تجربه ,,,, والسلام

[قلم بلا حبر]

بسم الله الرحمن الرحيم

انك تداوم على الكتابه بشكل شبه يومى ,, دى حاجه بجد الى حد ما صعبه

خصوصا انك مطالب بتجديد افكارك ,, وانك متحصرهاش فى نطاق معين

وده الى بحاول اعمله لما بتنقل بين السياسه والاجتماع والدين وغيرها

مع انى حاسس بفشلى فى ده ,, بس اهى محاوله :biggrin:

النهارده حنتكلم عن التجربه بس من زاويه تانيه ,, نحاول نشوفها بشكل مختلف

واكيد مش محتاج اقولكم ان الموضوع اجتماعى فحيكون ليه علاقه بتجارب الصداقه او التجارب العاطفيه او حتى تجارب الزواج

كلها علاقات لما بتنتهى بشكل مش على هوانا ,,

على طول بنسميها تجربه

مع ان واحنا فيها وعايشينها بنسميها اسماء تانيه غير كده

علشان كده مش حناقش التجربه نفسها ,,

حناقش ما بعد التجربه ,,

واللى فى الغالب بتحمل معنى الفشل

لان فى النهايه احنا علشان كده بنسميها تجربه

الناس اللى اعرفهم :biggrin: فى التجارب نوعين

الاول : بيقدر يتماسك

التانى : بينهار

مفيش حد بعد تجربه فاشله بيكون احساسه فريش ,,,

وهنا ماليش دعوه بالطرف التانى

اللى اكيد حيتقال عليه ,, خاين وغشاش ومخادع ,,,,

خلينا فيك انت يا طيب يا مضحوك عليك ,, يا حنين :biggrin:

على نوعين

1 :: بيتماسك ؟؟

طب ازاى ؟؟

التجربه ,, اى تجربه فى العالم لارتباط بتتشابه مع مفهوم التجربه بشكل مجرد ,,

زى التجربه فى المعمل ,, انك تحاول تحضر مركب و ميطلعشى ,,

زى التجربه فى الشغل ,, انك تحاول تثبت ذاتك وفجأه متلاقيش ذاتك قادره تثبت حاجه ,,

زى تجربة اتخاذ صديق او حبيب واكتشافه على غير الحقيقه

هى هى اللتجربه ,,

بتختلف المواقف ,,

لكن بيفضل المضمون والمعنى واحد ,,,

وهو اننا فى الغالب بنسميها تجربه علشان بتحمل فشل

وطبيعى ان الانسان لما بيحس بفشل انه يتأثر ,

, وده اللى خلانى استخدم لفظ ,, متماسك ,,

لان اى انسان طبيعى اللى هو بيتفق مع التعريف العام للانسان ,,

لو متأثرشى بالفشل ,, يبقى مش بنى ادم ,, وفى الاخير بنقول عليه (( مبيحسش )) ,,

وعلى قد احساسك وتأثرك بالفشل ,

على قد ما بتكون انسان ناجح ,,

بس بشرط

ان تأثرك مينزلشى عن المحور الموجب

فاكرينه طبعا ,, يعنى ميبقاش -1 او -2 او -1000

لان وقتها زى ما محور الصادات اتقلب ,,

كمان حياتك بتتقلب

يعنى بدل ما حنقول

اقتباس وعلى قد احساسك وتأثرك بالفشل ,على قد ما بتكون انسان ناجح

حتلاقينا بنقول لو تأثرك نزل تحت خط الصفر

(( على قد ما حيكون احساسك بالفشل ,, على قد ما حيكون انهيارك كانسان ))

وفى حالة ثباتك عند نقطة الصفر ,,

يبقى انت انسان متبلد ,,, الكلام معاك زى قلته

وده حيخلينا نروح على النوع التانى

2- الانهيار

الانهيار مش معناه ,, الموت ,,

بالعكس الموت رحمه للى زى كده ,, لانه بيوصله بشكل شرعى لحالة التبلد

وفى نفس الوقت منقدرشى نوصف المنهار بالحياه ,,

لان الحياه حتى ولو اختلف العلماء فى تعريفها

انما هى فى النهايه عباره عن القدره على النمو والاستجابه للمؤثرات

فلما تلاقى نفسك بتضحك فى موقف ينبغى فيه البكاء

او تبكى فى موقف ينبغى عليك فيه الابتسامه

فهنا لا حياه ,,

انت منهار

ــــــــــــــــــــــــــــــــــــــــــــــــــ ـــــــــــــ


نيجى للمرحله التانيه من الموضوع ,,


الاولى كانت لتقسيم حال الناس بعد التجربه الفاشله

المرحله التانيه ,,


رد الفعل بعد التجربه



اولا

فى حالة الانسان المتماسك

طبيعى لو قدرنا نتماسك حنقدر نتحكم فى رد الفعل ,,

اللى فى الغالب بيكون معبر عن كل اهواء النفس البشريه الغير سويه

يعنى بالعقل كده ,, حد انجرح او اتخدع ,, المنتظر منه ايه ؟؟

لو قلنا يتماسك زى النوع الاول ,,

يبقى رد فعله حيكون متماسك هو كمان ,,

وفى الغالب بتلاقى انه بيحاول ينفض عنه غبار الفشل ويبدأ من جديد

ولما ييجى على باله التجربه الفاشله بيقدر يفرق بين الخطأ والخطيئه

لان الخطأ وقع اصلا عليه ,,

انما الخطيئه لو مقدرشى يتماسك ويحكم عقله وتوازنه ,,

هنا حتكون الخطيئه


وده بقى اللى بنقول عليه رد الفعل فى حالة الانهيار

ثانيا / رد فعل فى حالة الانهيار

وممكن نقسم تأثيره او نوعية رد الفعل الناتجه عنه على تلات انواع


الاول ذاتى



الثانى تجاه الغير



الثالث الجمع بين الاتنين ,, وده من وجهة نظرى اقساهم

الاول ,,, الانهيار فى رد الفعل على الذات

وده نتيجة احساسه بالخطأ من ناحيته هو ,,

سواء فى عدم تقدير الظروف ,,

او سوء الاختيار ,,

او الافراط فى الثقه ,,

المهم ان كل ده فى الاخير نابع من احساسه الشخصى بالخطأ ,,

فبيكون اقرب ما يكون من معاقبة ذاته على الفشل اللى وصل ليه ,,

وده بيتحدد على حسب مدى تأثره بالفشل

يعنى واحد متأثر جدا بتجربه فاشله

حتلاقى رد فعله تجاه ذاته ممكن توصل للاكتئاب ,,,

وبالتدريج ممكن نلاقى حد تانى بيفضل الانطوائيه كعقاب نفسى ,

, او حد تالت بيفضل عدم الخوض فى تجارب تانيه وده برده على سبيل العقاب ,,,



الثانى ,,,,

الانهيار فى رد الفعل تجاه الغير

الشخص فى عدم تماسكه وتحكمه فى ردود افعاله ,,

بيكون وقتها من السهل جدا ان حالة التأثر بالفشل اللى هو فيها تقوده للرد بالمثل ,,

واحيانا بيكون ابعد من كده ,, ويكون الرد على المثل

(( ونلاحظ ان فى فرق بين بالمثل وعلى المثل ده على حسب قصدى الشخصى ))

مثال للتوضيح

لو فرضنا ان محمد طفل و اتخانق مع احمد ,,, وضربه

لو احمد رد فعله جه على محمد وضربه بعد كده

يبقى ده (( بالمثل ))

انما لو احمد رد فعله جه على اى عيل فى عيلة محمد قابله فى الطريق وضربه

يبقى ده (( على المثل ))

التانيه دى بقى الخطيئه اللى بتكلم عنها ,,

اللى لو كان الشخص بعد تجربه فاشله فى حالة انهيار ممكن يقع فيها

واتسمت خطيئه ,, لان فى الوقت اللى انت بتنهار فيه من وقوع جرم فى حقك ,,

بترجع ترتكب نفس الجرم فى حق نفسك او فى حق اشخاص تانيه ملهاش ذنب

يعنى اللى بتشتكى منه بقيت انت زيه

بمعنى ان ,,,

--- الانسان لما بيفشل وفشله بيكون راجع لشخص ما ,,

ومش قادر ياخد حقه من الشخص ده

بتتبلور فكرة الانتقام فى اى حد يمثل الشخص ده على سبيل التعميم ,,

لمجرد اشباع غريزة الانتقام لديه

وده اللى بيخلينا احيانا حد يقولك انا متعقد من كذا (( بتعميم )) ,,

زى مثلا انك تلاقى حد متعته انه يستلذ بايلام اصحابه ,,

سواء بالغدر بيهم او بخيانتهم لمجرد انهم بيفكروه بصاحبه او صاحبتها اللى غدر بيه او بيها

وفى نفس الوقت وبرده كمثال تانى ,, نلاقى بنت او ولد بتستلذ او بيستلذ فى ايلام اولاد او بنات

لمجرد اتفاقهم مع اللى خانها او خانو فى النوع ,, انهم ولاد او بنات زيه او زيها ,,

او رغبته او رغبتها فى كسر اى علاقه لمجرد فشلها او فشله

ده بيمثل رد فعل مبنى على انهيار

لكن تجاه الغير ,,

وده صعب جدا ,,

لانه فى الاخير بيسبب مع الوقت تبلد وعدم لامبالاه

لان الانسان اللى يقدر يبنى رضاه النفسى على الم الاخرين ,,

مستحيل يكون بيحس ,,

ده اصبح فى تلاجه ,

, متبلد ,,

واحيانا بنقول (( مش فى وعيه ))

وده على سبيل الاختصار فى كونه منعدم الاحساس ,,

لان الانسان بيفقد الاحساس عند فقدانه للوعى

رد فعل غير متماسك ومعمم على المثل

طيب وهل معنى ده ان غريزة الانتقام مثلا ,,

((( واللى ممكن نعتبرها ممثله لفكرة رد الفعل الناتج عن الانهيار ,, فى اتجاه الغير ,, )))

ان الانسان يقدر يتخلص منها بسهوله ؟؟

لا طبعا ,,

خلينا نكون واضحين الغرائز من خلق الله ,,

ووجودها فينا اكبر دليل على تكريم الانسان ,,

انتم عارفين ان الملايكه سجدت لادم ,, لانه تعلم الاسماء كلها ,, مش بس كده

لان الملاك اتخلق بدون غريزه ,, فهو مخلوق للعباده

والشيطان ملعون الى يوم الدين ,,

فمفيش له طريق للهدايه يعنى مستمر فى الضلال

انما الانسان الوحيد اللى قدامه طريقين بختار من بينهم ,,

وده مناط التكليف ,, والتكريم فى نفس الوقت

مناط التكليف فى وجوب اتباع الارشادات الالهيه

اللى بيها يقدر يحافظ على نفسه من الهوى واتباع الغريزه بدون وعى

ومناط التكريم ,, لانه جهاد النفس وقتها بيكون افضل جهاد عند الله

وعليه لو قدر يجمع ده كله ساعتها حنلاقى ان رد الفعل بعد تجربه فاشله مش حيكون

اقتباس رد فعل غير متماسك ومعمم على المثل

لا

حيكون رد فعل متماسك ومخصص بالمثل ,,,

وساعتها حيبقى قدامه خير الامرين

اما انه يعفو ويصفح

او انه ياخد حقه (( العين بالعين والسن بالسن والجروح قصاص ))

لكن من ضمير انسان ,, (( فمن عفا واصلح فأجره على الله والله لا يحب الظالمين ))

,,,,,,,,,,,,,,,,,,,,,,,,,,,,,,,,,,,,,,,,,,,

اما التالت ده بقى

:: الانهيار فى رد الفعل تجاه الذات والغير ,,

فده قمة العذاب

لما حد يعذب نفسه

وكمان يعذب كل اللى حواليه

ارضاءا واشباعا لغريزة الانتقام

من ذاته ومن كل ما يمثل له شكلا او مضمونا نفس السبب اللى ادى بيه لفشل التجربه

مش محتاج اتكلم عنه ,,

اكيد انتم متخيلين ومدركين انا عايز اقول ايه

ـــــــــــــــــــــــــــــــــــــــــــ

فى النهايه ممكن تدوروا حواليكم او جواكم عن الحكايه دى وشوفوا هل فعلا التجربه الفاشله بالنسبه لك

بتاخدها وانت متماسك والا بتسلم نفسك ليها وتنهار

وكنت عايز اجيبلكم فيلم عدو المرأه :biggrin: ,, بس لقيته طويل ومحدش حيكمله

فجيبت ليكم كليب بيتكلم عن نفس فكرة الموضوع

وغيرت عنوان الموضوع واخدته من كلمات الكليب


ياترى رؤية ياسمين نيازى فى الكليب ده من اى نوع من اللى اتكلمنا عليهم ؟؟؟؟؟؟؟؟؟؟

شكرا للمتابعه


تحياااااااااااااااااااااااااااتى""""""""""

[ساحر الأحزان]

انت دخلتنا فى معادلة ميكانيكية ولا اية ياريس وقلت اهى تجربة والسلام

ان نجحت يبقى كويس وان ما نجحت نعيد المحاولة بسى التجربة على حسب

انواعها بتتغير عندك مش زى عند غيرك وفية الى بيتعلم وفية الى بيكبر

يعنى تقول التجربة علمتنى وفية الى يقول اهى تجربة والسلام

ومخسرناش حاجة فدة بيقول كدة على شان يدارى الى حصل لية

وختمتها بالكيليب بتاع ياسمين

معلشى انا اول مرة اسمع عن الاسم دة اصلى مش متابع الجديد

نايس توبيك ياكبير

تحياتى

[دمعه حائره]

من وجهة نظرى مافيش حاجه اسمها تجربه والسلام
فيه تجربه سابت فرحه وسعاده ونجاح
وتجربه تانيه سابت جرح وألم مايتنسيش
لو تماسكت ومثلت انك قوى
هايجى وقت تنهار بس بعد ماتبئا حطمت ناس كتير حواليك
ولو ضعفت وانهارت او حتى اذيت نفسك عادى
هاتفوق بعدها وتعيش من تانى
ايوة الجرح هايسيب اثر
لكن هايفكرك انك تخاف على نفسك اكتر وتعرف تختار صح
الكتمآن مؤذى لدرجة الغباء
وبيخلى صاحبه يقع فى نفس الخطأ تانى
ده غير امراض نفسيه هاتتمكن منه هاتحكم مستقبله
وتخليه دايما عايش فى ماضى ماشافش منه حاجه حلوة
فمن عفا واصلح فأجره على الله والله لا يحب الظالمين
سهله جدا على اى انسان متدين
لكن الصعب هوا النسيان وتبدأ من جديد
الانتقام نار بتحرق صاحبه اول واحد
وفى النهايه الرضى بالمقسوم عبادة
موضوعك جميل لدرجة ماتتوصفش
تسلم اخى وربنا يوفقك دايما

[פﭠة ﺳگـړُھَہّ]

هو انا كنت ماشيه زى الفل وعاجبنى الكلام وفى الاخر جيت توهت انا منك مش عارفه بقا عيب فيا ولا اى....
بس انا عاوزه افهم حاجه بقا بالنسبالك انت تجربه والسلام زى عنوان الموضوع ......
ولا عكس العنوان نهائى اللى هو طبعا داخل الموضوع .............

[SiLver Spectra]

اقتباس انك تداوم على الكتابه بشكل شبه يومى ,, دى حاجه بجد الى حد ما صعبه خصوصا انك مطالب بتجديد افكارك ,, وانك متحصرهاش فى نطاق معين وده الى بحاول اعمله لما بتنقل بين السياسه والاجتماع والدين وغيرها مع انى حاسس بفشلى فى ده ,, بس اهى محاوله :biggrin:

ليه بس بالعكس انا واحد من الناس لما بشوفك في المتواجدون الآن بتنشئ موضوع ببقى مبسوط و مستنيه زي ماكنت بتحمس عشان هشوف حلقة جديده لكونان و أنا صغير ههههه

و أعتقد ناس كتير بتستفيد من كتاباتك مش بس أنا
فلسفتك و شرحك للثبوت و الانهيار بعد تجربة حلو
و حالات الانهيار بيكون لها اسباب كتير لكن اغلبها بتكون حالات اكتئاب عاطفي
و ربنا يبعدك عنه لأنه بيكون صعب فعلا خاصة في بدايته
لأن العقل الباطن بيلعب فيها دور سلبي جدا و بيسيطر على العقل ككل بإنك مش هتقدر تجيب حد زيه أو ياااه بعد كل دا و بعدين ترجع للصفر , طب الشخص دا اتعودت عليه ,,الخ
دا كلو بيتسبب في حالة انهيار للشخص ,,و قيس على كدا امور تانية زي فقدان مال او املاك
لكن أتصور ان تاثير الاكتئاب العاطفي بيكون اقوى و لفترة أطول لأنه بيكون روحي مش مادي
و الروح دايما تغلب المادة

تقدريري لموضوعك,,

[Lαzєzα]

بص اول لما قرأت عنوان التوبيك
افتكرت سونج اهى يالا عيشه والسلام بتاعه اليسا تقريبا :d
وقولت التوبيك هيبقى نكد ف نكد شور
بس بجد الكلام عجبنى اوى وشدننى
وبالعكس انا شايفه انك بتعرف تكتب ف كل المواضيع حلو اوى ماشاء الله
بخصوص عنوان التوبيك
هيا مش تجربه والسلام
هيا تجربه لو انا عاقل اكيد هستفيد منها مدام مش عصيت ربنا
امممم ,, االلى بينهار ده امممم هو تفكيره اللى مخليه كده
يعنى هتلاقيه عمال يردد انا خسرت كتير وضيعت عمرى
ومش هلاقيه زيه تانى ,, ولا هو بعنى وانا اشتريته
وكلام الافلام ده
خلاص اهى تجربه وعدت
استفدت منها ,,, اه شور استفدت منها
فبلاش الواحد يقعد يندم ويعقد نفسه
لو ربنا كتبله الخير ف التجربه دى ,, كانت اكيد هتستمر
علفكره السونج بتاعه ياسمين دى بحبها اوى
مع ذلك مش داخل دماغى كلماتها
تسلم ايدك

[yasmine refat]

قال تفشل قال

يابني ماشاء الله عليك اللهم لا حسد:biggrin:

ما لا يميتك يقويك

يعني الواحد لازم يمر بتجارب فاشله علشان يكون واعي بمعادن الناس ويقدر يعرف نفسه أكتر

لازم كل أنسان يمر بتجارب سيئه

يعني انا شخصيا بكره الشباب الحديث بس بصراحة السبب الرئيسي الي بشوفه في النت والفيس وحوليه من قصص ( وعلى فكره في بنات كتير كده ومش شرط يكونوا مروا بتجربه اصلا !!!) عمللنا رعب وانتم مش حاسين:biggrin:

بس والله ياسيد الخيانه توجع وتوجع جامد وخاصة لو مافيش اعتذار يشيل شيء من الالم في داخلك

وربك كبير وما بينساش حد فطبعا غلط يغلط عليك شخص تعمم على الجميع هو الانسان الطبيعي حسب تعريفي عادي يكون حذر وبيخاف ومش لازم توصل لاكتئاب وانطوائيه

في ناس كويسين برضو وكتير بس لازم الالم ياخد وقت لين مايتعالج وتعرف تتعامل معاه

وعجبني تقسيمك للناس انا شخصيا بكره الناس الي بتتحطم وتحطم الي حوليها

الي حصل حصل وربك مش كاتب نصيب حتى لو جواز وطلاق

الطيور على اشكالها تقع وان بايماني بالله متأكده اني لو تجرحت من حد او ماحصلش توفيق بينا فالسبب هو اختلاف المعدن

الثعلب محتاج ثعلب يسيره

والمنحرف محتاج زيه

والخلوق محتاج زيه كمان

ومش معنى انك وقعت في حد غلط انك تنغلق على نفسك لانك ممكن تكون مهم لحد تاني ويشبهك ومش واخد بالك

وعموما غصبا عنك لازم تحتك بالناس ولازم تحبهم وحكاية التبلد انا مسمهوش تبلد اسمي نفس شيطااااااااانية وبس

وربك بيجمع ويوفق

والفيديو ياسيد مزعج شويه الاغنيه حلوه بس في مشاهد ضيقتني شويه

وهي من النوع الاهبل المثالي زياده عن اللزوم مسيرها تاخد وقتها ويبقى ذكرى ماتنفعش ترجع لان هيحل محلها كيان تاني ووضع يلزمك بالاحترام والوفاء اذا كانت كما ذكرت مش بتكذب على حد اي صاحبة مبدء

بس كل شيء محتاج وقت علشان تقدر تقنع نفسك وماتظلمش الطرف المقابل

مشكور

[حنـــــون]

فى البدايه اكيد الكل بيستفيد من كتابات ياسيد
ياراجل دا انا بقرا موضوعك مره واتنين على غير العاده
ورغم طول الموضوع :d اكيد استمر لان بجد موضوعاتك دايما متجدده
ورؤيتك للامور بتكون متوازنه جدا
اما بالنسبه للتجربه بشوفها شئ مفيد جدا رغم صعبوتها علينا لو كانت تجربه فاشله
الحياه لازم نسلم ليها ان مش دايما بتكون معانا واكيد مش هنقدر نوقف حياتنا
ولا نغير شخصيتنا عشان فشلنا فى تجربه
ماينفعش اتحول لشخص حاقد بئه ونفسه ينتقم من العالم كله ولا ينفع اتحول لشخص
ما بيحسش متبلده مشاعره لانو فى كل الحالات دى مش هيقدر يعيش حياته
وهو الى هيخسر فى الاخر وحياته هو الى هتضيع الحل الامثل والى لازم دايما
نحطه قدمنا مهما كانت صعوبه التجربه هو اننا نرجع نوازن امورنا ونرتب حساباتنا
من اول وجديده ونحاول بدال ما ننتهى نبدأ من جديد ...

الاغنيه حلوه جدا بس بتعرف هى الى موقفه حياتها مش التجربه الى مرت بيها
الانسان مهما مرت عليه اشياء صعبه جدا واهمها التجربه العاطفيه
لما يحاول يبدا من جديد ويحاول يلمس الحلو فى حياته الجديده
ومايحولش ابدا يقارن بين جديده وقديمه اكيد هتقدر تعيش وتقول تجربه وعلمتنى
اختار الى يناسبنى ويساعدنى وهتتحول التجربه لذكرى فى عقله زى ما جرحته
علمته ...
بشكرك ياسيد على تحليلك المنطقى واسلوبك المميز
تحياااتى لك ^^

[قلم بلا حبر]

اقتباس المشاركة الأصلية كتبت بواسطة ساحر الاحزان انت دخلتنا فى معادلة ميكانيكية ولا اية ياريس وقلت اهى تجربة والسلام ان نجحت يبقى كويس وان ما نجحت نعيد المحاولة بسى التجربة على حسب انواعها بتتغير عندك مش زى عند غيرك وفية الى بيتعلم وفية الى بيكبر يعنى تقول التجربة علمتنى وفية الى يقول اهى تجربة والسلام ومخسرناش حاجة فدة بيقول كدة على شان يدارى الى حصل لية وختمتها بالكيليب بتاع ياسمين معلشى انا اول مرة اسمع عن الاسم دة اصلى مش متابع الجديد نايس توبيك ياكبير تحياتى

ده حقيقى يا امجد ,, ان فى فعلا ناس بتقول استفادت من التجربه

بس هل هم صادقين ؟؟؟

الاجابه دى عندهم هم بس

اما ياسمين نيازى فالالبوم كله جامد بصراحه

نورت يا حاج ,, وعاده متنقطعش :biggrin:

تحيااااااااااااااااااااااااتى"""""""""""""

[قلم بلا حبر]

اقتباس المشاركة الأصلية كتبت بواسطة دمعه حائره من وجهة نظرى مافيش حاجه اسمها تجربه والسلام فيه تجربه سابت فرحه وسعاده ونجاح وتجربه تانيه سابت جرح وألم مايتنسيش لو تماسكت ومثلت انك قوى هايجى وقت تنهار بس بعد ماتبئا حطمت ناس كتير حواليك ولو ضعفت وانهارت او حتى اذيت نفسك عادى هاتفوق بعدها وتعيش من تانى ايوة الجرح هايسيب اثر لكن هايفكرك انك تخاف على نفسك اكتر وتعرف تختار صح الكتمآن مؤذى لدرجة الغباء وبيخلى صاحبه يقع فى نفس الخطأ تانى ده غير امراض نفسيه هاتتمكن منه هاتحكم مستقبله وتخليه دايما عايش فى ماضى ماشافش منه حاجه حلوة فمن عفا واصلح فأجره على الله والله لا يحب الظالمين سهله جدا على اى انسان متدين لكن الصعب هوا النسيان وتبدأ من جديد الانتقام نار بتحرق صاحبه اول واحد وفى النهايه الرضى بالمقسوم عبادة موضوعك جميل لدرجة ماتتوصفش تسلم اخى وربنا يوفقك دايما

بحس انك بتزاكرى اى موضوع ,, علشان كده ردك بيكون على اغلب افكار الموضوع

مع ان تحسى انه كتله واحده

بس دى حقيقه بين السطور فى تنقلات بين كل افكار الموضوع

احيانا ممكن تكتب علشان تكتشف موهبه خاصه بيك

وساعات ممكن تكتب فتكتشف مواهب ناس تانيه

رد عجبنى جدا

تحياااااااااااااااااااااااااااتى"""""""""""