عايزين الحق والا ابن عمه

[قلم بلا حبر]

بسم الله الرحمن الرحيم

السلام عليكم



عايزين الحق والا ابن عمه :

جمله تتردد كثيرا على مسامعنا فى شتى ارجاء مصر فى الشارع فى الحاره فى المدرسه فى النادى فى صالة البلياردو فى محل البلاى ستيشن فى سوق الخضار فى الاتوبيس فى الشغل فى الندوات فى البيت فى القهوه فى التاكسى

جوابها دايما (( الحق طبعا ))

ياترى احنا دايما بنكون مؤهلين اننا نتقبل نتيجة الاجابه دى ؟؟؟

يعنى لما نسمع الحق حننصاع ليه ,, وياترى قبولنا للحق مشروط بموافقته لمصالحنا الخاصه والضيقه ,,, وياترى ممكن نطوع الحق ونلويه علشان يكون فى صفنا ؟؟؟

مناسبة الكلام ده الجدل الداير بين قوى التيار المدنى وقوى الاسلام السياسى ,,,

الحق بيقول ان الاسلام السياسى حصد اغلبيه فى الانتخابات السابقه ,, والحق كمان بيقول ان اللى يحصد اغلبيه يحكم وينفذ سياساته وتوجهاته ,, والحق كمان بيقول ان الاطراف الاخرى تساعده فى تنفيذ برنامجه بانها تعارض بشكل حضارى لو انحرف عن مسار تطبيق سياسات برنامجه اللى الناس انتخبته علشانها

لكن ابن عم الحق بيقول ,,, مينفعشى نسلم السلطه للاسلاميين حتى لو كانوا اغلبيه ,, وابن عم الحق كمان بيقول دول حيرجعونا لورا ,, وابن عم الحق بيقول الثوره ليها ناسها اللى لازم يحكموا بصرف النظر عن رأى الشعب (( اصله شعب جاهل مبيعرفشى يختار ))

صعب انك تحافظ على انصافك وحياديتك فى وقت الاستقطاب فيه وصل للتخوين

لو انصفت قوى الاسلام السياسى فى حقها المشروع فى الوصول للحكم لو قدرت تحصل على الاغلبيه , يبقى انت كده فى نظر الطرف الاخر خاين للثوره ولدم الشهداء ومش بعيد خاين لمصر

ولو انصفت التيار المدنى فى حالة انه فضل على حالة الجفاء بينه وبين الناخبين ومحصلشى على تمثيل يؤهله للوصول للحكم ,, بأنك تقاوم حكم الاسلاميين تحت اى مسمى زى (( اخونة الدوله )) او (( اسلمة الدوله )) او (( تحويل مصر لطهران او قندهار )) ,, يبقى انت كده فى نظر نفسك خاين لمبادئك وافكارك والمفاهيم اللى كنا بنحلم نوصل ليها الا وهى الديمقراطيه والاحتكام للصندوق الانتخابى

احنا ليه ننطحن بالشكل ده ؟؟؟

كتير منا بيمر فى الوقت الحالى بنفس المأزق ,, بيكون جواه رفض لممارسات معينه من طرف التيار المدنى وميقدرشى يتاكلم خوفا من الانتقاد والاتهام بانه متلون او انه اتأخون

وفى نفس الوقت لو ساند الافعال والتصرفات دى بيفقد احترامه لنفسه وقدرته على استكمال مسيرته

مش دى الديمقراطيه اللى كنا مستنيينها ولا دى الحريه اللى كنا عايزينها ,,

ده اسمه قهر ,, انك تقهر انسان فى فكره لمجرد انه مختلف معاك فده ضد اى مفاهيم انسانيه العالم كله اتفق انها من أسس قيام اى حضاره محترمه

لو المطلوب اننا ننافق ,, يبقى كنا نافقنا مبارك من باب اولى وسكتنا

لو المطلوب ,, اننا نماشى الجو ,, يبقى الله يرحم شهداءنا اللى وقفوا قدام الظلم وقالوا لآ

لو المطلوب اننا نصبغ نفسنا بطلاء الرضى السامى من اى طرف ,, يبقا بلاها سياسه واقلبوها معركه واللى يكسب نقوله الف مبروك


عايزين الحق والا ابن عمه ؟؟؟

بصرف النظر عن اى حسابات او قناعات او اهدالف قد تكون فى ظاهرها نبيل ,,, لازم نقول الحق ,, ولازم نواجهه ولازم نعترف باخطاءنا ده لو عايزين نحقق اهداف الثوره ,, اللى اكتر من الف شهيد والاف المصابين ضحوا بنفسهم علشانها ,, وملايين شاركوا وعرضوا نفسهم للخطر علشان تحقيقها

حنقول الحق ,, وحنضرب ابن عمه على عينه ,, حتى لو مش عاجب حد ,,

حنعلمكم ازاى تقدروا تعارضوا ,, وفى نفس الوقت تتأكدوا ان اللى بتعارضوه مصرى زيكم

حنعلمكم ان التغيير بالدم ,, كان من اختراع حسنى مبارك ... انما احنا عملنا منتج جديد اسمه (( التغيير بالعقل ))

حنعلمكم ازاى اكون مدنى واقول ,, عندهم حق الاسلاميين ,, وازاى اكون اسلامى واقول عندهم حق الليبراليين

حنقول دى احلام ,,,, وهو يعنى الثوره اللى عملناها كنا دارسينها فى الكتب والا كنا بنتفرج عليها كل خميس على القناه الاولى

اى انجاز عظيم ,, بدايته فى الاساس حلم

مفيش حد حيرهبنا باسم الدين ,, ولا حيخدعنا باسم عبد الناصر ,, ولا حيضحك علينا باسم الليبراليه ,,, ولا حيستغفلنا باسم الثوار ,, ولا حيشتغلنا باسم القيم الساميه للعلمانيه

ربنا خلق لينا عقول نقدر ناخد من كل واحد فيكم ,, الشئ الجميل اللى فيه ,, بس ميستناش مننا اننا حنكون قطيع من الخراف وراه ,, بسيئاته وحسناته

من كل بستان زهره ,, والشوك لصاحبه

والحق حق ,,, وابن عمه بالجزمه

حـــــــــــــــــــــريــــــــــــــــــــــه

[نهر النيل]

عندك كل الحق في اغلب كلامك
ولو تكرمت لي ليا اضافه واسف في الوصف
الشعب اللي يخرج من بدلة حزب فاشل ولص ومزور وسفاك دم
ويدخل في عباية جماعه كانت محظوره بشعارات خنفشاريه ضحكوا بيها عليه
عذرا يعني
يستحق اي شيئ يحصل له
وبجد الواحد اتخنق
ولا شايفين لا حق ولا ابن عمه ولا ابن خالته حتى
وربنا يسترها
الف شكر للتوبيك الجامد ياكبيرنا
صباح الياسمين

[Mo7aMaD 3aLa2]

لما تيجى تسأل عايز الحق ولا ابن عمة
وانت بتتكلم عن الصراع بين الاسلاميين والليبراليين وانا شايفة متمثل فى تأسيسة الدستور حاليا
كان من باب اولى تسأل هل الجمعية التأسيسية للدستور مبنية على حق ولا على ابن عمة !!
احنا دولة قانون ,, قانونيا مجلس الشعب كان باطل
وفى قاعدة فى القانون ,, ما بنى على باطل فـ هو باطل
واعتقد هى مسألة وقت والجمعية هتتحل

ولو هنتكلم على الموضوع بشكل تانى اشمل من اللجنة التأسيسية
انت عايز تقنعنى ان سياسة الاخوان سياسة قائمة على المبادئ وكلمة الحق
ولا تسير وفقا لمصلحة الجماعة ؟!!
من قديم الاذل والتاريخ انت عارفة وتعرف ان كل مواقفهم كانت بتبين تخليهم عن المبادئ فى سبيل المصلحة
فـ انت عايز دلوقتى تقنع المعارضة باتباع سياسة المبادئ بعد ما الاخوان وصلوا للسلطة دة شئ صعب جدا
..

[قلم بلا حبر]

مشكورين على التواجد

مبدئيا خلينا نعترف ان فى مشكله ,,

والمشكله ببتمثل فى وجود الاسلام السياسى فى سدة الحكم

طيب ,, اى مشكله ليه مسبباتها ,, لو عرفناها حنقدر نحدد العلاج الناسب لها

اسباب اغلبية تيار الاسلام السياسى

1- اغلب المنتمين ليه انتماؤهم مبنى على عقيده مش افتناع بس وده بيحقق ليهم ثبات وتوحد مش موجود عن قوى التيار المدنى

2- اتخاذهم من الدين منهج بيجذب ليهم فئات مهمشه كتير المعارضه مبتقدرشى توصل ليهم

3- التنظيم الجيد نتيجة انهم تقريبا قدروا يحافظوا لفتره تجاوزت ال 80 سنه على نفس التنظيم ده بل وبيطوروه

4- النشاط المجتمعى عندهم مستمر منذ قيامها وحتى بعد اضطهادهم على يد الحكم العسكرى فى عهد عبد الناصر والسادات ومبارك

5- تراخى قوى التيار المدنى بشكل كبير وتفتتها وتمزقها والصراعات فيما بينها

ال 5 اسباب دول واسباب تانيه بتقدر تدينا انطباع هو ليه الاسلام السياسى مشكله

تقريبا المعارضه او لاتيار المدنى ككل بيحاول يصدر فكرة ان الاسلاميين مش اغلبيه ووانهم مش مشكله خصوصا لو حصلت اى انتخابات جديده

وانا بقول دى مغالطات القصد منها الشعور بالثقه ليس الا ,, وده اسلوب انتخابى موجود فى كل العالم (( yes we can )) اللى استخدمه اوباما مثال على ده ,, انك بتبث الثقه فى نفوس مؤيديك

بس هل موجود على الارض ما يدعم الثقه بالنفس دى ,,, ؟؟؟

بصراحه لآ

لكن خلونا نتفق ان اعتبار الاسلاميين كمشكله مش جاى من فراغ ,,, ده ليه سببه وهو تواجدهم القوى فى الشارع وقدرتهم على حسم المعركه الانتخابيه القادمه لصالحهم

يعنى مفيش حاجه اسمها اقليه منظمه ,, واغلبيه مفككه ,, لان الاغلبيه الحقيقيه فى مصر غير مسيسه من الاساس ,, لا مع دول ولا مع دول

حناخد اخر فقره دى ونبنى عليها السطور الجايه

الاغلبيه الغير مسيسه فى مصر ,, او تورتة الانتخابات لو حابين تصور خيالى شويه يقرب المعنى

التورته دى متاحه لكل القوى ,,, بس علشان تاخد جزء منها محتاج منك لمجهود وتنظيم وترتيب

طبعا التيار المدنى عينه بس على نتصف التورته اللى فها الكريمه ,, ودى نسبتها بالنسبه لحجم التورته ككل لا تتعدى 20% فى احسن الاحوال

يبقى بيفرط فيما نسبته 80% بكامل ارادته

الاسلاميين بيعملوا ايه ؟؟

بيسيبوا التيار المدنى ملهى فى ال 20% اللى هم زبدة مصر من مثقفيها وشباب الثوره والاكاديميين وغيرهم ويتفرغ هو لكامل ال 80% اللى مش قادر يوصل ليهم التيار المدنى فانتهت الجوله اللى فاتت انه حصل منها على اكتر من 60% والباقى كان من نصيب المستقلين

يبقى بحسابات العقل والمنطق ,, قبل ما الوم الاسلاميين على طمعهم او جشعهم ,, لازم افتكر ان ممثلى لاتيار المدنى اللى بدعمهم معملوش اى جهد يذكر فى انهم ينزلوا لل 80% ويحاولوا يتواصلوا معاهم باى شكل علشان يحصلوا على دعمهم وكانت النتيجه اغلبيه ساحقه اللهم انها لو تكررت تانى حتبقى كارثيه بكل معنى الكلمه

لحد هنا ,, نكون خلصنا من جزئية انتقاد الاسلام السياسى وازاى تقدر توازن بين نقدك لجشعه وطمعه وبين انتقادك اللازم لقوى لاتيار المدنى على تخازلها وتهلهلها فى مواجهة الاسلاميين


-----------------------

نيجى للجزئيه التانيه

تشكيل الجمعيه التأسيسيه للدستور ,, انا موافق انها مش معبره بالكشل المطلوب عن كافة احلامنا ومقترحاتنا ,, بس لك ان تتخيل لو وصلنا الى اقصى درجات الديمقراطيه وعملنا انتخابات مباشره لاعضاءها ,, النتيجه حتكون ايه ؟؟؟

حتكون ان فئات اكثر حيتم تهميشها لصالح تيار الاسلام السياسى اللى لسه لحد دلوقتى متغلغل فى الشارع ,,,

فاكر فى انتخابات الرئاسه ,, محدش كان بيرجح كفة محمد مرسى ومكنشى معمول ليه اى حساب على اساس ان الاخوان خلاص انكشفوا وان الشارع مش قابلهم ,,, والحمله اللى قامت ضده تقريبا الفيس كله وتويتر اتفقوا للمره الاولى على مواجهة (( الاستبن ))

بس كانت النتيجه ايه ؟؟؟

انه الاول من بين مرشحى الرئاسه ككل ,,, مع العلم ان حزب النور السلفى والجماعه الاسلاميه بحزبها البناء والتنميه كانوا بيدعموا بشكل مباشر الدكتور عبد المنعم ابو الفتوح ,, يعنى الاسلاميين كانوا مفككيين للمره الاولى منذ قيام الثوره ومطعون فى شرعيتهم فى البرلمان وتصرفاتهم كانت مثار نقد من كل القوى ويمكن اشد من دلوقتى كمان ,, ومع ذلك قدر مرشح جماعة الاخوان انه يحتفظ بالمركز الاول

يبقى لازم تتأكد وكلنا نتأكد ان القوى المدنيه مش ساذجه وعارفه ان اى انتخابات لتأسيسية الدستور حيجيب اغلبيه يمكن اكتر من الموجوده دلوقتى ,, باعتبارات كتير

فاللى بيحصل دلوقتى هو الضغط على نفس المكان لتحقيق توازن ,, وده انا شايفه حل كويس ,, بس لو فى اطار محدد وناخد بالنا ان اى خروج عن الاطار ,, العواقب فيه مش حتكون كويسه لكل الاطراف


الحاجه التالته الىل عايز اكد عليها واللى برده بتندرج تحت تشخيص حجم المشكله السياسيه القائمه وامكانية مواجهتها من التيار المدنى

اننا لازم نعترف برده بان مجلس الشعب المنحل ,, لم يفقد الاخوان اغلبيتهم ,, لان الحل مش نتيجة حدوث تزوير فى النتائج ,, ده بسبب اجرائى قانونى بحت ,, ويمكن برده وللانصاف ان كان فى غلو فى حل البرلمان نتيجه لان نفس المشكله ونفس الخطأ القانونى عرض قبل كده على نفس المحكمه الدستوريه وفى النهايه اتعرض حكمها على استفتاء الشعب ,, فكان لازم يستفتى الشعب على حل البرلمان من عدمه ,, وطبعا لو كان فى استفتاء ,, مكنشى حيبقى فى انتخابات تانيه لان الاستفتاء كانت نتيجته حتكون بنعم لبقاء مجلس الشعب

دى كلها حاجات لو غمضنا عنينا عنها يبقى مش حنعرف نوصل للشكل الحقيقى والسليم لمقدار حجم المشكله لالى واقع فيها التيار المدنى ,, وحنبقى بنضحك على نفسنا زى ما عمل اعلامنا فى حرب 1967 لما كان الانباء من عندنا بتقول وقعنا 70 طياره والحقيقه ان اسرائيل كانت على الشاطئ الشرقى للقناه فى وقتها

او زى الصحاف وزير اعلام العراق لما كان بيهاجم الامركيان من اول الشارع وهم بدبابتهم فى اخر الشارع ,, للاسف دى مخلفات من نظم حكم عقيمه اتوارثتها المعارضه وبقت اسلوبها الحالى فى مواجهة الاسميين

وطبعا نتيجته باءت بالفشل فى الانتخابات السابقه ولو استمرينا على نفس المنوال حيصاب الكثير منا بصدمة نتيجة الانتخابات القادمه

الحاجه الاخيره

كلامك يا محمد عن استخدام الاخوان لاساليب بعيده عن كل القيم والمبادئ ,, وانى مينفعشى اقنع المعارضه بانها متستخدمشى الاساليب دى

انا بقولك بالعكس ,, انا مش حقنع حد ,, بس ياترى ده هو الحل

هو لما تستخدم نفس الاساليب اللى انت بتحاول تروج لنفسك من خلال رفضك ليها ,, يبقى بقيت معارض

لما تستخدم نفس اساليب الاخوان ,, يبقى ايه لافرق اللى يخلينى كناخب افضلك على الاخوان

مظنش ان حتى ده كمان حل مناسب ,, ولكنه برده ميراث اخدنا عليه ,, وهو تقريبا نفس الاسلوب اللى اتعاملت بيه الاخوان مع الحزب الوطنى انها كانت بتستخدم اساليب شبيهه باساليبه

يبقى لو عايز تؤسس لبديل قوى ومستمر وفعال ,, لازم تحصنه بقيم ومبادئ المستقبل

المصريين فى المستقبل يا محمد مش حيقبلوا لا الزيت ولا السكر ولا شنطة رمضان ,, لانهم حيكونوا بيدرسوا برامج كل الاحزاب قبل ما يدلوا بصوتهم

ياترى تضحى بمصر المستقبل علشان تكسب دلوقتى ,, والا تبنى نفسك وتأسس لمعارضه حقيقيه فى مصر المستقبل

علشان كده انا اعتبرت ان خطوة اتحاد قوى التيار المدنى فى مواجهة الاسلاميين خطوه مكنتشى فى صالح حزب مولود بقوه زى حزب الدستور

كان يقدر يقول بتنسيق مع ابلاقاء على ثوابته واهدافه بعيده عن التواءات التحالفات السياسيه والى ان شاء الله حنزل موضوع (( سمك لبن تمر هندى )) عنها

كنت بعتبره امل لقاعده قويه فى بنيان المعارضه المصريه فى المستقبل ,, بس نفس القصه اخوانوفوبيا اصابته وخلته يفقد خط سيره الىل كان حيكون نموذج لكل الاحزاب المدنيه والليبراليه

عموما يارب اكون قدرت اوضح الفكره

ولك ان تتخيل انى بتكلم كويس فى حق الاخوان وانا اللى كتبت عنهم (( لاهم اخوان ولا هم مسلمون )) وتقدر تراجعه هنا فى القسم

لكن لما تكون عايز تحقق نجاح او انتصار عقبه ما ,, يبقى لازم تديها حقها وتشوف مدى قوتها بانصاف ,, ومتحاولشى تخدع نفسك ,, لان ده حيصب فى طريقة معالجتك للازمه وتحديدك لسبل العلاج اللى بالتاكيد مش حتكون فعاله

لازم نشوف الحقيقه بتجرد ,, علشان نقدر نوصل لحل جذرى ,,

بالتوفيق