حكاية عويضه أوتوماتيك ومسعدة أستاند باى

[عادل طه]

تقع احداث هذه الحكايه فى عام 2099

الحلقه الاولى

فى جلسة رومانسيه بين عويضه ومسعدة فى الحديقة الدوليه لقرية صفط اللبن جلسا يتناجيان وقد ركن عويضة الموتوسيكل الرهوان بجوار أحدى الأشجار وأفترشا النجيلة الخضراء وأخرجا سندوتشات الهمبورجر والسوسيس ولفة الفجل والجرجير ليأكلا سويا لقمه على ما قوسوم
عويضه> عارفه يابت يا مسعدة..أنا بحبك جوى.. جوى.. ورحمة دادى العمدة
مسعده: مصدقاك يا عويضة من غير ماتحلف برحمة باباتك العمده ..بس أنت مبلط فى الخط ومش عايز تاخد خطوة لجدام ونتجوز أحنا بجالنا خمس سنين مخطوبين وأنت محلك سر
عويضه: مين جالك كده ..تفى من خشمك يابت.. ده أنا بأعد الأيام والليالى علشان أشوف اليوم أللى يجمعنا سوا فى بيت واحد ..خدى حتت المخلل دى
مسعده> يا خويا عليك.. أسمع كلامك أصدقك أشوف أمورك أستعجب..
عويضه> أصبرى يابت دى كلتها سنه وتعدى جوام.. ونطول المراد من رب العباد أيكش أن أمك مصربعاكى وعماله تزن فى ودانك ..ون ون ون.. حتجوليلى على أمك
مسعده> ما تجبش سيرة أمى أنا بقولك أهه يا عويضه ..أنا أللى بكلمك..الدار أللى حنسكن فيها وخلصت وأتحط فيها العفش كمان مش عارفه أيه أللى مأخرك وعمال تماطل فى الميعاد تكنش رجعت فى كلامك ياوله
عويضه> أرجع فى كلامى أزاى يعنى ..هو العبارة أن فيه شوية حاجات ضروريه ولزما أجيبها قبل مانتجوز
مسعده> أنا شايفه أن البيت مش ناقصه حاجة ياعويضه
عويضه> أزاى بجاه ..ناقص الديش الطاير والرسيفر أبو ساعة والبلاى أشتيشن الأمريكانى والديب فريزرأبو كاتينه والميكرويف لتحميص البتاوى والأوتومبيل أبو ست عجلات ومقطورة ..عايزه تتجوزى من غير أتومبيل يا مسعده علشان الناس تاكل وشى ومن غير تليفزيون فلاتن 70 بوصة ياخى لع وألف لع مش عويضه أبن الحاج محروس أوتوماتيك أللى يبقى مجلته فى البلد كولتها.. ده كان زمان ياشاطره أيام ستى وستك سنة 2009 فى الأيام الفقر أللى كانوا عايشينها ورضيين بحالهم ويكملوا عشاهم مسلسلات وشتيمه فى الحكومه
مسعده> طب عندى فكرة ماطروح تشترى أللى ناقصك بالقسط وسدد على مهلك
عويضه> أنا أشترى بالقسط مش حيتبجى حاجة نعيش بيها يا فالحة
مسعده> أنا بالعربى كده مش لادد عليا الحال ده أحنا كبرنا يا عويضه أنت داخل على خمسين وأنا قربت أكمل الأربعين عايزه ألحق أخلف لى حتت عيل أفرح بيه
عويضه >هو كل همك على الخلفه ما تخفيش ياختى على نفسك الحقن الجديده فى مركز تفسيح الأسرة دلوقتى بتخلى الستات تخلف على الستين وأقربها مراة خليفه أخويا أهى لسه مخلفه على 67 سنه
مسعده> بس بيقولوا أن الحقن دى بتجيب العته والعبط والجنان يا عويضه بعد سن التسعين مفيش أحسن أن الواحده تخلف طبيعى
عويضه> همك كله على الخلف ماتقلقيش نبجى نعملك أستنساخ عند الدكتور( أبو الحسن كربونه) فى البندر أحسن من الحقن ..هو الأستنساخ مكلف شويه أنما بجى عشان خاطرك كله يهون ماتشليش هم ..هو حيجى أعز منك يا مضروبه..هههههه
مسعده> لا بجه أنا مابحبش الأستنساخ أنا عايزه أخلف زى أجدادنا وطبيعى زى ماربنا خلقنا ولا عايزه حقن العبط ولا الجنان أيه رأيك بجى
عويضه> يابت أنت مخك راكب شمال ليه ..أكيد ما بتخديش حبوب الزكاوه وتكبير المخ
مسعده> مابخدش حبوب القطران أللى بتقول عليها دى.. آخر حبايه أخدتها من شهرين
عويضه> عشان كده مزرجنه ومخك قافش معايا.. طب ما قولتيش ليه كنت جيبتلك شريط من السوق السودا على كولن خدى حبايه من بتوعى دلوقتى وأستهدى بالله
( تأخذ مسعدة حباية من عوضين وتجلس وهى مبلمه )
عويضه> مالك يابت مابترديش ليه ..(يضربها على ظهرها ) أنطقى يابت أيه أللى جرالك
مسعده>مافيش أنا حاسه أن نفسى غمه عليا يا عوضين قوم بينا روحنى دارنا
عويضه> حتعرفى تركبى ورايا على الموتوسيكل الرهوان
مسعده> أعرف بس ماتجريش ورحمة باباك العمدة
عويضه> مانتى عارفة السرعة الأولانيه على 120 والتانيه على 180 والتالته على 240 أسوق بيكى على 120 وأمرى لله أمسكى فيه كويس يابت ..فوووم.. فوووم

الى اللقاء مع الحلقه التانيه
لو كانت عجبتكم الحلقه دى

[عادل طه]

.................................................. ...................

[بسمة العمر]

هههههههههههه
جميلة خالص
ياعادل
يسلموووووووووووووووو