني بيتبرع بتلت ارباعها لفقراء و الربع الباقي بيصرف منه النص و بيدخر النص الباقي و لو ساعدتك الظروفتلاقي الشباب على القهاوي و الكافيهات بيصرفوا ببزخ و كأن يوهم هوا آخر يوم في العمر و بكرا كأنو مش جاي

و تلاقي البنات إكسسوار و بيرفوم و هدايا و دباديب


إسأل واحد يكون لارج شويه و قوله انت بتخرج فين لما بتحب تتفسح .. يقولك انا بروح ازور القرايب و اوقات بروح انا و اصحابي ملاهي او حدايق .. و لو مره ساعدتك الظروف تقابلو في بارتيهات و ديسكوهات و مش بعيد في بارات

هات بنت و اسألها انتي بتساعدي ماما في البيت ولا لأ هتقولك اكيد ده انا اصلا اللي بعمل كل حاجه في البيت انا مش بسيب ماما تعمل حاجه خالص
و لو مره ساعدتك الظروف تدخل بيتها تلاقي امها طول النهار تقولها يا بنتي سيبي الكمبيوتر شويه و تعالي ساعديني انا تعبت و هيه تقولها يوووووه حاضر بس ثوانيو جايه و بعدها اما تتعطف على مامتها و تعمل حاجه بسيطه او يغلبها النوم و تقول بكرا هساعدك او تيجلها صحباتها و تخرج معاهم


جرب مره يا عزيزي تكتب موضوع علمي ولا ثقافي ( ثقافي بجد ها ) يعني تتعب انت و تلف مواقع و تفتح كتب علشان تقدم ماده علميه حقيقيه للأعضاء اللي انت طبعا اعتبرتهم من ضمن اهلك منتوا بئا بتتقابلوا كل يوم في المنتدى .. المهم اتعب انت يومين تلاته و اكتبلك موضوع علمي بحت و شوف الردود
ده اصلا لو حد رد هتلاقي الناس اللي بترد معظمها كالتالي :-

1 - حد يروح يعمل بحث عن الموضوع في اي موقع بحث و لو جوجل و يخطف كلمتين واحده من الشرق و التانيه من الغرب و يجي يعمل عليك استاذ و يقولك بملو فمه ( انا اؤيدك يا استاذ فلان في كذا وكذا و لكني اختلف معك في كذا و كذا و كذا و كذا ............ إلخ ) و طبعا الغرض انو يظهر لباقي الاعضاء قد ايه هوا مثقف و فاهم و ان الموضوع مالهوش قيمه لأنو فكره قديمه اوي لدرجة انو كان قرب ينساها

2 - واحد تاني يجي يقولك الله يعطيك العافيه و يسكت او اي رد من الردود الباهته اياها مشكور يسلمو نتمنى نشوف جديدك حاجات كده

3 - واحد تاني يلاقي موضوعك طويل و هوا مش فاهم منو اي حاجه يقوم يقرا سطرين في الاخر يقول لنفسه بس هيه دي الخلاصه و انا فهمتها .. يقوم يرد عليك رد ينقطك و مش بعيد يشلك .. انت بتتكلم في اتجاه و هوا في اتجاه تاني خالص

4 - يجي مشرف لذيذ يحط رد ( تم نقل الموضوع للقسم التابع له ) قال يعني كاتب الموضوع اللي تعب كتير جدا على ما جمعه مش فاهم نوع موضوعه و في اي قسم يحطه

آخر حاجه بئا و دي مهمه اوي

تلاقي الاعضاء بيشتكوا من التفاهات و الترهات اللي في المنتدى بتاعهم و يجولك في القسم بتاع الترحيب بالأعضاء الجدد و تلاقيهم بينقشوا لك عبارات و جمل ترحيب مطبوعه بطريقه قص و الزق و في نهايتها نتمنى تفيد و تستفيد قال يعني المنتدى كلو افادات و لما تيجي تعمل حصر لموضوعات المنتدى تلاقي معظمها منقول
او مسروق و تلاقي حتى الالعاب هيه هيه اللي في كل المنتديات كأن العرب ميعرفوش يلعبوا غير الالعاب دي من واحد لخمسه او لعشره و معرفش تضرب مين و تطرد مين و تسجن مين ( حاجه كده في منتهى الركاكه و ملهاش اي فايده وكمان منقوله خاليه من اي ابداع او حتى ترفيه ) و تلاقي قسم الالعاب هوا انشط قسم في اي منتدى انشط حتى من المنتدى العام و تحدي على كده


و في الختام احب اقول ملحوظه صغيره


*** انا لسه اول يوم ليا معاكم يعني منتداكم غير مقصود بأي كلمه هنا ***

أصل الخلاصه :: هل انت شخص ذو وجهين احدها جميل بالمنتدى و الأخر الله اعلم به ؟ ::


ام انك لا تعلم معنى الازدواجيه ؟؟


اتمنى اجابات صريحهه


خالص التحيه


ياسر الاباصيري

[ملكة القلوووب]

السلام عليكم
انا ممكن اكون متقلبه المزاج يعني ساعات تلاقيني بضحك وبهزر مع صحباتي وفجأه الاقي نفسي مشيت من جمبهم وطفشانه من حالي
يعني ساعات اتصرف تصرفات غريبه
بس انا مش من النوع إللي يكون قدام الناس مسكين وطيب ومن وراهم سكين
يسلمووووووا*

[عشق الطفولة]

اولا موضوع غايه في الروعه ماشاء الله عليك
بجد كتيييييييييير اوى بتلاقي ناس جوة المنتدى حاجه وبره حاجه تانيه خااااالص القيم والاخلاق والمثاليه والثقافه اللي بتكون في طريقه كلامهم بتكون عامله زي الشيكولاته بتدوب اول ما بتطلع في الشمس والنور وبيبانو على حقيقتهم عشان كده مبقاش حد يآمن بأي صداقه من اي منتدى كل واحد بيبقى عايز يفضل ضاحك على نفسو عشان يشوف الوش الناعم بس من الناس واخلاقهم العاليه عشان بيبقى عارف انه مجرد ما العلاقه هتزيد هيكتشف الحقيقه المره اللي كان بيخبيها على نفسو...اسفه عالاطاله بس بجد موضوع شيق جدا واتمنالك التوفيق...تقبل مروري

[انا كتكوته]

موضوع شيق للغايه والانسان فعلا بوشين بس الوجه الكويس داخل المنتدى لانه مشفش من حد حاجه وحشه لانه مجرد كلام بن اشخاص ولكن لو اى شخص غلط فى حد هيطره على انه ىظهر ليه الوجه الاخر بس مش معنه كده انى اةى حد يكتب موضوع و اكون معترضه
هقول ومش هجامل تمنياتى لكم

[falta tanto amor]

فعلا انا ساعات بحس في كل المنتديات ان الاعضاء كلهم ملايكة

اكيد لان كل واحد بيفكر مية مرة قبل ما يرد وبيجهز نفسه وكدة

لكن عموما في حياتنا العادية باحس دايما ان كلنا عندنا شيزوفرينيا

شخصية في البيت فيها كل العيوب وشخصية برة البيت بحاول اخبي عيوبي

[فيروزه]

	اولا تسلم ايديك ع طرح الموضوع ومعاك حق فعلا الناس بقوا بوشين علي فكره مش في المنتدي بس وبره المنتدي كمـــــــــان وتحس من طريقه كلامهم انهما ناااس بريئه مش بتعرف تكدب ولا تخادع وسبحان الله تحسهم كلهم ملتزمين وبيتكلمو بالدين بطريقه جميله تقول يااه ياريت كل الناس زيهم كدا بس اول ما تتعامل معاهم ولا تلاقي اي حاجه من الكلام دااا مش عارفه اقولك ايه غير ربنا يهدي الجميـــــــــع وميرسي ع الموضوع

[نبيل البصراوي]

السلام عليكم بارك الله فيبك على هل كلام الروعه باينك ما ضال منتدى ما داخل فيها
هل رئيت كل المنتديات نفسها هل رئيت كل كل الناس الذي حولك نفسها لا لم تجدها
وهاكذا النسان مرات طافش مرات مراتاح
لو تشاهد نفسك وقيسها مثلها
تسلم موضوعك روعه

[انسان بسيط]

اقتباس المشاركة الأصلية كتبت بواسطة ملكة القلوووب السلام عليكم انا ممكن اكون متقلبه المزاج يعني ساعات تلاقيني بضحك وبهزر مع صحباتي وفجأه الاقي نفسي مشيت من جمبهم وطفشانه من حالي يعني ساعات اتصرف تصرفات غريبه بس انا مش من النوع إللي يكون قدام الناس مسكين وطيب ومن وراهم سكين يسلمووووووا*

كلنا زيك بنعاني من ضغوط نفسيه في مجتمعاتنا بتنعكس على تصرفاتنا و تجعلها غريبه

و اهم شئ اننا منتهوش وسط الزحمه و نكون بوشين

شاكرلك مرورك

تحيتي

[انسان بسيط]

اقتباس المشاركة الأصلية كتبت بواسطة عشق الطفولة اولا موضوع غايه في الروعه ماشاء الله عليك بجد كتيييييييييير اوى بتلاقي ناس جوة المنتدى حاجه وبره حاجه تانيه خااااالص القيم والاخلاق والمثاليه والثقافه اللي بتكون في طريقه كلامهم بتكون عامله زي الشيكولاته بتدوب اول ما بتطلع في الشمس والنور وبيبانو على حقيقتهم عشان كده مبقاش حد يآمن بأي صداقه من اي منتدى كل واحد بيبقى عايز يفضل ضاحك على نفسو عشان يشوف الوش الناعم بس من الناس واخلاقهم العاليه عشان بيبقى عارف انه مجرد ما العلاقه هتزيد هيكتشف الحقيقه المره اللي كان بيخبيها على نفسو...اسفه عالاطاله بس بجد موضوع شيق جدا واتمنالك التوفيق...تقبل مروري

أولا : بشكرك جدا على مرورك اللامع ده

ثانيا : شكلك كده زيي تمام عانيتي كتير من الموضوع ده

ثالثا: و ده طبعا الأهم .. أنا معاكي إنو مفيش أمل في صداقه حقيقيه من منتدى .. لكن ممكن يكون فيه علاقات جيده و كفايه انها تكون علاقات في حدود المنتدى و بس

بجد بشكرك على حضورك المميز

[انسان بسيط]

اقتباس المشاركة الأصلية كتبت بواسطة انا كتكوته موضوع شيق للغايه والانسان فعلا بوشين بس الوجه الكويس داخل المنتدى لانه مشفش من حد حاجه وحشه لانه مجرد كلام بن اشخاص ولكن لو اى شخص غلط فى حد هيطره على انه ىظهر ليه الوجه الاخر بس مش معنه كده انى اةى حد يكتب موضوع و اكون معترضه هقول ومش هجامل تمنياتى لكم

معاكي حق

جايز فعلا الناس في المنتدى بيكونوا على درجه عاليه من الاخلاق لأنهم مش بيشوفوا حاجه وحشه من حد .. انما لو شافوا حاجه وحشه جايز يطرهم ده لأنهم يظهروا على حقيقيتهم

و فلا إذا غضب الإنسان ظهرت عيوبه

و كمان انا معاكي إنو لا مفر من المجاملات في المواضيع بس أكيد مش هتكون في كل حاجه

شكرا لمرورك

تحيتي