المعاكسه واجب وطني........

[دودي المصراويه]

المعاكسة وااااااااااااجب قومى ولا بد منه

--------------------------------------------------------------------------------

المعاكسة واجب قومي وحق تجاه اي مزة نازلة الشارع وتاعبة نفسها ومتشيكه وحاطة ميكب ونازلة تقول للأرض اتهدي ما عليكي ادي ... عايزين ايه من الشباب يعني ... مش لازم يشجعوا المنتج المحلي ... وكمان لما البنت دي تتعاكس والشباب يقرفها في الشارع اكيد هاتتربى وهاتتعلم الادب وتنزل الشارع بعد كده محترمة .... ماهو لو محترمة والله ما كانش حد قرب ناحيتها .

بس في مشكلة ...

البنت اللي لبسها كويس ولابسة اسدال كمان او خمار بتتعاكس ليه .؟؟؟.... ايه اللي بتتعاكس ليه ... اكيد ماشية تتمايع وتضحك في الشارع وحاطة ميكب اد كده ....لازم نربيها بردو وتنزل الشارع محترمه ... ساكتة ولا تنطق من اساسه ... مش بقولكم واجب قومي ... بنربي بنات مصر ...

طب واللي ماشية لابسه محترم ولا حاطة ميكب ولا غيره وماشية في حالها لا بتضحك ولا بتتمايع ماشية في حالها ... ...لأه بقى ما هي نازلة الشارع وحدها وقاصدة تتعاكس ايه اللي منزلها الشارع وحدها وهي عارفة الشوارع بقت عاملة ازاي ... ماهي لو محترمة بجد كانت نزلت مع باباها ولا اخوها ولا خطيبها حتى ... دي عايزة تعمل محترمة وتضحك عالشباب وتجيب عريس ... وبردو لازم نبينها على حقيقتها وتتعاكس علشان محدش يفتكرها محترمة ...

طب واللي نازلة مع اخوها ولا خطيبها ولا حتى جوزها (مش نازلة وحدها اهو) ويطلع لها واحد من ورا خطيبها ولا اخوها بيبصبص ليها كده من ورا ضهر الراجل الغلبان وعمال يشاور ويعمل حركات ويقرفها ... ... يا سلاااااااااااام ومين قاللك ان ده خطيبها ولا اخوها .. تلاقيها الواد اللي ماشية معاه ماهو لو كان خطيبها كان قعد يشوفها في بيتهم .. وانا بعاكسها علشان اعرفهم قيمتهم هما الاتنين علشان يتربوا ويبطلوا صرمحة في الشوارع ... مش بقولك واجب قومي علشان البلد والله....


طب واللي واقفه في البلكونه الغلبانه بتنشر ولا بتجيب حاجة بالسبت بيطلع لها ميت واحد من الشارع راصدينها واللي يعاكس واللي يشاور.. الله ما هي قاصداها اهي وطالعة البلكونة علشان الناس تشوفها وتتعاكس .. هي اللي عاوزة تتعاكس من الاساس .. وانا لما بعاكسها بوريها قيمتها اصلا ... هي ايه اللي طلعها البلكونة من الاساس .. تنشر .. هههه دي تلاكيك يا عمنا ... دي عاوزة تتعاكس ... ماهو لو محترمة والله ما كنت هاقرب ناحيتها ...

طب واللي قاعدة في بيتها يا ناس .. ويطلعلها من الشباك اللي عمال يبص ويبحلق فيها ويعاكسها ... شوفت اديك قلت بنفسك ياعم ... هيا اللي فاتحة الشباك علشان الراجل ده يشوفها ويعاكسها ... وتلاقيها كانت بتتمخطر قدامه رايحة جاية ومتشيكه علشان يشوفها ويعاكسها .. هي لو محترمة تفضل في بيتها وتقفل الشبابيك والبلكونات والبيبان كلها وتقعد تحت السرير كمان علشان تبقى بنت محترمة بصحيح ومحدش يشوفها خااااااالص وتدفن نفسها بالمرة

[الهلالى]

الحمد لله وشهد شاهد من اهلها

تسلم ايدك دودى

والله انا بشجع منتج بلدى على اد ما اقدر

وربنا ياخد اللى فبالى

ههههههههه

[دودي المصراويه]

مرررررررررسي على مرورك
وربنا يخد مين قولي ماتخفش سيراك في بير
هههههههههه

[الهلالى]

لا عادى داه انا كاتب فيها اكتر من 32 قصيده ساخره

وان شاء الله هنقلهم للمنتدى عن قريب

داه غير برنامج انا والنجوم وقفاك اللى كاتب حلقاته مخصوص بوحى منها

وعموما انتى وصفتيها فموضوعك الجميل داه

[دودي المصراويه]

ربنا يخليك بس انا عيزاك تدخل الموضوع التاني على فكره موضوع
هام جدا جدا يا ريت تدخولوا
ومرررررررسي

[بنوته متغربة]

موضوع حلو اوى يا دودى
وعندك حق فى كل الى بتقوليه وبالمناسيه انا حقولك على حاجه تضحك اكتر واكتر انا عايشه فى السعودية ولازم نروح المدرسه واحنا مغطيين وشنا وحياتك المسافه ما بين باب المدرسه وباب العربيه وانا بكون لابسه العبايه ومغطيه وشى يعنى حاجه اسود فى اسود مش باين منى اى حاجه غير الشنطة بتعاكس مليون مره والمسافه ما بين باب العربيه وباب العماره بحس انى حتخطف
قوليلى بقى دول بيعاكسوا فينا ايه ده لو جاب عبايه اخته فى البيت وحطها قدامه واعد يعاكسها بتكون النتيجه هى هى بس والله اسهل له بدل ما ينزل فى الشمس والحر ده عشان يشوف شوال اسود ما يعض فى بيتهم ويعاكس اى عبايه عندهم
المشكله ان الشباب فاكرين ان من طقوس الشارع المعاكسه
معلش طولت عليكم وربنا يهديهم
تقبلى مرورى

[rosalia]

الموضوع حلو اوي يا دودي

[BatoOota]

ههههههههههههههههههههههههههههههههههههههههههههههههه

يا شماتت ابلة ظاظا فيااا

ههههههههههههههههههههههههه

كدة يا دودى كدة!!!

ماشى يا ست دودى

[دودي المصراويه]

اقتباسالمشاركة الأصلية كتبت بواسطة بنوته متغربةموضوع حلو اوى يا دودى
وعندك حق فى كل الى بتقوليه وبالمناسيه انا حقولك على حاجه تضحك اكتر واكتر انا عايشه فى السعودية ولازم نروح المدرسه واحنا مغطيين وشنا وحياتك المسافه ما بين باب المدرسه وباب العربيه وانا بكون لابسه العبايه ومغطيه وشى يعنى حاجه اسود فى اسود مش باين منى اى حاجه غير الشنطة بتعاكس مليون مره والمسافه ما بين باب العربيه وباب العماره بحس انى حتخطف
قوليلى بقى دول بيعاكسوا فينا ايه ده لو جاب عبايه اخته فى البيت وحطها قدامه واعد يعاكسها بتكون النتيجه هى هى بس والله اسهل له بدل ما ينزل فى الشمس والحر ده عشان يشوف شوال اسود ما يعض فى بيتهم ويعاكس اى عبايه عندهم
المشكله ان الشباب فاكرين ان من طقوس الشارع المعاكسه
معلش طولت عليكم وربنا يهديهم
تقبلى مرورى


هههههههههههههههههه
مرسي على مرورك بنوته وعلى فكره انا كمان في السعوديه ونفس الموقف ده بيحصل كل يوم عندي وبنفس الاسلوب وبجد ربنا يهديهم

[دودي المصراويه]

اقتباسالمشاركة الأصلية كتبت بواسطة rosaliaالموضوع حلو اوي يا دودي

مررررررسي يا قلبي على مرورك