الغلابه حقهم فين ؟

[نهر النيل]

الغلابه حقهم فين ؟
بنسمع تصريحات ومعادلات وارقام وحسابات من الحكومه والساده المسؤلين
وبنشوف ان الامور على حسب تصريحات حضراتكم
بدأت تمشي بشكل حتى لو بطيئ بس كويس
كل دا حلو وزي الفل وجميل خالص
انما الأفظع
الكارثي
المحزن
المخجل
لما أكون مثلا في منطقه بالقاهره ( حي الوزراء / بالتجمع الخامس ) والسبب صديق ليا بيبني فيلا هناك
وأشوف كميات اطعمه بتترمي في صناديق القمامه
وأشوف كمان ناس من أهالينا البسطاء الطيبين بيتسارعوا عشان يفتشوا فيها
السبب
الفقر
الجوع
قلة أي موارد ماديه ليهم
شكل بجد مستفز ويجنن
ناس بترمي أطعمه بيتجاوز أقل كيس منها ال 200 جنيه والغريب منها أكياس محفوظه وسليمه
وناس مش لاقيه حق رغيف
معادله مجحفه وظالمه وغبيه
معادله بجد لا إنسانيه
معادله لا ترقوا بثورة شعب وضحايا ثوره وبحث عن حريه وكرامه وعداله
وشعارات خنفشاريه مش شايف ليها أي تغيير بعد مرور سنتين من الثوره
هيطلع أي حد يقول
الصبر
صبر مين ياعم
بقولك ناس بتاكل من اكياس القمامه
انت فاهم دا معناه ايه ؟
انتشار مرض
انتشار تفرقه عنصريه
انتشار غل وحقد بين بعض طوائف الشعب
ثورة جياع ممكن ف لحظه تنفجر
صبر ايه هنا
الموضوع دا مستفز جدا
ومحتاج سرعة من المسؤلين
واعتقد اكتر ناس تقدر تتكلم في العدل
اخواننا بتوع الحريه والعداله
ياترى في واحد منهم عفوا في اللفظ يعني يقدر يفتح كيس قمامه ويتناول طعاموا منوا ؟
يا اخواننا انا نزلت وكلمت ناس بنفسي
واقسم بحق جلال الله
اقسم بحق جلال الله
اقسم بحق جلال الله
الناس الطيبه دول حالتهم زفت
بكرر زفت
وناس كتيره
طب ايه الحل ؟
في صراع شغال ومفيش واحد واخد بالوا منوا طيب وبعدين ؟
هل منتظرين ثورة جياع تدمر البقيه الباقيه من الاقتصاد ؟
السيد رئيس الجمهوريه ياريت ياخد في اعتباروا الموضوع دا
وسرعة الحل فيه
لأنوا لو استمر هيكون كارثي لو حدثت ثورة جياع
الناس دي مطحونه ومغلوله
واحد كلمني بالنص دا : يخرب بيت دي بلد لما الناس اللي هنا دي ترمي كميات الأكل دا واحنا مش لاقيين حق رغيف !!!!!!!!!
منظر يقطع القلب
منظر حزين بجد
منظر معيب في حقنا كلنا
منظر مخجل في وجه كل الانسانيه
ازاي اخويا الانسان بيحصل على طعاموا من بقايايا !
بالله عليكم مش عايز فلسفه
عايزين طرح حلول
عايزين نفهم اهالينا الطيبين دول اننا وياهم
بس مش بالفلسفه ولا بالشعارات لانهم طيبين وغلابه وعلى نيتهم
وربنا يحفظ الجميع
وبعتذر للتطويل بس الموضوع محتاج كتير مننا كلنا
ربنا يحفظ الكل يارب


مش هقول بقلمي وبس
لا
هقول بمشاعري وغضبي وحزني
حزين بجد للي شفتوا
بعتذر
لا تعليق اكثر

[Words Whisper]

حاليا سأكتفي بالمتابعة

وسيكون لي عودة أخرى بإذن الله ..

موضوع قيم كثيرا

شاكرة لحضرتك

سلمت

ودمت بحفظ الرحمن ..




وسام التميز و 5 ستارز ..

[نهر النيل]

اقتباس المشاركة الأصلية كتبت بواسطة words whisper حاليا سأكتفي بالمتابعة وسيكون لي عودة أخرى بإذن الله .. موضوع قيم كثيرا شاكرة لحضرتك سلمت ودمت بحفظ الرحمن .. وسام التميز و 5 ستارز ..

ربنا يبارك في حضرتك يارب أ أسماء
ومؤكد
حضورك وتقديرك كرم ابلغ من أي شيئ تاني
حقيقي متشكر كل الشكر
مودتي واحترامي

[الرحــاال المٌتَمرد]

سامحني ,, الموضوع جه فى وقت صعب ,,
بكرا ليا عوده اكيد , لطرح رايى من المهزله اللا منطقيه

تحياتى احمد

[نهر النيل]

اقتباس المشاركة الأصلية كتبت بواسطة الرحـــــال سامحني ,, الموضوع جه فى وقت صعب ,, بكرا ليا عوده اكيد , لطرح رايى من المهزله اللا منطقيه تحياتى احمد

تشرف وتنور دايما مشرفنا الغالي رحال
ومؤكد اهلا بيك اي وقت ياجميل
نورتني جداااااااااا

[yooka]

الموضوع كبير اووووووووى وليه جوانب كتيره

بس الشغل كله مش بيبقى ع الوزراء والريس
عشان مهما عملوا لازم اى مجتمع يبقى فيه طبقات
بس ابسط حاجه طبقه الناس العايشه ومترفهه ع الاخر
تحاول تبص للفقراء وتشوف حالتهم ايه
بس حتى لو بصيت
ف مشكله الضمير والاحساس للاسف بقيت شبه معدومه دى لو مش كانت معدومه اصلا
محدش بيحط نفسه مكان غيره
كل اللى ع اللسان يلا نفسى والباقى يولع

ربنا يهدى بقى الكل

تسلم ايدك احمد ع الموضوع القيم ده

[SiLver Spectra]

علاج الفقر المقتع مش سهل
و بياخد سنين
خاصة لما تكون الدولة نفسها بتعاني من عجز و ديون في الموازنه العامة

فعلا مصر يادوبك خيرها يكفي 20 مليون مش اكتر من كدا
البلد كلها صحراء قاحلة و الضغط على الدلتا خلانا نستورد اللحوم و القمح و غيره

ربنا يعين البلد ,,

[ابتسامة الزهر]

استاذ احمد
وخلينى اكلمك بالبلدى
اكيد انت عارف ان البلد بتمر بظروف اقتصادية سيئة
غير الاضرابات ووقف عجلة الانتاج وبالعقل كده الحكومة مش حتقدر تعمل حاجة
سيبك من الكلام والزعل وكل الكلام اللى لا حيودى ولا يجيب
الحل العملى يرجع للشباب تكوين حملة تسمى نفسها اى اسم
تقوم بتوعية الناس اللى بترمى الاكل وتعمل على تغليف الاطعمة
وتوزيعها على المحتاجين
زى ما بيحصل فى رمضان او العيد وغيرة
الشباب ثم الشباب هو القادر على الفعل ومساعدة الناس
حتى اللى بيشتغل يقدر يجمع من زملائة مبلغ رمزى كل شهر حتى لو 10 جنية
ويشترى للناس بالمبالغ دى اكل هو مش صعب
التجربة دى عاملينها فى العمل عندنا وبنساعد بيها الغلابة والايتام
وتجربة ناجحة وكل يوم العدد بيزيد
لازم الشباب يقوم بخطوات عملية ومافيش طريقة غير كده
لغاية ما تتحسن ظروف البلد
ده رأى ومن واقع تجربة
شكرا على الموضوع الهام

[راجية الشهادة]

للاسف ماساه ومش شاطرين غير نتكلم عنهم في الافلام لكن حل عملي مافيش
في جمعيات خيريه بتحاول تساعدهم كتر خيرهم بس ده مش كفايه لازم دعم من الحكومه
الناس دي الي مش لقيه تاكل لو اي حد اداها فلوس وقالها تعمل اي حاجه هاتعملها بدون تفكير مش نرجع بقي نعاتبهم لو عملو اي شئ
ولا نزعل لو قالو اخدنا ايه من الثوره
لان احنا الي وصلناهم لكدا
شكرا لك علي الطرح
تحياتي وتقديري

[SeMoz]

اولاً استاذ أحمد موضوعكـ بيناقش اهم قضية لازم نبدأ نعرف حلها قبل اي حاجه فــ البلد
هو فـ البداية كدا .. مش مصر بس هي اللي بتمر بــ كدا .. انا كنت عايشة ف السعودية اللي هي اغني البلاد العربيه بالبترول .. متخيل حضرتكـ كمية الفقر اللي كان فيها ؟! .. و دا مش شئ اتحكالي مثلاً .. لا انا بحكم ان ماما دكتورة
فــ كنت بقابل منهم كتير اوي .. و كنت بتصدم من اللي بسمعه منهم عن حالهم ..
و ع فكرة بحكم ان البلد دي غنية اوي فــ هناكـ الناس كانوا مرفهين اوي فــ كان نفس النظام اللي حضرتكـ شوفته
لما روحت التجمع الخامس و يمكن افظع بمية مرة !! .. أحمد دول كانوا بيرموا الذهب ف الباسكت !!
انت متخيل حجم الكارثة اللي احنا فيها كــ دول عربيه .. الموضوع مش موضوع ناس مش لاقيه تاكل و خلاص !
الموضوع ليه ابعاد اوسع من كدا ! ..
طبعاً الحكومة فـ النقطة دي بالذات ليها البداية .. يعني مثلاُ حل بسيط اوي و سريع لحد م نقدر نضبطـ اقتصادنا
ممكن نخصص راتب شهري بسيط اوي لكل اسرة تحت خط الفقر ! الحكومة بتبص قدام اوي .. احنا محتاجين نبص تحت رجلينا شوية .. اقتصادنا مش هينهار بشوية الفلوس اللي هتاكل الناس و لو رغيف ع الاقل بكرامة !!
م تيجوا نبص لـ مرتبات الــ لاعيبه و الممثلين .. ايه قمة الفســـــــــــــــاد دا !! ميرضيش ربنا بجد
دا بالنسبة للحكومة .. بالنسبة لينا كــ شعب محتاجين شوية رحمة .. ايه يعني لما نعمل حساب ف البنك
احنا كــ مجموعة شباب نحط اي مبلغ نقدر عليه و كل واحد و مستواه الاجتماعي و ندرس حالات محتاجه فعلاً المبالغ دي !
احمد احنا لو عاوزين نتحرك و الله فيه مية حل .. احنا فعلاً محتاجين نفوق من اللي احنا فيه دا
و ع فكرة انا لما كنت ف السعودية كنا بنعمل حملات التبرع دي و كنت انا مشتركة فيها
اتمني محدش يدخل يقول اقتصاد بلدنا و الإضرابات و غيره و غيره
حطوا نفسكوا مكان الناس دي .. احساس قاسي و مذل اوووي !
تقديري و متابعة الموضوع و الردود و ممكن ادخل ارد تاني ~