نفسك تطلعى ايه يا شاطرة ....رقاصة ياعمو؟؟؟

ŌиĹч.Ḿё · منذ /02-28-2009, 12:24 AM

حبيتك و احنا في سنة اولى
بامارة ما طلعتي الاولى
و في تانية لقيت قلبي ارتاحلك
و في تالتة بدأت ألمحلك
و في رابعة لقيتك مشغولة

عادي
أغنية سخيفة من أغاني اليومين دول اللي بيتفننوا انهم يلاقولها موضوعات غريبة

بس العجيب في الموضوع بقى إن الاغنية دي اغنية اطفال

و إن المعذب اللي حبيبته طنشته و طلعت مشغولة بغيره هو في الحقيقة مطرب طفل ... و إن سنة أولى اللي بيتكلم عليها هي - بالتأكيد - سنة اولى ابتدائي ...

الحقيقة ان ولادنا الصغيرين بقوا محاصرين بالاغاني و الافلام و اللي هما تقريبا مش بيشوفوا غيرها قدامهم و بيحاولوا يقلدوها على اعتبار إني عايز ابقى عمو الكبير ده ... خصوصا لما يلاقوا اهلايهم فرحانين بده و بيشجعوهم و يسقفولهم ...

و نتيجة ده ايه ؟؟
انك تلاقي مثلا عيل في ابتدائي و عنده جيرل فريند .... و بنت ماطلعتش م البيضة تلاقيها بتقولك انا باحب فلان زميلي في الفصل

و عشان ماحدش يقول اني بابالغ حاحكيلم قصيتن حدثوا بالفعل و العهدة على الراوي

اقتباس

الاولى

المدرس بتاعي في ثانوي قالي انه في مرة كان داخل فصل ابتدائي حصة احتياطي ... فكان واخد معاه هدايا عشان يعمل مسابقة و يدي هدايا للولاد و كدة ... فبعد ما خلص لقى ولدين بيتخانقوا ... فيه ايه يا عم ... يا مستر اصله عايز ياخد مني المسطرة بتاعتي عشان زرقة زي بتاعة فلانة ... اصله بيحبها ... !!!

اقتباس

التانية

لما احد الامهات بتدور في كرسات ابنها _ اللي في ابتدائي برضة بالمناسبة _ عشان تشوف الواجبات ... لقت الكراسة مليانة قلوب و بحبك يا بودي ... طبعا بعد ما استفسرت من بودي عرفت إن اللي كاتبة الكلام ده هي البنوتة الامورة زميلته في الفصل !!!

افتكر إن اصلا الاطفال في السن ده مابيبقوش مدركين معنى الكلام ده أصلاً ... هما بيقلدوا اللي بيشوفوه و اللي الكبار بيوجهوهم ليه ...

زي مثلاً فرق الاطفال اللي طلعت اليومين اللي فاتوا اللي بيلبسوا فيها البنات لبس مش عارف ايه و يحطولهم ميك اب _ بيبقى شكلهم سخيف اصلاً _
و يخلوهم هما و الولاد يطلعوا يغنوا و يرقصوا ... و كل ما البنوتة ترقص احسن تحس ان اللي حواليها فرحانين بيها اكتر ......

كان شيء طبيعي لغاية الموضوع اللي قريته في مجلة ماجد - أيوة باقرا مجلة ماجد فيه حاجة - لما كان فيه برنامج اطفال و المذيعة بتسأل البنوتة نفسك تطلعي ايه لما تكبري ... فردت بكل براءة : رقاصة !!!

طبيعي يكون كدة و هما دول اللي القدوة اللي شافتهم من ساعة ما بدأت تفهم ... و دي الحاجة اللي اهلها كانوا بيبقوا فرحانين قوي و هي بتعملها و يسقفولها عليها ...

نفس الشيء بنكرره في حاجات كتير ... الاغاني ... الافلام ...

عندي واحد قريبي مثلا عنده بنوتة عندها سنتين يا دوب بتتكلم ... و كان طبيعي و هية بتتعلم أول الكلمات اللي حتواجه بيها الحياة إن يكون ضمنهم الكلمة اللي قلبت العالم العربي من المحيط إلى الخليج : أطبطب ؟؟

و طبعا الاهل و الاصحاب فرحانين بيها و بيسقفولها ...

اللي عايزة أقوله أن الاباء و الامهات بييجوا بعد كدة عايزين يمشوا حياة ولادهم بطريقة معينة و عايزينهم يبقوا كويسين و يهتموا بالاخلاق ... بس ماعتقدش الموضوع ده حيبقى سهل أبداً على طفل و طفلة فتجحوا عنيهم لقوا قدوتهم نانسي و أخواتها و شافوا في الافلام إن فيه حاجات كتير عادي و مافيهاش مشاكل ... جايين بعد ما بقوا مراهقين بتقولولهم عيب و حرام ؟؟
طب كان فين من بدري ...

و عليه ماحدش يستغرب لو اكتشف إن اخته اللي في حضانة بتحب زميلها و نفسها تطلع زي نانسي عجرم ... او ان اخوه اللي في اعدادي بيفكر يتجوز عرفي

و دمتم سالمين

يوسى كات · منذ /03-10-2009, 01:57 AM

كلامك جميل وفعلا كله حقيقى انا عن نفسى بطلع تدريب فى الجامعه تبع الدراسه

وبنروح مدارس ابتدائى وبصراحه اتصدمت من الكلام اللى بسمعه من الاطفال

ومكنتش مصدقه غير لما شفت بنفسى ده يقول انا بحب فلانه ودى مصاحبه ده

والسبب فى ده كله الكبار والمشكله ان انا قسم اجتماع يعنى لازم اسمع مشكلهم

وبصراحه انا مبعرفش ارد عليهم

A7meD · منذ /03-10-2009, 02:05 AM

تسلم ايديك يا رائد

الواحد فينا دخل الجامعة وخجلان يقول لاهله انه بيحب

و تلاقي العيال دول بيحبوا عيني عينك ههههه

بس هنعمل ايه يا رائد

واقع و بنعيشه واحنا الي فرضناه على نفسنا

مش غصبن عنا جه

ان شاء الله يتعدل الاحوال

موضوع جميل يا غالي

بإنتظار جديدكـــــــ

تحياااااااااااااااتي

SiLver Spectra · منذ /03-10-2009, 07:05 AM

و الله المشكلة مش في الأفلام بقدر ما هي في الأهالي

الولد الصغير لما بيحب الأهالي بيتفاخروا بيه....و بسم الله ما شاء الله

و ياخدوها بضحك....فالولد يتشجع أكتر

على الإنحراف...الشقاوة إلي بيعتبروها صفة كويسه

إنك تبقى شقي و تكسر الدنيا....

و طبعا الإعلام

المفروض الأطفال آخرهم كرتون...

لكن طبعا مش بإيدك تحجب الطفل عن مشاهدة الأفلام

و بيبدأ يتعلم و يشوف يعني ايه حب!!

العجيبه فعلا البنات

لأن الدرسات بتقول البنت لا تميل للجنس الآخر إلا بعد البلوغ

لا يوجد أي ميول قبل البلوغ

على عكس الولد إلي بيميل من صغره

بس هتجبها كدا أو كدا

هتفضل القضية كده....

بتركيبتها تعقيداتها

إلي تقدر تعمله هو تربية أبناءك على الحرص

تحياتي على موضوعك الشيق

روح صامتة · منذ /03-11-2009, 11:28 AM

انا رايي ان دا كلام صح مية في المية وبيحصل كتير اوي بس لازم عشان نربي عيال فهمين وعاقلين لازم نعلمهم ونلراقبهم في اللي بيتفرجوا عليه وبس

ميرسي على الموضوع الجامد تسلم ايدك

ŌиĹч.Ḿё · منذ /03-12-2009, 12:18 PM

شكرا على المرور نورتونى

Just G!rl · منذ /03-12-2009, 12:27 PM

طيب ما إحنا ممكن نمنعهم إنهم يتفرجوا عليها

ممكن لوسمعوا الأغاني يتعاقبوا

بس موضوع مهم

تسلم إيديك يا جميل

ŌиĹч.Ḿё · منذ /03-13-2009, 12:37 PM

ميرسى يا جميل نورتى

DO3AA · منذ /03-14-2009, 12:18 PM

الموضوع جميل جدا وكلامك صح يارائد

لكن ممكن الموضوع ده يقل بأن الاهل يربوا اولادهم بشئ من الانضباط

ويعرفوهم الصح من الغلط

تسلم يا رائد على الموضوع الجميل ده

ربنا يبارك فيك يارب

سـالـي · منذ /03-15-2009, 02:29 PM

والله المشكلةمش في الاطفال

المشكلة في الاهل

يعنيلما الام بتبقى بتموت في هيفاء وهبي وبتفتح اغانيها وفيديوكلباتها بقى في البيت

طبيعي ان البنت هتقلد هيفاء وهبي

لما الاب بدل مياخد ابنه للمسجد يروح يشتريله ام بي تري عشان يسمع اغاني

طبيعي ان الولد بدل ميقرى القران هيغنى

الاطفال طبيعتهم التقليد وبيقلدو قدوتهم اهلهم

بيتفرجو الافلام ونور ومهند وبيتعابو كل حلقة ومفيش حاجة بتفتهم

لازم الاول نتكلم عن الاهل قبل منتكلم عن الاطفال

لازم نحاسب الاهل عن تصرفاتهم قبل منحاسب الاطفال

ولازم كل واحد مننا هنا يحاسب نفسه ويشوف نفسه بيعمل ايه

اكيد كل واحد فيكو عنده اخت صغير او اخ صغير او يمكن بنت اختك او ابن عمتك

ياترى بتعمل ايه قدامهم؟ اول مبيأذن بتجري تصلي؟ لا طبعا

بس اول متسمع نانسي على التلفزيون بتروح معلي الصوت

الطفل بيتفرج وبيركز على الحاجات دي

يعني ياريت قبل ما اي حد يتكلم يحاسب نفسه الاول

الاطفال ضحية اهلهم ولمجتمع

لك مني ارق التحية على الطرح

سـالـي

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
بنات تصنع وبنات شاطرة في المص	شاعر واسير الحب	مواضيع عامة - ثقافة عامة	5	12-13-2012 12:06 PM
يا شمس لا تطلعي - موال رائع	سارة2030	صوتيات اسلامية - تلاوات - خطب - يوتيوب	1	03-05-2012 11:39 AM
آسفه ياعمو قوقل	نقط وحروف	مواضيع عامة - ثقافة عامة	1	02-11-2011 09:42 AM
صدقيني ما راح تطلعي من هذا الموضوع إلا و أنتي مبتهج‎	الايمان	منتدى الاسلاميات والقرأن الكريم	4	04-01-2009 06:13 AM

الذين يشاهدون محتوى الموضوع الآن : 1 ( الأعضاء 0 والزوار 1)

..{ فع‘ــآآليـآآت المنتــدى }..

الإهداءات

نفسك تطلعى ايه يا شاطرة ....رقاصة ياعمو؟؟؟

قسم مناقشة المواضيع المتداوله والمنقوله