حكايه قلب

[الأميرة رودي]

فتره الغربه علمتني كتير جدا .
بس الأسوء من الغربه خارج بلادك هى انك تشعر بالغربه فى بلادك..

. كنت بحب الاغاني الوطنيه اوي كحال اي مصري متيم ببلده .
بس حقيقي مع الوقت حسيت ان حتى كلمات الاغاني هزليه.
مجرد ألحان مع كلمات تمس القلوب عشان فى الاخر يضمنو شعب راضى وشبعان برغم الجوع .


وصلنا لدرجه مابقناش عارفين نحبها ولا نكرهها ولا نشفق عليها.
بس اللى وصلتله انه أسوأ قرار انا اخدته ونادمه عليه يوم ما قررت اعيش فيها من تاني واستقر بعد ماجربت ابعد عنها.

حقيقي مهازل بشوفها مش موجوده فى اى بلد فى العالم.

الله المستعان

[الأميرة رودي]

صباح الخير من قريتي الحنونه ..

اول امبارح شاب اربعيني انتحر بسبب خلاف مع زوجته بعد ماكتبلها كل مايملك علشان مخلف بنات ومعندوش ولد فلازم يحرم اخواته بقى ويكتب املاكه لزوجته.
يقوم بعدها بفتره يقترض من البنك لعمل مشروع فيفشل المشروع ويضطر لبيع بعض من ممتلكاته لسداد البنك فترفض زوجته البيع بما ان كل شئ اصبح ملكها +شكوكه مؤخرا فى سلوكها .
يضطرب نفسيا فياخد حبه غله ويموت فى الحال..

٠٠٠٠٠٠٠

النهارده ولأول مره نشوف فعل شاذ عن ديننا وتقاليدنا يحصل فى قريتنا بالفعل. اب يعتدى على بنته وتروح البنت تعمل محضر بصحبه خالها والقريه مقلوبه وحديث الشارع والناس الان . لاننا كنا نسمع عن الاخبار الشاذه دي من بعيد لكن محصلتش لحد نعرفه .

احداث من قريتي الحنونه جداااا

[الأميرة رودي]

والسهرانين مع صوت الست . على الله حكايتهم

[الأميرة رودي]

عاوزه اغير اسم الأميرة رودي بقى كفايه كده
لانى ببساطه ولا اميرة ولا اسمي رودي
يبقى إيه كان جه عليا يعني اختار الاسم ده
الإنسان غريب فعلا. بيعمل حاجات وبعد فتره يستغرب ويضحك على نفسه

[الأميرة رودي]

الواحد لما يكون قاعد لوحده تلاقيه بيخترع مشاكل فى دماغه.
مش عارفه كل الناس كده ولا انا اللى بجر شكل نفسي والآخرين. .

ممكن بكون فراغ

[الأميرة رودي]

مش فاهمه انا ايه المشكلة ان الناس تحتفل بالمولد النبوي و تشتري حلاوة المولد ..
ايه المشكلة .؟؟.
كل واحد دماغه مش عاوزة تواكب تغير الحياة و رابطها ببعض الفتاوي مر عليها قرون و لم تعد تناسب الدنيا اللي الرسول نفسه قال انتم ادري بشئونها ..مصمم يحرم علي الناس كل فرحة كأن الدين جاء لمنع الناس من اي فرحة و لحزنهم و تكديرهم فقط ..

كل واحدة يقولك بدعة ..
و ماله يا سيدي ..
بدعة حلوة ..
ما البدعة يا حلوة يا وحشة ..
دي بدعة حلوة ..
الناس تفتكر ذكري ميلاد النبي و نفوسها تهدي ..
الاطفال يرتبط في ذهنهم من الصغر ذكري ميلاد النبي الحبيب بالحاجات الحلوة و الحلويات و الهدايا و الفرحة ..
فمن صغرهم يبجلوا النبي و يحبوه و يرتبط في ذهنهم حبه بالسعادة و الفرحة ..
كفاية بقي تصعيب و تحريم كل شيء علي الناس كرهتوهم في الحياة ذاتها ..
لم يرسل الله الاديان لسحق سعادة الناس في كل شيء ..
الدنيا تغيرت و لابد من عقليات متفهمة متسامحة عاقلة لا تفرط و لا تغلو ..
. احتفالات عظيمة بمولد سيدنا و حبيبنا النبي و حلويات و سعادة بس متكتروش عشان الضرر الصحي ..
و كل سنة و اهل مصر كلهم طيبين و بكل خير ..
كل عام وكل المسلمين فى كل مكان بخير وفرحه.

[الأميرة رودي]

مع قهوتي المسائيه ..
اكتب وعلى عاتقي الكثير من الهموم وتجول فى ذهنى العديد من التساؤلات
لم تغير البعض ممن حولي؟
ارى بعيونهم الحنين لكل لحظه مضيناها. ولكن هناك شئ ما يمنعهم
بجساره عن الاقتراب.
هناك كبرياء غريب لم نعتاده حتى فى نبره صوتهم حين يتحدثون.
هناك عناد غير مبرر فى ردود كل الأفعال . وكأنهم يثبتون لأنفسهم شئ ما بالكذب.
هناك أشياء ظهرت وأشياء تحاول الا تختفي برغم كل هذا التيه.
الأصعب بحق هو ان يبلغك غالي ب رسائل ك( لم أعد احتاجك )
وفى ذات الوقت تجده يموت كل لحظه لهفه وشوق فى بعادك.
يتابعك ، يغير عليك ، يراقب ضحكاتك . يقهر حينما تتركه وتبتعد قليلا او تنشغل قليلا..
لما كل هذا العبث . فى وجود كل هذا الحب ؟

اتذكر جيدا أشياءا لن يذكرها او يعرفها غيري.
همسات، ضحكات ، حكايات مكتوبه بيدك على جبيني
فاطمئن..
لم يعرف الجفاء يوما طريقا لقلبي .
لن يمت عشقا ولد فى صباي وها انا الان تجاوزت الثلاثين من عمري اي نضوجا بما يكفي .
فيحق لي الان وعلى مر الزمان ان اعشقك الف مره دون الرجوع إليك. او الاستئذان من قلبك المتيم بي..

همسات،مسائيه

[الأميرة رودي]

‏هل كان نزار قباني محقا عندما قال :
"أخذليه كي لا ينساكِي، وأوجعيه كي يُحبك أكثر."

[الأميرة رودي]

الرادار الأعظم ..
زي الماسون الأعظم اللي كان مدوخ أحمد سبايدر و توفيق عكاشة كده ..
ده رادار يلقط الدبانه اللى واقفه على وشك مش أرقام عربية ..
الرادار ده يبدو كأنه قادم من أفلام حرب النجوم
من مجرة بعيدة جدا جدا
أنا حاسه ان مصر لسه عارفة الرادارات جديد و عندها شهية لجلب كل انواع الرادارات ..
الطويلة و القصيرة ..
الثابتة و المتحركة ..
رادارات للسرعات و الحزام و اللي بيكلم جاره في العربية ..
رادارات تجلب الحبيب و ترد الغائب ..
رادارات تقرأ الطالع و تطلع المقروء ..
رادارات بتدي مخالفات غير ثابتة القيمة ..
و نسميها بورصة الرادارات ..
المخالفات بتاعتها تصحي من النوم تلاقيها زادت لوحدها ..متخيلين ازاى فرض غرامات على الناس من كل اتجاه عشان الحكومه تلم فلوس
مصر شكلها اكتشفت الرادارات جديد وفرحانه بيها.
يعني اسوق عربيتي ولو عاوزه اهش دبانه من على وشي مثلا اتخبط غرامه
شكله هيبقي مرار طافح ..

[الأميرة رودي]

" جهل اليوم يختلف عن جهل العصور الوسطي ، فمع انتشار وسائل التواصل و الصحافة فإن جهل اليوم لا يمكن الا ان يكون منظما و مرتبا و متعمدا .."


علي عزت بيجوفيتش ..
روايه هروبي الي الحرية ..