الاسلام فى عيون الغرب

[MESEE]

إن شاء الله هنتناول فى الموضوع ده نظره الغرب للإسلام هايبقى عندنا شويه عناوين حابب انى اذكرها فى البدايه و على اساسها هانبدأ نتكلم إن شاء الله
بس الاول لازم اقول ان مفيش حرف واحد منقول و ان الموضوع نقلاً من مدونتى ......

هانتكلم فى ايه ؟

1- أحداث و نقاظ تحت الضوء.

----- a. احداث 11/9 فى الولايات المتحده.

----- b. تفجيرات مدريد و تفجيرات لندن .

----- c. الحادث فى فلسطين المحتله

2- الإعلام الغربى ... ماذا ينقل

----- a. من وكاله رويترز ننقل لكم اخبار العيد.

----- b. الفيلم الامريكى OSAMA

3- ما هو المطلوب منى ؟

4- مصادر

------------------------

1- أحداث و نقاظ تحت الضوء.


1- احداث 11/9 فى الولايات المتحده.

تفجيرات برج التجاره العالمى تعتبر اكتر حدث مؤثر ربط صوره الاسلام بالارهاب


و خلونا نتفق ان بجد الحادث كان مُرَوِع مات فيه 3000 شخص تقريباً من المدنين

اللى ملهمش اى ذنب فى اى حاجه و ده احنا ضده او لأ ... مش موضوعنا دلوقتى

المهم ... كانت حادثه بشعه و كانوا المنفذين مسلمين و كان التخطيط منشأه تنظيم القاعده و قائد التنظيم أسامه بن لادنو خلونا نركز على صوره أسامه شويه علشان مهمه --- هو : مسلم , سعودى , ملتحى ... انا قلت سعودى ملتحى لسببين

الصوره و القيمه .... صورته كــملتحى اوحت ان كل المسلمين الملتحيين ارهابيين و ان اللحيه رمز تطرف عند المسلمين و سعودى كقيمه بلد الحرمين اللى بقت مصدره للإرهابيين ده طبعاً مع العلم ان معظم المنفذين سعوديين

بالتالى بقى ينظر للإسلام ككل على انه دين إرهاب و اعتقد ان القيمه دى اتزرعت جوا

كتير جداً من الامريكان أن المسلميين ارهابيين.! و ده احنا كلنا لاحظناه و عرفناه و احتكينا

بيه سواء فى الاخبار او فى النت او على الشات مع امريكان او من اى حته مش منتشر

فيها الاسلام بشكل كبير و مفيهاش احتكاك كبير مع مسلمين.



معلش انا عايزكوا تجربوا حاجه بسيطه ... افترض --- تعالى على نفسك معلش و افترض

إنك أمريكى غير مسلم و ليك أخ او قريب او صديق او حبيب او اى حد تعرفه يعنى

مات فى الحادث ده ...

أنت هاتفكر ازاى ؟؟؟؟؟ هاتقول مين اللى مسؤل ؟؟؟؟

و هل هاتحمل المسلمين ككل المسؤليه زى ما احنا بنحمل كل اليهود مسؤليه الصهيونيه ؟؟؟؟


هاترد عليا و هاتقوللى بس أرجو انك تقول بكل صراحه .......

ب- تفجيرات مدريد ------------- 11/3/2004

الموضوع فى اسبانيا ما إختلفش عن امريكا كتير و مش محتاج انى اعيد اسباب
انتشار الرعب و لا الفزع اللى حصل فى اسبانيا بسبب التفجيرات دى
بس خلونا نقول حاجه ببساطه


لو انت من سمعت ان الميترو فى القاهره حصل فيه تفجيرات

و عدد الوفيات 191 و الجرحى 1755 شخص

انت هاتعمل ايه ؟
هاتبقى قلقان على نفسك و على اهلك ؟
هاتبقى مش فارقه كتير و مش مهم مين اللى عمل كده ؟

هل هاتتمنى اعدام المنفذين او المخططين فى ميدان عام ؟ هاتعمل ايه ؟

اجاباتنا مهمه علشان نعرف هل ردود افعال الاسبان مناسبه للموقف
و لا كانوا بيتصرفوا بشكل مبالغ فيه ؟

تفجيرات لندن ----------- 7/7/2005

بالظبط زى اللى حصل فى اسبانيا بس بفرق التوقيت و ان فى لندن كانت مجموعه متزامنه

من الانفجارات فى عده قطارات فى الــ subway او الميترو

مش عايز اطول فى التفاصيل لأن مش ده اللى انا عايز اوصله و هايبقى رغى على الفاضى

د- الحادث فى الاراضى الفلسطينيه المحتله

الفلسطينيين العرب بيقتلوا مدنيين يهود اسرائيليين و بيخطفوا الجنود و بيقصفوا المستوطنات المسالمه

و رافضين السلام مع اليهود و رافضين فكره ان يكون فى دوله اسمها اسرائيل ....!!!

اه احنا اللى غلط .. ده اللى هم فاهمينه من الاعلام ان احنا اللى غلط
و ان اليهود هم اللى مظلومين و ده هاينقلنا لنقطه قمه فى الاهميه

2- الإعلام الغربى ماذا ينقل ؟؟؟

يعتبر الإعلام من أهم الاسلحه التى يُحاربون بها الاسلام

و قد اثبت اعداء الاسلام تفوقهم فى استخدامه ضدناو اثبتنا فشلنا فى استخدام نفس السلاح سواء فى الدفاع عن انفسنا او فى إظهار حقائق الامور

ا) من رويترز أنقل لكم

فى يوم عااااااادى جداً ... إذ فتحت النت عااااااادى جداً برضه

و كالعاده فتحت شويه مواقع اخبار اجنبيه زى

new york times , Washington post , Reuters

كنت حابب انى اعرف الناس دى صحافتهم زيينا ؟

بيشتكوا برضوا من ازمه الرغيف و البطاله و الحاجات دى ؟

و كمان كنت عايز اعرف بيكتبوا ايه عننا ؟

و هل بينقلوا فعلاً حاجات حقيقيه و لا بيقولوا اللى هم عايزينه بس ؟

المهم لقيت على رويترز فيديو عنوانه بيقول انه

احتفال اسلامى و الخبر كان فيه فيديو

إتبسطت .. و شغلته ... و إشتغل الفيديو و احكيلكوا بقى الموضوع

الفيديو كان فيه الاتى :

ناس كتيييييييييييير فى الشوارع و كلهم مش لابسين حاجه من فوق و ماسكين سيووووووووف و سكاكييييييين و حاجات كده بسلاسل كتير و امواس
بيضربوا بيها ضهرهم

و الناس كلها دم فى دم كل واحد قاعد بيضرب فى نفسه و اللى بيلطم و اللى بيضرب عياله يعورهم

تحس ان فى حرب بين كل واحد مع نفسه

اخوكم طبعاً كان مزبهل بس فهمت بعد كام ثانيه كده

الموضوع انه كانت عاشورا فى العراق و الشيعه بيعملوا كده علشان استشهاد الحسين و علشان هم اللى حاربوه

طبعاً انا كل ده مكنتش اخدت بالى ان مكتوب شيعه
انا اللى لمحته "مسلم و عيد " فى عنوان الخبر فدخلت

طبعاً اللى مكتوب المسلمين الشيعه .... و بما ان كتيييييييييير مننا مش عارفين مين هم الشيعه

يبقى اكيييييييييد محدش من الناس الاجانب اللى بتقرا الخبر دى يعرف الفرق بين الشيعه و السنه

يبقى كده هم بيتفرجوا على ايييييييييه ؟ على مظاهر الاحتفال بالعيد عند المسلمين

و انا هاحط فيديو فى جزء المصادر للى عايز يتفرج و الفيديو من رويترز طبعاً

مش الفيديو اللى انا شفته علشان اللى انا شفته مش لاقيه و بصراحه ده اهون كتييييييييييييييييييييييييييييير من اللى انا كنت شايفه

على كل حال هاتشوفوا و تحكموا بنفسكوا

و ابقوا قولولى لو اتقاللك المسلمين بيحتفلوا كده

انت هاتبص للمسلمين ازاى ؟؟؟؟؟؟؟؟؟

2)فيلم OSAMA

للأسف لازم احكى ملخص الفيلم بس اوعدكوا انى مش هاطول
و مش هابقى ممل على قد ما اقدر ;

فى يوم من احد ذات الايام كنت باتفرج على قناه افلام اجنبى

قوووووووم ايه .... قاللوا ان الفيلم اللى هايتعرض اسمه Osama

عجبنى الاسم و انتبهت كويس جداً للفيلم

و موضوع الفيلم ببساطه شديده:

ولد جميل كده اسمه اسامه عايش فى افغانستان اسمه أسامه والدته مش بتشتغل علشان
طالبان قفلت المستشفى اللى كانت شغاله فيها فى افغانستان
و والده و خالو ماتو فى الحرب مع السوفييت
المهم بقى مفيش حد يصرف و طالبان منعت خروج السيدات من البيوت من غير مِحرم!

اسامه كان بيشتغل علشان يصرف على البيت

لأن سنه كان قرب على سن الجيش طالبان اخدته و شويه ولاد فى نفس سنه علشان تدربهم
عللشان يبقوا جنود
الولاد دايماً كانوا بيضحكوا عليه علشان هو مش خشن كده و ضعيف
المهم حصل حاجه كده خلت الناس يعرفوا ايييييييه ؟

اسامه ... بــنــت !!!!!!!!!!!!!! ايييييييييييوه اسامه اصلاً بنت
بس عملت كده علشان تعرف تشتغل و تصرف على البيت و علشان ميموتوش من الجوع

المهم انهم ودوها لأسامه بن لادن علشان يحكم عليها و كان متوقع انهم يحكم بالاعدام زى كل اللى كانوا قبلها فى المحاكمه

و هنا يظهر الشيخ اللى كان بيعلمهم الدين قال لأسامه بن لادن انا هاخدها كزوجه رابعه و تبدأ رحله العذاب و باقى الفيلم مش هايتعرضله

الشاهد من الفيلم :

حاولوا يصوروا المجتمع الافغانى و على فكره الفيلم مش بلهجه انجليزيه و لا الممثلين امريكان...كله افغانى
المهم القيم اللى اتكلموا عنها هى :

- المرأه بدون الرجل"مِحرم" لا يمكنها الخروج من بيتها.

- اذا مات عائل الاسره الرجل قد تموت النساء جوعاً دون ان يشعر احد.

- اسامه بن لادن يحكم حتى على المصورين بالقتل و ده كان فى الاحداث.

- احد العقوبات كانت "دفن واحده ست حيه" وده زى ما اتقال انه حسب تعاليم الاسلام..!

- الاطفال بيتعلموا العاب غريبه كلها حروب و انهم مش بيعيشوا فتره طفولتهم بشكل طبيعى

- الشيخ معلم الدين يستخدم الواسطه للعفو عن البنت اللى فى سن احفاده علشان تبقى زوجه رابعه مع العلم ان زوجاته اصغر تقريباً من 25 سنه .

طبعاً الفيلم التعليق عليه كتير جداً بس دى القيم الاساسيه فيه

فى لينكات للفيلم للى عايز يتأكد من الكلام هاتبقى موجوده فى جزء المصادر إن شاء الله

ما هو المطلوب منى ؟

بعد الحيره الشديده فى كيفيه تناول الجزء ده من الموضوع

قررت انى هاقسم الموضوع اتنين جزء عليا و جزء عليكوا

1-الجزء اللى عليا

بعد اعاده النظر فى ما كتبته خلال يومين فى الكشكول .. الحاجات اللى شطبتها و الاجزاء اللى مكتبتهاش هنا اصلاً و الموضوع اللى انتوا قريتوه ده

وجدت ان : الغرب مش شايف الصوره الحقيقيه للاسلام لكنه شايف صوره مزيفه كلها
ليها علاقه بتفجيرات او اضطهاد للنساء فى الافلام او انهم يشوفوا
تخلف المسلمين فى الاحتفالات بتاعتهم

كل الحاجات دى كفيله انهم يبقوا شايفن جزء سئ مننا و هو الجزء الاصغر

لكنه الجزء اللى واصل و عارفين واصل ليه ؟ لأننا موصلناش الاسلام صح
و لأننا سيبنا غيرنا يوصله مع العلم ان فى امريكا بشكل خاص اللوبى الصهيونى ليه
سيطره واسعه على الاعلام و بالتالى صوره الاسلام اللى احنا مرسمنهاش سيبنا اعدائنا يرسموها زى ما هم عايزن

طيب و الحل ؟؟؟

مش هاتكلم على الاعلام العربى و لا الدعاه و لا اى حاجه من دول!

انا هاتكلم علينا احنا ...

مين فينا فكر فى ان صوره الاسلام واصله بشكل خاطئ و حاول انه يوصلها بشكل سليم ؟؟

طيب سؤال هل حد يعرف تعاليم البوذيه ؟؟؟ حد قرا فى البوذيه ؟

حد قرا فى الهندوسيه اللى بيعتقد فيها 14% من سكان العالم ؟

بلاش انت قريت الانجيل او التوراه ؟ انت تعرف ايه عن المسيحيه و اليهوديه ؟

لو اجابتك انك مش عارف حاجات كتير من دول

اعتقد انك لازم تفهم ان برضه الغرب مش عارفين حاجه عن الاسلام

بس لو انت عارف اى حاجه

هاقوللك عرفتها ازاى ؟؟؟؟

يا عرفتها لما واحد كلمك عنها على شات مثلاً او واحد صاحبك او حد قريبك

او شوفتهم فى برنامج بيتكلموا على البوذيه مثلاً فعرفتها !

شوفت موقع مسيحى دخلته فبدأت تقرا فعرفت شويه حاجات من ديانتهم

و طبعاً البرامج او المواقع او الكلام هايكون بالعربى

كذلك ... عايزين نوصل صوتنا

عايزين نوصل رساله عن ديننا ... عايزين نصحح مفاهيم احنا شايفين انها مش صحيحه عن الدين الاسلامى الجميل

لازم احنا اللى نروحلهم ... بلغتهم ... بثقافتهم ... فى مواقعهم ... فى منتدياتهم ... فى الشات

صدقونى اللى عايز يوصل لحاجه هايوصلها بس احنا اللى مفكرناش و مجربناش

انا هاقوللكوا و عن تجربه ان الامريكان مثلاً بعضهم متعصب جداً بس كتير فيهم كانوا

متفاهمين اوى ... الملحدين فيهم قابليتهم انهم يتناقشوا كويسه اوى
و من السهل جدااااااااااااا انك تهدم كل اعتقاداته فى خمس دقايق
بس انت حاول و جرب و انوى ان دى حاجه لله

انا باكتب الموضوع ده و احنا فى رمضان يعنى لو منويتش ده دلوقتى هاتنوى امتى ؟؟
و الاهم هاتعمل امتى ؟... مش هاقوللك تخيل لو ان حد اسلم على ايدك

بس على الاقل لو انت صححت لشخص واحد مفهومه عن الاسلام

انت كده فتحت الباب قدامه انه يتعرف اكتر على الدين ... انت كسبت واحد
حتى لو مش مسلم ... بس انت كسبته فى صف الاسلام ... على الاقل مش هايهاجم الاسلام ...
على الاقل مش هايرسم صوره مش كويسه عن الرسول عليه الصلاه و السلام
جميل اوى لما تلاقى حد كان معادى اوى للسلام بيقوللك
من الواضح ان محمد(عليه الصلاه و السلام) كان شخص عظيم و محترم جداً

صدقنى هاتحس بانك انجزت حاجه كويسه ...
مش هاقوللك ادعوا لللإسلام –رغم انه مش صعب- بس على الاقل وصل الحقيقه و وصل صوره الاسلام الصحيحه.

اللى انا شايفه
اننا نقدر نتكلم مع ناس على الشات مثلاً
ممكن ندخل على منتديات اجنبيه بيناقشوا فيها الاسلام
او بيهاجموا فيها الاسلام
نبدأ نروح احنا ليهم و نبدأ احنا اللى نصحح المفهوم
الخطوه الاولى اننا نبقى فاهمين الدين بشكل مش هاقول ممتاز
لكن على الاقل تبقى عارف تتكلم عن الدين
و عارف تتكلم بالانجليزى و مش شرط يبقى كويس
و لو انت شايف ان اللغه عندك مش كويسه نميها
و حاول تتحسن بنيه انك انك عايز تستفيد و انك عايز تستخدمها فى طاعه الله
و على فكره احسن حاجه تنمى بيها اللغه انك تتكلم مع حد اجنبى
ممكن اوروبى ممكن امريكى ممكن يابانى المهم انه مش عربى

يا جماعه احنا لازم نِوصل للناس دى
و لازم نكلمهم
على فكره من الطرق مثلاً انك تكلم حد على الفيس بوك
و استغلال انك عربى ده بيخلى عندهم فضول رهيب انهم يعرفوا عنك حاجات كتير
و هاتلاقى ناس بعد كده هى اللى بتكلمك و هم اللى بيضيفوك
بس انت ابدأ و حاول تتكلم
و ان شاء الله ربنا هايوفقك
يا رب معنى اننا نروح لهم و نكلمهم يكون وصل
و ربنا يوفقنا جميعاً

2-دلوقتى ده الجزء بتاعكوا

انا عايز اسمع اقتراحات
عايز اعرف انتوا شايفين اننا ممكن نصلح صوره الاسلام ازاى
و ازاى نقدر نِوصل للناس دى
عايزكوا تحطوا تَصور او تخيل اسيناريو ناجح علشان نقدر نوصل صوره صحيحه عن الاسلام


المصادر هنــــــــــا

آسف على الاطاله و بجد انا شيلت كتييييييييييييير اوى من الموضوع
و حاولت اختصر على قد ما قدرت
و يا رب يكون الموضوع ده دافع لأى شخص انه يقدم حاجه مفيده لدينه
و يكون دافع لينا هنا فى المنتدى اننا نحاول نوصل فكره سلميه عن الاسلام
ازاى انا سايبها لأقتراحاتكوا
و لازم اقول برضه ان الموضوع كله هو آراء شخصيه و ان رأيى صحيح يحتمل الخطأ
و اعتذر لو كان فى اخطاء املائيه "الكيبورد بتاعى معليهوش عربى و الكلام كتير"

فى النهايه تقبلوا التحيه ,,,
محمد علوان

[MESEE]

4- المصادر
-=-=-=-=-
1- أحداث و نقاظ تحت الضوء.

تفجيرات 11/9 : استعنت بمقال من Wikipedia
هنـــــــــــــا

تفجيرات ميترو لندن : استعنت بـ ــمقال من Wikipedia و آخر من BBC

تفجيرات مدريد : مقال من Wikipedia

الحادث فى اسرائيل : لا يحتاج الى مرجع او مصدر يكفى المشاهدات اليوميه

-----------------------------------
2- الإعلام الغربى ماذا ينقل ؟

من رويترز ننقل لكم اخبار العيد:
الفيديو ----- مقال

فيلم اسامه:
اعتمدت على مشاهده الفيلم فى المقام الاول
و راجت بعض الاجزاء ---
مقالات عن الفيلم ---- IMDB و Wikipedia

[فتاه الاسلام]

حجز مكان للرد

منور يامحمد

وربنا منور المكان كله

احلف كمان هههههههههه

[محمد الشريف]

اقتباس
المشاركة الأصلية كتبت بواسطة فتاه الاسلام





حجز مكان للرد

منور يامحمد

وربنا منور المكان كله

احلف كمان هههههههههه

[محمد الشريف]

الأخ الكريم / محمد

موضوعك رائع ولكن مكان مناقشته هنا يتعارض مع هدف

القسم فى عدم تناول الموضوعات السياسية بوجه

عام أو التعرض للأديان أو المذاهب

فالمنتدى اجتماعى بحت كالموضح والثابت فى قوانين قسم

النقاش ودعوتك الجميلة للرد على الغرب لبيان سماحة

الإسلام يحتاج إلى متخصصين فى شئون الدين خشية


الخوض فى خلافات بين المذاهب أو الردود غير الملائمة

المدركة بتفاصيل الدين والرد والتوضيح الملائم

فديننا الإسلامى قام على الحق وانتصر بالصدق ولم يقم

على العصبية حتى مع أهل الشرك والوثنية فى مهد

الدعوة وأمرنا الله تعالى :

: "وجادلهم بالتى هى أحسن "

وأن يكون شعارنا الصفح والعفو والكرم والحلم والمنطق

الهادىء والأسلوب الرزين والخلق الحسن والأدب المحمود

والاحترام المتبادل

يقول تعالى :

" أدفع بالتى أحسن فإذا الذى بينك وبينه عداوة كأنه ولى حميم

وما يلقاها إلا الذين صبروا وما يلقاها إلا ذو حظ عظيم "

وفى حدود ما أشرت لك به سأكتفى بهذ القدر

ويغلق الموضوع للأسباب سالفة التوضيح

مع تقديرى