|| درس قص الصور بأداة الـ Pen Tool ||

[Ahmed Shepo]

السلام عليكم ورحمة الله وبركاته

انهاردا هنتعلم ازاى نقص الصورة باداة البن تول
والأداة دى يا جماعة هى تعتبر أصعب حاجة فى الفوتوشوب
لأنها بتستخدم فى حاجات كتير جدا منها الرسم
بس ان شاء الله الدرس شرحه يكون سهل

دى صورة لـ أداة الـ Pen Tool

اختصارها من الكيبورد حرف الـ P




فكرة أداة البن تول هى انها بتشتغل بنظام النقط
تعالوا نطبق ونجرب ازاى بتشتغل بنظام النقط
انا مثلا فى الصورة دى عملت نقطتين
بدأت من الشمال وبعدين بعديها بمسافة حطيت النقطة التانية
ودا المثال




أداة البن تول بردو ممكن تتحرك على شكل منحنيات زى المثال دا




نيجى بقى لدرسنا وهو قص الصور بالبن تول
دا لينك الصورة اللى استخدمتها فى القص

http://imageshack.us/a/img27/5089/graaam4735941ef49.jpg


الخطوة الأولى أول حاجة هنفتح الصورة فى الفوتوشوب وهندوس
ctrl+j
عشان نعمل نسخة من لير الصورة
زى المثال هنا



وبعدين هنمسح اللير اللى تحت اللى معمول عليه علامة القفل
لغاية ما يتبقى اللير اللى عملناه نسخة
زى المثال هنا



للتوضيح بس الخطوة اللى فاتت دى انا عملتها عشان بعد ما نقص تظهر الخلفية الشفافة


الخطوة التانية هنعمل زووم على الصورة بقيمة 500% عشان نقص بجودة عالية وبإحترافية على قد ما نقدر
طبعا الزووم دا هنعمله من صندوق الـ Navigator
اللى مش ظاهر عنده الصندوق ممكن يجيبه من قايمة Windows وبعدين يختار Navigator
ودا المثال بعد ما عملنا زووم




الخطوة التالتة هنبدأ بالتحديد على المناطق اللى عاوزين نقصها بطريقة نظام النقط اللى جربناه مع بعض فى الأول زى المثال هنا




وهنفضل نحدد لغاية ما نوصل زى المثال هنا



طبعا انا محدد الخلفية اللى ورا تامر لأن دى الخلفية اللى انا عاوز اقصها
وطبعا بعد ما احدد المنطقة اللى عاوز اقصها واوصل النقط ببعض
زى الصورة هنا هدوس كليك يمين فوق الصورة وختار
Make Selection
زى المثال هنا



هيظهرلى صندوق وهحط فيه قيمة 0
وهقوله أوك زى المثال هنا



وهنلاقى الخلفية اتحددت بالطريقة دى
زى الصورة هنا



هندوس على Delete من الكيبورد عشان نمسح الجزء المتحدد
ودا النتيجة فى الأخر



يارب يكون الدرس عجبكم ويكون الشرح خفيف وبسيط
طبعا الناس اللى هتطبق الدرس لازم تطبق على صورة تانية غير صورة تامر
وعاوز الصورة قبل وبعد التطبيق

لو الصور مظهرتش لحد
دا لينك انا مجمع فيه الصور فى ملف مضغوط rar
http://www.multiupload.nl/YFDLCI5JVK



لأى إستفسارات راسلونى على الخاص

[حنـــــون]

درس جميل يااحمد
بجد افدتنى ماكنتش بعرف اقص بالاداه دى
شكرا لمجهودك الجميل
تحياااااتى

[Ahmed Shepo]

اقتباس المشاركة الأصلية كتبت بواسطة حنـــــون درس جميل يااحمد بجد افدتنى ماكنتش بعرف اقص بالاداه دى شكرا لمجهودك الجميل تحياااااتى

الاداة دى انا من ساعة ما بدأت الفوتوشوب كنت ببعد عنها
عشان كانت دايما بتعقدنى لكن لما جربتها وفهمتها بقيت احب استعملها جدا

[حنـــــون]

دا انا بتخنق منها بشكل ههههههه

[Lost Pearl]

درس تحفة

بجد مفيد اوي ده ف القص

يا ريتني كنت عرفت الطريقة دي من زمان ههههههه

تسلم ايديك يا احمد

هاشوف لو عرفت اطبق مش هتأخر ان شاء الله

تقييمي

[Ahmed Shepo]

اقتباس المشاركة الأصلية كتبت بواسطة حنـــــون دا انا بتخنق منها بشكل ههههههه

هههههههههههههه طب تخيلى انا بقالى 3 سنين وشوية على الفوتوشوب
قررت انى اشتغل بالأداة دى واتعلمها بنفسى من حوالى سنة كدا
يعنى سنتين بالظبط كنت متعقد منها

اقتباس المشاركة الأصلية كتبت بواسطة lost pearl درس تحفة بجد مفيد اوي ده ف القص يا ريتني كنت عرفت الطريقة دي من زمان ههههههه تسلم ايديك يا احمد هاشوف لو عرفت اطبق مش هتأخر ان شاء الله تقييمي

ان شاء الله تطلعى أحلى نتيجة

[beauty angel]

تسلم ياأحمــد درس جميل
والشرح بسيط وسهل
فعلا الأداة دى استخدامهآ صعب وأنا كمان ببعد عنهآ خالص
ان شاء الله هجربها وأطبق الدرس
تسلم الايادى ياأحمد
مجهود مميز ،، تقييمى ^^

[Ahmed Shepo]

اقتباس المشاركة الأصلية كتبت بواسطة beauty angel تسلم ياأحمــد درس جميل والشرح بسيط وسهل فعلا الأداة دى استخدامهآ صعب وأنا كمان ببعد عنهآ خالص ان شاء الله هجربها وأطبق الدرس تسلم الايادى ياأحمد مجهود مميز ،، تقييمى ^^

شكرا ليكى
ولو اى حاجة وقفت معاكى ابعتيلى

[๓αℓάҝ]

ااااااااه فهمتو انا دلوقتي


العلم نور برضه هههههههه


اول مره اخد بالي منها اصلا ههههههههه


تسلم علي الدرس و منكم نستفيد برضه

[SplendiD SouL]

الدرس حلو اوي والاداه جميله بس رخمه انا مخلصنيش اجي بايدي فاضيه
فضلت ادور علي صوره اقصها بس دماغي قفلت علي دي

وبعدين



وبس كدا تسلم ايدك علي الدرس الجميل دا
توحفه بجد
تحيتي