الحلقة الثانيه من برنامج ( كلنا واحد ) معانا ( رنين ) حملة ( التعايش )

[Words Whisper]

من جهة حد أخد منك موقف

فأعتقد لا لأنه ببساطة مش عشان توبيك ناخد موقف من بعض ..

حلو الحوار

تسلم أ/أحمد ..

دمتما بحفظ الرحمن ..

[قلم بلا حبر]

الضيفه اتكلمت بفطره جميله ,,, لو حتدل على شئ يبقى حتدل على اننا محتاجين حملة التعايش فعلا

نقدر نوصل بيها ان التعايش مش حرام ,, ومش خروج عن الاسلام انك تسمح لغير المسلم باقامة شعائره والا مكناش شوفنا كنيسه جنب مسجد لحد دلوقتى

هى كانت غايبه عنها نقطة التعايش بحكم المجتمع اللى بتعيش فيه

ومع ذلك لما جيت سألأتها عن المسلمين فى اوروبا قالت ربنا ينصرهم

هى دى اللى بسموها فطرة الصدق

هى بتحبها دينها وبتنتصر ليه ,,

محتاجه بس لتوجيه حبها لدينها انه يكون فى اتجاه غير التعصب

حلقه مميزه يا موروشوا

فى انتظار باقى الحلقات

بالتوفيق

[morshooo]

بسم الله الرحمن الرحيم

اهلا ومرحبا بكم وبرنامجكم

( كلنا واحد )




طبعا التوبيك معمول عشان ماحدث فى توبيك

القسم المسيحى

والتوبيك تابع لحملة ( التعايش )

النهاردة معايا ضيفة مميزة جدا ليها أرائها الخاصة

معايا ومعاكم

رنين
مشرفة قسم حواء



اهلا بيكى

تعالو نشوف رنين قالت اية فى الحوار

س / فى البداية اهلا بيكى فى كلنا واحد ؟

اهلا بيك يا احمد

س / طبعا انتى تابعتى الى حصل الفترة الاخيرة فى المنتدى ؟ اية تعليقك على الى حصل فى توبيك القسم المسيحى ؟

اللى حصل كان مجرد طرح فكره وانت تقول رأيك فيها ومببرراتك معرفش ليه الموضوع اخد منحنى تانى واعتقد ان السبب ان كل واحد عايز يثبت انه صح واللى يخاف الرأى يبقى ضد الوطنيه !!
بيفكرونى بالتلفزيون المصرى تبقى خناقه بين اتنين مصريين يخولها فتنه طائفيه !!
احنا اللى مش قادرين نتقبل الاراء

س / انتى اية رائيك فى علاقة المسلمين بالمسيحين فى مصر ؟

بص يا احمد انا لما باجى اتعامل مع بنات معايا فى الكليه مش بسألها انتى مسلمه ولا لا
احنا بنتعامل عادى جداً وفى الكليه بيكون فى مجموعة صحاب متعرفش فين المسلم وفين المسيحى

وده مينمعش ان كل واحد معتز بعقيدته ومبادئه ويدافع عنها حتى النخاع

س / انتى كنتى مع والا ضد فكرة القسم ؟ ولية ؟

كنت ضد الفكره وقولت وكان كلامى اننا مش منتدى دينى فى المقام الاول
وان وجود قسم للأسلاميات فرضه وجود مواضيع اسلاميه بعدد كبيره زى كدا لما تلاقى كذا موضوع بيتكلم عن التنميه البشريه فتروح عامل ليهم قسم لان لقيت فى اقبال على ده

ومع ذلك لو نزل اى موضوع عن الديانه المسيحيه اهلاً وسهلاً بيه
بس تدينى الحق انى ارد فيه

اما الكلام على ان القسم ممنوع الاقتراب ده اللى كنت ضده

انا مره قعدت ساعه اناقش واحده زميلتى فى الكليه كانت مسيحيه عن فكرة الحجاب ومخسرناش بعض ولا انا قولتلها يعنى ممنوع الاقتراب

بالعكس ونهينا الحوار بضحك وهزار وكل واحد حكى مواقف كتير اتعرض لها

الموضوع انى مش ضد الديانه المسيحيه انا كنت ضد الطريقه اللى اتعرض بيها فكرة القسم علينا

س / كلمينا عن علاقتك بالمسيحين لو ليكى اصدقاء او جيران ؟

اتكلمت عليها فوق وعلاقة كويسه جداً وعمرى ما فكرت وانا بتعامل انا بتعامل مع مسلمه ولا مسيحيه

س / حسيتى قبل كدا ان فى فتنة فى مصر واية سببها لو فية فعلا ؟

بيكون فى اشتعال فتنه فى مصر وسببها امن الدوله:biggrin: والاعلام العظيم بتاعنا
ايام تفجير كنيسة القديسين وقفت مسيحيه وسط النناس كلها وقالت باعلى صوت ده مش شغل مسلمين ولا مسيحين ده شغل حكومه وامن دوله

النظام اللى كنا فيه مكنش من مصلحته ان الدنيا تبقى هاديه وبمبى
كان عايز الناس تاكل فى بعضها

والاعلام رقم اتنين بيكون خناقه بين اتنين مصريين وفى سبب للخناقه بعيدأً تماماً عن الدين
يقولك احداث بين مسلمين ومسيحين

زى كدا احداث ماسبيرو لما فى التلفزيون المصرى قالولك الحق الاقباط يقتلون الجيش !!

اظن كل ده دليل ان مفيش فتنه عارف لو كان فى مكنوش تعبو نفسهم كدا:biggrin:

س / فى بعض الاعضاء دخلو وردو فى التوبيك بطريقة ساخرة او بطريقة عفوية مع ان سنهم لا يتعدى الــ 16 عام تفتكرى الاعضاء دى عندهم حق فعلا ؟

على فكره انا قريت كل الردود ومعظمهم الرد الاول بتاعهم كان هادى وكويس وعبرو عن رأيهم بطريقه تلقائيه
بس اللى زود الموضوع ان كل واحد داخل يرد على رد اللى قبله
فانت بتلاقى نفسك بتدافع عن رأيك باستماته وطبعا لقلة الخبره هتلاقى ردود تعصب

احنا لو بنتقبل بعض مكناش وصلنا لكدا

واظن من حق اى حد يوافق او يعارض فكره والدليل لكدا انك عرضت الحوار فيها لو كنت عارف ان ميه فى الميه موافقين مكنتش قولت نعمل استفتاء
طالما عرضت انك تشوف الاراء يبقى تقبلها كامله

مع اعتراضى طبعاً على اى هجوم على الدين المسيحى
انا كل كلامى كان عن فكره وقوانينها مش اكتر

س / اية الطريقة من وجهة نظرك الى لازم نشتغل عليها فى المنتدى عشان نمحى التعصب دا ؟

اولاً عدم غلق المواضيع بدون ما نوصل لحاجه
عارف انت لو سبتها هتهدى لوحدها
اما الغلق هيخلى الاعضاء تعمل مية موضوع محور فكرتها الموضوع اللى انت قفلته

ثانياً ياريت اللى يتكلم يبقى قارى قواعد التعامل فى الاسلام
هتلاقيه بيتكلم بسلالسه وسهوله
وبلاش طريقة احنا داخلين نكسب الحوار
لا اسمع اللى قدامك وبراحه بلاش طريقه الكلام بان انا اللى فاهمم وانت جاهل
وعلى فكره ده فى اى موضوع مش شرط فى الدين

والكلام يكون بدليل والناس تستوعب الادله وتبحث
لما تيجى تتكلم فى موضوع اتكلم فيه بانك تكسب منه معلومات وخبره مش انك داخل خناقه

س / انتى لو قبلتى حد مسيحى وطلب منك مساعدة مثلا او دخلتى محل وجيتى تشترى منة حاجا وطلع مسيحى هترفضى تشترى او هترفضى تقدمى المساعدة ؟ ولية ؟

لا طبعاً
عارف انا باذن الله هكون دكتوره واول حاجه خدتها فى اول محاضره
انت مهنة تنقذ حياة اللى قدامك حتى لو كان عدوك
تخيل ده بقى ابن بلدى
وعلى فكره حصلت كتير فى الترام والمواصلات وبتتعامل عادى وبتساعد وكمان بتتساعد
وبعدين الرسول عليه الصىلاة والسلام قال (مَا مِن مُسلم يَغرِسُ غَرْسًا أو يَزرَعُ زَرْعًا فيأكُلُ مِنه طَيرٌ أو إنسَانٌأو بهيْمَةٌ إلا كان لهُ بهِ صَدقَة)
اتقال انسان متقلش مسلم ولا مسيحى
يعنى اخلاق دينك بيقولك تتعامل وتساعد وتفيد كل الناس مش مسلمين بس

س / تحبى تقولى اية لاعضاء منتدى بنات مصر المتعصبين ؟

اسمع اكتر ما تتكلم
واقرأ فى سيرة الرسول عليه الصلاة والسلام واتعلم منه هتستفاد كتير

وبكدا تنتهى حلقتنا النهاردة

انتظرونى وحلقة جديدة

تحياتى

[كبرياء رجل]

منوره الموضوع رنين وعجبتني اجاباتك
وكتير بتعامل مع اللي قدامه من غير ما يدخل الدين
اكيد محتاجين كده بجد
ربنا يوفق الجميع
وتبقى بينا روح اﻻخوه وحسن التعامل الطيب
والتفكير في جميع اﻻمور بعقلانيه
اشكرك على الحلقه مورشو
منوره رنين
دمتم بخير
تحياتي

[نقاء القلب]

حلقه جمييييله مع رنين ^^

واجابات عقلانيه جداااا ،،

منوره ي قمرايه )

[احضان الحبايب]

حلقة رائعه جدا ,,

عجبتنى اجاباتك جداا يا رنين ,,

متفق معاكى فى اغلبهاا لو ما كان كلهاا كماان ,,

ماشاء الله بجد ,,

و برنامج جميل يا مورشو ,,

[dr.yoyo]

حلـو البروجرآم ى موروشو ~

عجبآنى اجآبآت رنين ~


دوآم التمييز ~

[~ NoDa~]

منوورة يا رينو
الحلقة محورها وموضوعها حلو ومجهود مميز منك يامورشو ..
ومتفقة معاكي طبعا ف آرائك وكلامك كله ،
لازم علاقتنا تبقا ود ورحمة كدا وتآلف ..
غير ان دي حاجة دينية ، دي حاجة ضرورية عشان نحافظ ع وطنا ووحدته ،،
برنامج مميز
خمس نجوم

[SiLver Spectra]

منورة يا رنين
بس شوية ملحوظات كدا
اولا المنتدى لو مش ديني يبقى المفروض نشيل الاقسام الاسلامية

ثانيا
احنا المنتدى مش بيسمح لحد انه يدخل يشكك في العقيدة عندنا و بالتالي كانت هتبقى المعاملة بالمثل

ثالثا
الناس الي اعترضت هي الي حولت الموضوع بشكل طائفي
و مش كل الي اعترضوا , في ناس اعترضت باحترام , انا مش متذكر ردك , لكن الكلام عامة عن الي دخلوا يشككوا في المسيحيين و في عقيدتهم بشكل مؤذي

رابعا
لما نقول دي عنصرية دا مش رفض للراي الاخر لان دي حقيقة
انا لو اتمنعت في اي بلد في العالم اني اقيم الشعائر بتاعتي هقول دي عنصرية , و اي حد في العالم هيقولك دي عنصرية
مالهاش اي علاقة نهائيا برأيك و اختلافه
المنع عشان الجنس او العرق او الطائفة او الدين بيطلق عليه (عنصرية)
انك تدي لنفسك حقوق و تحجبها عن غيرك
أما انك تحجبها عنك و عن غيرك , وقتها هتكون عادل
لكن تديها لحد و تحجبها عن حد يبقى كدا انت دخلت في مفهوم العنصرية

و على فكرة المسيحيين كتير
يعني المفروض كل 100 زائر مصري هتلاقي 10 مسيحيين
بس انت عمرك ما هتشوفهم طالما انت مش مديهم الوسيلة الي يعبروا بيها عن نفسهم و عن مسيحييتهم
زي بلد يقولك احنا مافيش مسلمين عشان نعملهم مسجد
ما انت لو عملت مسجد هتبدا تجمعهم و هتحس بوجودهم وقتها

و عامة الاسلام ضد اي شكل من اشكال العنصرية
((إنَّ اللَّهَ يَأْمُرُكُمْ أَنْ تُؤَدُّوا الْأَمَانَاتِ إِلَى أَهْلِهَا وَإِذَا حَكَمْتُمْ بَيْنَ النَّاسِ أَنْ تَحْكُمُوا بِالْعَدْلِ إِنَّ اللَّهَ نِعِمَّا يَعِظُكُمْ بِهِ إِنَّ اللَّهَ كَانَ سَمِيعًا بَصِيرًا))
ما قالش ان حكمتم بين المسلمين , و لكنه عمم كلمة الناس

منورة

[Single girl]

حلقة بجد مميزة لعضوة مميزة
اجاباتك منطقية و في منتهي الروعة
ميرسي يا قمر ع المجهود الرائع و المتميز