عبقرى الشعر العربى

[a7med -3del]

نجم الثورة

واجمل شاعر ف الدنيا

هشام الجخ

ودى قصيدى من قصايده

24 شارع الحجاز



ادلعى واتبغددى واتفاخرى واتباهى


قولى لكل الناس ده عشقنى والله


لمى العيال حواليا زفونى


ظاظو عليا وحدفونى طوب


مانا اللى سبت عينيكى لفونى


وانا اللى استاهل كل يوم مركوب


فادلعى واتبغددى واتفاخرى واتباهى


ادى ضحية كمان فدا رمشك الساهى


موت الضحايا جزايا مانا اللى وديتك


ولحد حد ماوديتوش ولا حد وديتك


وقلعت كل سنينى على خسرك


دفرت شعرك عش جوايا


بايعت حكمك وابتديت عصرك


ووقفت ورا عرشك ومسكت هواية


موت الضحايا جزايا واهى كلها ضحايا


مين اللى قال الحب اخره عمار


الحب اخره نهاية فى رحايا


القسوة طاحنة والحجر دوار


فادلعى واتبغددى واتفاخرى واتباهى


واستنكرى من عزتى


واستهترى بجاهى


خلينى مضرب مثل من بعد هيبة ووزن


كوبى المرار ف العسل واملى الفرح بالحزن


يعنى انتى اولهم ولا انتى اول هم


ولا انتى اول سهم اتسنلى واتسم


لو تكشفى ضهرى تلقى السهام علامات


وانا زى زرع فى هوا وطا حيي وعلا مات


موت العلالي شرف بس اسمها موتة


مش عدل تبقى فى ترف وانا بطفح الكوتة


ما ياما نقسمهم واخذة قصاد واخذة


ياما لاء مواخذة توتة ياحدوتة


وابقى اكدبى براحتك وادلعى براحتك


طعم الهزيمة جزاء للى يزور ساحتك


وانا قلبى ياما غلب مش عيب يبات مغلوب


اهو برضه فيدتينا وكفرنا بيكى ذنوب


ولحسنا من شهدك وشربنا من ريقك


وسكرنا من كاسك وكسرنا ابريقك


وطعمنا من حسنك وشبعنا ببريقك


ومشينا فى طريقك ورجعنا ملو اليد


جرحى قصاد جرحك ولا حد ظالم حد


ولا انتى فاكرانا رجالة خايبانة


نبكى على النسوان ونسح فى بكانا


كنتى اسالى نانا اللى اسمها نانا


يدوب زعلنا يومين واهى دنيا لاهيانا


هابكى عليكى انتى


متكدبيش على الناس الناس دى عارفانى


قلبى خشب لو غطس بيقب من تانى


فمتحرجيش روحك وتقولى ده عشقنى


بدل ماصحباتك يقولولك ادى دقنى


حبى على قدك واحكى على قدك


وان جات سيرتنا فى يوم ابقى الزمى حدك


تتدلعى ماشى تتبغددى ماشى


وتقولى حبينى موت برضه ميجراشى


بس انتى من جوه فاهمة انى زمنك مات


وبقيتى زى اميرة قلبها شحات


لفى على اصحابى سبينى فى غيابى


قولى ان عمرك يوم ماوقفتى على بابى


لا كاويتى قمصانى ولا جيتى زورتينى


لا تعرفى مكانى ولا تعرفى تجينى


وانى يدوب واحد دايب فى دباديبك


عامل كما عيل شابط فى جلاليبك


وانتى ياعينى اوف زهقانة منى خلاص


عملتى زار بالدوف وسوقتى كل الناس


وانا برضه لازقلك


معلش حظك كده ربك ورازقلك


روحى ياشاطرة هناك انضمى للالبوم


انا كل عشرتى بيكى اتنين وعشرين يوم


عملتى نفسك حكاية


ومحبة فياضة ومخدة بكاية


وسهر وصهد وويل


وغنى وبكا ومواويل


فى اتنين وعشرين ليل


على اى حال


شكرا وشكرا ثم .......... شكرا


للقصيدة


قلما تاتينى يامراءة بافكارا جديدة

[a7med -3del]

هتفضل برضه الاستاذ
عشقى وفخرى
اعتزازى
هشام

[ساحر الأحزان]

كلماتك زجلية وجميلة

وتحمل الكثير من الكلام الواقعى

تحياتى عليها

[a7med -3del]

تحياتك للنجم الاسطورة هشام الجخ لانه ده منقول وليس بقلمى خالص
انا معرفش ابدا اكتب كده

[دمعه حائره]

من أجمل قصائد هويس الشعر العربى
استاذنا هشام الجخ رائع جدا مانقلت
بجد استمتعت جدا بقراءتها اخى
اتمنى كل فتره تكتب لنا قصيده من قصائده
تقبل تحياتى وتقديرى

[a7med -3del]

ده لازم
انا بقولها دايما ومقتنع جدا
انى مشفتش حد زى هشام
شاعر بالفطرة
ان شالله انقله حاجات
الوحيد اللى ممكن انقله غير كده هيكون بقلمى
تحياتى دمعة

[be with me]

دائما بين حروفك اجد روحا تتمزج بما بنا من وجدان وشعور يخرج لنا بروعه البيان ولك تمنيت ان لا تنتهى بى الكلمات فلا يسعنى غير قول الصمت فى حرم الجمال جمال فدمت بكل تميز وابداع ميرسي ليكي جد موضوعك اكثر من مميز تتحيتى اخى نونـــا

[a7med -3del]

مرور جميل يانونا
ودايما منورانى