سوبر مرسى

[قلم بلا حبر]

بسم الله الرحمن الرحيم

السلام عليكم

سوبر مرسى

مش محتاجه شرح ,, بعد الاعلان الحنجورى اللى اصدره مرسى او قصدى (( سوبر مرسى ))

المناقشه بقت مفتوحه لاى حد ,, وانا اولكم ححط رأيى

اللى ياريت تقراه بعقلك مهما كان انتماءك الفكرى او الايدولوجى

اوعى تحبس نفسك فى سجن فكرى معين لاى سبب ,, متنساش ان الذى لا يأتيه الباطل هوالله ,,,

فحط فى بالك انك وانت بتقرا متحاولشى تتصيد كلمات لاثبات وجهة نظرك

حاول تشوف الفكره العامه للموضوع ولو لقيت افكار تستاهل تأييدك اوعى تتردد ,,, لاننا مصريين زيك ,,, وتهمنا البلد زيك


كان اول تعليق ليا وانا بسمع الخطاب مع السيد صاحبى (( من محاسن الصدف انه على اسمى )) المهم مع تانى ماده قلتله مرسى بيحط السم فى العسل

فهو كان فرحان بحكاية اعادة المحاكمات والكام سطر اللى قراهم ياسر على فى الاول اللى اتكلم عن الثوره فيهم

المهم مع نهاية الاعلان لقيت رد فعلى اتغير بالرغم من ان الناس اللى تعرفنى عارفه انى بقول رايى بعد ما اكون درسته واقتنعت بيه

بس المرادى لقيت نفسى مضطر للحق والامانه انى اغير موقفى من (( مرسى حط السم فى العسل )) لموقف تااااااانى خالص

(( مرسى بيستهبل :d ))

والتحول ده تاريخى فى حياتى بحكم انى مبرجعشى فى كلامى بس عموما زى ما حضراتكم ان شاء الله حتوافقونى بعد قراءة رأيى فأظن انكم برده حتتفقوا مع التحويل اللى عملته ومش بعيد الاقيكم اتحولتم اكتر منى لموقف تالت


(( الرجل الذى فقد عقله ))

كل المواقف عادة بتحاول تعبر بشكل او بالتانى عن حاله عامه سيطرت على كل من لديه عقل فى هذا البلد ,,, وصدقونى الموضوع مبقاش بيحتمل اى حياديه

حتسألنى ,, انت متحيز يا سيد فى الموضوع ده ؟؟؟

,, حقولك ايووووون ,,:d متحيز ,, لان الحيادى فى الحالات الصعبه اللى بيمر بيها الوطن بيكون جاهل ومش قادر يحدد
بناءا على عد وعى او ادراك او من تاثير الصدمه

رئيس بينصب نفسه ديكتاتور يا اما تكون معاه وشايف ان ده حقه وليك اسبابك لفهمك ده

او انك تكون ضده وتعارضه وتثور عليه كمان وليك برده اسبابك لفهمك ده

فمسمعشى كلمة انا على الحياد ,, لان عذرا ,,,, مفيش خيار 3

فالنهارده بقولكم اننا قدام تاريخ بيتكتب علشان يشهد على ان مرسى اللى عصرنا على نفسنا ليمونه علشان ننتخبه مش لنجاحه ولكن اسقاطا لشفيق ,, ضاقت بيه الدنيا وجاى ينصب نفسه ديكتاتور فى مصر


خلونى ابين ليكم ليه برفض الاعلان الدستورى


اولا - قبل اى حاجه مرسى مالوش حق انه يصدر اى حاجه اسمها اعلانات دستوريه ,, ولو نفتكر كلنا ان محدش من الثوره بشتى اطيافها كان مؤيد لاعلان دستورى من المجلس العسكرى لم يتم الاستفتاء عليه ,,, ونزل الناس فى الميادين واعتصموا فى كل ميادين مصر واول من انسحب من الاعتصامات دى كان جماعة الاخوان نفسهم

واستمر خضوع مرسى للاعلان الدستورى المكمل لحد ما جه واسقطه وكلنا هللنا للقرارات اللى كان منها اقالة بعض قيادات المجلس العسكرى

ثانيا - الفرق بين الدستور وبين القانون ,, ان القانون ممكن يصدر كاقتراح من الحكومه او من الرئيس او من احد نوائب مجلس الشعب ويتم مناقشته وصياغته واخذ الموافقه عليه فى مجلس الشعب واعتماده من رئيس الجمهوريه ليكون نافذا

انما الدستور او القواعد الدستوريه التى تعتبر ما فوق القانون ,, فهى مواد تأثيرها ونفوذها بيكون فوق القانون لان اعتمادها بيكون من الشعب ,, علشان كدا لو تفتكروا الاستفتاء اللى حصل على الاعلان الدستورى فى مارس ,, بتاع (( الجنه والنار )) فاكرينه ,و لما التيارات الاسلاميه قالتلك اللى حيقول نعم حيدخل الجنه واللى حيقول لآ يبقى بيرفض شرع الله وحيدخل النار ,, ايوه اهو هو ده ,, ده بقى لحد دلوقتى يعتبر المرجع اللى بيحك مصر حتى اعلان الدستور الجديد

الاعلان الدستورى بتاع مارس هو بمثابة العقد الذى وافق عليه الشعب لانه يكون الضابط والاطار لكل ما يخص المرحله الانتقاليه

وبناءا عليه فان اى اجراء او قانون او قرار يخالف مواد الاعلان الدستورى ده تصبح هى والعدم سواء ,,,

طيب مين اللى يحكم فى ان القانون ده او القرار ده مخالف والا مش مخالف ؟؟

القضاء ممثلا فى نوعين من التقاضى

لو كان الصادر بمخالفه هو (( قرار )) يبقى مختص بيه القضاء الادارى

ولو كان الصادر بمخالفه هو (( قانون )) يبقى المختص بيه المحكمه الدستوريه العليا

يعنى لما حضرتك كمصرى تلاقى قرار صدر من احد الوزراء مثلا او قانون صدر من صاحب السلطه التشريعيه اللى المفروض يكون مجلس الشعب ,, لكنه دلوقتى مرسى

فيبقى من حق حضرتك انك تتقدم بطعن سواء قدام القضاء الادارى او المحكمه الدستوريه العليا

طيب لحد كدا الموضوع كويس ,, ايه بقى اللى مزعل الناس ضد قرارات مرسى ؟؟؟

لان احد مواد الاعلان الدستورى اللى اصدره مرسى بيقول


(( يتم تحصين كل القرارات والقوانين الصادره من الرئيس وبأثر رجعى منذ ولايته فى 30/6 حتى بداية العمل بالدستور الجديد ضد اى طعن عليها من اى جهه ))


وكمان ماده بتقول

(( لا يتم الطعن بحل مجلس الشورى او حل الجمعيه التأسيسيه امام اى هيئه قضائيه ))


هم دول المادتين يا عم اللى عاملين الانقلاب اللى فى مصر

طيب مش محتاج اشرحلك اساس الغلط لانك لما قريت السطور اللى فاتت عرفت ان الرئيس بحكم الاعلان الدستورى فى مارس 2011 والمستفتى عليه من الشعب مبيديش الحق ده لمرسى

2- اثناء القضاء عن النطق بحكم فى طعون مقدمه بالفعل هو مش توغل وبس ,, لآ ,, ده كأن بيقولهم ,, لموا الورق اللى قدامكم ده ,, مفيش قضيه ومش حتحكموا فى حاجه خلاص بح ,, انا حكمت ان الشورى مكمل والتأسيسيه مكمله

3- يعنى ايه تحصين قرارات مرسى ,, يعنى حضرتك لو بكره سمعت قرار بغلق صحيفه او قناه فلازم تعرف ان يا عينى صاحب القناه او الجريده مفيش قدامه غير انه يرفع وشه للسما ويقول (( حسبى الله ونعم الوكيل )) حتى لو مظلوم لانه لو راح للمحكمه ,, المحكمه حتقولوا معلشى منقدرشى نلغيله قرار ,, استعوض ربنا بقى

4- يعنى ممكن تلاقى قرار باعتقالات تعسفسه زى الى عملها عبد الناصر فى حق الاخوان بقرارات اعتبرها ثوريه ,, ومالكشى محاكمه يا حلو لانك مش حتقدر تطعن اصلا على الاعتقال هو كده وخلاص

5- يعنى اعادة انتاج نظام قمعى بسلطات لم يعرفها البشر من القرون الوسطى

6- المجلس العسكرى حاول بشتى الطرق انه يعيد انتاج النظام القديم ومعرفشى فاتحالف مع الاخوان واختار الخروج الامن ,,, ولما كان شفيق خلاص قاب قوسين او ادنى من انه يبقى رئيس ,, كنا بنقول بسخريه اننا حنبقى رومانيا ,,,, النهارده انت الشعب الوحيد اللى قام على الحاكم علشان استبداده وجاب حاكم تانى بانتخابات حره ونزيهه وديمقراطيه اكثر استبداد منه ,,, يعنى حتبقى مسخره يا كابتن

7- لو افترضنا النوايا الحسنه اللى قالها مرسى ان فى رجال فاسدين وهو اللى شافهم واوعى تفكروا انى مش شايفكم والكلام بتاع السسبنس اللى عمله فى خطابه ده ,, طيب يبقى فى سؤال ساذج من اخوكم وفكروا فيه بقليل من التمعن ,, يعنى مش محتاج تركيز خالص ,, محتاج انك تكون صادق بس مع نفسك

مبارك كان بيقول البلد مش سهله وانتم مش حاسين بحاجه وفى ناس متربصه وفى اخطار خارجيه وفى اجندات وفى اسلاميين حيقلبوها قندهار ,,,, وبناءا عليه كان مدى لنفسه صلاحيات على الجيش وصلاحيات على الداخليه وعلى المجالس التشريعيه وفى الدستور وكان بيحاول باستمرار التوغل فى القضاء ,, يعنى كان بيتحكم بالسلطات الثلاثه (( التشريعيه والتنفيذيه والقضائيه )) بس بشكل مستتر ,, وكنا بنقول عليه الديكتاتور ,,, ياترى النهارده ومرسى بيقولنا برده ان البلد مش سهله وان فى مخططات وفى اجندات وان لازم تدونى التلات سلطات (( التشريعيه اللى هى معاها اصلا ,, والتنفيذيه اللى هى معاه اساسا ,,, والقضائيه اللى حصن نفسه منها يعنى مبقاش ليها لازمه فتعتبر معاه هى كمان )) وده كله علشان يقدر يصلح من حال البلد ,,, المطلوب اننا نقول ومالوا طالما النيه خير ,,, يبقى كان لزمتها ايه الثوره وليه اسقطنا شهداء ووقع منا مصابين ,,, ولما مصر مش بتتحكم الا بالرئيس الديكتاتور كنتم زعلانين ليه من مبارك لما كان ديكتاتور وماسك كل السلطات ,, ؟؟؟

ياترى احساس مبارك ايه دلوقتى ,, انا حاسس انه عايز يخرج لنا كلنا ويقول (( كنت بتحكم فى السلطات التلاته بس كان عندى دم كنت بقعد الف وادور واشتغلكم علشان اتحكم فيهم )) النهارده جالكم اللى معندوش دم وحطلكم السيف على رقابيكم وبيقولكم انا وبس ,,, انا = مصر ,, انا معايا الحق ولا يلمسنى الباطل ,, انا الصح اللى مبيغلطشى ولا حيغلط ,, واللى اقوله يمشى من غير اعتراض من اى حد مهما كان ,, ولما نسأله ليه يا ريس ؟؟

يقولك اصل فى اتنين تلاته متغطيين بالغطاء القضائى ولازم احاسبهم واضيق عليهم

والنبى عمركوا شفتم استهبال كده ,,, عمركم شفتوا هيافه زى كدا ,,, هى المخدرات ممكن تعمل كتير انما بالشكل ده مفيش غيره (( الترامادول ))

بقى علشان تحاسب 3 تودى البلد لحرب اهليه

بقى علشان قلنا البلد واسعه عليك تقوم تقول طب ادونى فرصه ابقى ديكتاتور وانتم حتشوفوا على قدى والا لآ


سيدى الرئيس ,, مصر مش بس اكبر منك ,, مصر انت مش شكلها ,,, ولو حتحل ازمتنا او حتحقق لنا مطالبنا بالديكتاتوريه فيبقى بضاعتك متلزمناش ,,, مش قدها سيبها ,,

حتسمعوا كتير (( انتم خايفين من ايه )) ده هو بيعمل كدا علشان مصلحة البلد ,,, وبعدين ما تحطوا الدستور وانتم تاخدوا منه كل السلطات دى

لازم يكون ردكم (( حماده بالجنزبيل يا ريس ))

الرئيس اللى مش قادر يدير بلده وفقا للدستور اللى انتخب عليه وشايف ان قدراته مش جايبه مع القانون وبيطلب مننا انه يبقى ديكتاتور لمده قصيره يحقق فيها وعوده ,, يبقى يقدم استقالته ويقول منيش لاعب

الرئيس اللى يفكر ان فى شعب بيسلم نفسه لمبايعة لديكتاتور بدعوى تحقيق مطالبه ,,, يبقى لازم مؤيديه يعترفوا بسذاجته

الرئيس اللى ينقلب ويقسم بلده نصين ويعرضها لحرب اهليه الله اعلم مداها حيكون ايه او لفين ,, يبقى انسان اقل ما يقال ليه (( اسفوخس ))

اول مره ممكن تقرا منى الكلمات دى ,, بس هى دى الحقيقه الرئيس اللى يقول انا ربكم الاعلى عيب انك تحترمه والا تبقى سفيه زيه ,,, والا يبقى زعلتوا من بوش ليه وكنتم بتسبوه ليل نهار ,,

مرسى بيقول بقهركم وبمحى ارادتكم وبنصب نفسى ديكتاتور عليكم علشان احقق احلام ثورتكم

وبوش كان بيقول بحتل العراق وبقتل فى ابناؤه علشان احرره

- بمناسبة محاكمة قتلة الثوره ,,, فبالعقل كدا اللى عمل تصالح مع الداخليه ورفض هيكلتها ورجع الامن الوطنى زى زمان يعتقل الناشطين من منازلهم ممكن تصدقه لما يقولك ححاكم ظباط ولواءات الشرطه اللى اخدوا براءات

- ياترى حضراتكم عارفين ان اعادة المحاكمات فقط لمن كان فى عهد النظام السابق ,, طيب والشهدا اللى فى احداث محمد محمود ومجلس الوزراء وغيرهم اللى انت بنفسك يا مرسى قلت انهم شهداء وان مصابيهم ليهم معاش شهيد ,, ياترى حتحاكموهم ازاى وهم مش تبع النظام السابق ,,,,

- ياترى الاخوان لحد امتى حينسوا انهم كانوا اشبه باللى بيشحت المصوتين علشان شفيق مينجحشى ,, دول وصلوا لانهم كانوا بيقولوا للثوار يا عم بلاش تنتخب مرسى بس على الاقل سقط شفيق ,, بعد ده كله يرجعوا ويعيشوا علينا دور الاغلبيه ,, طب ازاى ؟؟

خدوا الكام رقم دول

1- مرسى فى المرحله الاولى حصل على 5 مليون صوت تقريبا كانوا كلهم من الاخوان ومن بعض التيارات الاسلاميه واللى قدروا يعشموهم بالزيت والسكر ,, والمعروف ان ده كده اقصى ما يمكن جمعه من اصوات لصالح مرشحهم

2- حمدين وابو الفتوح وخالد على مرشحى الثوره حصلوا على حوالى 8 مليون صوت كلهم من شباب واحزاب الثوره باختلاف اتجاهاتها وايدولجيتها بما فيها اصوات الاخوه الاقباط اللى فى الغالب راحت لصباحى ,,, يضاف عليهم اصوات حزب النور اللى اخدها ابو الفتوح

3- فى المرحله التانيه ,, مرسى كان ضامن اصوات حزب النور وحاطط عينه على اصوات شباب الثوره والاتنين فعلا ادوله وحصل على 13 مليون صوت تقريبا

يبقى مرسى جاله حوالى 8 مليون صوت ,,, اللى هم اصوات ابو الفتوح وصباحى

لو حذفنا منهم اصوات السلفيين والاخوه المسيحيين حيفضل لنا اصوات الثوره ,,,

وعلشان اقربلكم المعنى واعرفكم ازاى حنحذف ,, فده شئ بسيط ,,, حزب النور كان مع ابو الفتوح ,, فى نفس الوقت كان معاه عديد من ائتلافات شباب الثوره وكل ما حصل عليه ممن اصوات كان حوالى (( 3 مليون ))

فلو افترضنا ان حزب النور اداله 1.5 وكل الاطياف التانيه ادته 1.5 ,,

يبقى نرجع ل ال 8 مليون اللى اخدهم مرسى ونحذف منهم 1.5 علشان يفضلنا اصوات الثوره اللى اضافت لمرسى

الارقام كده تقريبيه ,, عايزها تأكيديه بقى ,,, اخصم كمان .5 مليون صوت بكده يبقى اصوات الثوره = 8 -2 = 6 مليون صوت

يا عم شيل كمان مليون علشان خاطر الحبايب يبقى اصوات الثوره 5 مليون بس

ضيف بقى ال 5 مليون صوت على اصوات شفيق وفى نفس الوقت اخصمهم من مرسى وانت حتعرف الاغلبيه اللى بيتكلموا عليها دلوقتى

13-5 = 8 مليون صوت لصالح كل التيارات الاسلاميه

12+5 = 17 مليون صوت للقوى المعارضه ليهم ,,,

شفتوا الفرق عامل ازاى ,, يعنى البلد مش بتاعتكم علشان تحطوا دستورها ,, وهم عارفين من ده ومتأكدين

علشان كده حصنوا الشورى وتأسيسية الدستور ,, نهم لو انحلوا مش حيعرفوا ينفذوا مخططهم بوضع دستور جائر لمصر يخدم اهدافهم وافكارهم الاستبداديه ويؤصل للتدخل والافتئات على حريات الناس بدعوى الكهموت الدينى تحت مسمى (( بما لا يخالف شرع الله )) وينصبوا انفسهم اولياء على محاسبة الناس حسب فهمهم الشخصى لشرع الله ,,,

حتقولى وهو ينفع الفلول مع الثوره ,,, حقولك ان لما يكون خصمك بيتصالح مع اوسخ اطياف الفلول (( الداخليه )) وبيكرم قتلة الثوار من اعضاء المجلس العسكرى لرئيس وزارة الازمات الجنزورى ,,,

يبقى اوعى تخليهم يضحكوا عليك ويقولوك هو ايه اللى ممشى موسى مع صباحى والبرادعى

قوله اللى خلى طنطاوى وعنان ياخدوا قلادة النيل ,, يخلى موسى الغلبان نصفح عنه من غير تكريم ,, على الاقل اهو لسه بيناضل

المهم ان اصوات شفيق مكنتشى كلها فلول ,, وانما اصوات سلبيه مش بتخرج فى الانتخابات ناس غلابه فى القرى والعزب ,,, اتقالهم من كباراتهم ادوا شفيق فبيدوه ,,,

علشان كده شفيق اتفوق فى الشرقيه اللى هى معقل الاخوان المسلمين هههههههههههههه

فاللى يقولك اصلكم اقليه اقليه ,, قوله (( حماده بالجنزبيل ))

وزى ما قولتلكم مبقاش فى حاجه اسمها حياد , يا مع القرارات ياضدها ,,, فى واحد بقى يقولك اصلى انا مع خلع النائب العام او معاشات الشهدا واعادة المحاكمات فعايز دول وبلاش المادتين والا التلاته اللى عليهم قلق ؟؟

اقوله يا سيدى انا معاك ولو ان فى تحفظ مهم ,,, هو لما تشيل النائب العام اللى عينه مبارك فى ظل نظام قمعى بيمنح الرئيس سلطة تعيين النائب العام ,, يبقى لما تشيله وتحب تجيب غيره يبقى بطريقه مختلفه لاننا بلد اصبحنا ديمقراطيه , صح كدا والا ايه ,, ؟؟

, لا الباشا شال ده وجاب ده بنفس طريقة مبارك ,,,

انا مع خلع النائب العام ,, بس مجبناش جديد الرئيس برده هو اللى بيعين النائب العام اللى المفروض انه يكون مستقل ومعين من السلطه القضائيه ,,, يعنى حق يراد به باطل او السم فى العسل

يعنى تلاقى المواد كلها مسوسه كدا وتشم منها ريحة الغدر وتبييت النيه والطمع والحسابات الضيقه ولمحصوره فى جماعه بعينها


خوفى من ايه /؟؟؟

اننا لو سكتنا على كل الممارسات اللى قلتها دى ,, حنبقى خلقنا فرعون ,, وحتى لو التزم ومبقاش فرعون فاحنا فتحنا باب مش حيتقفل لاى رئيس قادم انه يطالب بتوسعة سلطاته تحت اى مبرر

وبدل ما كنا بنحتفل بثوره قضتت على النفوذ السياسى الغير محدد ,, حنحتفل بعيد ميلاد الحاكم يا اما نتمنع من الملوخيه زى ايام زمان

فى حاجه اخيره ,, قبل ما تلومنى على تسلط لسانى ببعض الالفاظ اللى جت فى المقال ,, لوم على الرئيس اللى استهان بشعبه وخرج عليهم يقولهم انا الصح المطلق واللى شايفه حعمله واللى مش عاجبه مالوش غير الحيطه يضرب دماغه فيها ,, وقال ايه بعمل كدا علشان مصلحتكم

تصدقوا ان مفيش فرق ,, واضح ان كلهم عارفين اننا شعب طيب وبنعدى اى حاجه ,, مبارك كان عامل فيها ابونا اللى عارف مصلحتنا اكتر مننا ,,, ومرسى دلوقتى نصب نفسه وصى علينا علشان يحمينا من الاخطار اللى حوالينا

للدرجه دى هم شايفينا شعب معوق ذهنيا محتاج دايما اللى يخطط ويفكر ويقرر باسمه ؟؟!!!!!!!!!!!!!!!

ده كان رأيى ودى كانت مبرراتى ومعاها بعض ملاحيظ يارب تكون افادتكم باى حاجه

اسف ع الاطاله

بالتوفيق

[حنـــــون]

عاوزه اقولك
روح يابنى ربنك يكرمك
والله يسلم قلمك
وان شاء الله هيطلع زى الشاطر
يلغى الاعلان المبتزل الى هو نزله دا
لاننا خلاص بئه قرفنا من دور الاب وابنائه دا
احنا مش ابناء حد ياعم احنا ولاد البلد دى
ومن حقنا فيها يكون لينا دور وراى ومش هنسكت على
استغلال واستخفاف بعقولنا بعد كدا
شكرا ليك بجد ياقلم حقيقتا لخصت الى حصل
الى هيدخل يقولك ايه الى انت بتقوله دا
اعرف انو نفسيه اتربت على انو انت ماتعرفش الصح من الغلط
ولازم حد يقررلك حياتك
بجد عاوزين نفوق بئه من الى احنا فيه
تحيااااااااااتى

[SiLver Spectra]

اسمحلي هحط موضوعك في التنبيهات :d

اقتباس - ياترى حضراتكم عارفين ان اعادة المحاكمات فقط لمن كان فى عهد النظام السابق ,, طيب والشهدا اللى فى احداث محمد محمود ومجلس الوزراء وغيرهم اللى انت بنفسك يا مرسى قلت انهم شهداء وان مصابيهم ليهم معاش شهيد ,, ياترى حتحاكموهم ازاى وهم مش تبع النظام السابق ,,,

اقتباس حتقولى وهو ينفع الفلول مع الثوره ,,, حقولك ان لما يكون خصمك بيتصالح مع اوسخ اطياف الفلول (( الداخليه )) وبيكرم قتلة الثوار من اعضاء المجلس العسكرى لرئيس وزارة الازمات الجنزورى ,,, يبقى اوعى تخليهم يضحكوا عليك ويقولوك هو ايه اللى ممشى موسى مع صباحى والبرادعى قوله اللى خلى طنطاوى وعنان ياخدوا قلادة النيل ,, يخلى موسى الغلبان نصفح عنه من غير تكريم ,, على الاقل اهو لسه بيناضل المهم ان اصوات شفيق مكنتشى كلها فلول ,, وانما اصوات سلبيه مش بتخرج فى الانتخابات ناس غلابه فى القرى والعزب ,,, اتقالهم من كباراتهم ادوا شفيق فبيدوه ,,, علشان كده شفيق اتفوق فى الشرقيه اللى هى معقل الاخوان المسلمين هههههههههههههه فاللى يقولك اصلكم اقليه اقليه ,, قوله (( حماده بالجنزبيل ))

بجد يعني الواحد نفسه يقول الفاظ بس ماسك نفسه
لما يطلع يقولك هعيد تشكيل اللجنة التأسيسية و هو بيرشح نفسه و مايعملش حاجه
يقولك هيكلة الداخلية و النظام و أول ما مسك راح مكرمهم
لما يقولك اعادة محاسبه قتلة الثوار و يطنش كل الي ماتوا بعد كدا و الي منهم بالمناسبة واحد لسه ميت من يومين او شبه ميت , و دا ان شاء الله مين هيحاسب المسؤول عن موته اذا كان الرئيس محصن نفسه !
لما يقولك بحترم القضاء و له مكانته و القضاء الشامخ ( و لسه قايل الكلام دا في خطابه امبارح)
طب هو نزيه , محصن نفسك ليه يا عم الكلامنجي ؟
و هو في أكثر اهانة من الي هو عمله (تحصين نفسه) , دا انت كدا بتقول انه قضاء فاسد , لكن هو بقى رئيس (كلامنجي) لازم يشتغلنا

بص
كل القرارات الي اتخذت دي كان هدفها هو تمرير الدستور
هما ماكانوش يقدروا ينزلوا الايام دي للاستفتاء و عارفين ان صعب جدا الجو يكون لصالحه و محتاجين يمدوا فترة ال6 شهور
و في نفس الوقت عارف انه لو مدها شهرين فمليون في الميه التاسيسية هتتحل بسبب الانسحابات الي حصلت باعتبار انها و بدون ذرة شك لم تعد تعبر عن اطياف الشعب المصري
عشان كدا راح محصنها

بصراحة قمة البجاحه الي خلقها ربنا لما يفرض رأيه و يقولك اصلي اغلبية
تقوله اغلبية ازاي ياعم الحاج , دا انت فايز على واحد في الميه باصوات قوى مدنية كتير , دا انا ليه اصحاب كتير جدا كارهين للاخوان و راحوا صوتوله ضد شفيق ,
يبقى ازاي تقولي أنا اغلبية و هفرض نفسي , انت مجرد بتحشد
يا اخي دا لو اي حد بص على دفعته في الكلية هيلاقي اصحاب الفكر الاسلامي بيتعدوا عالصوابع ( الي ليهم انتماء اخواني او لحزب النور أو حتى مش ليهم)
لو حتى مشيت في الشارع

دا انا قرايبي كلهم متدينين عمرهم ما فوتوا ركعة فجر و مع ذلك بيكرهوا التيار الاسلام السياسي
مش عايز اقولك انهم في الاعادة انتخبوا شفيق
عشان في الآخر يطلع الاخوان و النور و يقولك احنا اغلبية و هنفرض عليكم الدستور !!

حتى لو كنت اغلبية في الشورى الي ناس كتير ماراحتش تنتخب اصلا و كانت شايفه انه مالوش اي ستين لازمه + ان المجتمع فيه جهل ماحدش يقدر ينكره
المفروض لو انت صاحب مبدأ تراعي ربنا و تراعي اطياف المجتمع لانك مدرك ان في ناس كتييييييره جدا بتختلف معاك فكريا
فين حقهم دول و ليه انت عايز تستحوذ !!
خايف من ايه ؟
ما صدقت تكبش مش كدا ؟

الدستور في اي بلد في العالم مش بيتكتب بالفرض و لا بالعافية و لا بالعند و لا بأغلبية حتى
الدستور بيتكتب بالتوافق لأن الاغلبية قد تصبح اقلية مستقبلا
بيجيبوا كل اطياف المجتمع بتوزيع عادل يعدوا مع بعض و يكتبوا فيه , لكن الي بيحصل دا اسمه مهزلة

و ليه سؤال بقى للاخوة السلفيين الي لسه في التأسيسية
ايه بقى نظام احكام الشريعة ؟
مش كنتوا بتتظاهروا من يومين على أحكام الشريعة ؟
ايه الي مقعدكم في اللجنه الي قالت مبادئ مش أحكام ؟
و لا هو انتوا مع الحاكم و خلاص ؟
و السؤال مش لكل السلفيين في ناس محترمه و عندها وعي سياسي زي (محمد يسري سلامة) , الكلام للي بيطبلوا للحاكم و بيهللوله

عايزكم تصارعوا الاخوان و تكتبوها أحكام و خلي عندكم مبدأ سياسي مره كدا

ماهي اصلا خربت :d

تسلم عالموضوع يا سيد و وفرت عليه موضوع تاني كنت عايز اكتبه بتفصيل , بس انت قولت كل الي انا عايزه و أكثر

[Şα3Đ..♥]

هي مصر بقي كلها محللين سياسيين ولا ايه
دي بقت حاجه تحت المريبه
الكلام مبيقدمش ولا بياخر
وخصوصا الكلام ف السياسه
يا اما بيخلص بخناقه يا بزعل
اي كلام ف السياسه انا برفض اتكلم فيه بصراحه
ماهو يا اما واحد موافقني ف كلامي وهنقعد نمدح ف الراجل او القرار اللي بنتكلم عنه
يا اما العكس
وساعتها هيتقلب بخناقه
الكلام مبيوديش ولا بيجيب
اطلعوا بره خنادق الكتابه دي بئه
يا اما تسكتو

[PrinCesS Gege]

بجد بجد انت فله شمعه منوره ياباشا ^_^
كلامك ده مظبوط جدا
دانا بسبب الحوار ده اتخانقت مع ناس على الفيس لانهم شايفين ان مرسى هوا الصح والراجل يعينى مفيش ف ايدو حاجه يعملها
واصلا هوا فرد عضلاته ف الانتخابات وقلك بس ادونى 100 يوم وهعمل حاجات واثبتلكم انى استاهل وعدوا ال100 يوم والبلد خربت اكتر
هوا طالما عارف نفسه مش قد الود مكانش وعد بس هوا شايف ناس ماشيه وراه ومصدقاه قالك اصيع بقا عليهم
بجد حاجه تقرف ناس كتير ماتت ومفيش ولا حد جاب حقهم
ربنا يصلح حال البلد بجد حرام اللى بيحصل فيها دا

[SiLver Spectra]

اقتباس المشاركة الأصلية كتبت بواسطة mohamed saad هي مصر بقي كلها محللين سياسيين ولا ايه دي بقت حاجه تحت المريبه الكلام مبيقدمش ولا بياخر وخصوصا الكلام ف السياسه يا اما بيخلص بخناقه يا بزعل اي كلام ف السياسه انا برفض اتكلم فيه بصراحه ماهو يا اما واحد موافقني ف كلامي وهنقعد نمدح ف الراجل او القرار اللي بنتكلم عنه يا اما العكس وساعتها هيتقلب بخناقه الكلام مبيوديش ولا بيجيب اطلعوا بره خنادق الكتابه دي بئه يا اما تسكتو

ماهي لما ماكانتش محللين سياسيين كانت البلد راكعه تحت ديكتاتور
فاكره انت اكيد , بس غريبه انك وقتها ما اخدتش بالنصيحه دي و بعدت عن السياسة !!
و انزيم (آسف ياريس) كان شغال معاك :d
ففعلا ابعد عن السياسة يا سعد ليك انت احسنلك

سيد طول عمره سياسي قديم , يمكن اكتر واحد بيكتب في السياسة من اول ما سجل
و اذا كنت شايف ان الكتابه مالهاش لازمه ففي غيرك شايف ان ليها لازمه , و كفايه ان تحريك الثورة تم بالفيس بوك و بالكتابة و هو أضعف الايمان

[๓αℓάҝ]

هههههههه صدقت يا استاذ سيد ..
مش هعرف اقول رأيي بتعمق زيك ..
اول حاجه جت في دماغي لما سمعت قرارت مرسي انه شرب بريل ..
معك في اللي قولته .. بس ممكن تتشاف من ناحيه تانيه مفيش حد هيرضى بحاجه
و اي قرار مرسى هياخده هيكون في ناحيه معارضه علي القرار ده و مفيش حاجه هتمشي ..
مش عارفه قرار مرسى ده يتقال عليه ايه ..

و فعلا التيار الاسلامي مش اغلبيه ولا شئ ,, لان للاسف بعض الاخوان بتستخدم الدين كوسيله او سبب
يعني حاجه قذره .. انا مش ضد الاخوان انا ضد السياسيه و الفكر اللي ممكن يوصف بالفكر المريض اللي بيستخدمه
لانه له ابعاد ملهاش اساس من الواقع ,,
يمكن حظنا لبس في شفيق و مرسى و كان صعب ان الواحد يختار ساعتها اصل في كل الاحوال لبسين في ملف اسود ..

يلا ربنا يسترها علي مصر
تسلم قلمك بجد روعه اسلوب هايل
بالتوفيق لكـ ..

[واد حبيب]

والله مش عارف انتو مزعلين نفسكم ليه كده
يا سيد البلد دي خلاص مش بلدنا دي بلد الاخوان ومصر
عوز يكون ليك نصيب في مصر انضم لجماعه الاخوان
غير كده ملكش نصيب فيها
ولا تقول مرسي ولا مبارك
هوه خط والكل بيمشي عليه محدش عارف يغيره
الفرق بين مرسي ومبارك ان مرسي الاخوان والمرشد هما اللي بيحكمو البلد
اما مبارك كانت المدام سوزان وابن المدام جمال
تقبل تحياتي
الحبيب

[نجمة النجوم]

كرسي مصر
ورئاسة مصر
تعرفوا يعني ايه مصر
أقوى دوله عربيه موجوده دلوقتي
تعرفوا يعني ايه مصر
الشوكه الوحيده اللي في ضهر الصهاينه حتى لو في سلام ويهمهم جدا يكسروها
تعرفوا يعني ايه مصر
البلد الوحيده بالعالم اللي اهلها راكعين ومرعوبين ومشلولين ومقهورين من الاف السنين ورغم كده عايشين !
تعرفوا يعني ايه مصر
موال طويل وكبير ومش هينتهي
بالنسبه للموضوع
كنت متوقعه ده
وخلافي مع بابا وصل للشده
كان عايزني اختار مرسي بحجة انهم ناس بتعرف ربنا
طيب وهو يعني بقية الشعب مش بيعرف ربنا ؟
كمان عايزه اقول شيئ
المفروض القانون يمشي في البلد بالعدل والتساوي
يعني مثلا لما ايمن نور حاول يتقدم اترفض بحجة انه عليه حكم وكده
طيب ما مرسي نفس الحال ليه التفرقه ؟
المضحك والمخزي انه كان احتياطي لان الاخوان منافقين
المخيب للامال
انهم نافقوا وكذبوا ( مشاركه لا مغالبه )
المخيب أو كمان ( مش هنقوم بترشيح رئيس مننا )
بأمانه
شعب مصر يستحق أي حد يسخر منه
عارفين ليه ؟
لأننا فلاسفه على الفاضي
عمال على بطال
ووقت الزيت والسكر والبطاطس ما يظهروا
تختفي المبادئ
وتنتحر القيم
وتموت الضماير
لسه بلاوي مرسي والاخوان جايه ومش تستعجلوا
عارفين ليه يا حلوين ؟
لانهم انتقاميين ودمويين
ومع الايام وانا هحفظ لينك الموضوع ده عشان ردي ده هفكركم
بس بجد
حزينه ان يكون رئيس مصر كده
وحزينه ان يكون حال مصر كده
طيب وبعد مراحل الكلام والشعارات دي
ناويين نعمل ايه ياشعب مصر ؟
لما مرسي والمرشد والمحظوره كلها ينتقموا من الشعب ؟
منتظرين ايه ؟
ما هي النوايا بتبان مع الوقت اهه
امتى الشعب ده هيفوق
بجد
حرام علينا كلنا
انا اسفه كلامي كتير
بس مخنوووووووووووووووووووقه
ميرسي بجد صاحب الموضوع المهم كتير

[سلطان الزين]

طيب ويش رايك نطلع حسني وترجع مصر قبل الثوره..!!
يااأخي اعطو الراجل فرصه زي ماأعطيتو حسني.
حكمكم 30سنه ومرسي 5شهور!!
الغواغائيه لم ولن تقدّم لمصر إلاّ الخراب والدمار..

تحياتي..