ولد وبنت

[صوووت الحق]

يادى الخيبة و يا دى العار
احلامنا شوية غبار!!!!!!!!!
باعوا الثورة والثوار
باعوا بلد بتتولد
وقالوا ايه بنت وولد
شوفوا ال ماتوا فى الميدان
بضربة عصا طلقة رصاص ضابط جبان
بضربة سيف من فوق حصان
او تحت اقدام الجمال
ماتوا عشان احنا نعيش
مفكروش مسلم مسيحى او اى دين من الاديان
ايه ما تتحرق البنت هى والولد
مين قال عشانهم احنا نموت
او حتى نسكن التابوت
من غير كلام سكوت سكوت
فتنة وهبت فى البلد
مين يتعظ مين يفتكر
ثورة ايادى اتشبكت
وعيون بكت على الشهيد
وام واقفة بتنتظر يمكن يعود
علشان يبدل الهدوم
او حتى ياخد ساعة نوم
كمان شوية اكيد يعود
يا ناس يا هوه مين شاف ولد
بدر ف تمامه اتولد
ابنى حبيبى اسمه سعيد
قالى ياماما انا هنا ومش بعيد
اصل سعيد ابنى الوحيد
وشوش كتير بتروح وتيجى ياريت يردوا
يطمنوا قلبى يا ناس ال انجلد
طب مين يقول شاف الولد
اهم جايين كل اصحابه مقربيين
ايه يا ولاد شفتم سعيد
ليه الدموع وليه كمان بدوروا عنى وشوشكم
مات الولد مات الشجاع
مات علشان كل الشباب الطيبين
نصارى هما ومسلمين
آه يا بلد
فيكى اتولد ابنى وفيكى عمره اتجلد
لا مفيش دموع ولا خضوع
لازم ننادى باعلى صوت
واقفين هنا ولو نموت
هما كمان ماتوا علشان احنا نعيش
من غير طوارئ من غير شاويش
او حتى مخبر مفترى يشدنى
يكسر رقبتى يشلنى
عادى اوى تقريرى جاهز من زمان
مجرم خطير بياع حشيش
او حتى هارب من السجون
آه يا بلد بنت وولد
ثورتنا كانت فى الميدان
مش من زمان
لسه اهية على اللسان
وفى الشوارع بتقول كمان
عاوزين نعيش عاوزين سلام
حاكم نظيف بس ياريت ما يكونش زى نظيف زمان
نظيف بيعرف ربنا
يجيب لنا عدل وامان
آه من عدلى ال كان
قتل الولد علشان امام
اوحتى صحفى قال حرام
آه يا بلد بنت وولد
قالوا عبط قالوا جنون
ازاى نصارى ومسلمين متكافئين
ازاى وفى الثورة كده مترابطيين
وعلى الكنائس والجوامع اهم واقفين
يا كل الشياطين اجمعوا باسم النظام
اومال فى ايه هيتلهوا ويفكروا
لما الكنائس والجوامع يتحموا ويتعمروا
لازم بسرعة نشوف وسيلة لهدمهم
اسبوع كمان ياكلوا سوى ويشربوا ويهرجوا
آه ه ه ه ه ه ه ه ه ه ه يا بلد
كل شياطين البلد تحضر هنا
تحضر اوام وتجيب نيران
يالله يا نار شعللى
وانتوا انفخوا بلا توان
وفكروا ازاى تكون كل البلاد مافيهاش امان
مسلم مسيحى او اى دين من الاديان
الفتنة هى المهرجان
آه يا شيطان يا ابن الشيطان
اشعل حريق كنيسة جامع او طريق
غير معالم ثورة شباب
خليها نار ورا كل باب
آه يا بلد
اصحوا بقى بنت وولد

[Remaas]

كلمات جميله جدا تسلم ايدك انتظر كل جديد لكى

[احمد الحلو]

وجعٌ رُسِمَـ بريشةِ حرْفٍ,





ظُلْمُـ زمنٍ !





آلصَبرْ




اختيار موفق وراقي



ربنا يسلم مصر واهلها



تحياتي مع باقة ورد



مررت هاهنا انا 000احمد الحلو

[lolo&nono]

الصراحه بهنيك علي ابدعاك بجد كلماتك روووووعه وربنا يشهد عليا مع احترامي لباقي الاشعار ان كلماتك احسن كلامات قرتها في ثوره 25 بجد رررررررررررروعه

نهى

[sεηυσяιтα ησOση]

خاطرة رائعة تسلمى

[صوووت الحق]

مشكوره كتير

[فارس الكلمة]

أجمل ما نقرأ عندما تكون الكلمات مكتوب بإحساس صادق
نعم هنا كان النداء فى غاية الصدق
لذلك خرجت الكلمات مؤثرة ولها رونق الإبداع
مشكورة على الإبداع وننتظر منك كل جديد ومبدع
تقبلى مرورى
فارس الكلمة

[صوووت الحق]

تسلموووووووووو كلكم