مصر واللى حاصل فيها

[العاشق الذى لم يتب]

أحبائى السلام عليكم ورحمة الله
ونرطب ألستنا بذكرالله ونقول
سبحانه وحده له الملك والأمر من قبل ومن بعد
ونصلى ونسلم ونبارك على خير الأنام وآله الكرام
وبعـــــــــــــــــــــــــــــــــد
قبل ما نحكى عن اللى حاصل فى مصر
ودا طبعا الكلام فيه يطول ويطول
وياما تكلموا قبلى كتير وياما يتكلموا بعدى كتير

الناظر فى أحوال بلدنا وأحوال الناس كلها
يستنتج الآتى أولا: كل الناس بلا إستثناء
أصحوا سياسيين ومثقفين ومحليين
ماأكثر الصفات الآتية:
ناشط سياسى ، محلل سياسى ، خبير أستراتيجى سياسى
رئيس قسم الزعبلة فى جريدة والله ماواقف على حد السياسى
وعمى الحاج أبو شملول المتحدث الرسمى للفلاحين السياسى
والأستاذ والناقد الرياضى شبر ونص المتحدث الرسمى
لرابطة المشجعين لفريق أهل الفسق السياسى
وزعيم المخربين لحركة ستين فى سبعين والمتحدث الرسمى
لرابطة (هافضح مصر) السياسى
وفاقد نص لسانه ومشلول كيانه جدنا أبو زلبطة والمتحدث الرسمى
لحركة العجزة والمشلولين لشعب مصر السياسى
والأستاذة ناكشه شعرها والخالعة ضرسها والمتحدثة الرسمية لرابطة نسوان مصر الثقافية والناشطة السياسية.
وكما يسعدنا يكون معانا أصغر ناشط سياسى وله دور بارز فى تعبئة زجاج الملوتوف وتكسير أرصفة الشوارع وعنده قدرة لحشد الأطفال وتهريبهم من الدراسة وفتح أبواب الملاجئ وتجميعهم وحملهم فى اتوبيسات على حسابه ونقلهم إلى مقر وزارة الداخلية وقد صرف على أكلهم وشربهم أكثر من 50 مليون صفروت مصرى وجدير بالذكر وقبل ما أنسى وأبخس هذا العملاق الصغير حقه قد أستورد صواريخ وشماريخ من الصين والهند ودولة ماليش أسم وبنادق وذخيرة آلية حديثة الصنع وسهلة الأستعمال لا تحتاج لأى مجهود فى أستعمالها من (البدارى)وأيضا على حسابه معانا ومعاكم الطفل المشرد اللى أبوه طلق أمه وأمه رمته فى ملجأ الأستاذة مش لاقيه حد يحكمها :أهلا بيك معانا وشرفت قناة الوسخين لتقبلك الدعوة الواد سلنكح

وكما لا يفوتنى أن أذكر الناشط السياسى الكبير

والمتحدث الرسمى بأسم حزب خرابك يامصر وكان له دور فعّال فى توحد وتجميع كل أحزاب مصر وجمعهم على كلمة سواء وقد أتحدوا وتعاهدوا وأقسموا يمين الولاء وخائن فاسق مجرم من يخون العهد والذى من خلاله أتخذوا قرارات حاسمة ومهمة فى هذه الظروف الصعبة والتى تمر بها مصر مصر التى إذا حام فى سمائها غراب أو أبو قردان أثر ذلك
الطيران فى جوها على سماء الوطن العربى الكبير

وتأثرت شعوبها كاملة بظروف ومهالك لا يعلم مداها إلأا الله حتى أن شبابهم اللى خاطب فتيات عانسات سابها تعنس فى بيت أبوها وكل راجل مجوز وحده ماطلعا عينه قرر يطلقها ناهيك عن عدم وجود( مندى) فى دول الخليج العربى ودا طبعا هيأثر على مزاج البطون وكما أنه لا يوجد فى الشام (حلو ولا قمردين )
بالإضافة أنه سيكون أنعدام تام لوجود( كسكسى) فى المغرب العربى وسيشرد الشعب السودانى الشقيق

وكل زول هناك هيقول ( أنا هاسس إنى وهدانى )
فمن أجل هذا وذاك أستضفنا أكبرناشط سياسى ومفجر بركان لمّو واجمعوا بعض واحتلوالميادين فى انحاء مصر من أجل أسقاط مصر معانا ومعاكم البروفيسير الدكتور حالق حاواجبه.المتحدث الرسمى بإسم الحزب

يسلام يأهل مصر مشاء الله عليكم كلكم آصدى كلنا أصبحنا محليين الله يرحم زمان أمى كانت تفضل تحلل دقيق لوحديها لمّا لونها يصبح أبيض من الدقيق وهى تصرخ وتقول آطيعة تاخد الأكل واللى هايكلوه وأنا ياأمى هقول

آطيعة تاخد المحليين واللى هيحللوه .
يانس حرام عليكم سيبوا الناس تشتغل شوية
ياناس صبرنا أعوام من غير عدد وإحنا محرومين من كل شيئ مش بس العيش ولا الحرية ولا الكرامة الإنسانية

دا إحنا كنا محرومين من أننا نتكلم فى سيرة ليه الفول مسوس والزيت لونه أسود كزيوت المكينات المحروقة
ممنوع تتكلم أنت والمدام وتقولها بحبك يابنت الإيه لحسن يسمعك أمن الدولة ويعتقلك أنت وهى ويحرر لك محضر على أنقلاب الدولة على محكومها
كنت زمان أخاف أقول ربنا ينتقم منكم ياظلمة لحسن يفكروا أننى بادعو عليهم
وإحنا النهرده ومن أفواه الصبية والمجانيين وبأعلى أصوتنا نصرخ ونقول يسقط يسقط مرسى
أحمدوه وأستغفروه ونادوه يحوش عن مصرنا
أم دمنا ولحمنا
يارب ياأكرم من سأل وياأجود من أعطى
ياعالم السر علم اليقين وياكاشف الضر عن البائسين
أرحم مصرنا وهيئ لها البطانة الصالحة وولى أمرنا لمن يتقيك فينا
اللهم عليك بمن أراد لها سوءا أن تجعل كيده فى نحره وتدميره فى تدبيره
اللهم إنك ولى ذلك والقادر عليه
وحمدلله وصلاة وسلاما على عبده النبى محمد
والسلام علكم ورحمة الله
أخوكم
رفعت

[ساحر الأحزان]

سكوت سوف يتبعة سكوت

طالما بقت الافواة مكممة

ولا تتكلم عن الاخطاء

معالجة الخطاء فى اولة

افضل من علاجة قبل ان ينتشر المرض فى جسم المريض

ويصعب علاجة

موضوع قيم منك

تحياتى

[دمعه حائره]

شعب خرج من حبسه سنين لحريته واول ماينولها
لقى اللى جاى يسرقها منه تانى
معاك حق ان مش كل واحد يعمل نفسه محلل سياسى
ويقعد يملا دماغنا بكلام ويشتتنا
بس الحقايق واضحه للجميع ومافيهاش اختلاف
ولما تعالج الغلطه وهيا صغيره افضل بكتير ماتسكت
ويفلت منك الزمام
بحييك على موضوعك وطريقه توصيلك وطرحك للفكره
وربنا يصلح حال مصر وشعبها
احترامى,,

[العاشق الذى لم يتب]

اقتباس المشاركة الأصلية كتبت بواسطة ساحر الأحزان سكوت سوف يتبعة سكوت طالما بقت الافواة مكممة ولا تتكلم عن الاخطاء معالجة الخطاء فى اولة افضل من علاجة قبل ان ينتشر المرض فى جسم المريض ويصعب علاجة موضوع قيم منك تحياتى

نعم أخى الكريم معالجة الطأ فى أوله أحسن
من تركه حتى يتفاخم ويكبر وينتشر
ولكن من الذى يعالج أليس أفضل أن نتركه لمن هو أهل
سعدت بمرورك أخى الكريم
تقبل تحياتى وودى
رفعت

[Ćяч ƒ0Я ℓ0√З]

السلام عليكم بشكر حضرتك على موضوعك ووجهة نظرك المحترمه اقدرها طبعا بس بعد اذن حضرتك ممكن اسأل حضرتك سؤآل ؟

حضرتك كنت مؤيد مين فى انتخابات الرئاسه ؟ مع العلم انى مش من مؤيدى مرسى ولا انا اخوانى وبشكرك مره تانيه على موضوع حضرتك

[العاشق الذى لم يتب]

اقتباس المشاركة الأصلية كتبت بواسطة Ćяч ƒ0Я ℓ0√З السلام عليكم بشكر حضرتك على موضوعك ووجهة نظرك المحترمه اقدرها طبعا بس بعد اذن حضرتك ممكن اسأل حضرتك سؤآل ؟ حضرتك كنت مؤيد مين فى انتخابات الرئاسه ؟ مع العلم انى مش من مؤيدى مرسى ولا انا اخوانى وبشكرك مره تانيه على موضوع حضرتك

أولا أنا أشكر حضرتك على المرور والذى أسعدنى
كما أشكر شخصك الفاضل على الرد فى حق وجهة النظر المحترمة
ثانيا أنت حر كماأنا حر تنتخب أخوان ولا غيرهم لك كامل التصرف والأختيار
وزى حضرتك مش بأيد مرسى برضوأنت حر
وبناءا عليه مش من حقك تسألنى أنا أنتخبت مين
مش كده ولا إيه
أحنا الآن فى وضع مزرى وخطير عايزين الخير لبلدنا أشوف وقلى ماذا نفعل
تقبل تحياتى وودى
رفعت

[Ćяч ƒ0Я ℓ0√З]

اقتباس مش من حقك تسألنى

ههههههه كنت ماشى كويس بس الكلمه دى جت تقيله شويه

على العموم ولا يهمك اخى تقبل مرورى ودى

[العاشق الذى لم يتب]

اقتباس المشاركة الأصلية كتبت بواسطة Ćяч ƒ0Я ℓ0√З ههههههه كنت ماشى كويس بس الكلمه دى جت تقيله شويه على العموم ولا يهمك اخى تقبل مرورى ودى

عفوا أخى لا أصد مافهمته
طبعا من حقك تسأل وتستفسر
ولكن قصدى الأمر فات ميعاده
وإحنا بنتكلم على اليوم
ولو كنت جنبى كنت وشوشتك وقلتلك
أنا أنتخبت مين
ومرة تانية أشكرك أخى الحبيب
على مرورك
وتقبل تحياتى وودى
أخوك
رفعت

[راجية الشهادة]

امين امين
يعطيك العافيه على الطرح الرائع

[قلم بلا حبر]

بصرف النظر عن موضوعك البطيخى اللى انت كاتبه

بس المفروض نكلمكم باى منطق وانت زيك زى الاف غيرك من المنتمين لنفس العقليه ونفس التفكير دى طريقة تفكيركم

اقتباس نعم أخى الكريم معالجة الطأ فى أوله أحسن من تركه حتى يتفاخم ويكبر وينتشر ولكن من الذى يعالج أليس أفضل أن نتركه لمن هو أهل

انتم لو شيخكم قالكم يمين يبقى يمين ,, ولو قال شمال يبقى شمال

انا حكلمك على نفسى وعلى اى حد ممكن يشاركنى فى كلامى

فى حاجه اجمل ,, انك تكون اهل لكدا ,,,

زمانك بتقول لنفسك ,, الله هو قلم بلا حبر بيدبسنى والا ايه ؟؟

ايوا بدبسك ,, خلينى اضربلك مثال

لو عندك 50فدان قابلين للراعه ومعاهم مزرعه بيتربى فيها فراخ وفى اخرها منحل بيخرج ليك عسل وعلى حدودها اشجار فاكهه

ونويت تزرع ال 50فدان دول بنجر سكر ,,,

وانت بعد دا كله اساسا لا بتعرف تزرع ولا بتعرف تراعى النحل ولا بتعرف تربى فراخ ولا بتفهم فى زراعة الفاكهه

اكيد حتأجر عمال يباشروا الحاجت ويكونو بيفهموا فيها

بس ؤال برده ,, هو ينفع تسيبهم من غير رقابه منك ؟؟؟

المثل بيقول (( المال السايب يعلم السرقه ))

وده مالك اللى لازم تراعيه ,, فحتلاقيك بتدور على ح يكون عنده نحل علشان تفهم شويه علشان الواد بتاع المنحل ميضحكشى عليك

وحتلاقيك برده لو تعرف حد بيفهم فى الفاكهه حتحاول تفهم منه علشان تقدر تتابع الواد المسؤول عن الفاكهه

وهكذا

يبقى لما يبقى عندنا بلد بكل مواردها بكل طاقاتها بكل ثقلها الاقليمى والدولى وتقولى نسبها

اسيب ايه يا بركه ,,, انت عايز تسيب سيب

انما انا مش حسيب ,, ربنا خلق لينا عقل ,, جايز مكونشى فاهم فى الاقتصاد ,, بس بدل ما بقعد على المنتدى 8 ساعات مثلا ,, اخليهم 4 وال 4 التانيين اروح اقرا فى الاقتصاد لحد ما افهم

جايز مكونشى بفهم فى السياسه الخارجيه ,,, بدل ما اقعد على الفيس كل يوم ساعتين والا تلاته اخليهم ساعه والباقى اروحج اقرا عن سياسة مصر الخارجيه

يبقى كسلك انت متصدروش لينا كلنا ,, وتقول سبوها للى بيفهم

اللى بيفهم دا عمل زينا وقرا برده ,, ومحتاج اللى يحاسبه ويراقبه ,, اصل عقبالك كدا ان شاء الله ,, مصر عندى زى بيتى

فى حد بيأجر بيته وبيسيب المستأجر يعمل اللى هو عايزه ؟؟؟؟؟؟؟

فدعوتك بتاعت موضوعك دى بترجعنا لورا زى باقى دعوات نفس التيار اللى بتنتمى ليه افكارك

وهو كلوا واشربوا واحمدوا ربنا انكم عايشين

انا بقولك بقى

طبقوا دا على نفسكم

احنا بقى منتعلم وحنعلم عيالنا انهم يقروا ويفهموا ويتعلموا اكتر علشان يقدروا يقولوا للحرامى اثبت ,, ويقولوا للديكتاتور ,, قف

واللى عايز يريح دماغه ,, يريحها

انما هو انت تصدق ان شباب ادهس تحت المدرعات واتقلعت عينيه حيسمع كلامك اللى بتقوله دا

ممكن شيخ يقوله فى درس فتهللوا وتقولوا (( الله اكبر ))

بس عندنا بقى لا

الكل لازم يتعلم

الكل لازم يفهم

الكل لازم يكون ليه رأى

مفيش حاجه سيبها وخلاص