ساعة اولي حرية

[رفيق السحاب]

في لحظة خرجت كل الجموع
عدت علي الشوارع
نادت علي كل البيوت
خرج الشباب والشيوخ
خرج السليم والقعيد
الميدان كان محتاج دم
والميدان عشان نوصله كان لازم يندفع مهر
والعسكري سمعه بيقول امرك يا باشا
هرمي عليهم رصاص حي
والشعب في وقت الثورة كان حي
ما همهوش مدرعات ولا موت جي
اترمينا علي طول في حضنك يا مصر
ما اللي يحضر مصري ما يعرفش يصرفه
وفجاة طلع الفجر من المعتقل يجري
يلحق اخر ثورة في التاريخ
يحشد لها شعب علم الدنيا
سطر اول ابجدية
رسم اول لوحة فنية
زرع لما مكنش فيه ميه
واليوم مد المصري جذوره
افتكر انه ليه في الارض اصول
عرف انه في البشرية وزنه تقيل
انه من غير المصري الدنيا متتعرفش
ما يبقاش فيها ونس
ولا صحبه ولا خال
يا مصر يا ام الدنيا
اسمحيلي اتغذل فيك شويه
يا ام طرحه وجلابيه
وضفاير علي النيل مرميه
بتغني كام موال علي كام اغنية
وكانت حضره هناك السمسميه
هناك في السويس قلها اول شهيد
هرجع هواك يا مصر اللي اتحبس
نفسك اللي اتقطع
خنقه كانت في ضلمه بتدور
خلتنا شهود زور
وفجاة شفنا في التحرير خيط نور
بينسج شمس وبيمد بحور
ما احلك يا بلدي ولو ارضك بور
ما تبطلش تحلم يا مصري يا منصور