مـــــــــصــــر ,,,, رايحه على فين ؟؟

[قلم بلا حبر]

بسم الله الرحمن الرحيم

السلام عليكم

مصر رايحه على فين ؟؟؟

الاجابه عليه سهله جدا ,, وجاوبها قبل كده عمنا كلنا ,, جلال عامر ,, لما قال ,,

كنت اسأل قبل ما تركب :biggrin:

الله يرحمه

لكن النهارده اللى عايز يتعب نفسه قوى ,,

يدقق ويحاول يربط كل الاحداث ببعضها ,,

علشان يقدر يستنتج مصر رايحه على فين

وطبيعى وزى ما علمونا لما نيجى نحل مسألة مستعصيه

نبدأ نشوف الاول المعطيات <<<<< اصله كان علمى رياضه :762:

وبعد كده المطلوب

واخيرا البرهان على تحقيق المطلوب


خلونا نبدأ بالمعطيات

1- رئيس ذو خلفيه عسكريه تم خلعه واوكل مهامه بشكل غير شرعى للمؤسسه العسكريه ممثله فى مجلسها العسكرى

2- مجلس عسكرى التف على التيارات المنظمه والقويه فى صفوف الثوره وعلى رأسهم الاخوان وقدر يعقد معاهم صفقه بناءا عليها سلب الشرعيه من الثوره لنفسه وأصبح فى مقام حاكم البلاد

3- مجلس عسكرى استغل سلطاته المخوله بحكم الدستور لحاكم البلاد واستغل معاها كمان اساليب النظام البائد فى توجيه سهامه الى الاقليات فى الثوره ,, زى 6 ابريل وكفايه واعضاء الجمعيه الوطنيه للتغيير

4- مجلس عسكرى انتزع الاختصاصات التشريعيه اللى بناءا عليها اقر عدة مراسيم دستوريه وقوانين مشبوهه استغلها ومازل بيستغلها ,, زى قانون تجريم المظاهرات والاعتصامات وقانون مجلسى الشعب والشورى واخيرا (( الخازوق الكبير )) قانون انتخابات الرئاسه

5- وضع سياسى أشبه بالبركه الضحله ,, محدش قادر يشوف فيه حد ,, كل تيارات الثوره منقسمه ما بينها ومنقسمه على نفسها ,, وده وضع مثالى جدا لتوجيه الضربه القاضيه

6- شعب اكثر من نصفه يعيش فى اميه قاحله ,, لا يدرى عن الانتخابات سوى انها الوقت اللى فيه بتيجى الهدايا والعطايا

7- شبهات حول نية ترشيح نظام قامت ضده ثوره وخلعته ,, لاشخاص من بينهم واحد زى احمد شفيق اللى اترفض كرئيس وزراء وبيحلم يكون رئيس ,, فكرنى باللمبى لما معرفشى يهرب الصبح ربنا وفقه وهرب تانى يوم :762:

8- حاله معيشيه تقود الى الرضا باى شئ فى مقابل عودة الامان وانخفاض الاسعار وتوفر السلع الرئيسيه

9- ضغط دولى موجه ناحية دوله محوريه ومركزيه زى مصر بيفرض شروطه كلاعب رئيسى فى المنطقه للحفاظ على مصالحه

10-حكم محكمة القضاء الإداري بمجلس الدولة فرع بنهاوقف تنفيذ القرار رقم 5 لسنة 2012 الصادر في 7 مارس الماضي من رئيس لجنة الانتخابات الرئاسية فيما تضمنه في مادته الأولي من دعوة الناخبين للانتخاب ،



المطلوب

استنتاج المرحله الجايه شكلها ايه

البرهان


بما ان ,, لديك شعب تغزوه الاميه ,, وعوقب على مدار سنه ونصف فى امنه ورزقه وامانه المعيشى

اذن ,, انت امام شعب مهيأ نفسيا لقبول اى نتيجه للمرحله الجايه وعلى رأسها انتخاب الرئيس <<<<< (( 1 ))

-*-*-*-*-*-*-*-

وبما ان النيه مبيته لاستمرار حكم عسكرى بشتى الصور وكان واضحا وجليا فى تعدى المخلوع على الدستور وتسليمه السلطه للمجلس العسكرى فى الوقت اللى كان ممكن يسلم فيه السلطه لحد مدنى زى رئيس المحكمه الدستوريه العليا ,

وبما ان المجلس العسكرى المعين من قبل المخلوع انتهج نفس النهج وبيت النيه لاستمرار النظام الفاسد وده كان واضح كمان فى افعاله اللى منها رفضه لحل الحزب الوطنى ومحاكمة اعضائه بتهمة الفساد السياسى (( مع ان دع اتعمل من العسكريين نفسهم فى ثورة 23 يوليو )) ,,, ورفضه كمان حل المجالس المحليه اللى بتعتبر امكنه موبوءه لتعشيش الفساد بين ربوع مصر ,, واستمرار نهجه فى دعم وزارات لا تعبر باى شكل عن الثوره وكل من كانوا على رأسها اما تابعين للنظام السابق او كانوا جزء ا منه

اذن ,, فلا تخبرنى انه يفعل كل هذا لمجرد انه غبى ,, او بمحض الصدفه ,, وانما هى خطوات لازمه لاعادة انتاج النظام السابق دون اللجوء للعنف الا فى المراحله الاخيره <<<<< (( 2 ))


-*-*-*-*-*-*-*-*-

بما ان المجلس العسكرى قدر يعقد صفقات مع تيار الاسلام السياسى ممثلا فى الاخوان ,, منذ اختيار عضوين من اربعة اعضاء من الاخوان لكتابة الدستور ,, وانطلاقهم بدعم من التيار السلفى لحصد الاصوات لصالح الموافقه ب (( نعم )) على تلك التعديلات التى ستمنح شرعيه دستوريه لمجلس هو بالاساس وضعه الدستورى خاطئ

وبما ان المجلس العسكرى استطاع ان يستغل تلك التيارات المنظمه والموجوده بالشارع لتحسين صورته امام الرأى العام وكسب تأييد ملايين البسطاء بعد فتاوى اصدرتها الهيئات الدينيه المنبثقه عن تلك التيارات والتى تقول بعدم الخروج على المجلس العسكرى ,, وانه خط احمر ,, وان انهياره يعنى انهيار مصر كما قال الشيخ محمد حسان

وبما ان المجلس العسكرى استغل تلك الجماعات والتيارات فى هجومه المتكرر على شباب الثوره وتشويه صورتهم وربط الثوره فى الاساس بالجيش على اساس انه من قام بتأمينها ,, والانقضاض بشراسه على كل ما هو ليبرالى او علمانى او حتى مثقف لا ينتمى الى تيار ,, وهذا كان واضحا فى اتهام حركة 6 ابريل بالعماله والتخوين ,, واتهام المعتصمين فى محمد محمود واحداث مجلس الوزراء وميدان التحرير بالبلطجه ,, واتهام منظمات المجتمع المدنى بالعماله ايضا والتخوين وهى التى كانت تقف بمثابة حائط الصد الاخير لحماية الثوار من بطش العسكر فى المحاكمات العسكريه التى افضت الى سجن الالاف من شباب الثوره عقابا لهم على ما ارتكبوه من جرم الا وهو الثوره على النظام العسكرى

وبما ان لا يوجد عاقل الان يدرك مدى التدهور الذى وصلت له العلاقه بين طرفى الصفقه من مجلس عسكرى وتيار دينى ,, اتضح فى اكثر من موقف مثل مشكلة حكومة الجنزورى ,,, وترشيح الشاطر لانتخابات الرئاسه ومن ثم بعد ذلك محمد مرسى ,,, واخيرا العباسيه ومليونيات الاخوان الاخيره التى تهتف باسقاط حكم العسكر والتى من خلالها استطاع العسكر ان يحصدوا تأييد جموع البسطاء من شعب مصر ,, لانهم كما سبق وجدوا من قال لهم ,, ان انهيار المجلس العسكرى يعنى بالاساس انهيارا لمصر ,, فجاءت اللعنه على الفاعل ,, وصب الشعب المصرى جام غضبه على التيار الدينى لهتافه فى التحرير والعباسيه باسقاط العسكر

اذن فالذئب قد كشر عن انيابه واتضحت نيته فى التهام القطيع,, بدأها بتفريق القطيع ومهاجمة كل حمل بانفراد واصابته فى مقتل , بمساعدة افراد من نفس القطيع , ومن ثم استطاع ان يصيب كامل القطيع واحدا تلو الاخر ,, واصبح كل حمل اسيرا لجرحه بعيدا عن الاخرين ,, ومن ثم فالفرصه الان متاحه للانقضاض على كامل القطيع دفعة واحده ,, ولن يستطيع احد منه النهوض او المقاومه ,, فالكل جرحه غائر <<<<<< (( 3 ))


-*-*-*-*-*-*-*-*-


وبما ان مصر كانت ولازالت هى عمق الشرق الاوسط ,, ولطالما كانت مواقفها بمثابة مؤشر لتحديد المواقف الدوليه فى المنطقه

وبما ان ايضا فى الاونه الاخيره خرج من مصر الثوره اصواتا تنادى بشعارات مرعبه لكل من له مصلحه فى المنطقه ,, مثل قطع العلاقات واعادة النظر فى كامب ديفيد والتقارب مع ايران واقامة الخلافه الاسلاميه او الوحده العربيه الى غير هذا من الشعارات المختلفه

اذن فالرأى العام العالمى قد يتقبل اختراقا لحقوق الانسان فى مصر فى الفتره القادمه ,, فى الوقت الذى لن يقبل فيه اختراقا لمصالحه فى المنطقه سواء بالتهديد او التلويح <<<<< (( 4 ))


-*-*-*-*-*-*-*-*-


واخيرا بما انه قد صدر الحكم المشار اليه فى المعطيات فى بند رقم (( 10 ))

اذن نحن امام ارض رخوه فوق بركان من السهل جدا عن طريق محامى مبتدئ بعد انتهاء الانتخابات ان يفجر هذا البركان فى وجه الجميع <<<<<< (( 5 ))


-*-*-*-*-*-*-*-*-

اذن

من 1 ,,, 2 ,,, 3 ,,, 4 ,,, 5

يتضح لنا ان احد 5 سيناريوهات هو القادم

الاول : ان تدار الانتخابات بشفافيه تامه وان ينتخب الرئيس ويتسلم الحكم وتبدأ مصر النهوض (( وده سيناريوا ضعيف ))

الثانى : ان تدار الانتخابات وينجح فيها مرشح فلولى ولا يصح الطعن عليه حينها استنادا لقانون الانتخابات الرئاسيه فى مادته رقم (( 28 )) السابق ذكرها ,, وهو ما سيؤدى الى تفجير الوضع برمته وهو ما سيقابل بقمع شديد مؤيد من الداخل (( الشعب المصرى )) ومن الداخل (( القوى الدوليه التى لها مصالح فى المنطقه ))

الثالث : ان تدار الانتخابات وينجح مرشح ثورى ويتم الطعن عن الانتخابات استنادا الى حكم محكمة القضاء الادارى وحينها نقع جميعا فى فراغ دستورى لا بديل له الا بمد امد وجود الحكم العسكرى وهو ما سيفجر الوضع ايضا

الرابع : انسحاب احد المرشحين زوى الثقل من سباق الانتخابات اعتراضا على عدم شفافية الانتخابات وهو ما سيؤدى الى استنفار فى جبهة مؤيدى الثوره ,, ويقابله فى المضاد جبهة راغبى الاستقرار ,, ويشعل الموقف تماما ويطيل امد الوجود العسكرى

الخامس :: حدوث امر ما مجهول قبل الانتخابات يقود على قرار صارم مثل اعلان حالة الطوارئ او الاحكام العرفيه ,, يؤدى بنا فى النهايه الى نقطة الصفر ,, ويتيح الفرصه للذئب للانقضاض بشكل كامل على كامل القطيع وتوجيه ضربته الاخيره للثوره ,, ومنجيش ليكم فى حاجه وحشه

# # #

_______________________

عايزين رأيى

مصر بحاجه الى ثوره جديده بادوات جديده تواجه بها مؤسسه محبوبه بين جموع الشعب ,, ومنحها بعضا من الثوار هاله من القداسه نحن من يدفع ثمنها الان

مش زى الشرطه اللى ناس كتير من الغلابه كانت مشاركه فى الثوره علشان تجامل فى ضربهم

الوضع جد خطير

شكرا للمتابعه

تحياااااااااااااااااااااااااااتى""""""""""""""

[الأميرة رودي]

ربنا يستر..
ويكون للسيناريو الضعيف اللى قولت عليه ..

[color=#] ان تدار الانتخابات بشفافيه تامه وان ينتخب الرئيس ويتسلم الحكم وتبدأ مصر النهوض (( وده سيناريوا ضعيف ))[/color]

واللى كلنا املنا عليه انا وكل المصريين
اللى نفسهم يشوفو مصر مش بس مستقره وفى امان
لآ تكون كمان في ايد حاكم يراعي ربنا فى شعبه
بعيدا عن الحكم العسكرى واللى عشنا فيه سنين طويله
وجربنا ظلمه واضطهاده ..
محتاجين انسان يعدي بينا الفتره الصعبه اللى بنعيشها
واكيــد مش ههنعطى الفرصه للمجلس العسكرى انه يحكم البلد بالعافيه ..
واللى عمل ثوره مره يعملها ألف مره ..
وكل السيناريوهات المطروحه ماعدا الاول طبعا
بتوضح اد ايه تخطيط العسكر لاعاده النظام السابق ..
وتؤكد الرغبه فى تحقيق اهدافهم وهى اسقاط الثوره ..

لكن ان شاء الله ربنا هيرد كيدهم وهتكون الانتخابات بعيده عن التزوير
وننتخب المناسب والآفضل ..
بس المهم التأكيد على موضوع الوعى لدى المصريين
والفهم بالآمور والبعد عن العاطفه والكلام المعسول اللى بنسمعه من المرشحين
من فلول النظام ...

شكرا جزيلا قلم
وضحت نقط مهمه يغفل عنها ناس كتير
وانا شخصيا استفدت منها
احترامى الشديد لك ولقلمك

[ساحر الأحزان]

الانتخابات نقطة فاصلة فى تحديد الشرعية القادمة فى انتخاب الرئيس القادم

فلو كل واحد حكم عقلة وترك عاطفتة واختار الرئيس الى شايف فية

ان عندة الكفائة فى الرئاسة يبقى كويس القرار حيكون للشعب

انما لو تم اللعب حنرجع لنقطة البداية ولية الدستور

جايين دلوقتى يضعوة فى الوقت القصير دة مكانت الفترة طويلة قدامهم

ويكتبوة براحتهم ويعرضوا بنودة على الشعب ولا العملية سلق فى سلق

دة مستقبل امة كلها مبنية علية

توبيك نايس عرب

كما تعودنا منك

تحياتى

[فداااااااااااء]

مصر رايحه على فين
سؤال ربما عجز عنه الكثير من علماء السياسه التنبؤ به
شوف فى كثير منا بيعترض على الاسلوب الدائر الان فى الانتخابات وعلى الرغم من انى قد تربيت على فكر سياسى معارض وكان مثلى فى ذاك حمدى قنديل الذى طرد من مصر لقول الحق فى النظام الفاسد سابقا
ولكن مش مع الحجه السائرة الان ان المجلس العسكرى يتحد مع الاخوان او انه سيسعى لاكتساب الحكم لاحد ممن يريده
لان الحقيقه اظن ان المجلس العسكرى لم يقوم بثورة بلطجيه لحرق مقدرات البلاد وسرق ثرواتها وايضا تهريب الاسلحه وترويع الناس
خلينا نضع كل شخص مسؤل ومسبب لهذا فى مكانه دون نزع التهم من عليه

شباب الثورة هم اكثر الناس خوفا من الاخوان الان وذلك اتضح عندما اصدروا تصريحات للاخوان بقول طيب اعتذروا واحنا هنسمح ليكم بدخول الاعتصام فى التحرير معنا ياراجل اى قوة يتحدثون عنها بعد الضعف الذى ظهر منهم
تقدر تقولى هما ليه بيطالبوا المجلس العسكرى بالتدخل فى صد اطماع الاخوان فى حين هما بيطلبوا من المجلس عدم التدخل فى الامور
امر محير والله شيء مناقض

واما عن الانتخابات فأسمح لي اقول ان كل المرشحين هم تيار اسلامى ما عدا الابرز فيهم ثلاثه حمدين صباحى وعمرو موسى والعم فشيق اى شفيق
فبعد ما اُعلن الناس انه امام الاختيار ما بين هؤلاء الثلاثه لبعدهم عن اى تيار اسلامى تقدر تقولى الناس هنا هتقيس على ايه وهما فضلوا سنيييييييييييين ما يتعرضوش للحديث عن السياسه ولا حتى السعى للفهم الامور فيها
حمدين صباحى شخص مجهول لاغلب من هم موجدين فى الشعب
وعمرو موسى سياسى ولكنه فشل فى حل قضيه واحده لما كان فى الجامعه العربيه
وشفيق رأو الناس فى اخر حكم الرئيس السابق وشهد الكثير على ادارته الجيده فى امور وكل بها قبل الوزارة ولكنه من الفلوف
شوف لو ان الامر موكل لى
فبقول ضع الالقاب على جنب لا فلول ولا طبق فول
ونتكلم بالمنطق شويه دلوقتى حكم الرئيس 4 سنوات والبلد فى حاله صعبه يبقى لازم ادارى جيد ومطلع على امور البلاد سابقا وبقول ما فيش غير الاخ فلول يللا ياعم يمكن كلمة الفلول بتسعد
ولكن هل الاختيارده من صميم القلب بالطبع لا ولكن اختار من السيئين اقلهم سوء

وهذا ما يفكر فيه كثير من افراد الشعب اللى للاسف كثير من التيارات مش فاهمه كده

طرح قيم
عذرا للاطاله
ااااه على فكرة انا مش من الفلول

[.نبض القلوب.]

مصر رايحة على فين
سؤال يطرح نفسه
تعالى شوف المرشحين
عمرو موسى مش عرف يحل قضية واحدة لما كان رئيس جامعة الدول العربية
دا بيقول هحل مشاكل مصر كلها بالفون
طيب يخويا محلتهاش ليه بل كدا ولا انت بتستهزء بالشعب
محمد مرسى مرشح الاخوان وكفاية ع الاخوان مجلس الشعب دا غير انه والله اعلم مش محنك سياسيا
ابو الفتوح دكتور ممتاز ومن زمان وهو ليه ف السياسة
بس برضو مش هيقدر يتصرف مع احوال مصر الايام اللى جاية
احمد شفيق راجل سياسى من الدرجة الاولى مع انه حكم فترة مبارك
بس كانت له ادارة ممتازة ف الطيران وبشهادة ناس كتير قرايبى ف مجال الطيران المدنى
وناس ف الطيران العسكرى كمان
راجل لو كنا ادناه فرصة بعد الثورة كان عمل كتير لكن احنا شعب مش بيصبر ع حاجة
هتقولوا بقى دا فلول ومش عارف مين
اقولك انا حاجة صغيرة خالص
ايه رأيك بقى كل الشعب فلول :biggrin:
مش تستغرب كدا
اه كلنا كنا من الشعب اللى حكمه مبارك وكلنا عشنا ف مصر ايام البيه دا
وكلنا كنا تحت حكمه
ولا احنا كنا عيشين ف المريخ :762: واحمد شفيق كان مع حسنى
كل الشعب فلول
30 سنة واحنا تحت حكم بنى ادم واحد
وشربنا من سمه كتير
مش تقولى اننا مش فلول
لكن فعلا الحاجة الوحيدة
اللى هتنفع مصر هو واحد
محنك سياسيا واعى بالادارة الخارجية شجاع
اعتقد ان الاصلح احمد شفيق
مش تقولى بقى انتى من النظام والكلام دا :biggrin:
بس انا شايفة حال البلد حلو اوى
والكل متعرض للخطر ناو لو مش جه رئيس يعدل البلد دى كويس
مش عايزين رئيس طيب
عيزين رئيس قوى
طرح راقى
تحيااااااااااااااااااااتى
وعذرا للاطالة

[doiss]

الأمل بالشباب ..
لسة المارثون طويل وعلى قدر التشاؤم والإحباط والظلم فقد يكونوا طاقة الدفع للأمام وتحقيق كل اهداف الثورة او اغلبها ,,

من حوالي كام شهر تمنيت فوز شفيق او موسى لرغبة مكبوتة ذاتية لأنني اكاد اجزم بشكل شخصي انهم سيكونوا السبب بتحقيق اهداف الثورة وإتحاد جميع القوى ضدهم وضد المجلس العسكري ,
لأن نجاح اي منهم سيكون نتيجتة دولة قمعية ومعتقلات وتعذيب وسجون لأن من تربى على نهج المخلوع لن يكتسب اي خبرة سوى من نفس نهج المخلوع وسياستة فهو لم ولن يعرف اي اي خبرة اخرى غير الاقصاء والتعذيب والتنكيل والفساد والتزوير ..

فعلى سبيل المثال ..
كيف لصبي تاجر المخدرات ان يكون عندة خبرة بأي مجال اخر سوى كيفية تسليم البضاعة والترويج لها والبلطجة والفساد وافساد شباب المجتمع !!
وهنا تاجر المخدرات المضروب بة المثل هو المخلوع وصبيانه هم شفيق وموسى الذين بدءو من الصفر من اول "ناضورجية" حتى لا تقع كبسة .. ثم ترقوا ليصبحوا تجار مخدرات بالقطعة والتجزئة حتى اصبحوا يطمحون في ان يكونوا المعلم الجديد بدلاً من المعلم المسجون حالياً :762:.

فهم لا يعرفون اي خبرة سوى الذل والمهانة والقمع والواسطة والمحسوبية والفساد والظلم سواء للمصرين بالداخل او بالخارج ,
وانا اثق تمام الثقة بشباب مصر الواعي فهم الأمل ..
(الثورة مستمرة)
تسلم الايادي يا سيد على التحليل الشامل والوافي والمميز ..

[همسه الجوارح]

هى رايحه مارينا
وممكن تاخدنا معها
المهم اننا هنفسح يعنى هنفسح
والله لو جه رئيس عاقل وصبور ورزين
ويتحكم بعدل
ولقى شعب يساعده فى تحقيق هدفه
مش من اول يوم يقولوا نفذ واحنا من طبعنا الاستعجال
المهم ان اللى جاى متوقف ع الانتخابات
ودور الرئيس اللى جاى
والشعب على حد سواء
والكل يعرف دوره رايح فين
ربنا يحفظ مصر