ربى قل لأمنياتى كونى

[dяєαм..|♥]

صباح الخير
حبيت ادخل المنتدى واوثق الايام اللى بعيشها حاليا وهى أن احنا اتخرجنا م بس ايام بسيطة
يمكن عمرى ما اتكلمت ع فترة الجامعة ولا حتى اتكلمت عن كليتى اللى هى فنون تطببقية
وده عشان هى كانت فترة صعبة وعدت بتساهيل ربنا زى ما دايما بيسهلى كل الامور والحمد لله
فعلا فترة الكلية والخمس سنين كانوا صعبين وفضلنا سنتين نفكر أن احنا نحول م الكلية وفضلنا ع الوضع ده لحد ما بقينا ف تالته
بعد كده بدأنا نأقلم نفسنا ع الكلية وشغل الكلية الكتير لحد ما الحمد لله بدأنا نحبها والحمد لله ربنا كان دائما بييسر لنا الأمور وبيدينا اكتر مما نستحق والله وكنا بننجح بتقديرات كويسة جدا الحمد لله
واكتشفنا أن اختيارات ربنا مفيش احسن منها والله مهما حصل وان ده الخير طلاما ربنا كاتبه
دلوقتى انا فعلا بقول انى حبيت الكلية وهفتقدها جدا جدا
حتى الايام الصعبة اللى مريت بيها هفتقدها 😅
وهيوحشنى الضغط اللى كنا بنضغطه طول الخمس سنين تقريباً
واكتر حاجة هتوحشنى بجد هى دمياط اللى كنت بروحها يومياً وبجد حبيتها جدا وحبيت كل حاجة فيها
يمكن ف الأول وم ضمن الصعوبات اللى واجهتنا أن احنا ازاى كل يوم نسافر م محافظة لمحافظة وانى كنت طبعا متوقعة أن كليتى هتكون ف جامعة المنصورة وعمرى ما كنت أتخيل انى اروح مكان تانى غير محافظتى غير انى كان عندى مشكلة مع المواصلات 😅
بس بالوقت اتعودت ع المواصلات واتعودت ع دمياط وحبتها جدا بجد ⁦❤️⁩⁦❤️⁩
مش مصدقة انى اتخرجت وبجد الايام سرعتها مخيفة جدا
انا لسه كنت ف إعدادى وكنت بكتب هنا حاجات مش بصدق انى انا اللى كتبتها بجد 😔
وكأنى كتبتها امبارح بس مش م سنين كده 🤔
انا داخلة المنتدى ده وانا ١٢ سنة والوقتى بقينا ٢٢ سنة ؛ سنين كتير اوى عدت 😔
المهم حبينا نوثق اللحظات دى عشان بعد كده أن شاء الله ادخل اتفرج وابقى برضو ف نفس حالة الاستغراب اللى أنا فيها حالياً 😅

[dяєαм..|♥]

بما اننا اتخرجنا وبقينا إلى حد ما فاضيين 😅
فإن شاء الله هنبدأ ندخل ونكتب هنا زى زمان
ع مدار الخمس سنين اللى فاتوا دول مرينا بمواقف كتير صعبة سواء كانت ف الكلية أو خارج الكلية بس ع رغم م صعوبتها كانت درس لينا وكانت كلها بتعلمنى انى عندى رب كريم قادر يخرجنى م اى موقف صعب وع اد صعوبته ع اد ما عوضه بيبقى كبير ⁦❤️وحبيت أوثق المواقف دى علشان افتكرها بعد كده وأحمد ربنا انها عدت بكرمه وبقت الوقتى ذكريات ⁦❤️⁩⁩
م اصعب المواقف وبدايتها هو دخولى الكلية م البداية خالص وزى اى حد خارج م ثانوية عامة وكان بيتمنى يدخل كلية قمة زى صيدلة مثلا اللى هى كانت حلمى ، وسبحان الله انا مكنش ف دماغى كلية فنون تطبيقية نهائى وبالصدفة كنت فاتحة التلفزيون لقيت مكتوب أن آخر يوم لتسجيل القدرات بكرة ، قولت وقتها لأخويا هو اللى شجعنا وشبه اجبرنا أن احنا نروح 😅 وفعلا روحنا بس كنا مخنوقين جدا وطول ما احنا ف فترة امتحانات القدرات كنا بنقول مش هندخل الكلية دى وهى فترة مؤقتة عشان يبقى عملنا اللى علينا
بس سبحان الله تعدى الايام والنتيجة تظهر وحد جاب 96 والتانى 95 ⁦❤️⁩😅
ف نفس الوقت نتيجة القدرات ظهرت ونجحنا احنا الاتنين 😂
فكنا محتارين ما بين تطبيقية وما بين علوم وفضلنا ع الحيرة دى وقت طويل لحد ما قررنا خلاص هندخل تطبيقية
اول سنتين كانوا صعبين جدا بسبب حاجات كتير منها أن المواد كانت تقيلة وجديدة علينا وكان فيه ضغط كبير مجربتوش حتى ف الثانوية العامة
مواد علمية ومواد رسم ومواد هندسة كله مع بعضه ف اول سنة فكنا كل يوم نروح معيطين وكنا مصممين نحول م الكلية
بس كل اشارات ربنا كانت عكس كده ⁦❤️⁩
التيرم التانى كان أغلبه مواد علمية اكتر اقرب للثانوى زى كيميا وميكانيكا وفيزيا فكان كويس الحمد لله مقارنة بالتيرم الاول فالنتيجة علت شوية الحمد لله فلغينا قرار التحويل 😎
حصل وقتها موقف غريب جدا معانا بس هحكيه ف وقت تانى إن شاء الله عشان الكلام ميكترش
بعد كده دخلنا اولى تخصص قسم طباعة منسوجات وصباغة وتجهيز ⁦❤️⁩⁦❤️

تابع

[dяєαм..|♥]

بعد ما دخلت القسم قابلت الشخصية اللى دمرتنى نفسياً حرفياً للأسف 😔
الشخصية اللى كرهتني فى نفسى عشان شوفت اد ايه انا ضعيفة ادامها 😞
معيدة كانت بتدينا 3 مواد عملى اللى هى مواد التخصص كلها .
كانت دايما تعاملنا بإهانة احنا الاتنين دونا عن القسم كله . كله كان ملاحظ وبيواسينا
مكنتش بتعلمنا حاجة . المفروض الشغل العملى ده يتم متباعته باستمرار عشان محدش يتأخر فيه . كانت هى بتتعمد متشوفش شغلنا
أصعب حاجة فى الدنيا لما تكون شايف حد قريب منك مخنوق ومش قادر تعمله حاجة . كنا ندخل السيكشن ابص لاختى الاقى الدموع فى عينيها وتقولى مخنوقة مش قادرة أعد . لحد ما نروح نفضل نعيط
ع الرغم من انى شديت معاها كذا مرة بس ده مكنش كفاية . ولا عمرى كنت اتخيل انى أشد مع حد اكبر منى بس هى خرجتنى عن شعورى .
الفترة دى احنا كنا بنغيب كتير لظروف عندنا ده مش مبرر ليها انها تعاملنى كده درجاتى فى ايديها تنقصنى بس تعاملنى بكرامة
ف مرة شديت معاها قولتلها غيابنا مش استهتار غيابنا بسبب ظروف . ترد تقولى الظروف متبقاش مع سكاشن المواد العملى لو مواد نظرى مش مشكلة 😐 اليوم ده مش هنساه فضلت اتحايل عليها تشوف شغلى حقيقى والله .
كنت كل اما اقابل حد اعرفه أقوله يدعيلها ربنا يهديها وانا كنت دايما أقول حسبى الله ونعم الوكيل 😞
اسمها بس لما كنت بسمعه كنت بتخنق لحد الوقتى .
ايه اللى يخلى إنسان يتعامل بالشكل ده مع حد
ربنا أنعم عليكى بنعمة . هى نعمة وفتنة فى نفس الوقت ربنا بيختبرك بالنعمة دى
انك تكونى معيدة وتبقى إنسانة متفوقة وشاطرة ده مش من حكمتك وزكاؤك ده من فضل ربنا عليكى . وانتى مراعتيش ربنا فى شغلك
الفترة دى كانت صعبة جداً . ده كان أول تيرم ف التخصص بعد كده الحمد لله ربنا عوضنا التيرم التانى بمعيدة كانت تقولنا شغلكوا من أعلى الشغل ف القسم
وفعلاً فرق الشغل كان واضح جدآ لان بسبب احباطنا التيرم الأول للأسف مكناش بنقدر نشتغل 😔💔
وعدت السنين ورجعت هى ادتنا تانى بس رجعت دكتورة 😥. لما شوفت اسمها ف الجدول اتخضيت ويمكن عيطت مش فاكرة بس قولت فى عقل بالى أكيد ليك حكمة ي رب ⁦❤️⁩⁦❤️⁩
فعلاً كان ربنا ليه حكمة عظيمة .هى ان احنا نجبرها تحترمنا ومتقللش مننا بشغلنا اللى هى اضطريت تحلف بيه ⁦♥️⁩ وده كله طبعا بتدبير ربنا اللى خلانا نطلع شغل مكناش عارفين بنطلعه ازاى ⁦♥️⁩⁦♥️⁩ ربنا الحمد لله رادلنا اعتبارنا وجبر بخاطرنا بجد ⁦♥️⁩
معاملتها لينا اتغيرت إلى حدا ما وهى مجبرة ع ده لأن مسبناش ليها فرصة تعاملنا معاملة مش كويسة لأننا بقينا م أعلى الناس ف القسم وع الرغم م كده كانت برضو بتيجى علينا ف حاجات .

بس للأسف حاسيين ان احنا مش قادرين نسامحها أبدا
لان اللى يجى عليا أو يأثر ف نفسيتى بالشكل ده عمرى ما هسامحه ابدا وربنا يهديها لنفسها ويهديها للطلبة اللى لسه هتدرسلهم
ونفسى كنت اقدر اواجهها الوقتى واقولها أن اللى انتى كنتى بتقللى منهم دول اتخرجوا بامتيازات ورتبوا ع القسم الحمد لله ⁦♥️⁩⁦♥️⁩ بس مش هحتاج اقول لأنها باذن الله هتعرف لوحدها
معلش انا رغيت كتير اوى بس دى حاجة حصلت معايا وعمرى ما هنساها ف حياتى
وزى ما هفضل فاكرة صعوبة الموقف واد ايه كان قاسى هيبقى الموقف مرتبط معايا بكرم ربنا ولطفه وتدبيره وعوضه الجميل ⁦♥️⁩⁦♥️⁩⁦♥️⁩
كان لازم أوثق الشخصية دى هنا عشان هى اثرت فيا بس للأسف بالسلب
وبإذن الله هوثق برضو مواقف تانيه افضل ⁦♥️⁩

[dяєαм..|♥]

مساء الخير
مش عارفة فيه حد متعلق بذكرياته كده زيى ولا ايه
لازم كل يوم أفضل اعدة انا واختي نفتكر ذكرياتنا ونعد نضحك ونعيط
انا عيشت ذكريات وتفاصيل جميلة اوى كفيلة أنها تفرحنى طول العمر لما افتكرها
بس للأسف الأشخاص اللى بيسكنوا الذكريات دى معدتش موجودة
حاسة نفسى لسه صغيرة ومش قادرة استوعب انى كبرت . مش قادرة اتأقلم ع حياة الناس الكبيرة دى 😅
دخلت جامعة واتخرجت منها وحاسة انى لسه زى ما أنا
حاسة ان العمر ده مش عمرى . زمان وانا صغيرة لما كنت أسأل حد ع سنه ويقولى أنه ف العشرينات كنت اقول يااه ده كبير اوى
فانا الوقتى ف العشرينات ومش حاسة انى كبيرة ولا حاجة
كل اللى حواليا حياتهم بتتغير وانا حياتى ثابتة وانا حابة الثبات ده جدا وكل أما أحس أن حياتى هتبدا تتغير أو اى جديد ممكن يحصل ف حياتى بهرب وبخاف .
الكلام ده لما بقوله لحد ف الواقع بيستغربنى وبيضايق عشان كده بحكيه هنا
معنديش مشكلة افضل عايشة ع ذكرياتى و طول الوقت بحاول استرجعها واشوف كنت بعمل ايه وبعمله . لدرجة أن العاب زمان أعدت فترة ادور عليها وحاليا بلعبها 😅
مش عارفة انا كده طبيعية ولا ايه . بس انا فعلا مرتاحة كده ⁦❤️⁩⁦❤️⁩

[dяєαм..|♥]

مفتقدة ماما اوى واعده افتكر حنيتها واهتمامها بينا وبأقل تفاصيلنا
وبصراحة مفتقدة اوى الحاجات دى
اللى فقد حد غالى عليه اوى بيبقى مش مستوعب وفاته نهائى حتى بعد ما يعدى ع وفاته سنين كتير برضو مش بيبقى مستوعب اى حاجة
وبرضو مش عارفة السنين عدت ازاى كده وسبحان الله بجد اللى صبرنا وادانا القوة نعيش كل ده م غيرها
ربنا بيصبر الانسان اللى فقد حد صبر عظيم بجد والله
لسه بعد مع نفسى وبقول هى ماما بجد ماتت . هو انا كان عندى ماما بتهتم بيا كده
ماما كانت بتحب التوائم اوى عشان كده كانت مبسوطة اوى لما ربنا رزقها بينا
كانت مدلعانا جدا وبتحب تلبسنا زى بعض وتهتم بتسريحة شعرنا
عمرى ما انسى ف الاعياد لما كنت مش بعرف انام م فرحتى
كانت ماما تصحى وتفطرنا وبعدين بقى تلبسنا الاطقم الجديدة مع تسريحة الشعر وتحطلنا التوك ⁦وبعد كده تصورنا ⁦❤️⁩
كانوا قرايبنا يبقوا مستنيين يشوفونا بفارغ الصبر وي ترى لابسين ايه المرة دى
وحشنى اوى اهتمامها بينا ف كل الاوقات
ماما كانت حنينه جدا والله ع الكل
كانت بتحب اخواتها اوى رغم أنها كانت أصغرهم بس كانت شايلة همهم كلهم وتصالح ما بينهم اصل كانت مشاكلهم كتيرة
امى ماتت وهى زعلانة منهم وعليهم ف نفس الوقت
سابتنا اطفال واخواتها اللى ضحت بحاجات كتير عشانهم وشالت همهم وماتت م زعلها عليهم مقدروش ده خالص
بالعكس مكنوش معانا ف اى حاجة خالص وسبونا ومشوا
بزعل اوى لما افتكر أن ماما تعبت معاهم كتير اوى وهما محسوش بده
عارفة أن لو ماما دلوقتى حاسة بينا هتكون زعلانة اوى م اللى عملوه معانا ولو كان الزمن رجع تانى مكنتش هضيع وقت معاهم ولا هتزعل عليهم
بجد جرحونا كتير وبدل ما يكونوا معانا وجنبنا لا عملوا العكس كانوا بيتعمدوا يضايقونا ويجرحونا
الحمد لله بجد ع كل حال وأن ربنا بيورينا حقيقة الناس م حوالينا
وعارفة والله إنها ابتلاءات وربنا عوضه كبير
وع اد ما ربنا ابتلانا ع اد ما بيحبنا الحمد لله ⁦❤️
وسبحان م صبرنا ع مصائب الدنيا وابتلاءتها ولولا الصبر والقرب م ربنا كنا اتجننا

بكتب الكلام ده هنا لان للاسف مش بعرف اكتبه ف اى حتة تانية
مجرد فضفضة