ربــاعيـــات الشاعـر علاء البلتاجـي

[علاء البلتاجي]

بسم الله الرحمن الرحيـم

علي نهج الراجل العظيـم

فيلسوف ولاد البلد ( صلاح جاهيـن )

مع الفرق بيني وبينه طبعااااااا

***

شـعوري ليك ياعـمنا هالخصه فـي حرفيــن

ال (ح) وبعــدها (ب) ورا بـعض متصلــين

وبجد صادقة مشاعــري من قلبي و بأحســـاس

ياعم كـل النـاس يا صلاح يا ابن جــاهيــن

********

(الجزء الأول)

(1)

في قطه قابلت كلب و بالحب اتوصلوا

ولما شافت قط سابو بعض و انفصلوا

و لأنه طبعا كلب ماكرهش قد ماحب

والقطة بان طبعها و الكلب بان اصله

عجبي

(2)

غمت عينيا سحابة في الدنيا بتخبط

والقرد عاش في الغابة فرحان بيتنطط

أتاري ان الغابة مافيهاش وحوش وديابة

دول طيبين و غلابة وانا كنت متلخبط

عجبي

(3)

أرفعي يا نعامة راسك بلاش خجـل وكســوف

واجهي عيون ناسك و كفاية جــبن وخــوف

مايهزكيش ريحك دي البـــركة من ريشــك

و الـكل داق كاسـك و الـكل جتله ظـروف

عجبي

(4)

بطل و مجــرم حرب و أبنـه خرب مالطـة

وحطوا وش الشـعـب في مــدفع الشرطـة

قـال له تمام يا جــمال كده كله عال العـال

أسبقني بالأمــوال و انا جــاي بالشـنطـة

عجبي

(5)

بايـــن عليـه مـجـنـون و دماغه مـلحوسة

مخلفـات فرعــون أزاي يكــون موســي

الرشــوه ف الفــيزا وخـاربها في الجـيــزة

فيـنـك يابو حـفيـظة تـديـلنا كام بـوسـة

عجبي

(6)

نسناس بيــأكل مـوز فرحان و زاد لـعبه

وأنسـان بياكـل لوز أكـل وراه صابــعه

و حاجـه غريبة بشكل بعد أما خلـص الأكل

واحد شبـع من المـوز و التانـي زاد فجعـه

عجبي

(7)

ليجزاس هناك في أشارة شكمانها جاب دخان

والناس هنا في الحارة جالها في صدورها جنان

مش حقد لا من الهم و الكحهة طلعه بـدم

ومرضها زاد بالشم و الشرب والأدمـان

عحبي

(8)

انا وحيــد فـي دنيتي و ع الوحده متـعـود

ولـما بـــخرج منــها الدنيـا تتسـود

ف الأحسن ابقي وحيــد لو عايز ابقي سعيـد

لأن وســـط النــاس الوحــده تتـزود

عجبي

(9)

معلش بقي يا جماعـه في حكايه وجعانـي

خلوا الشرف ولاعه و بيولعوها تانـــي
أستوردوا أجزاء قطع غيـار وغشــاء
بقي هـي دي الأخلاق الستر علي الجانـي

عجبي

(10)

مريض بمرض النفس عنده أضطراب وجدان

مع أنه كان بالأمس سليم و مش عيــان
كل الكلام بيعيده و مفيش علاج هـ يفيده
لأنه علي أيـــده خلصت حياه أنسـان

عجبي

(11)

الدش فوق السطح بيدور يمين وشمــال

علشان يوري الكل أنه بصحيح شغـال
سبب الصداع والوش و برامجه كلها غش
والناس تخـاف و تكش علشان تربي عيال

عجبي

(12)

طبعك غريب و عجيب يا مذكر الأنسان

في سبع لما يخيب بيركبوه النسوان...!!!
يقل من هيبتـه و يتاطــي من خيـبته
ومقدرش أوضح عيب ليزعلوا الخرفـان

عجبي

(13)

تعبت من التفكيــر في الدنيا والعيشه

عقلي خلاص هيطير بقي أخف من الريشه
شغال كتير و أحتـار و تاعبني ليل ونهار
وياريته كـان بزرار أو كوبس أو فيشه

عجبي

(14)

سألوني ايه بيعجبك ع الارض او فى الكــون

اناقولت أحب الورد علي كل شكل ولــون

و لأني كــنت صريح قالولي لاء بصحيــح

طلعت حتة شاب اهـبل عبــيط مــجنـون

عجبي

(15)

الحزن زي الرمح ضرب قلبي علي سهوه

ف أخدت بعضي الصبح و قعدت علي القهوه
طلبت قهوه و شاي و سئلت ليه وأزاي..؟
الفرح قال مش جاي و رد ليه الدعوه..!

عجبي

(16)

طبعا فراق الضنا شئ صعب ع الانسان
دوقـت مرارتـه انا وقتلني مرة زمـان
وعوضي كان بنتي روح قلبي و حبيبتي
و أتمني بكره أشوفها بالطرحة والفستان

عجبي

(17)

خد مني حكمه بسيطه و جربهـــا لوحبيت

هات عقربتين علي الحيطه مع حرمتين في البيت

ما بين خنــاق و هزار ديمـا تعيش في مرار

و يهدوا فوقك الدار و فوق أللي كانوا عالحيط

عجبي

(18)

من فوق نيران الظلم أحلامنا تتبخــر

و الظلــم لما يعم في ناس بتتسخــر
و الظلم علي ودنه و نايم علي ودنــه
ياهل ترا في سجنــه دلوقتي بيشخـر..!

عجبي

(19)

بنده عليكي كتير موصلكيش صوتــي..؟

لا يعني كنت هـ طير ولا كنتي هـتموتي
سيبتيني وقت الجد و قت أما حيلي أتهد
قـادر أللي خلق الأرض ينقذني منحوتي

عجبي

(20)

يا كمنـجة ليــل و نــهار بتبكي وتسحي

قطعتي ليه الاوتار في بكاكي علي جرحـــي
بكره تقولي ياريت ما حزنت يوم و بكيــت
دهأنا نفسي كنت نسيت ما تنسي و تسامحي

عجبي

(21)

عصفورة حـبـت تعـلب فشـدها لـفخـه

وأكلهـا لحـم و دم و قلبهــا شرخـــه
تـعـلب المكــار طـلـع كمان جـبـار
مصمصها جلد و عضم و الريش كمان سلخه

عجبي

(22)

ياديب بتاكل فريستك و هي كـانت حيــة
ياهل تري ب غـريزتك الرحمة ممحية.....؟
قلبك غريب و عجيب أزاي مافوهش حبيب..!!
ف رد قـــالي الديــب لدعتني فيه الحيـة

عجبي

(23)

ايه يعني هبقي وحيد ما بخفش و أتهدد

لا انا يعني هنقص أيد ولا أيــد هتتذود
لو فاكره و انتي بعيد هرجع بلوي الأيد
مخك ده راح لبعيد ما انا قولت متعود

عجبي

(24)

لوحد عنده جنيه بيسوي بيه الأهوال

و اللي يشيل كارنيه بينحني له رجال
ضمايـرنا متباعـة و الفـقـر شماعة
بالزمة يا جماعة ده اسمه كلام يتقــال

عجبي

(25)

بتطلبي رجوعك وتقولي عفو سمـــاح

لا وقفي دموعك المكياج في وشك ساح
أخلاقي مش سامحه غير أني اقول بجحه
بدموع عيون واقحه و كمان دموع تمساح

عجبي

(26)

واحد وشاف بعينيه غـزالـة كانت شـارده

شال الجبل بأيـديـه و من تحته جـاب ورده
وأستـني رد جميـل قالت له ده انت بخيـل
جدع عريض و طويل و ماجبش غير واحدة

عجبي

(27)

من أجل نزواتي باضحي بضحايا
وبادوس بشهواتي علي قلبي وصبايا
ونسيت معاد أجلي و دوست علي مهلي
بـ أيديا و برجلي في دنس الخطايـــا

عجبي

(28)

عجبي علي ده زمن و منه كان عجبي

عايش وبدفع ثمن ذنوب ماهيش ذنبي
جــراح بعديها و سنين بقضيــها
وعينيا في عينيها وبتعدي من جنبي

عجبي

(29)

الفيلم ده كوميدي و جو قديم و رخيص

و انا بردو مش هندي ولا واد و عيل سيس
اسطوانة مشروخة و قديمه و منسوخـــه
بالكدب منفوخة و بتقولي جاي لي عريس

عجبي

(30)

عيل يا دوب بلية شايل في جيبه سلاح

و كأنها ماديلية او سلسلة مفتـــاح
فاكرهـا قصافـة و واخدهــا بلطافة
والشرطة شفافة بعد ما كانوا أشـباح

عجبي

(31)

لما انت وحش الشاشه و شريف و شاب تمام...!
طب خوفت ليه من الباشا ودفعت رشوه حرام..؟
في الشرطه ناس عــوره وأتفضحوا في مناوره
و انا كنت في الثــوره وكنت انت في الحمام

عجبي

(32)

ماشي و بلف الكون علي رجلي بتمشي

فرحـان سعيـد ممنـون و بدقه بتـعشي
بتناسي أني حزين سديت وداني الأتنيـن
بودن طيـن و عجيـن و بصدر الطرشـة

عجبي

(33)

ما أطلعش نمرة أتنين و بقـــولها وأتحدي

و بقــولها للأتنين في حــدود ماتتعدي
مبصوم لي بالعشرة واد عشرة على عشـرة
ضرباتي حرة مباشرة مش هجمة مرتــدة

عجبي

(34)

الصـحـة رايحة بـلاش و العمر بيعـدي

ويدمر الخشخاش ف مخي و في كـبـدي
و فصوص كلاوي تدوب و باقول قدر مكتوب
و ازاي اكون مغصوب و انا مشتريه بيدي

عجبي

(35)

قال يعني كده موضه و شياكه وسط الناس

دي عمايلكم السوده بتجرح الأحسـاس
بنات بتستعبـط و رجاله فيهـا نتلخبـط
ببنطلون متسقط و يصدرولنا لبــــاس

عجبي

(36)

ما فرحت مرة في حد و انا غالبه في الأخر

وكلامي فعلا جد مش كـدب ولا ساخر
ف سكوت قـافل بوئي رجع حـلال حقي
ولا جيبت ولا أنقي خيــار من الفاخـر

عجبي

(37)

عصيتي طوعي كان ردي جــاهـز

تكسير ضلوعــي بنا الحواجــز
لا انا فيـا علة ولا مــاسكه ذلة
ولا أقبل رجوعي لو حتي عـاجـز

عجبي

(38)

حريم كده بلاستيك و رجال تجيب أحباط

الذمة فيها أستك أما الضـمير مطـــاط
السوسه و الوسواس مابيعرفوش أحســاس
و عايشين في وسط الناس البومة والوطــاط

عجبي

(39)

بالكدب و التزوير بقي نـجـم جيــل ياشباب
و يشهد التحرير علي الجـزمه والقبـقــاب
ياعم نجم الجيل في نجـــــوم ما ليها مثيـل
والكينـج أسمه منـير و الهضبه عمرو ديـــاب

عجبي

(40)

يا بحر زاد جرحك في صاحبك البحـــــار
ليه ساقتني من ملحك و انا حلقـي كله مـرار
الـغـدر فيك عـاده و القسـوه مـعـتـاده
و ملحـك مـراره زيــاده عن علقم الصبار

عجبي

　

(41)

الشعب له طلبات مش غاوي فالأضراب

ولا حب في اعتصامات ولكل شئ اسباب
الثوره كانت سلمية و التانية دي عكسية
من حزب من الحرامية علي شعب كح تراب

عجبي

(42)

عملت فيها عيان بالمكر والتخطيط

ده السجن للجدعان و مسيره ليك ياحويط
عملت فار يا جبان ما لكل وقت أذان
ثعبان عمل تعبان وفاكرنا شعب عبيط

عجبي

(43)

بفلوسنا يلعب لعب و بعملة صعبة دولار

ده العد فيهم صعب معرفش كام مليار
معقول حرامي و لص ده عنده عزة نفس
ده حر ماله او ورث مع انه كان طيـار

عجبي

(44)

شجـره و فروعها ف سمــــا عاليــة

طرحت أمــــل بس الامــــال غالية
ومنين أجيب المــال و انا فقيـر الحــال
و الفقر هد جبال حتي الجبال يا فقر مش خالية

عجبي

(45)

ف البحر كنت بعوم و القرش حواليا

أمل النجاه معدوم و مفيش معديـه
ومره وحده بقوم أتاريه كبوس محلوم
نوم العصاري ده نوم كوابيسه اصليـه

عجبي

(46)

أرجع لصومعة يابرادعي مفيش مكان

بلجام و بردعة متساق من الأمريكان
يا عالم ف النفـاق و مغرق العـراق
هيرشحوا عـلاء أقله انا مش جبـان

عجبي

(47)

لأي زوج او زوجه ف الدنيا مبتدئين

حتعدلوا المعوجه لو كنتوا متفـاهمين
مركب و لها ريس و التاني بيشاوره
و أن فضلوا يتحوروا هيغرقوا الأتنين

(عجبي)

(48)

حتكسب أيه من الدنيا يالي جمعت المـال

من غربه لتانيه و تقول ده رزق حـلال
فاكر النهايه سعيده يا وحيد ف تنهيـده
وسيبت ست وحيده و يتمت بدري عيال

(عجبي)

(49)

سرحان ف أحوالي و أيديا علي خـدي

مـع أن ما جرالي لا بأمري ولايـدي
هيفيد بأيه التفكـير لا هو حل ولاتغير
ما انا ليا رب كبير و بأذنه بكره هعدي

(عجبي)

(50)

معلش أصلي صريح و أللي حصل مش سهل

و أللي كلامه أبيح ما يقولش أدبي ده جهـل
الشعر لو في الجنس يبقي كلام للهلــس
و دي ناس ضعيفه النفس و بردو الغلط علي الأهل

عجبي

[البرنس رامى]

جميل ماقدمت أخى علاء

راق لى ماكتبت هنا

اتمنى لك التوفيق من كل قلبى

احتراااماتى

[zeanalabden]

الى شاعرنا الكبير علاء
====
بجد روعه ثم روعه
لك التميز والاجاده والابداع

[sεηυσяιтα ησOση]

رباعيات اكثر من رائعة

ابداع بلا حدود

بالتوفيق استاذ علاء

[SiLver Spectra]

و الله انك مبدع
مجهود عال جدا
واضح انك كاتبهم و باذل فيهم مجهودك من زمان
في انتظار مزيدك ,,

[مِسكُ الشَهادة]

أخي الحبيب علاء ...
بجد إنتا إنسان مميز ورائع فيما تقول
تصف الحدث وكأنه اليوم ...تتأمل ببريق ِ
مستقبل ٍ قادم عسى أن يتغير الحال ...
نعتنق في مضمون حروفك ما نسعد به
ونفتخر ...أنت مكسب للشعر ولمصر ولمنتدانا
تقبل تقديري وإعجابي برونق ِ ما تصنع هنا وهناك ...
أخوك ف الله ...خالد

[DO3AA]

روعه روعه روعه
ما شاء الله بجد جميل جدااا
يمكن مفهمش فى الرباعيات اوى لكن هسميها مقاطع مثلا
فى اكتر من مقطع عجبونى جدا جدا جدا
و سؤال بس
هو حضرتك بتنشر كتاباتك و لا لا؟؟
يعنى على اتصال بالشعراء المشهورين ولا حضرتك لسه فى البداية؟؟
ربنا يوفقك و يزيدك
تحيااااااااااتى ليك
و دااااااااام ابداعك

[sokara]

مااروعها من كلمات اعادت الينا زمن المبدع صلاح جاهين
فحقا لمست بكلماتك نفحات من روائعه

شكرا لاابجديات حرفك التى انارت المنتدى بروعه احساسك
دمت بخير ودام نبض قلمك الماسى
تحياتى والتقيم والتثبيت

[ساحرة الليل]

سلمت يمناك اخى روعة

[رنين]

بجد استمتعت جدا بقراءه شعرك
تسلم اناملك
وتستحق لقب شاعر حقا
تحياتى لك