الثورة العمياء ,,

[SiLver Spectra]

((تصدق سلخت قبل ما أدبح))
عبارة ساخرة قيلت في فيلم هزلي (بوحه)
تنطبق تماما على احداث ما بعد ثورة 25 يناير
نقلبها عامية أحسن :biggrin:

فعلا ثورة عمياء , انفجرت و بعدين مالاقيتش قيادة ليها
بل كان من الذنب أن يدعي أحد أنه قائدها
يعني لو خرج علينا حد و قال انا زعيم ليها الناس ترد على طول : انت مين انت عشان تبقى زعيم للثورة,,اتكلم عن نفسك ,, انت ياعم جاي تنط علينا من براشوت ,,الخ

فكان من الطبيعي ان يجيلها قادة من الخارج يتحكموا فيها
و للاسف القادة دول مفهومهم للثورة بيختلف تماما عن مفهوم الشباب ,,لأنهم رجال عسكر , ملخص الثورة في دماغهم : كان ان الثورة قامت عشان تشيل مبارك و ابنه و بس

و من هنا و بدأت الفترة الانتقالية تشد الثورة لأماكن غريبة
و كل شوية الثورة تتكعبل عالسلم و الناس تحاول تسندها و تقع تاني ,,لحاد ما السلم الي طالعين عليه اتكسر و وقعنا تحت تاني جنب سلم شفيق :biggrin:

كلنا طبعا شوفنا الحكم بتاع امبارح عن بطلان ثلث أعضاء البرلمان و الي هما الناس الي انتخبت بالنظام الفردي و دا ترتب عليه بطلان مجلس الشعب بكامله
+
الحكم بعدم دستورية قانون العزل و ما ترتب عليه من ابقاء شفيق في الانتخابات

نبدأ بالحكم الأول
عشان نوضح للقارئ برضو
الحكم جاء بناء على مخالفة النظام الانتخابي للاعلان الدستوري الخاص بانتخابات مجلس الشعب بالنظامين (القوائم + الفردي)
بس تفتكروا مين الي عمل الخلل دا ؟

بما أني متابع قديم
هقتبس القصة بشكل تحليلي بالمختصر المفيد

اقتباس القصة تبدأ من سبتمبر الماضى عندما أصدر المجلس العسكرى مرسوماً حمل رقم 120 لعام 2011 الصادر بتاريخ 27 سبتمبر الماضى، ووفقا للمرسوم تستبدل نصوص المواد الأولى «فقرة أولى»، والثالثة «الفقرة الأولى والثانية والثالثة والخامسة»، والتاسعة «فقرة أخيرة» من القانون رقم 38 لسنة 1972 فى شأن مجلس الشعب، ووافقت القوى السياسية على جميع المواد بالمرسوم عدا المادة الخامسة، التى تنص على أنه يشترط فيمن يتقدم بطلب الترشح لعضوية مجلس الشعب أو مجلس الشورى بنظام الانتخاب الفردى، ألا يكون منتمياً لأى حزب سياسى، ويشترط لاستمرار عضويته أن يظل غير منتم لأى حزب سياسى، فإذا فقد هذه الصفة أسقطت عنه العضوية بأغلبية ثلثى أعضاء المجلس. وثارت القوى السياسية والأحزاب وعقدت اجتماعاً موسعاً بحزب الوفد فى 28 سبتمبر، ووقتها هددت بالانسحاب من الانتخابات البرلمانية برمتها، وأعقبها فى 29 سبتمبر مظاهرة مليونية تحت اسم جمعة استرداد الثورة، التى طالبت بإلغاء الطوارئ، وقصر الانتخابات على نظام القائمة النسبية، وإلغاء المحاكم العسكرية للمدنيين، وأعطت الأحزاب للمجلس العسكرى مهلة لإلغاء القانون أو مقاطعة الانتخابات بشكل جماعى، وفى الأول من أكتوبر دعا المجلس العسكرى جميع الأحزاب إلى اجتماع عاجل لبحث الأزمة، وعقد اللقاء بين الفريق سامى عنان، نائب رئيس المجلس الأعلى للقوات المسلحة، وأعضاء من المجلس، وخرج بعد الاجتماع بيان كانت أهم مواده التأييد الكامل من الأحزاب المشاركة فى الاجتماع للمجلس العسكرى، والثانية التعاون الأمنى بين الأحزاب والسلطة العسكرية، إلى جانب إلغاء المادة الخامسة، وبتاريخ 18 أكتوبر أصدر المجلس العسكرى مرسوما حمل رقم 123 لسنة 2011 ليتيح للأحزاب الترشح على المقاعد الفردية، بما جعل النصوص الحالية مشوبة بعدم الدستورية، لأنها بذلك فرضت فرصتين لمرشحين آخرين لمجرد الانتماء الحزبى الإخوان المسلمون يهددون بمقاطعة الانتخابات التشريعية المقبلة قالت أحزاب التحالف الديمقراطي في مصر التي يتزعمها الإخوان المسلمون إنها ستقاطع الانتخابات التشريعية المقررة في نوفمبر/تشرين الثاني إذا لم يلغ المجلس العسكري المادة الخامسة من قانون الانتخابات. وإذا لم يتم تفعيل قانون من شأنه أن يحرم قيادات الحزب الوطني الديمقراطي المنحل من العمل السياسي لمدة قد تصل لعدة سنوات.

و بناء على الاعتراضات الي قامت من الاحزاب تم تعطيل تلك المادة من المجلس العسكري و تم السماح للأحزاب بالترشح على القوائم الفردية بالإضافة الى النسبية

دا و بحد ذاته بيلغي فكرة المؤامرة المدبرة من المجلس العسكري لأن الاحزاب هي الي أصرت على كدا
الأحزاب ليها مبرراتها ,,و هو الخوف من الفلول
و القانون له مبرراته و هو اتاحة الفرصة للافراد للترشح و المنافسة الشريفة بعيدا عن الأحزاب
يعني لو فرضا أنا حبيت أرشح نفسي هيكون صعب اني أنافس عضو فردي من حزب الحرية و العدالة (حزب منظم و كبير)
و دا هيترتب عليه عدم كفاءة الفرص

الحل ببساطة في قانون العزل كان يبقى في التعديلات الدستورية
يبقى انت كدا اتقيت شر الفلول + انك هتحقق مبدأ المساواة في الفرص

طيب الي حصل ايه بقى ؟
اننا وافقنا على ترقيع الدستور ,,و للاسف الأحزاب الكبيره على راسهم الاخوان المسلمين الكرسي عماهم و لهثوا وراء السلطة بحسن نية اتجاه العسكر

و مش عايز حد يجي يقولي احنا اتعملنا استفتاء على مواد قليلة و الاعلان نزل فيه مواد كتيره مش في الاستفتاء!
هقولك ماهو الاستفتاء اتعمل على المواد المعدلة فقط و الموافقه يعني انك موافق ان الدستور يبقى كما هو مع تعديل بعض البنود الي في الاستفتاء و بس
لأن مافيش دولة بتحكم من عشر مواد مثلا!!

النتيجة : حل المجلس و مستقبلا الي هياخدوا المقاعد الفردية اغلبهم هيكونوا من اصحاب المال السياسي الي اغلبهم فلول

أنا امبارح بس عرفت العبرة من الاعلان الدستوري الي المجلس عمله و خلانا نصادق عليه
و دا عكسلي مدى ذكاءهم و غباءنا في نفس الوقت

الموضوع ماكنش عشان يفرق و يعمل استقطاب لصالحه و بس
الموضوع انه كسب شرعية دستورية تقيه من اي طعون مقدمه في حقه مستقبلا !

أنا فكرت كدا و قولت : المحكمة الدستورية مطلعه القطط الفطسانه و كل حاجه تقولك غير دستوري غير دستوري ,,طب اشمعنا المجلس العسكري دستوري
اذا كانت اصلا عملية نقل سلطة مبارك اليه كانت غير دستورية
يعني بالمبدأ ما بني على باطل فهو باطل , ممكن كنت ترفع قضية و تقول ان نقل السلطة غير دستوري و يلا يا محكمة احكمي ,,العملية ماكنش هيكون فيها اي سند قانوني يبرر تولي المجلس العسكري للسلطة
و من هنا كان ممكن تحكم بانتقال السلطة لرئيس المحكمة الدستورية
(دا طبعا ان كان الحكم عادل)
و الفرض دا ممكن يحصل دلوقتي كمان زي ما ذكرت ما بني على باطل فهو باطل , بس مع القضاة بتوعنا ,انسى :biggrin:

لكن المجلس العسكري لعبها صح و عرف ازاي يكسي نفسه بالشرعية
و خلى الاسلاميين بقى يلعبوا لعبتهم ( استقرار و شريعة و غيره)

المهم عشان مش نتوه بس
عدم دستورية النظام الفردي كان معروف بعد انتهاء الانتخابات
و المجلس ساب الورقة دي في درجه بحيث انه يخرجها في الوقت المناسب أو عشان يفاوضك بيها
و زي ما ذكرت أنا مش هقدر ألومه و اقوله انت دبرت المؤامرة دي لأنه كان مصر يبقي على المادة الخامسة الي موجودة في الاعلان الدستوري و الاحزاب رفضت و هددت بالمقاطعة و كمان نزلت مليونيات لحاد ما المجلس راضاهم و لغاها ( مع ان أنا برضو مش عارف الاحزاب دي كانت فين ايام التعديلات ,,من ضمن الغباء السياسي برضو)

واضح ان الأدوار دلوقتي أو بالأخص بعد الانتخابات الرئاسية هتتشقلب
المجلس العسكري هيلعب دور السلطة التشريعية
حسب الاعلان الدستوري
اقتباس من بوابة الأهرام

و يتضح من المواد السابقة ان مافيش نص بيسمح بنقل السلطة التشريع للرئيس الجديد المنتخب (زي ما البرادعي ندد)
بل تظل سلطة التشريع و التنفيذ في يد المجلس العسكري الى ان يتم انتخاب رئيس فيتسلم السلطة التنفيذية (هيتم على اخر الشهر دا)
و تسليم السلطة التشريعية بعد انتخاب مجلس شعب (تم و اتحل فرجعت للمجلس)

باعتقادي ان مكان المجلس العسكري في التشريعية بدل التنفيذية هيكون لصالحه
بعيدا عن ادارة الدولة و وجع الدماغ هيقدر يلعب و يشرع براحته
دا خلافا على ان الجيش سلطة شبه تنفيذية
يعني لو نزل قرار يقدر ينفذه تاني يوم بسبب نفوذه و قدراته العسكرية (مش زي مجلس الكتاتني)


ندخل بقى في الحكم التاني
عدم دستورية قانون العزل
عشان مش اعيد تاني و اقول المفروض كان يبقى في التعديلات الدستورية و تضمن دستوريته و قوة شرعيته
بس أنا شخصيا بحس ان موضوع عدم الدستورية مبالغ فيه و ان كان صحيح

هل مثلا عشان يبقى دستوري لازم القانون أو المادة تنزل من السما ؟
حد يفهمهالي برضو ,, و لا لازم الشعب يصوت عليها!
طب ماهو مجلس الشعب منتخب و لسه طازه حتى , اعتقد كاف ان هو الي يصوت

أنا عارف ان الدستور ابو القوانين و غيره من القواعد الصارمة
بس لو جينا نرجع تاني و نشوف شرعية تسليم مبارك للسلطة
كنا قبل التنحي مصدعين دماغنا بان مبارك لو فوض عمر سليمان بصلاحياته هيعد كام شهر عشان يعدل مواد في الدستور و مش هيقدر و مش عارف ايه و كلام كبير كدا يخليك تصدع و يبقى نفسك تولع في الدستور و ابوه
سبحان الله بقدرة خالق ,,فجاة كدا في خطاب مدته ثواني السلطة اتنقلت للعسكر بدون لا دستور و لا احزنون !

بصراحة ,,الأحكام الدستورية عقيمة و مالهاش معنى لما تحصل ثورة او انقلاب
و لا هو مثلا محمد نجيب و لا الظباط الاحرار مسكوا البلد بشكل دستوري!!

تراكم الأخطاء و حسن نية الاحزاب و سوء نية العسكر و سوء ادارة المرحلة الانتقالية و استقطاب المجتمع و تشتت الثوار
كل دا هو الي جاب النتيجة الي احنا فيها النهاردة

و الله اعلم هتنتهي على ايه ,,هنعرف اكتر كمان يومين بالظبط
و ان كنت شخصيا حاسس ان شفيق هيفوز بنزاهة لكن ما اقدرش اجزم لان الخصم بتاعه قوي برضو
بس انا حسب ما بستطلع و بشوف المزاج العام
ناس كتير كارهه الاخوان ,,دا انا عيلتي كلها الي صوتت لحمدين و فتوح هتصوت لشفيق في الاعادة الا من رحم ربي !

و بيني و بينكم انا بطلت اتعب دماغي مع الناس دي او مع اي حد عايز ينتخب شفيق , لأني مش فاضيله و كمان ما يستاهلش نباح صوتي :biggrin:

و بالمناسبة انا بكرا هنزل انتخب مرسي
الي بالمناسبة لو كسب مش بعيد يقولك ان ترشحه اصبح غير دستوري , باعتبار انه مرشح من البرلمان الي اتحل مش من الشعب

و كفاية كدا عليكم ,,

[۩۩ elMagic ۩۩]

تحليل جميـل جداا للأحداث اللى حاصله
والكلام دلوقت مبقاش نافع
كتيـر بردوا من مصوتـى ابو الفتوح وحمدين
يا هيدوا شفيـق يا هيقاطعـوا
مع ان لازم كلنـا دلوقت نبقى ايد واحده مع مرسـى
دا لو عايزين ننقذ الثوره اللى وقعت دى
يلا ربنــا يستــر على البلــد
وكلهــا يومين فعــلا وكل الامور هتبقـى واضحه اكثـر
تسلم للموضوع يا ريــس
احترامـــــى

[Hearts Whisper]

صراحة عاجبنى كلامك جدا
رغم انى مليش فى السياسة
بس هقول رأيى المتواضع
حاليا كتير اوى بيأيدوا شفيق
لمجرد انهم مش بيحبوا الاخوان وكرههم لييهم
وانا صادفنى كتيير مؤيدين لشفيق تلاقيهم بيزوقوا فى كلام شفيق
وافعاله عشان يبرروا اقتناعهم بييه ومن اسلوب كلامهم
بتحس ان جواهم مش ممقتنعين اصلا
وحاليا بعد حل ثلث والمجلس وموضوع قانون العزل
اشك ان صندوق الانتخابات هو الى هيفصل دلوقت
لان المجلس عايز شفيق يبقا هو شفيق
ربنا يستر على البلد والثورة
وحسبى الله ونعم الوكيييل
تقبل مرورى وتحيياتى
شيماء

[TIMO]

والله العظيم انا تايه على الأخر دلوقتى
شوية أققول لو كنا قلنا لا كان زمنا عملنا دستور ثورى محترم
وشوية أرجع أققول لأ لو قلنا لا كان الـ 100 دول عملوا كرلوا كبير
وكل من هب ودب عايز يخش اللجنة
الدستور أولا كانت صعبة

هو الحل أنهم كانوا يلغوا حكاية الفردى دى خالص
ملها القوائم ؟؟؟

[رقة BaNOTa]

هيا كانت عميه بس ياطارق :d
تحليلك منطقي جدا
وعلى رايك مش بعيد اي حاجه تحصل في البلد ديه
بس احنا نعمل االلي علينا وندي صوتنا لمرسي وخلاص
وادينا وراهم للاخر
ويخبر بفلوس بكره يبقى ببلاش

وربنا يستر على مصر ومتبقاش دوله مدنيه حراميه ولا دوله اخوانيه تراجعيه
بس بتهيالي موضوعك مكانه من الافضل يكون في قسم الثوره
تشكراتي على طرحك المميز دائما

[حنـــــون]

اساسا بكره يقولك وجود
الشعب فى المرحله دى غير دستورى بالمره :d
ربنا يستر ع الايام الجايه شفيق دا لو نجح
هنبئا كاننا معملناش اى حاجه
بس يلا مع مصر كله خير
قرائه جيده جدا ياطارق
تحيااااتى

[دمعه حائره]

العنوان منطقى جدا ومعبر عن الحاله اللى وصلت ليها الثورة
واضح جدا التخبط بين الناس وده كان نتيجة ان الثورة مالهاش قائد
اللى اضعف موقف الاخوان هوا موقفهم السلبى فى الاول تجاه الثورة
انهم لما تاكدوا من نجاحها نزلوا وظهروا للشعب
ممكن يكون مرسى افضل من شفيق لكنه ليس الاصلح من وجة نظرى
الاختيار صعب جدا مش عشان شفيق اقوى لا
لكن عشان مضطر تختار بين السىء والاسوأ
ومسئوليه كبيرة والصوت فعلا بيفرق
ولازم نحس بالتغيير واعتقد مش هايتحقق لو شفيق كسب
وفى كلا الحاتين سواء ده او ده كسب
ربنا يستر البلد مش هاتهدى
موضوع رائع وتحليل قيم منك اخى بحييك عليه

[ساحر الأحزان]

موضوع جميل يا طارق والثورة قامت وجة الى عايز يسرق نجاحها

ويعدل فى القوانين حسب الاجواء يعطيك الفرصة وينومك فى العسل

لحد ما خلاص وفجائة يجى يعدل على هواة والى يرضى مصالحة مش مصالح

الشعب الى ثارة وقدم الشهداء

بسى تفتكر لو مرسى نجح؟

حيكون نجاحة غير دستورى والمجلس حيقلة فوزك باطل يا مرسى

[♥..pure]

دلوقتي احنآ فعلا حيرانين نعيب ع مين !!
مين السبب في اللي احنآ فيه دآ , الثوار ولآ النظام السابق ولا جهل امه ولا ولا ولا !
آيـآم الثورهـ كنت بقول هو احنـآ في حلم ! هو احنآ عملنا ثورهـ ! أيوا عملنا ثورهـ
دلوقتي بقيت بقول ياريته كآن حلم ونصحى منه عشان نحققه ونعيد صياغته من جديد
مهما اتفرعن الشعب المصري هيفضل ف الاخر [ عبيط وساذج ] ..,
كلمتين يودهـ وكلمتين يجيبوهـ .. والاسخن من كدآ انه بيحب يهول من الحآجه اوي
ّإذا كـآنت صح او غلط بس التهويل ف حد ذاته بيعقد الأمور وبيخلي الدماغ تروح لحته بعيدهـ
النظآم السابق ومنهم [ المجلش العسكري ] استغل النقطه دي وحول التهويل لـ انقسام بين اطياف الشعب
ولعب لعبه جميله جدآ من الأول وهي انه يدخل شفيق ف حسبه الانتخآبآت
ودآ باين جدآ من اللقاءات الحواريه اللي كان بيعملهآ .. واللي بيلعب لعبه وخططلها لازم يكملها ف الاخر
هي باينه باينه
بس الواحد عندهـ امل في ربنا كبير ان الثورهـ تفضل حيه ومتفشلش !!
مقـآل عجبني أوي بصراحه .., حآول تشوف جريدهـ او موقع سياسي تنشر فيه يا طارق
عشان بجد خسـآرهـ الحآجآت الحلوهـ دي تضيع في صفحآت المنتدى بس ..
بتمنالك التوفيق ,
تقييمي + 5 ستارز

[مشتاقه للجنه]

بجد بحب أقرأ لك تحليلاتك السياسيه

مع انى بصراحه كرهة السياسه ولعبتها الــ ....

بس المجلس العسكرى لعبوها صح الصح
واكيد ماما أمريكا بتصفق لهم بحراره ..
وعلى فكره حسه أن شفيق اللى هيكسب وبدون تزوير
ربنا بجد يستر من القادم