دستور الاخوان

[قلم بلا حبر]

بسم الله الرحمن الرحيم


السلام عليكم


الاخوان قدموا ايه فى الاعلان الدستورى وبيطلبوا منا ايه ؟؟؟

الاخوان قدمولنا نيه سيئه ,, وبيطلبوا منا ان نحسن النيه

ايه هى النيئه السيئه اللى اتعامل بيها الاخوان مع الاعلان الدستورى

1- اعادة المحاكمات

المادة الأولى: تعاد التحقيقات والمحاكمات فى جرائم القتل والشروع فى قتل وإصابة المتظاهرين وجرائم الإرهاب التى ارتكبت ضد الثوار بواسطة كل من تولى منصبا سياسيا أو تنفيذيا فى ظل النظام السابق وذلك وفقا لقانون حماية الثورة وغيره من القوانين.

ويرجعوا تانى يقولوافى قانون حماية الثوره الملحق بنفس الاعلان الدستورى

(( إعادة المحاكمات في قتل المتظاهرين، في حال ظهور أي أدلة جديدة، ))

طيب ما هو من قديم الازل معروف ان لما يظهر ادله جديده بتتعاد المحاكمه , وموجوده فى قانون الاجراءات الجنائيه كماده من مواده ,,, ايه اللى يخليك تحطها بقى فى اعلانك الحنجورى , دى المتاجره بدم الشهداء ,, ودى النيه السيئه للاخوان اللى بيخاطبوا فيها الجانب العاطفى من الناس وبيستغلوا قلة الوعى السياسى عند البسطاء ويتاجروا بدم الشهداء لاستدراك عاطفة الناس ,,


2- المادة الثانية : الإعلانات الدستورية والقوانين والقرارات السابقة عن رئيس
الجمهورية منذ توليه السلطة في 30 يونيو 2012 وحتى نفاذ الدستور وانتخاب مجلس شعب جديد تكون نهائية ونافذة بذاتها غير قابلة للطعن عليها بأى طريق وأمام أية جهة ، كما لا يجوز التعرض بقراراته بوقف التنفيذ أو الإلغاء وتنقضي جميع الدعاوى المتعلقة بها والمنظورة أمام أية جهة قضائية.


دى ملهاش اى توصيف عندى غير (( بجاحه ))
مبارك فى عز جبروته لما جه يحصن الماده (( 76 )) فى الدستور ,, الكل اعترض حتى الاخوان ولو تفتكروا الكتاتنى وهو قاعد على الرصيف ,,, وحاطط على صدره وشاح اخضر وكاتب عليه لا للتعديلات الدستوريه ,,, ييجى الكتاتنى بقى فى 2012 يشوف صاحبه بيحصن ايه

صاحبه بيحصن قراراته ,,, يعنى اى حاجه يقولها صح ,, لا يأتيها الباطل


الحاجه التانيه : فاكرين وقفة القضاه اللى الاخوان قالوا نحن ندعمهم وعملوا وقفه فى مجلس الشعب تضامنا مع القضاه ورفضوا تغول السلطه التنفيذيه فى القضاء ,, النهارده مش تغولوا لا,, ده قفلوا المحاكم نفسها
تخيل مثلا القاضى اللى المفروض خلاص حاجز قضية اللجنه التأسيسيه للدستور وبالمناسبه بتنظر فى القضاء الادارى مش قدام الدستوريه اللى فيها تهانى الجبالى اللى قارفنا بيها ,,, المهم القاضى دا فجأه يتاخد من قدامه الاوراق ويتقاله مش حتحكم فى القضيه ,, احنا حكمنا انه يستمر عمل اللجنه وكمان حنمدلها شهرين علشان تنجز عملها ,,, انا مش حكلمكم على الفعل ,, انا فارق معايا قوى رد الفعل وهى صورة القضاء فى عين المتقاضى اللى هو المدعى الراجل اللى رافع القضيه ,,, مبقاش فى هيبه للقضاء (( بالرغم من انه بالفعل محتاج تطهير ,,,)) ,, بس لو الناس فقت ثقتها بسلطه تعيد لهم حقوقهم بالعدل وبالقانون ,, يبقى بقينا فى غابه ,, الا لو الرئيس حيكلف اعضاء الجماعه يشكلوا محاكم تحكم بين الناس لحين تطهير القضاء

الحاجه التالته : ان وصف ديكتاتور بقى مكتمل الاركان ,, فهو الرئيس المشرع للقوانين وكل قراراته لا يطعن عليها امام اى جهه ,, يعنى معاه التلات سلطات (( تشريعيه - تنفيذيه - قضائيه )) ,, يبقى شيلنا ديكتاتور وجبنا ديكتاتور ب اكتر من 1000 شهيد وبالاف المصابين ,,, ده احنا شعب طيب


3- تعويضات المصابين ,,, بالله عليكم محتاجه تنزل فى دستور ,, دا لو قال لوزير الشؤون الاجتماعيه زود معاشات الناس المصابين فى صورة قرارات اداريه كان الراجل مشكورا حيزود ,, يا سيدى خليها فى قانون سميه قانون تعويضات الثوره ,, انما تحطها فى دستور ,,, ده انت بتضحك علينا العالم بقى ,,, يعنى تاجرت بالشهدا وكمان بتاجر بالمصابين ,, يعنى لا عاتق الحى ولا الميت

4 - النائب العام ,,, كلنا من اول يوم طالبنا باقالته وكان اقوى وقت للمطالبه بعد احداث بورسعيد وشهداء الاولتراس اهلاوى ال 70 ,,, وساعتها برلمان الدقون قال ان عزل النائب العام بيكون عن طريق استقالته مش اقالته ,, والحجه كانت اننا فى دولة القانون ,,, وكانوا وقتها بيقولوا الشرعيه للبرلمان ,, برده كنا بنطالب بعزل النائب العام قبل الاعلان على طول ,, بس احنا مش عزلنا عبد المجيد اللى عينه مبارك ,,, علشان يجيلنا طلعت اللى عينه مرسى ,, فى حين ان القانونى والدستورى ان اللى بيعينه مجلس القضاء العالى ,, ودى ماده موجوده حتى فى مسودة الدستور اللى الشعب حيستفتى عليه قريبا ,,, يبقى ان شاء الله كدا اقدر اقول للنائب العام دا بعد اقرار الدستور (( باى باى )) ومرسى ساعتها مينطقشى بكلمه ,, لان طريقة تعيين النائب العام ده بعد اقرار الدستور حتكون مخالفه للدستور الجديد ,, وعليه لازم نختار نائب عام جديد ,, طيب سؤال اهبل (( هو انت يا ريس شاكك كمان فى مجلس القضاء الاعلى )) ؟؟؟ ,, ما كنت سبت مجلس القضاء هو اللى يختار النائب العام ,,, والا هو كل رئيس بييجى معاه (( لغلوغه )) قصدى (( نائبه العام )) ؟؟؟!!!!!!!!!!


5- المادة الخامسة: لا يجوز لأية جهة قضائية حل مجلس الشورى أو الجمعية التأسيسية لوضع مشروع الدستور.

طبعا الماده بتنضاف للماده التانيه اللى بيها تم استباحة السلطه القضائيه من جانب مرسى ,,, بس ضيف على كدا

ان مجلس الشورى اللى تم تحصينه دا واللى المفروض انه بكدا حيستمر معانا لحد التجديد النصفى بعد سنتين وعليكم خير كان اعضاؤه منتخبين على انه مجلس لاقتراح القوانين لتعرض على مجلس الشعب لمناقشتها وتشريعها انما هو مكنشى من صلاحياته التشريع ,, علشان كدا لو تفتكروا ان انتخاباته تقريبا مكنشى حد كتير بيروح لانه ببساطه مالوش اهميه كبيره عند القوى السياسيه ,, فاستطاعت التيارات الاسلاميه ان تنفرد باغلبية المقاعد فيه ,,, فى الدستور الجديد اللى حيستفتى عليه الشعب قريب ان شاء الله ,, مجلس الشورى بقى حيشرع قوانين ,,, يبقى كدا مجلس الشورى بتشكيله الحالى واللى انتخبناه على انه بيقترح قوانين حيبقى بعد الدستور الجديد بيشرع ,, يبقى بكدا التيارات الاسلاميه لو حصل ليها انتكاسه فى انتخابات مجلس الشعب يعنى ماخدتش الاغلبيه اللى يخليها تقدر تعتمد القوانين ,,, يبقى معاها الاغلبيه اللى فى مجلس الشورى اللى تقدر بيها تشرع القوانين اللى على مزاجها ,,,, يا سلام على الدماغ ناس طيبين قوى يا خال

طيب والحل / الشورى والنائب العام يعاد انتخابهم من جديد بعد وضع الدستور واحد من الشعب والتانى من المجلس الاعلى للقضاء ,

طب ده اللى حيحصل : أشك بصراحه


6- المادة السادسة: لرئيس الجمهورية إذا قام خطر يهدد ثورة 25 يناير أو حياة الأمة أو الوحدة الوطنية أو سلامة الوطن أو يعوق مؤسسات الدولة عن أداء دورها ، أن يتخذ الإجراءات والتدابير الواجبة لمواجهة هذا الخطر على النحو الذي ينظمه القانون.


اولا فى كلمتين اتنين كافيين انهم يفكرونى بقرارات جمال عبد الناصر اللى تم فيها اخفاء الاخوان المسلمين من الساحه السياسيه وهما

1- خطر

ايه هو نوع الخطر ,, ايه توصيفه ,, ايه اشكاله ,, يعنى مين لما يعمل ايه يتسمى اللى عمله ده خطر بيهدد ثورة 25 يناير او حياة الامه او الوحده الوطنيه او سلامة الوطن

يعنى لنفترض مثلا انى مشيت فى مظاهره ضد قرار حكومى مثلا زى رفع الدعم واللى كلنا منتظرينه خصوصا بعد موافقة صندوق النقد الدولى على القرض ,, الاقينى متهم بان اللى عملته ده خطر بيهدد ثورة 25 يناير والا بيهدد حياة الامه ,,,

ومين اللى حيحدد هل الفعل ده خطر على الثوره وعلى البلد ,, والا لا

يعنى ببساطه ومن غير لف ولا دوران ممكن يتقبض على كل رموز المعارضه بزعم انه اى فعل عملوه هو خطر على ثورة 25 يناير او على حياة الامه

2- الاجراءات والتدابير

يعنى الخطر وعرفنا ان اللى يشوفه مرسى خطر على الثوره يبقى خطر ,, ايه هو نوع الخطر اللى يقصده مقالناش ,, سبهالنا مفاجأه احتمال يكون دخولك الحمام وتسيب النور شغال بعد ما تخرج يتصنف على انه خطر على حياة الامه

لكن المصيبه الاكبر ان اللى بيحدد اجراءات المواجهه كمان مش القانون ,, لا ,, ده ابويا الحاج مرسى ,,

يعنى لا القانون حيحدد هل ده خطر والا لآ ولا حيحدد ايه هى اجراءات المواجهه ,, يعنى ابويا الحاج مرسى يمسكك ويصنف فعلك وكمان يقول ايه اللى يتعمل معاك


كانوا بيتظلموا من عبد الناصر ومرسى قالك فى التحرير (( الستينات وما ادراك ما الستينات ))

عمرى ما شفت اللى داق الظلم بقرارات زى دى يرجع بعد 50 سنه ويمارس نفس الدور بنفس الصلاحيات وكان السجون عملتلهم امراض نفسيه خلتهم اصبحوا حاقدين على المجتمع وعلى الناس ,, وكان اللى مشاركشى حتى فى تعذيبهم فهو فى نظرهم شارك برده بسكوته على تعذيبهم


وفى الاخير وبعد كل النيئه السيئه اللى بيحاولوا بكل اشكال التلون واللف والدوران انهم يمرروا مواد لمصالحهم الخاصه ,, ييجوا ويقولوك

(( أكدت الرئاسة المصرية الأحد على "الطابع المؤقت" للإعلان الدستوري ))

وكان بعد كل اللف والدوران ده عايزينا نصدق ان نيتهم سليمه فى وضع الاعلان الدستورى بالشكل ده ,, وبدون حتى التشاور مع اى حد حتى مستشارى الرئيس معرفوش عن الاعلان ده حاجه

اعلان يشكك فى الجميع ,, من قوى سياسيه ,, لقضاء ,, الى حد الفريق الرئاسى نفسه

انهم جماعه من الواضح ينتمون الى سلاله انقى من سلالتنا المصريه


------------------

بعد كل النوايا اللى زى الزفت دى واللف والدوران ده كله ,,, يقولولنا ده مش ليكم ده للفلول ,

يكون ردنا (( اضمن منين انك مش حتستخدمه ضدنا ))

يكون ردهم (( احنا نيتنا خير وبنعمل ده علشان البلد ))


يقدمون الينا سوء الظن والنوايا السيئه ,,, ويطلبون منا احسان الظن تجاه ما قدموه








،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،

[حنـــــون]

اقولك ايه انت قولتلها
ناس طيبيييييييييييييييييييييييييييييييين اووووووووووى
واحلى حاجه انهم فاهمين كل حاجه
وهيظبطولنا حياتنا المفروض نركن احنا بئه
وهما يظبطوا دا حق الاب على ابنائه ياقلم

[قلم بلا حبر]

اقتباس المشاركة الأصلية كتبت بواسطة حنـــــون اقولك ايه انت قولتلها ناس طيبيييييييييييييييييييييييييييييييين اووووووووووى واحلى حاجه انهم فاهمين كل حاجه وهيظبطولنا حياتنا المفروض نركن احنا بئه وهما يظبطوا دا حق الاب على ابنائه ياقلم

عين العقل انا برده قلت كدا

حسنى مكنشى بيمشوركوا على الانتخابات وكان بيقفل الصناديق

سيبوا الاخوان تاخد مجراها

[SiLver Spectra]

انت كدا لخصت و جبت المفيد

عارف كل المشكلة الي احنا فيها سببها ايه ؟
هو اننا رحنا ننتخب مجلس شعب و رئيس قبل الدستور
و من البداية كان توجه الاخوان (بنعم) عشان هو الي يشرع و يتحكم
مع العلم ان حتى الاعلان الدستوري وقتها كان بيكلف مجلس الشعب على انه يدير التاسيسية مش انه يستفرد بيها
بمعنى انه مطالب بتجميع كل اطياف الشعب و يلم الناس كلها حواليه و ينجح التاسيسية بالتوافق الي مطلوب و الي بتيعمل في اي بلد في العالم

انا براي ان التاسيسية لو كانت اتعملت من البداية قبل اجراء اي انتخابات كان هيكون في احترام للدستور و للقانون الي كان هيكون ثابته
بس تقول ايه بقى لسوء النوايا سواء من العسكر او من احزاب الاسلام السياسي !

الي انا شايفه ان اللعب و التعديل في الدستور باعلانات دستورية كل شوية باقيت لعبه
يعني ممكن اي رئيس مستقبلي تحت اي ظرف (مش موجود فيه مجلس شعب) يجي يطلع اعلانات دستورية و يلعب فيها , الاول كانت التعديلات و الاعلانات الدستورية بيتم استفتاء الشعب عليها
دلوقتي كل حاكم بيلعب بمزاجه و لا بيستفتي و لا حاجه
بيجي يفرض عليك
و يطلع مرسي يخطب بجماعته عند الاتحادية زي القذافي كدا في العزيزية
عشان يثبت انه مش رئيس لكل المصريين !
طب فين راي الناس الي احتشدت امبارح و ملت الميادين !
في رئيس يطلع يقول انه بيتجسس على تليفونات
بجد كلها امور بتبين انه رئيس ساقط الحكمة و الدرايا

و بعدين يقولك دا اعلان مؤقت !
هو مش عارف ان الوقت المؤقت الي هو بيتكلم عليه دا هو اهم وقت في تاريخ مصر !
يعني هو يشيله بعد ما يحط و يشرع الي هو عايزه ! يا فرحتي
عموما انا واحد من الناس مش هحترم الدستور و كل ما هتحصل حاجه هعيبه و هقول انه دستور الاخوان و يسقط دستور الاخوان , يبلوه و يشربوا ميته , و لا هو ما يحترمش القوانين و يجي يفرض عليه اني احترمها !

كفايه انه كذب حلفانه باحترام القوانين و الدستور اثناء القسم في الدستورية !!

[توليلا غسان]

انا هحكي اشي مصر دمرت هاد ملخص

كل يوم ثورة

كل يوم قتل

كل يوم دمار

وانا اساس انا مش مع انو الاخوان المسلمين انهم يمسكو او يعملو

ومسير الشعب المصري يعرف انو اختيرهم كان غلط

والله ينصرك يا مصر

[العاشق الذى لم يتب]

أقدم تحياتى لفخامة مقامك الفاضل
ونبجل ونحترم قاداتنا إذ أنك أحد رموز
المنتدى أليس من أولى أن نفعل ذلك
أننى والذى نفسى بيدى لم ولن أسمح
لنفسى أن أفكرأو مجرد عبور فكرة تمر
أمام ناظرى أن أسيئ لسيادتكم حاشا وألف كلا
وبالتالى كان حتما وضروريا أن نحترم
قادتنا وهم قد ولاهم الله عجلة القيادة
بإرادته هو وحده إذ لا يمكن أن يحصل المرء
على شيئ من حطام الدنيا إلا وقد كتبه الله له
ثانيا وبإنتخابات نزيهة وشريفة وعفيفة
وتحت هؤلاء القضاة بما فيهم الصالح والطالح
شهدوا ومعهم العالم كله بنزاهة الانتخابات
لا وكما يدعى الهارب الفار أحمد شفيق بأنهم
زوروا النتائج .هذا أولا
ثانيا : وكما أطلقت سيادتك أنه دستور الأخوان
ودعنا نسلم جدلا أنه كذلك كم من الزمن سرى
وأمتد مفعول هذا الدستوروماهى المضار التى لحقت
بى وبك وبالشعب المصرى هل الذى تراه الآن
من تحطيم وتخريب وأشتعال الحرائق وسد الطرق
وغلق الناس لمحلهم ومنعهم من أرزاقهم هو دستور إخوانى هل التهجم وتحطيم أماكن ومقرات الأخوان
هودستور اخوانى وقتل الناس أيضا دستور اخوانى
هؤلاء المنافقون والكاذبون والمتشدقون بكلامهم
وقراراتهم وقنواتهم فقط هم عملاء خائنون لوأنك بحثت
وقرأت ماذا قالوا فى إذاعات العالم وصحفهم لعلمت أن عدوهم اللدود هو الله ومن يحمل دعوته
وأضرب لسيادتك مثلا حينمافاز أوباما فى الأنتخابات الأخيرة هل قام الحزب الجمهورى بدعوة إلى مليونية وأجتمع زعمائه وقرروا أعلان ماأعلنه حمدين صباحى والبردعى وعمروموسى وبتاع الوفد بإسقاط رئيس الجمهورية والحكومة وهدم الدولة رأسا على عقب كما أدعواهؤلاء المنافقون هل سيادتك أطلعت على أى شيئ أنسحبوامن التأسيسية فقط ياسيدى لايريدون أصلاح الدولة هم يريدون مخططا من خلاله يصلواإلى سدة الحكم ويسرقوا وينهبوا كما فعل أسلافهم وأمثالهم بل هم شركائهم فى سلب ونهب مقررات الدولة والتربع على مكوناتها.
هذا الذى تراه الأن مجرد زوبعة فى فنجان وكلمات قدقالها قبلهم المنافقون علانية وأمام رسول الله إذ قالواعلانية ( ماوعدنا الله ورسوله إلا غرورا) ولكن هيهات هيهات فإن وعد الله هوالحق وسينصر الإسلام والمسلمين أينما وجدوا وأينما كانوا وغدا سترى دستور الأخوان هو على حق ودستورهم على باطل سيدى كم من الكلام المعسول والبسمات المصطنعة رأيت وكلمة حق أريد بها باطل سمعت ولكن الذى يعلم السر وماخفى كفيل بإظهارالحقيقة وستعلوا راية الحق خفاقة عالية لا يعقوها عائق
وإن فرج الله لقريب
فقط هو إخلاص النوايا لله رب العالمين
أشكر لسيادتك سعة صدرك وأستماع وجهة نظرالآخرين وإنما يدل على حسن خلقك وأدبك الجم
تحياتى ودعواتى لك بالتوفيق دوما
وتقبل فائق الأحترام
أخيك
رفعت

[ڪــــبرياء الروح]

اللهم اشفى خادم الحرمين يارب العالمين

[big bốss]

فعلد كلامك صح يا سيد

الاخوان مسكوا البلد من الاول غلط

لانهم بيتجروا بروح الشهداء وبكل كيان البلد


وعايزين يسيطروا على البلد من كل جانب


شلنا فرعون وجبنات فرعون


قلها الشعراوى لا تولوا متدين يستميت على السلطه

[نجمة النجوم]

ياااااااااااااااااااااااه
هو حضراتكم لسه فاكرين ان الشعب انضحك عليه
طب ما ناس كتير صرخت ولطمت على وجوهها
ومنهم اكتر حد اتوجهت له سخريه
ولو قلت الاسم
هتقولوا عليا فلول
بس هقول الاسم
توفيق عكاشه
لو تعرفوه
هو الراجل ده مش اكتر واحد صرخ وفهمكم
انما دي عادتنا كمصريين
تحصل المصيبه
نقوم نفكر في حلولها
طيب ما نوفر على روحنا حدوثها اصلا
عجبت لك ياشعبي
يا شعب مصر
ميرسي للدعوه هنا
وللعلم
الاخوان بيحفروا نهاياتهم
وافتكروا
ميرسي كتير

[LasTSouL]

لا حــــــول ولا قــــوه الا بـــــالله ..!