مسـرحيـــة

حبك امتلاك · منذ /01-07-2011, 11:29 PM

مسرحيه والبطل فيها يموت
خط كاتبها سطور في سكوت
وارتفع عنها الستار
وابتدأ أول مشاهد لها..غبار..عتمه
موسيقى ترتجف حزن
وحيده تشكي الظلمه
حبيبه تكتب رسايلها
وترسم قلبها رسمه
تنادي بلوعة قلبها المجروح
خلٍ سلبها عقلها والروح

********

في لحظه.. يدخل أبوها...شافها
انزعج.. بان في عيونه غضب
سالها... ليش الحزن واليوم عرسك
وابن عمك عندنا
قالت يبه
انكسر قلبي وماتت بسمتي فيني
وصار الحزن عنواني وتكويني
وشلون ابفرح وانت الموت تسقيني
قال اسكتي
يابنت هذي رغبتي
رغبة عمك المرحوم
تكوني عروس لولده المحروم
قالت يبه ماني هدوم
تفصلون وتلبسون
قال إسكتي هذي ماهي علوم
مالنا ومال الحكي الفاضي لزوم
اليوم عرسك..مانبي الليله خصوم
يخرج أبوها ويسدل المسرح ستار

***************

ويبتدأ ثاني المشاهد
وقلبها باقي يعاند
إنفتح شباك غرفتها
وشافها بثوب الزفاف
حاول يكلمها..حاول وخاف
شافته صاحت ..ابيك
جاوبها كذبتي
تبيني ونتي بالثاني قبلتي؟
ياخساره..كنت انا لعبه
وأنتي بعصابي لعبتي
ملكتيني..كل مافيني ملكتي
في النهايه..تجرحيني
تقتليني بسهم غدرك..لاربحتي
حاولت تشرح... تبررالموقف ولكن
ضاع في وسط الاماكن
غاب عنها..غاب عن كل المساكن
وارتفع صوت الاغاني
ويدخل الغرفه حريم
من كل شكل وكل لون
هذي جديدٍ لبسها..وهذي ملابسها قديم
كلٍ يغني..كل ٍمن اعماقه يهني
وهي لابسه ثوب الزفاف
أنتهي ياعمري..روح وانهي بي المطاف

*******************

وتنحدر دمعه ويرتفع صوت امها
دمعة فرح يبنيتي انتهى وقت الجفاف
وينتهي المشهد حزين
وليت هالقسوه تلين
واخر هالمشاهد يبتدي
حزينٍ يكتب على اوراقه
قصة محبٍ مبتدي
قصة مشاعرصدقت
كذبة عدو معتدي
مسكين قلبه للاسف
في موجة الكذب انجرف
قالو هي وافقت بالرضى
نصيبٍ لها ونقضى
وانكسر قلبه وراح
وزاده البعد بجراح
والحين اهو يحتضر
ينتظر...ينتظر.....ينتظر......