لازم تشارك في الإنتخابات,,

[SiLver Spectra]

مصر الآن مع موعد لإنتخابات أول مجلس شعب بعد الثورة



أهمية هذه الإنتخابات تكمن في أن أعضاء هذا البرلمان أو مجلس الشعب أو المجلس التشريعي هم من سيشكلون الجمهورية الثانية لمصر عن طريق كتابة دستور جديد و سن قوانين و تشريعات جديدة



و بالتالي فواجبك الوطني الآن هو المشاركة في تلك الإنتخابات
ماينفعش تكون سلبي و تعد في بيتك و تقول أصلي معرفش حد عشان أنتخبه!
اسأل والدك اسأل أهلك اقاربك , اسأل اصحابك , اسأل الحلاق البقال الي جنبك,,اسأل أي حد هتنتخب مين و مين كويس في دايرتك
كونك تعد و تقول مش هشارك فإنت كدا بتأثر على نسبة الإقبال على الإقتراع
في بلد زي تونس كانت نسبة المشاركة في إنتخابات المجلس التأسيسي 70%
نسبة المشاركة في الإنتخابات الرئاسية الأمريكية 2008 كانت 66%

لما انت تعد و ما تشاركش فانت بكدا بتزود النسبة السلبية للمشاركة في الإنتخابات
و دا مالوش علاقة بموقفك السياسي , مع أو ضد المجلس العسكري لكن لازم تنزل تنتخب
و أتمنى من كل الناس الي فوق ال18 سنة تنزل تنتخب ,,و شد معاك صاحبك أو قريبك أو عمك أو خالتك , اي حد تعرفه
أربوك ما تبقاش سلبي,,عايزين نسبة المشاركة تكون عالية جدا بحيث نفتخر بيها

---

كإجراء أمني و بسبب قلة عدد القضاة تم تقسيم الإنتخابات ل 3 مراحل

المرحلة الأولى
يوم الإثنين و الثلاثاء القادمين (28 - 29 نوفمبر)
هتقام الإنتخابات في التسع محافظات التالية
القاهرة - الفيوم - بورسعيد - دمياط - الإسكندرية -كفر الشيخ - أسيوط - الاقصر - - البحر الأحمر

الإعادة بعد اسبوع ( 5 و 6 ديسمبر)

المرحلة الثانية
الأربعاء و الخميس الموافق 14 و 15 ديسمبر
هتقام الإنتخابات في التسع محافظات التالية :
الجيزة - بني سويف - المنوفية - الشرقية - الاسماعيلية - السويس- البحيرة - سوهاج - أسوان

الإعادة بعد اسبوع ( 12 و 22 ديسمبر)

المرحلة الثالثة
الثلاثاء و الاربعاء الموافق 3 و 4 يناير
هتقام الإنتخابات في التسع محافظات التالية :
المنيا - القليوبية - الغربية - الدقهلية - شمال سيناء - جنوب سيناء - الوادي الجديد - مطروح - قنا
الإعادة بعد أسبوع (10 و 11 يناير)

يبقى انت كدا عرفت معاد الإنتخاب

---

هل ممكن تنتخب في اي لجنة زي الاستفتاء؟
لأ ,, لازم تنتخب في اللجنة بتاعتك الي هينزل فيها اسمك
و دي تعرفها ازاي؟
من الموقع الرسمي لإنتخابات مجلس الشعب 2011
اللجنة العيا للإنتخابات

هتنزول تحت في الموقع و هتلاقي (خدمة الاستعلام عن كشوف الناخبين)
زي الصورة


هتحط الرقم القومي بتاعك الي موجود في البطاقة (14 رقم)


و هتعمل بحث

دا بحث بالرقم القومي بتاعي
بيديني اسم مدرسة اللجنة الإنتخابية و عنوانها
و مهم جدا انك تحفظ أو تسجل عندك رقم اللجنة و رقمك في الكشوف الإنتخابية
عشان يطلع اسمك بسرعة من الكشف

هتصوت ازاي؟
يوم الانتخابات هتروح اللجنة بتاعتك و هتسلم البطاقة بتاعتك للمشرف على اللجنة و هيطلع اسمك من الكشف (لو عارف رقمك هتسهل عملية البحث)
و هتاخد ورقتين ,,ورقة فيها الإنتخابات بالقائمة الفردية و ورقة فيها الانتخابات للقائمة النسبية

عشان مش تتلخبط دا شرح بالفيديو للتبسيط


اللجان هتكون مفتوحة من الساعة 8 الصبح لحاد الساعة 7 بالليل

و خلي بالك انك لازم تصوت كمان يوم الإعادة
طيب ايه هي فكرة يوم الإعادة!!؟
الإعادة هتكون للمرشحين بالقوائم الفردية (بيشكلوا تلت المقاعد) , لأن شرط فوز المرشح هو انه يعدي نسبة ال50%
و نتيجة ان المرشحين بالنظام الفردي كتير فصعب ان شخص واحد يفوز بنسبة أكتر من 50%
ففي الغالب بتتعمل اعادة لأعلى 2 مرشحين نفسهم فازوا في المرحلة الأولى

بمعنى لو في 10 مرشحين نفسهم
و أعلى واحد حصل على 30% و التاني حصل على 20 %
بتتعمل اعادة بين أول اتنين بس
((طبعا بياخدوا أعلى 2 عمال و فلاحين و اعلى 2 فئات من المرحلة الأولى و بيفوز في الاعادة واحد عمال و فلاحين و واحد فئات))


ياريت الكل يشارك,,و بالنسبة للمصريين المغتربين فطريقة تصويتهم مختلفة و أكيد هناك عارفين الطريقة

لحاد لحظة اعتماد الموضوع , كلو بيأكد على إن الإنتخابات في موعدها
في الموقع الرسمي للإنتخابات هتلاقي اسماء المرشحين الفردي و القوائم في دايرتك الإنتخابية
و حاول تسأل و تستفسر مين كويس على أد ما تقدر
و حاول تكون أمين في اختيارك ,, مش عشان حد يقربلك أو صاحبك أو بدقن أو من غير دقن فتصوتله ,,لأ
الأولوية المفروض للوعي السياسي ,, سيبك من الوعود هنعملكم و هنوفرلكم فرص عمل و غيره ,,في الغالب بتكون اشتغالات لأن دا مجلس تشريعي وظيفته يسن قوانين مش يوفر خدمات ,, الي بيوفر خدمات هي المجالس المحلية

و دي قناة اللجنة القضائية العليا للإنتخابات على اليوتيوب
تقدر تشوف فيديوهاتها و تكسب خبرة أكتر
Election011Eg's Channel - YouTube

و بالتوفيق لمصر بإذن الله,,

[S n i p e R]

صح اوي يا طارق

وموضوع ف وقتوه تماما

بس حظي وحش بس

فرقت معايا على شهرين

كان زماني ف مصر وطلعت البطاقة

وصوت

موضوع عشرة على عشرة

تحياتى

[رووكه]

تسلم يا طارق على الافاده والتوضيح

ربنا يعديها على خير

وبامر الله مصر هتكون احسن من الاول

تسلم ايديك يا طارق

[همسه الجوارح]

ربنا يستر وتعدى على خير

مجهود كبير منك ياطأطأ تسلم ياكبير
وانت مستنينك ترشح نفسك فى الرائسه الجمهوريه وانا هديك صوتى

بالتوفيق ياريس

[اسكندريلا]

اكتر حد مستفيد من الانتخابات دلوقتى الاخوان

ربنا يستر على البلد

والاخوان فين دلوقتى واحنا فين

[game010]

شكراً بجد على المعلومات الكثيرة دى
بجد سهلت علينا حاجات كثيرة اوووى
شكراً لك يا د.طارق عليها دائم التميز
شكراً ليك على المجهوووود العالى ده

[Mind language]

تمام كدا الحمدلله انا عندى 18 سنه وشهرين
25 يوم كمان يعنى هنزل وهاخد كل اللى
اعرفهم معايا شكرا ليك يادكتور طارق واكيد
مش هنكون سلبين وهنشارك علشان بلدنا
تنتقل للاحسن باذن الله

[ساحر الأحزان]

الانتخابات وخروجها بامان اول لبنة فى الطريق الصحيح

الى الديمقراطية الصحيحة لان خروجها بنزاهة وامان سوف

ينعكس الوضع على الوطن

وايضا على انتخابات الرئسة

والمشاركة امر واجل للتعبير وانتخاب الاصلح

موضوع قيم طارق

تحياتى علية

[بنت الاكابر]

طبعا لازم كلنا هننتخب
وربنا يستر فى الايام اللى جايه
اختيار موفق منك
تسلم على المجهود يا طارق
بالتوفيق

[نقوش على صفحات الورد]

اسف جدا
مش هنزل انتخابات
لا انا
ولا اصحابي فى كل الجمهوريه
ازاي انتخابات قبل محاكمات
ازاي قوانين قبل تصليح
ما ينفع
انزل انتخابات لصالح الاخوان الوصوليين !
ولا الوفديين المتناحرين !
ولا بقايا الفلول الساقطين المزورين !
مفيش شيئ في مصر النهارده اسموا لازم
في شيئ اسموا حريه
كلمة لازم دي كانت ايام الحزن الوطني
انما بعد الثوره للكل حق الحريه
وحقي ارفض او اقبل
انما مش من حقي ان اي جهه تلزمني
انا ايام التعديلات قلت لا برغم علمي ان عارف نتيجتها
وعارف ان الاخوان هللوا ليها
وهما نجحوها
واصلا مش معترف بتعديل دستور فقد شرعيته اصلا
شبعت تصريحات ووعود وف الاخر نفس الحال
ومفيش اي جديد
لا انتخابات قبل القصاص من دماء الشهداء
ولو فينا حد سال دموا
او فقد شهيد
كان مستحيل يقبل كده
اتمنى نكون اكثر واقعيه
وكفايانا شعارات لاتغني ولا تسمن من جوع
اعتذر
لن
انزل
اي
انتخابات
قبل
تطهير
مصر
ممن قتلوا
ممن سرقوا
ممن نهبوا
لا تصحيح دون تصليح
اسف جدااااااااااااااااا
كل احترامي