حموكشة في اللوكشة,,

[SiLver Spectra]

كان يا مكان في هذا العصر و الزمان
كان في طفل اسمه (حموكشة)
هو طفل فيه كل صفات الطفل البريئ المهذب الي بيسمع كلام أبوه دايما
عمره ما بيعمل حركات غلاسة و بيحترم اخواته و بيصحى الصبح بيغسل وشه عشر مرات بالليفة و الصابونة
و بيحب يذاكر دروسه أول بأول , مؤدب في المدرسة و مش بيضرب العيال
أمنية حياته انه يشوف الحلقة الأخيرة من المحقق كونان و يغلب (حماصة) في ويننج اليفين

في يوم أبوه نازل من العربية عشان ياخده من المدرسة
ابو حموكشة : عمل ايه الواد النهارده
ولي أمر : حضرتك والده
ابو حموكشة : للاسف اه
ولي أمر : طيب حضرتك ينفع ابنك كدا كل يوم يعد يرسم على قميص الواد ابني الي قاعد أدامه
ابو حموكشة : هو رسم ايه؟
ولي الأمر : النهارده جت سليمة و رسم فراشة , امبارح رسم حاجات عيب
ابو حموكشة : معلش متأسف أنا هربيه النهارده
حموكشة : و الله مارسمت حاجة يا عمو
ابو حموكشة : يلا يا عجل اركب العربية

حموكشة يركب في المقعد الخلفي للسيارة و أمه بجانب ابوه
أبو حموكشة : عاملي فيها عم بيكاسو يا عجل
حموكشة : يعني ايه بيكاسو؟
أبو حموكشة : يعني ايه بيكاسو ,,كان واحد عجل زيك كدا و بيرسم على قمصان العيال
حموكشة : أووووف
ابو حموكشة : ولا ,,ما تنفخش ياعجل
حموكشة : أوووووف
ابو حموكشة : يا ابن الكلب هنزل دلوقتي اربيك ,,تتك نيله عليك
ابو حموكشة ينظر لزوجته : عاجبك الواد ابنك دا
أم حموكشة : معلش الواد لسه صغير
ابو حموكشة : لسه صغير!! ,,كنت راسم ايه ياض امبارح؟
حموكشة : طير
ابو حموكشة : طير ها ,,عارف لو سمعت شكوى تاني منك ,,هعلقك

حموكشة يحك في كرسي ابوه و شغال يقشر فيه
أبو حموكشة : بطل ياض تقشر في الكرسي مش بكلمك أنا
حموكشة : ما أنا سامع
أبو حموكشة : طيب بطل تقشر
حموكشة : مش بقشر أنا
أبو حموكشة : أمال بتعمل ايه ؟
حموكشة : بقشر
ابو حموكشة : يخربيت الي جابك ,,هو أنا كل يوم هجيب فرشة عشان حضرتك تقشر ,,ماشي أنا هوريك بس لما ننزل


عائلة حموكشة تعود للبيت
في الغرفة
أم حموكشة : خلاص بقى يا ناصر الواد كل تهزيق كتير في المدرسة و العربية مش لازم تضربه
ابو حموكشة و هو بيغير ملابسه : هو دا بيحس اصلا ,,أعدي دلعي فيه و وكليه ياختي ,,لما بقى حتت عجل ,,

في نفس الوقت حموكشة أول ما دخل البيت رمى شنطته و جري على البلايستيشن و وصلة بتلفزيون الصالة و بينده على أخته : هااااااااالة ,,تعالي بسرعة
أخته هالة جايه جري : ايوه
حموكشة : خدي الدراع يلا عشان هلاعبك كام ماتش
هالة مغصوب على أمرها و تمسك الدراع بدون نفس و تقول بصوت واطي : ماليش نفس ألعب كورة
حموكشة : بقولك ايه مش ناقص قلبت دماغ العبي بالذوق كدا بدل ما أوكلك علقة
هالة الي بتكره الكورة و بتباصي بالمثلث و بتخبط في اي زراير و خلاص عشان تراضي أخوها و تكفي شر غضبه , تبدأ تلعب و تدعي ربنا انه النهارده يلاعبها ماتش واحد مش عشر ماتشات ,,و يا سلام لو بابا جه و شد الفيشة
حموكشة يجيب جول و يتنطط : جول جول جول جول
و يقلع الفانيلة و يلف في الصالة : جووووول يا ولا يا حريف
و تنقطع لحظة الفرحة و السعادة لحموكشة بقدوم ابو حموكشة و شد فيشة الجهاز
ابو حموكشة : يلا ياض يا عبيط روح ذاكر ,,مش عندك امتحان بكره؟
حموكشة : ياااا بابا كنت تستنى لما أخلص الماتش ماصدقت أجيب جول هووووف
ابو حموكشة : ما صدقت مين ,,قاعد بتلاعب برشلونة انت يلا ياض روح ذاكر و مش عايز اسمع دوشة ,,هناملي نص ساعة ,,فاهم و لا لأ ,,شغل التنطيط دا مش عايزه
حموكشة : حااااضر يا بابا ,,في سرة (دا انت غلس)
أخت حموكشة : بابا مش هتاخد سلك الفيشة؟
أبو حموكشة : هاتيه
هالة تفك بسرعة سلك فيشة البلايستيشن و تديه لأبوها
حموكشة يستشيط غضبا و يمسك شعر أخته
هالة : يا يا بااا بااا ,,آه
ابو حموكشة : ولا يا عجل سيب أختك
حموكشة : هو أنا لمستها

حموكشة : ماشي يا هالة , طب و الله ما هسبلك حاجة في كيس الشيبسي بعد كدا
هالة : بابا الي قالي هات السلك
حموكشة : بقولك ايه تيجي نلعب ماتش كورة في الصالة
هالة و هي تحاول مراضاة حموكشة : ماشي
و تقول في سرها ( أهو جري و تنطيط و حركة أحسن من خبط الزراير عالدراع)
حموكشة: يلا روحي هاتي شراب من الدرج عبال ما ألبس الشورت

و يبدأ اللعب
حاموكشة : بصي انتي الجول بتاعك الكنبة الكبيرة و أنا الستارة دي
يلا هنسنتر
حموكشة يبدأ بمراوغة هالة بكرة الشراب و هالة تتجنب قدم حموكشة الكبيرة
حموكشة : جووووول ,,يا ولا يا حريف ,,واحد صفر
هالة : هي الفورة من كام
حموكشة : من خمسين
هالة في سرها ( الله يخربيت اليوم الي باقيت فيه أختك)
هالة تسنتر المرادي ,,تحاول المرور من قدم حموكشة بخوف
حموكشة يشوط رجليها ,,هالة تسقط على الأرض : آآآه ,,رجلي اتلوت
حموكشة : جووووووول ,,اتنين صفر
حموكشة ينظر اليها على الأرض : يلا قومي عايزين نكمل
هالة : رجلي بتوجعني
حموكشة : كدا هبدأ على فكرة و إنتي على الأرض
هالة تنهض و تدعي في سرها لقدوم منقذها السوبر مان بابا قائلة ( يارب بابا يصحى)
حموكشة : يلا خشي عليه مالك
هالة : ما أنا بخش أهو
حموكشة : إديلو ,,تلاته صفر ,,دا أنا هكسحك النهارده

بعد عشر دقائق
هالة : أنا تعبت و زهقت
حموكشة : يلا لازم نخلص الفورة
هالة : أنا تعبت بجد
حموكشة : ما احنا مش هنلعب فورة تانية ,,بس لازم نخلص, دلوقتي 15 واحد ليه
و يظهر فجأة أبو حموكشة و معه الساعق الرادع (الحزام)
ابو حموكشة : أنا مش قولت ياض مش عايز تنطيط و خبط و أنا نايم ؟
حموكشة يركض الى زاوية الصالة
ابو حموكشة : خد يا ابن اللذينة هنا ,,و يبدأ في تسديد الضربات بلسعات الحزام
حموكشة : آه ,,آه ,,بابا لأ لأ بتلسع ,,آه
ضربة في التانية
حموكشة يمسك طرف الحزام : خلاص يا بابا
أبو حموكشة : سيب يا ابن اللذينة
أبو حموكشة يديله بالرجل في بطنه
حموكشة : آآه ,,خلاص يا بابا
هالة بتمتع نظرها بالضرب و بتتشفى في أخوها
ابو حموكشة : سيب ياعجل الحزام ,,طب خد
و يديله برجله تاني ,حموكشة يمسك رجل ابوه بايده التانية
أبو حموكشة : سيب يلا هقع
حموكشة و هو ماسك الحزام بايد و رجل ابوه بالايد التانية : خلاص يا بابا كفاية ضرب
ابو حموكشة يحاول دفع حموكشة بإيده : سيب رجلي يا ابن الكلب يا عجل
أبو حموكشة يفقد التوازن و يقع على الأرض
حموكشة يصرخ و يطلع يجري للزاوية التانية من الصالة
ابو حموكشة و هو مندفع سريعا باتجاه حموكشة و في قمة الغضب : و الله لا أنا موريك بالحديدة
حموكشة : لا لا بلاش الحديدة ,,آه ,,كفايه كفايه
ابو حموكشة : يلا ياض برا ,,و يمسكه من فانيلته و يطلعه برا الشقة و يرزع الباب
أم حموكشة : طب كدا تطرد الواد برا
ابو حموكشة : دا ابن كلب مش متربي
أم حموكشة : انت هتعمل عقلك بعقله ,,الواد عنده امتحان بكرا
أبو حموكشة : و الله ماهو داخل دلوقتي ,,و قسما بالله يا عزيزة لو دخلتيه ما هيحصل خير


حموكشة يشعر بسعادة لخروجة من البيت في ايام الدراسة و التي يحرم فيها من نزول الشارع
حموكشة نزل السايبر لقى اوشة بيلعب سنجل و الشارع كلو واقف نكست (و تقريبا كان في اعلان بيتصور :biggrin
فقرر انه يروح (لميجو الصايع)
ميجو الصايع أخده (لحمادة الفشار) و راحوا يتسكعوا في الشارع
ميجو الصايع : الواد دا ابوه طرده من البيت النهارده
حموكشة : طردني بالذوق ,,قالي لو سمحت اطلع برا ,,بابا بيحترمني دايما مش زيك ,,فاكر يوم ما حدفك من الشباك
حمادة الفشار : عارفين أنا كنت بكلم مين قبل ما أنزل عالميل؟
حموكشة و ميجو : مين؟
حمادة الفشار : هانا مونتانا
حموكشة و ميجو : بجد؟
حمادة : آه ,,كانت عايزه تتعرف و كدا بس قولتلها بعدين خليها وقت تاني
حموكشة : على فكرة انت فشار
حمادة : و الله بتكلم جد حتى اسأل أخويا
حموكشة : أخوك فشار زيك ماانتوا عيلة واحدة
حمادة : طب تحب أخليها تضيفك عالميل
حموكشة : ماشي ,,بس عارف مش مصدقك ليه؟
حمادة : ليه ؟
حموكشة : عشان هي مش بتعرف تتكلم مصري ,,يبقى انت كلمتها ازاي؟
حمادة : ما أنا كلمتها انجليزي يا ذكي
حموكشة : بتعرف تتكلم انجليزي منين ,,ما انت معايا في الفصل و حمار انجليزي
حمادة : الكتابة غير القراءة ,,و على فكرة بقى هي بتعرف مصري شوية
ميجو الصايع : ما تفككم من الحوار دا و خلونا نلعب حاجه,,حاجه,,و لا انت و هو ,,الواد (ميزو بلطجة ) جاي هناك و معاه الشلة ,,خلونا نخلع من هنا
حموكشة : اجروا انتوا أنا مش جاري
ميجو : ياض دا معاه عشر عيال
حمادة : امبارح على فكرة مسكت 4 عيال منهم و فرمتهم لواحدي
حموكشة : طب ما تقف معايا طالما انت راجل كدا
حمادة : أصل النهارده ماليش نفس
ميجو : انت حر احنا ماشيين خليك انت لواحدك

و صمم حموكشة الوقوف مكانه لحين قدوم ميزو و شيلته التي كانت بتعبر نفس الشارع
ميزو و شلته : العجل أهو العجل آهو
حموكشة : أهو انت الي عجل
شلة ميزو : الحق يا ميزو دا بيشتمك
ميزو و شلته تحيط بحموكشة : مين دا الي عجل
حموكشة : انت مش بتقول عليه عجل؟
ميزو : أيوه انت عجل
حموكشة : الشتيمة بتلف تلف و ترجع لصاحبها
ميزو ضاحكا : هي لازم تلف مرتين ؟
حموكشة : مرتين ازاي؟
ميزو : يعني لازم تقول تلف تلف ماينفعش تقول تلف واحده؟
حموكشة : آه هي بتلف تلف عشان تاخدها على واسع
ميزو : طيب تعالى نوريك الواسع بتاعنا
و تبدأ شيلة ميزة بضرب حموكشة

و في هذه الاثناء كانت أم محاسن بتنشر الغسيل الأبيض المتوسط الداخلي على الحبل و كانت بتفكر تشيل الالوان بس حست انها لسه مانشفتش,, و شافت حموكشة و هو بيضرب من العيال فراحت تتصل بأم حموكشة : الحقي ياختي يا عزيزة ابنك بيضرب في الشارع من شوية عيال
عزيزة : الحق يا ناصر ابنك بيضرب

و نزل ناصر مسرعا و ساب شغل الفوتوشوب الي كان بيجهزه لشغله قبل ما يروحه (اعلانات) ,, كان بيظبط الخلفية بتاعت الصورة و كان محتار في درجة اللون يعملها أحمر و لا أخضر و كانت المشكلة في ان البرنامج بتاعه مش كامل و محتاج كراك
فقام مخضوض عشان ينزل لإبنه و قاعد يدور على الشبشب بتاعه ,, اكتشف ان الواد ابنه لبسه و نزل بيه و سابله شبشبه المقطوع ..دور على الشباشب الزنوبة الي في الحمام
كان عندهم شبشبين واحد فيه خرم و التاني مافيش فيه خرم ,,هو أخد التالت
و نزل جري عالسلم

شيلة ميزو : الحق يلا ابوه ,,إجري,,,
ابو حموكشة في سره (الحمد لله)
حموكشة و هدومة مبهدله و وشه وارم و في حالة هستيرية ,,و بيبص على الأرض ,,كان مركز على كيس شيبسي فاضي مرمي و بنكهة الكباب
أبوه : تعالى خلاص ما تخفش مشيو ,,انت ايه الي وقفك قصادهم اصلا!!
حموكشة صامت و بينهنه نهنهة البكاء الهستيري و لسه مركز على الكيس الفاضي و شاكك انه بنكهة الجبنة المتبلة مش الكباب
أبوه : انت جعان و لا ايه تعالى يلا عشان تتغدا
اصحابك فين طيب ؟
حموكشة : جرو
أبوه : و مش جريت معاهم ليه يا عبيط,,تعالى يلا على فوق

أبوه و هو بيدخله الشقة : انت رجلك كبرت و باقيت بتاخد شبشبي ,,ماقولتش ليه ان شبشبك اتقطع
حموكشة : خفت لحسن تضربني
أبوه : هضربك ليه!!
حموكشة : عشان الشبشب لسه جايبينه من شهر بس و اتقطع
أبوه : نجبلك غيره ايه المشكلة ,,هتلاقي الماركة بتاعته وحشه بس
يلا اتغدا كدا و كل و روق عشان تحكيلي الي حصل
انت مش عندك امتحان بكره؟
حموكشة : آه
أبوه : طيب هات كتابك و تعالى معايا الشغل ,,نذاكر هناك سوا و تغيرلك جو
حموكشة : ماشي

و بعد عودة حاموكشة مع أبوه من العمل
يعود للشقة و هو في كامل طاقته الحماسية و ينده : يا هااااااالة
هالة : ايوه
حموكشة : تعالي يلا عشان هلاعبك كام ماتش عالماشي

و طلعت هالة من المولد بلا حمص :biggrin:

تمت

[حنـــــون]

هههههههههههه والله جامده
ياعينى عليكى ياهاله دايما كدا
مستضعفين البنت اكمنها غلبانه وبريئه
بس والله حاموكشه صعب عليه
طول القصه بينضرب ههههههههههه
تسلم ياطارق ع القصه اللطيفه دى ^^
دوام التميز

[خارج عن القانون]

ههههههههههههههههههههههه
جامده تسلم ايدك

[ساحر الأحزان]

هى يوميات كوميديا جميلة وساخرة

وفكاهية وهى كتير موجودة

فى الشارع والحارة المصرية

وحموكشة بطلها

مثال بنشوفة كتير

ورب الاسرة احتار معاة

بحكم قلب الاب

توبيك جميل دكتور

نورتنا بية

تمنياتى لك بكل سعادة

[fankosha]

ههههههههه حموكشة برىء اوى اوى
مبيعملش مشاكل امال لو مش برىء بقى كان عمل ايه
ده مجرم بس صعب عليا برضو عشان انضرب
معلش هى البنت ديما كدا لازم تستحمل اخواتها المجرمين
تسلم ايدك ياطارق على القصة الجميلة

[مشتاقه للجنه]

ههههههههههههههههههههه

والله موت من الضحك يا عينى على الغتاته ..

بجد ده واد تيت خالص ويستاهل كل اللى بيحصله

ولو انا مكان أخته أتبرى منه ...

حلوه منك يا دكتر

بس هى القصه شكلها من الواقع صح يا طرووق

[~♥ Queen sozan♥~]

ايووووووووووووووووووت على طول القصة ’’
بس بجد صعب ان البنات تلعب بلستيشن على فكرة
هههههههههه
انا عن نفسى عمرى ما دخالت جون فى البلستيشن
اخوية بردك بيغلبنى كدة ههههه
هما كدة البنات غلبه

تسلمــ يا طارق على القصة

[countess]

) مستقوي على هاله الغلبانه

قصه جميله يسلم خيالك

[دمعه حائره]

ههههههههه
الواد حموكشه ده انا بشبه عليه مش عارفه شفته فين قبل كده:biggrin:
وهاله كمان مسكينه جدا معاه وعزيزة محتاره ترضى مين ولا مين
لكن ابو حموكشه ده اب مش عادى طول النهار شتيمه كده ازاى
بصراحه سلفر طريقتك فى الحكايه مشوقه جدا وبأدق التفاصيل
واحلى حاجه عجبتنى الغسيل الملون كان لسه مانشفش
يسلمو بجد قصة جميله ومتهيألى فهمت الغرض منه
لازم الاهل يحافظوا جدا فى تربية ولادهم
ومهما حصل مايخرجش الولد من البيت مضروب
تحياتى وتقديرى لك

[Bright Brain]

روووووووعه يا دكتور
بس فيها اطناب كتير أوي