هل ما يحدث في بلدنا ثوره حقيقيه ام فوضي مأساويه..( مسابقه برنامج الرأي رأيك )

[king lion]

أحبائى أعضاء المنتدى الكرام برجاء ربط الأحزمة والأمتناع عن التدخين
فسوف تقلع رحلتنا رقم.... بعون الله تعالى للوصول إلى ماهية هل ما يحدث فى مصرنا الحبيبة

ثورة أم فوضى

ولكى نصل إلى المضمون الصحيح للجواب فعلينا بالأبحار بعيداً ولنفرد أشرعتنا ولتنطلق رحلتنا المثيرة

فى البداية علينا العودة إلى تاريخ 25 / 1 / 2011

ذلك اليوم الذى خرج فيه ملايين الشباب المصرى دون تنظيم من إى جهة ودون توجيه من إى مخلوق ودون إى قائد كان قائدهم هى تلك المشاعر والهموم المشتركة فى تدنى أحوال مصر العظيمة وأهدار الكرامة المصرية فى الداخل قبل الخارج ومعاناة جميع أفراد الشعب الكادح فى الحصول على لقمة العيش التى توجه كثيراً من أفراد هذا الشعب للحصول عليها من صناديق القمامة


تنكيل وزارة الداخليه بالمصريين وأهدار كرامة المواطن المصرى دون أسباب غير الأستبداد والظلم والمحافظة على النظام الفاسد

كانت تلك الشرارة التى فجرت ثورة الشباب المصرى واللذى رفض ذلك الخنوع نزل الشباب الى شوارع مصر وميادينها للمطالبة بالحرية والعدالة الأجتماعية التى انقرضت منذ عقود مضت

صمد الشباب الثائر ضد جميع انواع القمع والتنكيل التى جرت فى ذلك اليوم ومن ثم جاء يوم الجمعة 28 / 1 / 2011 والذى كان يوماً حافلاً يوماً لا يمكن أن ينساه كل مصرى نزل فى ذلك اليوم أو كل ظالم من رجال الداخلية فقد فاض الكيل بالشباب كانت جميع المظاهرات تنادى سلمية سلمية ولكن آبت صدور الظالمين من وزارة الداخلية بقيادة حبيب العادلى وتوجيهات المخلوع إلى وئد تلك المظاهرات وقمع جميع المشاركين مهما كان الثمن

وكان لهم ما كان وتوالى العنف الدموى دون شفقة او رحمة على ورود وزهور هذا الوطن الغالى الذين التهبت حناجرهم برد الكرامة المصرية وأسقاط هذا النظام الفاسد الفاسق الذى يشرب من دماء شعبه ويسحق بسمات الاطفال وينكل بهم

ما فعلوه ذلك اليوم كان بمثابة زر تفجير لقنبلة ذرية تفوق قنبلتى هيروشيما ونجازاكى
تفجرت فى صدور الشباب الغاضب ليسحق كل صورة من صور الظلم وكانت تلك الصور ممثله فى أقسام الشرطة ومبانى لأمن الدولة ومبانى الحزب الفاسد
عفواً أقصد الحزب الوطنى

وتوالت الأيام لتلك الثورة البيضاء الناصعة وسقطت وزارة الداخلية التى كانت تعمل لحماية النظام ولم يكن فى الأمكان السيطرة على الموقف حين ذاك فالشعب خرج كمارد عظيم من ذلك القمقم الذى حبس فيه لعقود طويلة

حاول النظام الفاسد والمخلوع تهدئة الأوضاع بشتى الوسائل الممكنة وأعطاء مسكنات واهية ولم يفلح ذلك ولم يتبقى إلا التنحى عن الكرسى وكان ذلك

وخرج المجلس العسكرى ليتولى أمور البلاد فى ما نطلق عليه المرحلة الأنتقالية للبلاد

وعد بأمور كثيرة فهل تحقق منها شىء ؟

سؤال يدور بخلد كل أنسان عاقل ؟

من اللذى أطلق البلطجية والخارجين على القانون إلى شوارع مصر وما هو الهدف من ذلك ؟

لو فكرنا قليلا سوف نرى أن النظام الفاسد لا يتمثل فى شخص أو أثنين بل هم ألاف مؤلفه تعيث فسادا فى أرض مصر

هل يقتنع أنسان عاقل أن قواتنا المسلحة والشرطة الحالية والتى لم يتغير فيها أحد إلى الأن لا يستطيعون أحتواء الموقف وحصد جميع البلطجية والخارجين ومصاردة الأسلحة النارية التى معهم فى غضون شهر على الأكثر

هيهات فلو كانوا يريدون ذلك لفعلوا دون تردد ولكن هم لا يريدون ذلك فى تلك المرحلة

أن الفوضى التى تعيشها البلاد فى الوقت الحالى يلقى بها جميعاً على كاهل المجلس العسكرى والحكومة الحالية دون غيرهم

سوف يقول الجميع نرى يوم بعد يوم خروج المظاهرات وأضراب بعض العمال مما يوقف سير العمل وعجلة الأنتاج فى البلاد

فنرد عليهم ونقول

هل حققتم بما وعدتم به أبناء مصر منذ ثمانية أشهر
لم تحققون إى شىء ملموس يشعر الشباب او المواطنين بأن مصر تسير فى الأتجاه الصحيح وأن الثورة التى دفع ثمنها شباب مصر من دمائهم الحرة الأبية لم تحقق إى شىء إلى الأن

مسرحية هزلية فى محاكمة تماطل وتهدر دماء أبناء الوطن التى سكبت على أرض مصر عنف غير مبرر ضد أهالى الشهداء

يجب أن يتوقف كل ذلك بمحاكمة ثورية تنهى هذا الوضع المخجل وتقضى على اسس الفساد فى البلاد دون رحمة

يقول البعض أن الرجل قدم لمصر الكثير والكثير وأنه لم يكن يعلم بأمور البلاد منذ عشر سنوات

فنرد ونقول

هذا حديث البلهاء فكيف لرجل لم يكن يحكم ولا يعلم أن يرشح نفسه فى عام 2005 لفتره رئاسة جديدة إلا أن لم يكن حاكما يؤهل نجله لتوريث العرش وأنه على دراية كامله بما يحدث الحاكم المغيب لا يستحق الحكم

جميع الأحزاب ركبت على أكتاف شباب الثورة ولم يكن لأحد فيهم الفضل فيها مطلقاً بل هى ثورة خالصة للشباب المصرى دون أى أنتماء لأى تيار سياسى

حالة الأضطراب التى تعيشها مصر الأن هى من فعل فلول النظام ويشاركهم الوزر فيها الحكومة الحالية والمجلس الأعلى للقوات المسلحة

ويجب علينا الفخر بالثورة التى حققناها رغم تلاعب الكثيرين بها الأن

وأخيرا هى ثورة حقيقية تداعب جوانبها أياد خفية

[الروح أرق من الندى]

اولا الموضوع وافي بكل جوانبه واحترم وجهه نظرك

ثانيا في نهايه موضوعك كتبت

حالة الأضطراب التى تعيشها مصر الأن هى من فعل فلول النظام ويشاركهم الوزر فيها الحكومة الحالية والمجلس الأعلى للقوات المسلحة

هل تقصد بحاله الاضطراب تلك المظاهرات التي يقومون بها العمال للمطالبه بحقوقهم

وهل ما يفعلونه هذا دليلي علي فهم لثورتنــــا؟؟

[king lion]

أشكرك على الرد

اقتباس حالة الأضطراب التى تعيشها مصر الأن هى من فعل فلول النظام ويشاركهم الوزر فيها الحكومة الحالية والمجلس الأعلى للقوات المسلحة هل تقصد بحاله الاضطراب تلك المظاهرات التي يقومون بها العمال للمطالبه بحقوقهم

الأمرين مرتبطين بعضهم البعض فأنا اتكلم على حالة الأضطراب ككل من أعمال بلطجة وترويع للمواطن المصرى هذا أغلبه من فعل فلول النظام السابق كدفع أموال للبلطجية لعمل جبهة ضغط أخرى تساند المخلوع

أما بالنسبة لمظاهرات العمال وغيرهم فهذا يتحمل وزره الحكومة الحالية والمجلس العسكرى

والسبب أنه تم وعد الشعب بوعود كثيرة ولم يتحقق منها إى شىء فى خلال الثامنية أشهر الماضية فالمظاهرات للمطالبه بحقوقهم هى رد فعل على تقاعص الجهتين فى الوفاء بوعودهم أتجاه المواطن المصرى

اقتباس وهل ما يفعلونه هذا دليلي علي فهم لثورتنــــا؟؟

الامر ليس كما تنظرين له الثورة قامت من اجل الحرية والعيشة الكريمة ورد الكرامة المهدرة
ما يحدث الأن هى توابع للضغط النفسى الذى وضع فيه الشعب المصرى مدة ثمانية أشهر دون الشعور بالتغيير او الشعور بإى شىء ملموس داخل سياسات الدولة الداخلية وهذا امر كما اخبرتك يتحمله الحكومة الحاليه والمجلس العسكرى

[فيروزه]

	بصراحه انا مش عندي اي كلمه زياده ااقولها الي انت قولته وتقريبا اتكلمت عن كل الجوانب جميع الأحزاب ركبت على أكتاف شباب الثورة ولم يكن لأحد فيهم الفضل فيها مطلقاً بل هى ثورة خالصة للشباب المصرى دون أى أنتماء لأى تيار سياسى ودا الحاصل بالفعل مش هقول غير يارب الايام الجايه تبقا افضل علشان بجد تعبناااا موضووووع مميز بتمني ليك كل التوووفيق

[ساحر الأحزان]

موضوع جميل منك وهو يتحدث عن الفوضوية والوصولية

والاعتلاء ونسب الفضل لمن لا يستحق

وهذا هو اكبر خطاء نقع فية اخى العزيز

اختيار قيم منك

تحياتى علية

[بقــايا أنثى]

والله اى حد هيشوف الموضوع هيتكلم بوجهه نظر الضرر الخاص ال واقع عليه
بس لو فكرنا من ناحيه تانيه
احنا بقالنا 30 سنه دا كان بيحصل فينا وما كناش بنقدر نتكلم
طيب ماهو دلوقتى بيحصل هوا هوا بردو اه بنسبه اكبر بس دا من اخطاء جهاز الشرطه
ال لسه لحد دلوقتى ما ظهرش ومش هيظهر لانه اتكسر فى نفوس المصريين
الوضع محتاج وقت عشان نفوق
وانا املى فى ربنا كبير اننا هنبقى اقوى الدول وقريب جدا جدا
بس الثمن غالى شويه بس الحريه تستاهل

[iiwowii]

الاخ الكريم

king lion

بحييك جدا على موضوعك الهادف ده

........

جميع الأحزاب ركبت على أكتاف شباب الثورة ولم يكن لأحد فيهم الفضل فيها مطلقاً بل هى ثورة خالصة للشباب المصرى دون أى أنتماء لأى تيار سياسى

حالة الأضطراب التى تعيشها مصر الأن هى من فعل فلول النظام ويشاركهم الوزر فيها الحكومة الحالية والمجلس الأعلى للقوات المسلحة

ويجب علينا الفخر بالثورة التى حققناها رغم تلاعب الكثيرين بها الأن

احب بس اوضح حاجه من خلال وجهة نظرى
انا معاك ان الاحزاب السياسية ركبت على اكتاف الثوار
اللى هما الشعب
بس اسمحلى اقولك انت كنت عايز مين يمتلك الثورة
محدش من الثوار عنده دراية باصول اللعبة زى الاحزاب
ولا حتى خبرة
والطبيعى ان الاحزاب اللى كانت تركب
وده شى مفيد مش ضار
عشان لازم يبقى فيه قائد
والقائد دلوقتى فى نظرى بقى الاحزاب السياسية
مش المجلس العسكرى
المجلس العسكرى بيعتبر قائد بس فى خياله هو
وغصب عن الشعب
عشان الطبيعى ان البرلمان هيبقى من الاحزاب
والرئيس هيبقى من النخبة او من الاحزاب برده
ومش من الطبيعى ان البرلمان يبقى كله ثوار
لان الثقافة والتعليم حاجه وقواعد اللعبة السياسية حاجه تانى
ولو افترضنا اننا قولنا التعليم والثقافة والاستيعاب والفطنة يحددو سياسى
بس هيبقى سياسى مبتدئى
وهيبقى عنده سذاجة وبراءة سياسية
وده ممكن يتلعب بيه من اطراف عديدة
ومن مصلحتنا كلنا ان الاحزاب تركب
لعلا وعسى يتقو ربنا فينا ويصلحو شـأن البلد والشعب
وياعالم مخبية ايه الايام الجايا

اما بقى حالة الاضطراب والفوضى والانفلات الامنى المزعوم اللى احنا بنعيشها حاليا
ديه اساسها وروحها المجلس العسكرى
ليـــه
لان المجلس العسكرى اللى احنا كلنا فى ملعبه دلوقتى
هو رئيس الجمهورية من خلال الدستور
هو المجلس التشريعى (البرلمان) وبالدستور برده
يعنى هو الحاكم المتحكم العملى فى كل شى
يبقى هو السبب فى اللى احنا فيه
من خلال قرارته الضعيفة واللى لو قولنا عليها فيه شبه توأطو او سذاجة سياسية
مش هنخسر كتير او مش هيتقال علينا خونة
لان المجلس العسكرى افرـأد وليسو موسسة زى موسسة الجيش
والافراد وباجماع مش مقدسين ولا يجب المساس بيهم لا
دول بشر ولينا حق ننتقدهم ونحاسبهم
لاننا الشعب صاحب الارض والبلد وبالدستور
ومن امثلة القرارت والحجات الغريبة والمريبة اللى بيعملها المجلس العكسرى
قانون الانتخابات اللى الاحزاب السياسية اجمعها اجمعت انه يبقى بالقايمة النسبية الكاملة
وهو عمل حوار طرشان ومشى بالمثل نسمعهم نسمعهم وهنفذ اللى احنا عايزينه
وقرر يخليها الثلثين بالقايمة النسبية والثلث بالفردى
وطبعا ميخفاش عليكم يعنى ايه فردى
يعنى شراء اصوات يعنى بلطجة يعنى مدابح هتقوم تانى واكننا محلك سر
وكمان من قرارته الرشيدة التعجيل بالانتخابات
من غير لا ملامح مستقبلية والرؤية شبه ضبابية
ومن غير اى تجهيزات ولا خطوات
ده غير بقى الكارثة الكبرى اللى هيا
الحالة الامنية اللى بيقولو عليها منفلتة ديه
وده هيخلى الانتخابات تتعمل فى وقت فيه بلطجة وعنف ودم هيسيل
وبكده يبقى اكدو بقاء قانون الطؤارى بناء ع الوضع السى
ولو مش هكون معدى الحدود لو قولت
انهم احتمال يمدو فترة حكمهم سنة ولا سنتين بحجة الفوضى
وبكده هنبقى دخلنا فى مرحلة تانية خالص
اسمها ثورة من جديد بس المرادى
مش ع النظام والداخلية
هتبقى ع الجيش
وفى اسوء الاحتمالات ممكن ندخل فى حرب اهلية
وربنا يستر

بس انا معاك اننا لازم نفتخر بثورتنا
لانها بالاجماع واجماع مين
العالم كله انها اعظم ثورات التاريخ

الــــــندى
اسمحيلى بس اوضح وجهة نظرى

هل تقصد بحاله الاضطراب تلك المظاهرات التي يقومون بها العمال للمطالبه بحقوقهم

وهل ما يفعلونه هذا دليلي علي فهم لثورتنــــا؟؟

انتى بتسمى المظاهرات اللى بيقومو بيها العمال للمطالبة بحقوقهم زى ما بتقولى برده اضطراب
هيا الناس ديه بتطالب بايه ماهى بتطالب
بعدالة اجتماعية وحرية
تقدرى تقوليلى لما والدك مثلا مثلا
يبقى بيقبض 300 جنيه وبقاله 18 سنة مش متثبت
يعنى لا ليه معاش ولا تامين ولا اى حاجه
ياترى انتى شايفة ان ده عدل
باى عقل الناس ديه هتستحمل تانى الذل ده والظلم ده
ولو افترضنا انهم بيقولو هنجيبلكم منين
البلد فى حالة انهيار اقتصادى
طب ما البهوات اللى بيقولو كده
اللى قاعدين تحت التكييف وفى مكاتب
الواحد منهم بيقبض فى الشهر مرتب بيعدى الــ 200 الف جنيه
وسيبك طبعا من شغل احنا بنقبض 30 الف والكلام ده
ديه فرخة بكشك وما صدقو لقوها
صحيح هيجيبو منين 400 ولا 600 جنيه زيادة لمرتب العامل
اذا كان هما اساسا واكلينها كلها فى بطونهم
بيركب مرسيدس
بياخد شاور متكلف
بيفطر احلى واغلى فطار
بيتغدى اشى ديك رومى واشى بط وده تعبير مجازى
ده الاكل اللى بيكلوه اغلى بكتير من الكلام الفاضى اللى انا بتكلم فيه ده
ده غير البدل واللبس اللى البدلة الواحدة بتعدى الــ 1000 الاف جنيه
يبقى هيجيبو منين بقا مرتبات الناس
ياترى انتى شايفة عدالة هنا
ناس تقعد فى تكييف وبتاخد بالدولار
وناس قاعدة فى الحر وتحت الشمس
عشان بتطلب عدالة
يبقى مين اللى بيجيب الفوضى
اللى بيطالب بحقه ولا اللى مش عايز يدى الناس حقوقها
وخلى بالك انا كنت موظف كنت بقبض 190 جنيه
ومع الحوافز والكلام الفاضى ده كانو بيعملو 250 جنيه
وطبعا مستحملتش وسيبت الوظيفة
ياترى ده يعيش بنى ادم حياة ادمية
احنا تحت التراب يا سادة
ومحدش واخد باله من كده

واللى بيعملوه ده قمة فهم ثورتنا
لانهم فرقوهم من ميدان التحرير
هما جمعو نفسهم عن طريق المظاهرات الفئوية
اللى مبتطلبش ظلم لا بتطلب عدل اجتماعى
والله يرحمك يا جمال عبد الناصر مش هيجى زيك

بقايا انثى

ال لسه لحد دلوقتى ما ظهرش ومش هيظهر لانه اتكسر فى نفوس المصريين

بس الثمن غالى شويه بس الحريه تستاهل

تسمحيلى اقولك ان الشرطة متكسرتش ولا حاجه
والا مكنوش بهدلو اهالى الشهداء
وضربو شباب الالتراس
هما بس بيدعو انهم اتكسرو قدام البلطجية
اللى هما عارفينهم اسم اسم وبالحروف الابجدية
لكن ع الغلابة يبقو اسود
وكمان احب اقولك ان اللعبة لو فهمناها صح هنقدر نتكلم صح
واللعبة بتقول
ان البهوات قبل الثورة كانت فيه سبوبة بالحرام طبعا
وبعد الثورة السبوبة راحت هيشتغلو ليه ؟؟
كانو كلهم بياكلو والاكل راح ايه الدافع للشغل الوطنية
عمرهم ما حسو بوطنية
دول وحوش مش كلهم بس الاغلبية العظمى
اللى نقدر لو هنقيمهم نقول 99 و 9 فى المية
والواحد فى المية شريف ومش هنشوفهم لانهم كانو بيوزعوهم على اماكن ادارية ملهاش علاقة باى تعامل مع الشعب
وطالما محصلش هيكلة كاملة لوزارة الداخلية
وطالما مشلوش العواجيز
هتفضل الداخلية هيا هيا
اما عن الافلام بتاعتهم بتاعت اليومين دول
من احترام وضبط نفس
ده كله فلسفة فارغة
اللى يتربى تلاتين سنة على اسلوب
من الصعب يغيره باسلوب تانى
ديه عملية تنويم مغناطيسى ليس الا
وصحيح زمان كان الواحد منهم جوه نفسه اله
وميتخيلش ان واحد من الشعب يقدر يعلى صوته عليه
هما عندهم زهول بس من اللى بيحصل لسه
والحل فى الجيل الجديد من الشرطة اللى كانو بيعلموهم فى الكلية العسكرية
يضربو ع القفا ازااى

بس برده لسه محصلهمش تلوث خبرة
والامل فيهم



اخويا كينج ليون
بجد النقاش هادف واقليمى زى ما بيقولو

وتسلم وتقبلى ردى
واعذرنى فى ردى ع الاعضاء
بس انت كمان لازم ترد عشان اشوف مواجهاتك

وتقبلنى

[king lion]

فيروزة

اقتباس مش هقول غير يارب الايام الجايه تبقا افضل علشان بجد تعبناااا

بكل تأكيد نسأل الله أن يكون القادم أفضل أن شاء الله تعالى

أسعدنى حضورك ومشاركتك فى الموضوع

[king lion]

ساحر الأحزان

اقتباس موضوع جميل منك وهو يتحدث عن الفوضوية والوصولية والاعتلاء ونسب الفضل لمن لا يستحق وهذا هو اكبر خطاء نقع فية اخى العزيز اختيار قيم منك تحياتى علية

أسعدنى حضورك ومشاركتك الجميلة

لا تحرمنى من عطر مشاركاتك فى مواضيعى

تقبل خالص تقديرى وأحترامى

[king lion]

بقايا أنثى

اقتباس بس دا من اخطاء جهاز الشرطه ال لسه لحد دلوقتى ما ظهرش ومش هيظهر لانه اتكسر فى نفوس المصريين الوضع محتاج وقت عشان نفوق

الشرطة أختى الكريمة لم تنكسر كما يفهم الكثيرين ولو كانت الشرطة تريد حصد كل خارج عن القانون لفعلت فهى تعلم جميع الأسماء الخاصة بهم وأماكن أقامتهم حتى الأماكن التى يلجأون لها عند مطاردتهم

اقتباس وانا املى فى ربنا كبير اننا هنبقى اقوى الدول وقريب جدا جدا بس الثمن غالى شويه بس الحريه تستاهل

وجميع المصريين أملهم فى الله كبير أن يتحقق ذلك فى القريب العاجل

شرفنى حضورك كثيراً فلا تحرمينا المشاركة فى المواضيع الأخرى