قصيدة اختبار شهر أكتوبر

[أدب الغريب]

اختبار شهر أكتوبر
الجندي أستاذ والملاذ كان الإله
والجندي طالب مجتهد علمه ضياه
والجندي داخل حصته
وعلي جبينه بسمته
ماعمره تاه
*******
ياله نراجع في الزمن
مرت بنا سنوات كبيسة مظلمة
وسنين بسيطة وعظيمة ومؤلمة
في خمسة يونية سبعة ستة تسعة واحد دي كبيسة
إيه كبيسة أيوه علينا سنة كبيسة
لما تهنا في بلدنا في الصحاري
لما اندفنا في الميدان تحت السلاح
لما سرنا زي ريشة في الرياح
لما صقورنا حطموا فيها الجناح
ثم وقفنا .. عشان نلملم في اللي راح
ونداوي أحزاننا وآثار الجراح
كانت كبيسة .. كانت كئيبة وعصيبة
*******
وفي ستة عشرة ثلاثة سبعة تسعة واحد
هتقول بسيطة .. كان فاكرها كل واحد
لا عظيمة
لما ذاكرنا من تاريخه درسنا
تركيز شديد في عقلنا وقلبنا
لما كتبنا في تاريخنا بدمنا
في الإمتحان .. كان المراقب ربنا
هتغش مين .. بص لأرضك .. لسلاحك .. للقنا
عدي . وسوي حصنهم في رملنا
واعبر وحطم خطهم
واعبر وزلزل في الطرق من تحتهم
*****
والله أكبر .. دا العلم
رافعه أسد زيه علم
مرفوع بضمة في الصدور
منصوب علي أعلي القمم
*****
والإمتحان كان فيه صعوبه
أيوه صعوبة مستحيل
كل العلوم كل الحساب
قال مستحيل
مفيش مثيل للأسئلة .. جوة الكتب
ولا المدارس تعرفه .. في أي حرب
لكن ولاد النيل
بالهندسه قالوا نحل المستحيل
نفرض بـ ص نفرض بـ س
لأه هنفرض بالألف
أيوة هنفرض بالألف
أصل ابن مصر كان ألف
ماشي فـــ طريقه للهدف
كالمستقيم لا ينحرف
******
نال حب مصر ونال شرف
أسمر كما النيل الكريم
زي الهرم .. لا يختلف
لما امتزج دمه برملك لما ضمك
كان عرف
إن التراب غالي تمام زي الشرف
نال النجاح بالنصر .. كان أغلي شرف
أو نال شهادة .... ويه مرتبة الشرف