تميم البرغوثي-قالوا لي بتحب مصر

[~♥ Queen sozan♥~]

قالولى بتحب مصر قالت مش عااااارف

بجد هتعجبكم
وتميم البرغوثى شاعر متميز

[خارج عن القانون]

همس

اسمعى كويس الفيديو من اول 1:45

ودققى فى كل كلمه من بعدها

وخدى بالك من كلمه قالها

"ولا الحضارة اللي واجعة دماغنا جيل ورا جيل"

وخدى الشعر اهه كاامل


قالولي بتحب مصر فقلت مش عارف
المعنى كعبة وانا بوَفْد الحروف طايف
وألف مغزل قصايد في الإدين لافف
قالولي بتحب مصر فقلت مش عارف
أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل
ما يجيش في بالي غيطان خضرا وشمس أصيل
ولا جزوع فلاحين لو يعدلوها تميل
حكم الليالي ياخدهم في الحصاد محاصيل
ويلبّسوهم فراعنة ساعة التمثيل
وساعة الجد فيه سخرة وإسماعيل
ما يجيش في بالي عرابي ونظرته في الخيل
وسعد باشا وفريد وبقيّة التماثيل
ولا ام كلثوم في خِمسانها ولا المنديل
الصبح في التاكسي صوتها مبوظُّه التسجيل
ما يجيش في بالي العبور وسفارة اسرائيل
ولا الحضارة اللي واجعة دماغنا جيل ورا جيل
قالولي بتحب مصر أخدني صمت طويل
وجت في بالي ابتسامة وانتهت بعويل

قالولي بتحب مصر فقلت مش عارف
لكني عارف بإني إبن رضوى عاشور
أمي اللي حَمْلَها ما ينحسب بشهور
الحب في قلبها والحرب خيط مضفور
تصبر على الشمس تبرد والنجوم تدفى
ولو تسابق زمنها تسبقه ويحفى
تكتب في كار الأمومة م الكتب ألفين
طفلة تحمّي الغزالة وتطعم العصفور
وتذنِّب الدهر لو يغلط بنظرة عين
وبنظرة أو طبطبة ترضى عليه فيدور

وأمي حافظة شوارع مصر بالسنتي
تقول لمصر يا حاجّة ترّد يا بنتي
تقولها احكي لي فتقول ابدأي إنتي

وأمي حافظة السِيَر أصل السِيَر كارها
تكتب بحبر الليالي تقوم تنوَّرْها
وتقول يا حاجة إذا ما فرحتي وحزنتي
وفين ما كنتي أسجل ما أرى للناس
تفضل رسايل غرام للي يقدّرها

أمي وأبويا التقوا والحر للحرة
شاعر من الضفة برغوثي وإسمه مريد
قالولها ده أجنبي، ما يجوزش بالمرة
قالت لهم ياالعبيد اللي ملوكها عبيد
من إمتى كانت رام الله من بلاد برة
يا ناس يا أهل البلد شارياه وشاريني
من يعترض ع المحبة لما ربّي يريد

كان الجواب ان واحد سافر اسرائيل
وانا أبويا قالوله يللا ع الترحيل

دلوقت جه دوري لاجل بلادي تنفيني
وتشيِّب أمي في عشرينها وعشريني
يا أهل مصر قولولي بس كام مرة
ها تعاقِبوها على حُبَّ الفلسطيني

قالولي بتحب مصر فقلت مش عارف

بحب أقعد علىالقهوة بدون أشغال
شيشة وزبادي ومناقشة في مآل الحال
وبصبصة ع البنات اللي قوامهم عال
لكن وشوشهم عماير هدها الزلزال
بحب لمعي وحلابِسَّة ومُحِّب جمال
أروح لهم عربية خابطة في تروللي
كإنها ورقِة مِسودّة مرميّة
جوّاها متشخبطة ومتكرمشة هيّه
أو شلّة الصوف، أو عقدة حسابيّه
سبعين مهندس ولا يقدر على حلي
فيجيبوا كل مفكّاتهم وصواميلهم
ويجرّبوا كل ألاعيبهم وتحاييلهم
ساعات كمان يغلطوا ويجربوا فيّه
بس الأكيد أنهم بيحاولوا في مشاكلي
وإنها دايماً أهون من مشاكلهم

أحب اقعد على القهوة مع القاعدين
وابص في وشوش بشر مش مخلوقين من طين
واحد كإنه تحتمس، يشرب القرفة
والتاني غلبان يلف اللقمة في الجرانين
والتالتة من بلكونتها تنادي الواد
والواد بيلعب وغالبهم ثلاثة اتنين
أتوبيس كإنه كوساية محشي بني آدمين
أقول بحكم القاموس، إن الهواء جماد
واشم ريحة شياط بس اللي شايفه رماد
عكازة الشيخ منين نابت عليها زناد
يسند على الناس ويعرج من شمال ليمين
والراديو جايب خبر م القدس أو بغداد

قالولي بتحب مصر فقلت مش عارف

قطر الندى قاعدة بتبيع فجل بالحزمة
أميرة عازز عليها تشحت اللقمة
عريانة ما سترها الا الضل والضلمة
والشعر الابيض يزيد حرمة على حرمة
والقلب قايد مداين زي فرشة نور
والفرشة واكلاها عتة والمداين بور
اللي يشوفها يقول صادقة حكاوي الجن
واللي يشوفها يقول كل الحقايق زور

عزيزة القوم عزيزة تشتغل في بيوت
عشر سنين عمرها لكن حلال ع الموت
صبية تمشي تقع ويقولو حكم السن
وسِتّها شعرها أصفر وكلّه بُكَل
كإنها مربية فيه اربعين كتكوت
ووشها زي وش الحاكم العربي
كإن خالقها راسمها على نبوت
تحكم وقطر الندى تسمع لها وتئن
أصل البعيدة وليّة أمرها، عجبي
على الهوا بحجة الكسوة يقيموا له سور

أحكي يا قطر الندى والا ما لوش لازمة
حكاية ابن الأصول تفضل معاه لازمة
فيه ناس بتلدغ وناس ليها البكا لازمة
ياللي سطلت الخليفة بجوز عينين وشعور
كنت سما للأغاني والأغاني طيور
مين اللي باعك، عدوك، بعض أولادك
مين اللي كانوا عبيدك صاروا أسيادك
مين اللي سمى السلاسل في إديك دِبَل
مين اللي خط الكتاب مين كانوا أشهادك
وازّاي متى سألوكي "هل قبلتِ به"
سكتِّ ومشيتِ يا مولاتي في الزفة
لبنان وغزة وعراق فينا العدو تشفى
حطوا جثثنا يا حاجة تحت سجادك
ووقفت تستنى خيط الدم يبقى بحور

قالولي بتحب مصر فقلت مش عارف
لا جيتها سايح ولاني أعمي مش شايف
بلد علمها انمزع والرفّا في المساجين
ومهر مربوط في كارو وباله في البساتين
وابو زيد سلامة على كرسي وكيس جلوكوز
لجنة مشايخ تناقش فتوة الأراجوز
سؤال نعيش أو نموت، فيه لا يجوز ويجوز

لو السقوف خايخة نسندها بحجارة وطوب
لكن ده لوح القزاز كله ضرب تشريخ
لو الولد حرف في الآية، ها يبقى يتوب
بس المصيبة إذا الآية اخترعها الشيخ

يا مصر كومة حروف إبر المعاني فين
إبر بتجرح إيدينا قبل ما بتبان
نسرك في بال السما بيقول حدودها منين
نسرك بياكله الصدا في بدلة السجان

يا قلعة السجن يا قلعة صلاح الدين
أنا بقولك وأهلي ع الكلام شاهدين
لو كنت حرة ما كناش نبقى محتلين

والناس شكاير صريخ رابطين عليها سكوت
آهات سَكوتَة كإن الأرض مستشفى
مطرودة منها الدكاترة ف سجن أو منفى
والناس بتسأل هنصبر والا نتوفى
فيه ناس تقول زي بعضه دول نوعين م الصبر
وناس تقول زي بعضه دول نوعين م الموت
يا مصر بعض التسامح يبقى عار وبأجر
إفتكري "لا تحسبّن" مكتوبة فوق كام قبر
والتار يبات يصحى تاني لو يشيب الدهر
والتار حصان غير لصاحبه ما يلين ضهر
والتار تار العرب وعشان كده تار مصر

قالولي بتحب مصر فقلت مش عارف
لا جيتها سايح ولاني أعمى مش شايف
ولاني هايف اردّ بخفّة وبسرعة
وكل من رد يا كذاب يا هايف

أصل المحبة بسيطة ومصر تركيبة
ومصر حلوة ومُرَّة وشِرْحة وكئيبة
دا نا اختصر منصب الشمس وأقول شمعة
ولا اختصر مصر وانده مصر يا حبيبة

يا أهل مصر اسمعوني واسمعو الباقيين
إن كنت انا رحّلوني كلنا راحلين
يا أهل مصر يا أصحابي يا نور العين
يا شنطة المدرسة يا دفتر العناوين
يا ضغطة البنت بلكراسة ع النهدين
ترقص قصاد المراية، واحنا مش شايفين
يا صحن سلطان حسن يا صحن كحك وتين
يا ألف مدنا وجرس، لألف ملّة ودين
يا أهل مصر اسمعوني، والكلام أمانات
قلتولي بتحب مصر فقلت مش عارف
روحوا اسألوا مصر هيّه عندها الإجابات

[اتيتو]

يمكن احنا كمصريين فينا شئ غريب اوي اننا بننتقد بلدنا براحتنا اوي وبنقول كل حاجة بس مش بنحب حد ينتقدها غيرنا ! عموما البرغوثي له الحرية في الابداع !

خارج علي القانون انت شخص جميل اوي

همس شكرا ليكي ع الفيديو يابنوتة بس قوليلي عاجبك ايه فيه d:

[خارج عن القانون]

بص يا اتيتو

هقولك ع حاجه

مصر بحبها بلدى واللى يمسها أكله بسنانى وانتهى

يعنى ده بلدى بوحشتها وحلاوتها وانا بعتز انى حامل جنسيتها

انا اقول عنها بس محدش يكلم عنها

ولو حد اكلم وانا سكت يبقا مستحقش جنسيتها

[~♥ Queen sozan♥~]

السلام عليكم ورحمة الله وبركاته
اسفة على التاخير لان مختش بالى من الرد
غير دالوقتى
انا هقولك عجبنى فى اية يا خارج
بس انت شايفو مش كويس عشان الكلمة دى بس
اعتقد انو مش يقصد اسائة
لان بيقول بيحبهااا برغم كل العيوب لى بداخلهااا
اسمع الفديو تانى كويس
واعتقد فعلا
احنا من 29 سنة بنعيد ونزيد فى حضارتناااا
واجددناااا
هو اة لينا الفخر وكل حاجة
لكن فين امجاد بلدنا 29 سنة
واكتر كماااااااااااااان
فين الانجزات
ولا هنفضل نبكى على الحضارة ونقف فى نقطة الصفر زى ما احنااا

اسمع الفديو تانى
هتفهم هو يقصد اية


وركز فى
المقطع

والمدنة فى مسجد الحاكم باامر الله
كا انها من زمان وواقفة تستناة
سارتو غريبة الراجل دة يفهموها
اقيل
حاكم وقالها بصراحة اظن انى اله
جاب جوهر الحكم يا خوانة وفهم معناة
ما كل حاكم بيقولها فى سرو لما ينااام
بيقولها لى مراتو وابنو وحتى ابنو الخاص
ما كل حاكم كدة بس العيب على الشوف


يا خارج لى بيكتب حاسس بيهااا
ولى بيتحلم عيز ينهض بيها وليهاا
انم الساكت وبيحزن على لى كان
هيفضل يحزن ويبكى و هيفضل فى نفس المكان
لازم نتكلام لان حسين بيهاااااااااا
مش نسكت ونفضل نبكى علية

والبكاء مش بيفيد اى شئ

شكرا على مرورك انت اتيتو

[اتيتو]

بصي ياهمس انا بتفق معاكي ان مشكلتنا اننا عايشين علي 7000 سنة حضارة فاتت
والدنيا عايشة ل 7000 سنة جاية وده الفرق بينا وبينهم

شكرا ليكي مرة تانية

[خارج عن القانون]

يا همس

انا معاكى فى كل الى انتى بتقوليه

وفيه ناس بيقولو زى تميم ده بالظبط

ومنهم الشاعره الكبيره ايمان بكرى

بس فيه نقطه خدى بالك منها كويس

اتيتو قالها

اقتباس احنا كمصريين فينا شئ غريب اوي اننا بننتقد بلدنا براحتنا اوي وبنقول كل حاجة بس مش بنحب حد ينتقدها غيرنا

احنا ننتقد نفسينا منجبش حد ينتقدنا

ارجو انك تكونى فهمتينى

مع خالص تحياتى واحترامى