حدوتة مصرية

Words Whisper · منذ /02-03-2011, 02:43 PM

بسم الله الرحمن الرحيم السلام عليكم ورحمة الله وبركاته

هاحكي لكم النهاردة حدوتة

بس مش صغنتوتة

هي حكاية شعب و أمة

ومش هقول كان يامكان

لأنه الحكاية لسه جوانا

تيجوا تسمعوا الحكاية ؟؟ ..........

حكايتي عن أرض اسمها مصــــــــــر

حكايتي عن أرض الكرامة والشرف

كانت أرض مليانة خيـــــــــــر

و أهلها كلهم طيبة و حب

زارها محتلين كتيـــــــــــر

لكن عمرهم ماقدروا ياخدوها

لأن كل اللي جاها مش عايز لها الخير

أرض الخير طردته بأهلها اللي كلهم خير

بإيد أولادها اتبنت

بدمهم و كفاحهم عرفت الأمن والسلام

و عدَّا الزمــــــــــــــــــــان

وفي يوم قريب من الأيام

خرج ناس مننا يقولوا الكمال مالوش وجود

وعايزين نصلح الغلط الموجود

قلنا عايزين بلدنا في أحسن صورة

و عايزين نوصل بها لأعلى مكانة

لكـــــــــــــــــــــن

اللي حصل مش كان أبداً خير

جه نهار على حبيبتنا وفعلا مش عرف يدفع مهرها

ناس قالت احنا مصريين وعايزين إصلاح

ناس طاهرة عايزة بكرة أحسن

دخل وسطهم كدابين مش عايزين إلاّ الدمار

نمشي في الشوارع نلاقي زجاج وطوب و حريق

دمــــــــــــــــار في كل مكان

حتى جوا الإنســـــــــــــــان

طلع المصري اللي بيحب مصر بجد

قال يامصريين احنا قلنا عايزين اصلاح

و الإصلاح بدأ وصوتنا اتسمع

مش عايزين فتنة وفساد

قال يامصريين اللي بيدَّمَّر هيبقى علينا وعلى أولادنا

و بلدنا مش اتبنت ببلاش

لكن الناس التانية قفلت ودانها

ومشيت متغيِّبة ورا شعارات كدابة

ورا شعارات خراب ودمار مش بيكتفي

لكن احنا وقفنا وقلنا لاء و لسه بنقول

والحكاية لسه ماخلصتش .......................

مش هقول توتة توتة خلصت الحدوتة

لأن حدوتة بلدنا عمرها ماتنتهي

مصــــــــــــــر يعني شعب و تاريخ

مصــــــــــــــر يعني قلوب و أرواح

مصـــــــــــــر يعني أنا و أنت و أهلنا

مـصـــــــــــــر ذكرها رب الأكوان في كتابه الخالد

عشان يكتب لها الخلـــــــــــود على مر الزمان

ومادامت أرض الخلود موجودة

هتفضل الأيادي اللي بتحاول تهدم موجودة

و هنفضل واقفين ندافع عن بلدنا

دي الحدوتة بتاعتي

وعايزة أقول لكل مصــــــــــــــــري

أي بلد هي مجرد أرض ومباني

بس العبرة بروح وقلب أولادها

وبلدنا بتنبض بروح أولادها

و أولاد البلد هما اللي يبنوا و يعمّروا

هما اللي يوقفوا بلدهم على القمة

زي ماعملوا ولادها في 73

و احنا مصريين ولازم نكون قد الشرف ده

*** أنا مش ضد التغيير ومش ضد شباب 25 بس الموضوع ان الحكاية بدأت طاهة بحب مصر و دخل فيها زي ماانا قلت عناصر تانية مش عايزة الا مصلحتها يبقى اللي بيحب البلد دي بجد و بيحب ناسه بجد لازم يقف الوقت وتقف اي تجمعات او اشتباكات لاتأييد ولا معارضة دم اخواننا هو اللي بينزف و هتبقى حرب بين اخوات .......

أنا بجد موجوعة أوي اوي اوي .........

misho · منذ /02-03-2011, 03:08 PM

الكل موجوع اوي يا سمسم والله
من منظر المصريين الاخوة اللي بيضربوا في بعض
من منظر الدمار والخراب والحرايق في كل مكان
من الخوف اللي اترسم في عيون اطفال
لازم نقف جمب بعض ونعمرها مش ندمرها
تسلمي علي موضوعك الجميل
تحياتي

Pǿm Ŧặặk Ŧőợk · منذ /02-03-2011, 03:15 PM

التووووووووووووبيك حلووو اوى
كلنا مجروحين وزعلانين ع اللى حصل
لان مصر مش تستاهل كل ده
حرام اوى مصرى يضرب ويموت اخوه المصرى
كلنا اخووووووووووووووووووات كفاااااااااااااااااايه بقى اللى حصل واللى بيحصل

Dr.nour · منذ /02-03-2011, 03:20 PM

مش عارفه اقول ايه يا اسماء ،،

ما عادتشى فيه كلام بعد الى بيتقال وبيحصل ف البلد ده

وربنا هيعديها على خير ان شاء الله ...

♥..pure · منذ /02-03-2011, 03:24 PM

كلمات صادقه نابعه من قلب حزين على بلده

كلنا بنقول يارب يعدى الايام دى على خير

وربنا معاهم وينصرهم باذن الله

دوام الابداع يا اسماء ,,,

دمعه حائره · منذ /02-03-2011, 09:53 PM

كلامك رائع سمسم وربنا يحفظ مصر وشعبها
وتعدى الازمه على خير
وانا مع التغيير والاصلاح وضد التخريب
ومصر هاتفضل عظيمه وام الدنيا
تحياتى وودى

مشتاقه للجنه · منذ /02-04-2011, 05:20 AM

كلماتك صادقه ومعبره يا أسماء

بس نقول أيه لكل الناس مصر تستاهل أحس من كده

دمتى بصحه سمسمه

ماتركس · منذ /02-04-2011, 06:05 AM

كلمات جميله يا اسماء خارجه من بنت مصريه بتحب وطنها

وربنا بعون الله هيرجعها ام الدنيا زي الاول واكتر كمان

DR.SMA · منذ /02-04-2011, 08:23 AM

كلامك جميل يا سمسم

وشعور طيب جدا

الي حصل فعلا مش قليل ابدا

لكن الحدوته مش هتخلص طول ما مصر موجوده

الحدوته هتكبر بايد ولادها كل يوم

لكن الي راحو من شهدا ومصابين بالالاف

دمهم مينفعش يروح هدر

بس مصر هتفضل بلد الامن والامان

مهما عدى عليها وطال الزمان

تسلمي على مشاعرك الطيبه

وده الطبيعي من كل مصري وكل مصريه

بيحبو بلدهم بجد

ربنا يديم المحبه بين كل المصريين والعرب والمسلمين ف كل ماكن

دمتي بأمان الله ورعايته

تحياتي

Words Whisper · منذ /02-18-2011, 07:19 PM

اقتباس

المشاركة الأصلية كتبت بواسطة misho

الكل موجوع اوي يا سمسم والله

من منظر المصريين الاخوة اللي بيضربوا في بعض
من منظر الدمار والخراب والحرايق في كل مكان
من الخوف اللي اترسم في عيون اطفال
لازم نقف جمب بعض ونعمرها مش ندمرها
تسلمي علي موضوعك الجميل
تحياتي

تسلمي لمرورك الجميل

واعتذر للتاخر بالرد

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
نكت مصرية نكت مصرية جديده نكت مصرية 2009 نكت مصرية روعه نكت مصرية اجدد نكت مصرية	محمد خطاب	نكت - طرائف - وناسة - فرفشة	8	08-04-2011 11:07 PM
حدوتة مصرية ( منتدى بنات مصر ) لما وقع أهى	~♥ Queen sozan♥~	منتدى يوميات الاعضاء	16	04-22-2011 02:49 PM
حكاية اسمها حدوتة مصرية	ليالى2010	يوتيوب - موقع يوتيوب - يوتيوب فيديو - مقاطع يوتيوب	0	11-20-2010 02:54 PM
يلا رحبو بحدوتة مصرية اللي هتبأة حدوتة المنتدي	حدوتة مصرية	منتدى الترحيب بالاعضاء الجدد	8	09-21-2009 04:44 PM
حدوتة الغـــــجـــر	egyptian coptic	مواضيع عامة - ثقافة عامة	2	03-22-2009 01:52 PM

الذين يشاهدون محتوى الموضوع الآن : 1 ( الأعضاء 0 والزوار 1)

..{ فع‘ــآآليـآآت المنتــدى }..

الإهداءات

حدوتة مصرية

بقلم أعضاء بنات مصر - حصري