حائره..على جسر من الذهب

[دمعه حائره]

ولاكان فى بالى أسهر ليالى

وآلاقيك ياعمرى بين يوم وليلة

حبى وحلالى

وحلمت بيك تكونلى بيت

سندى وأبوعيالى

حضنك حنان مليان أمان

والدنيا ضحكالى

ده أنت اللى اتمنيته

وسنين استنيته يحلى ايامى

وبدعي طول العمر تبقالى

وعشان بحبك أنا جمبك مطمنه

ولايوم هاسأل بتحبنى..

لا ده أنا متأكدة

على فرحتى ناوى

لابنشغل يوم بحزن ولاهموم

وايه هايجرالى

عشان وياك فرحان قلبى

ومرتاح بالى

كلمة بحبك اتعلمتها على ايديك

والعمر الجاى هاعيشه بس ليك

وان سألونى يوم عليك

هاقول ده حبيبى وكل آمالى

حبك ده نصيبى وقسمتى

وبيك هاتحلى حياتى ودنيتى

اصل انت الغالى

اللى قلبى حبك ليالى

ومعاك الدنيا بتحلالى

mena_ hassan

20-9-2016

[دمعه حائره]

السلام عليكم ورحمة الله وبركاته
الامم المتحدة حددت يوم 21 سبتمبر من كل عام للاحتفال
باليوم العالمى للسلام
وبتقدم فى اليوم ده دعوة لكل شعوب العالم وحكام الدول
بوقف العنف ونشر السلام فى العالم
بكل الطرق بنحاول ننشر السلام
بالفن او التعليم او الندوات
فى الوقت اللى فيه لسه حكام ماتت ضمائرهم
وكل شغلهم الشاغل هو القتل والدمار
ضيعوا شعوب وأوطان عشان اطماعهم فى الحكم
فى اليوم العالمى للسلام
لسه سوريا بتقصف وشعبها بيموت
لسه فلسطين بتصرخ وتنادى على صلاح الدين
لسه اليمن بتنهار
لسه العراق بيعانى التشتت والطائفيه
لسه فى كل بلد ارهاب وخوف ورعب من المستقبل
فى اليوم العالمى للسلام بقدم ليكم دعوة وهدنة
انشروا الحب والسلام فى اى مكان تكونوا فيه
يمكن تكون بذور تطرح محبه وامان فى المستقبل
mena

[دمعه حائره]

بيقولوا اللى بيشرب من نيلك

بيلف ويرجعلك تانى

وانا عايش عمرى بغنيلك

مع انى سنين فيكى بعانى

وحاولت اصبرعلى مواويلك

لكنك دايما رفضانى

هاهرب من ارضك ومسيرك

تعرفى ان انتى اللى طردانى

وفى مركب هابعد واسيبك

مش هارجع وهاقول وحشانى

وعشان روحى يابلدى فى ايديك

سابتنى ورجعتلك تانى

غرقان فى هواكى قصاد عينك

مع انك ديما كرهانى

مطرود من حضنك واسيرك

وبلف ويرجعلك تانى
mena_hassan

23-9-2016
رحم الله ضحايا مركب رشيد

[دمعه حائره]

كنت فرحة تترسم فى عيونى ضحكة

لما اشوفك كأن شمس الدنيا طالعة

وقت اما كان الخوف مالينى

تيجى انت وتحلى ايامى و سنينى

والعذاب اللى عشتة قبلك

اختفى لحظة ماشوفتك

كنت حب كبير فى قلبى

ليه بقيت طعنة بيجرى معاها دمي

كنت حلم اتمنى لوفضلت العمر احلمه

وبسهولة جيت فى ثانية بكل قسوة تحطمه

يالى كنت فى عينيك بهرب من الدنيا ومافيها

والجروح بلمسة ايديك تشفيها

ليه بقيت كلمة تقتل فرحتى

ليه معاك دايما بحس بغربتى

كنت لون جميل يزين حروفى

مكنتش اعرف انه هايكون سبب لخوفى

يالى وجودك عن كل الناس كان مكفينى

ليه تضيع حب كان من برد الدنيا مدفينى

كنت فرحة عمرها فى يوم ما كملت

بقيت لى دمعه بعد حيره طويلة نزلت

على العموم كل الكلام ده مالوش لزوم

بعد المحبة جوايا منك بركان هموم

والذكريات بعد اما كانت على كل لون

بقت الدموع اللى ساكنه جوا العيون
mena_hassan

26-9-2016

[دمعه حائره]

نحن لانتعلم كيف نحب أو كيف نكون أوفياء
لكن نتعلم القسوة والكراهية من بعض تصرفات من يحيطون بنا
فقط القلوب الطيبة التى لامكان فيها لتلك الاشياء
تبقى محافظه على صلاحيتها ونقائها أكبر فترة ممكنه
فلاتعرف الكره ولاالحقد مهما تعرضت لتقلبات الحياة
mena

[دمعه حائره]

نفسي فى وطن
نفسي فى وطن بجد.. يعدى بينا من المحن
مافيهوش مكان للارهاب ,,مايعرفش معنى الفتن
أحس فيه بالأمان ,,أعيش مرتاح طول الزمن

نفسي فى وطن
يقدر شبابه... مايبعوش بأرخص تمن
يحلم ,,ويحقق أمنياته مش بسهوله يندفن
يكبر ويعلم ولاده.... يعنى إيه كلمة وطن

نفسي فى وطن
يجمع شملنا,,يضمنا,, ماندوقش فيه طعم الشجن
فيه المواطن محترم لا بينضرب,, أو يتسجن
وإن راح يقول الحق يتلف... فى أقرب كفن

نفسي فى وطن
مافيهوش ضياع أوحد اتشرد وجاع وعلى المؤبد يتشحن
نفسي فى مستقبل جميل,, مايعرفش كلمة مستحيل
مرسوم على سماه الأمل,, مش الضمير فيه انعدم

نفسي فى رئيس يكون حريص وعلى أرواحنا يؤتمن
يكون جرىء واضح بسيط ,,ومش بسهوله يتشتم
نفسي فى وطن حقيقي مش بالنشيد,, ولاالعلم
نفسي فى وطن
Mena hassan

[دمعه حائره]

تعيشى يابلدي تعيشى كمان

وعلمك يرفرف في كل مكان

تعيشى يابلدي يا أم البلاد

ياأصل الحضاره ياجيش الأمجاد

يامصر يارافعة راية السلام

سلام الإنتصارمش ذُل وإنهزام

تعيشى يابلدى آلآف السنين

وبكرا تشوفوا مصر هتبقى مين

مصر العظيمة هاتفضل عظيمة

مهياش تكية مهياش وليمة

وكل خاين عميل وجبان

هانقف قصاده هناك فى الميدان

هانخلص فى حبك وهانخاف عليكى

وربك هواللى حافظك وحاميكى

تعيشي يابلدى ويفضل جيشك عظيم

يامصر يابلد الأمان والشعب الكريم

تحية للجيش المصرى العظيم فى ذكرى نصر أكتوبر
والبطل محمد أنور السادات
وربنا يحمى مصر وشعبها
mena_hassan

[دمعه حائره]

وبحتاجلك
يانسمة رقيقة بتعدى فى عز الصيف
ونجمة تنورلى السما دى ليلها مخيف

وبناديلك
بكل كلام قالوه العشاق فى الروايات
وكل أسامى الحب والهمسات

وبكتبلك
كل مشاعرى اللى وياك أنا حسيها
هاتفهم ولا الغياب قساك ونسيتها

وبشتاقلك
يفضل قلبى يستنى تحن عليه
وتيجى بسرعة وتقوله غايب ليه

وبستناك
فى كل مكان جمعتنا فيه ذكرى
وبحكيله على هوانا واقوله هايجى بكرا

ومهما تغيب
وحتى إن هان عليك حبى وتقسى ساعات
ده حبى ليك مايفرقشى معاه مسافات

ياحلم جميل
ياروح ساكنة جوايا بقالها سنين
يالهفة شوق بداريها بدمعة عين

وأقول هانساك
أخبى حنينى جوايا يدوب ساعتين
يروح قلبى ويسألنى حبيبك فين...
mena hassan
6-10-2016

[دمعه حائره]

زى النهاردة سنة 1992حصل زلزال كبير فى مصر
انافاكرة اليوم دة كويس وانى فضلت فترة مش فاهمه ايه بيحصل
لانى مكنتش شوفت زلزال قبل كدة
وعلى مافهمت ايه دة كان خلص بس الحمد لله
مكنش فيه خساير
ربنا يرحم اللى ماتو ويحفظ مصر من اى شر

[دمعه حائره]

لا يتألم الا الأوفياء
ولا يبكى الا من يمتلك الاحساس
ولا يشعر بالفقد الا المخلصين