الكائن الاخوانى

[قلم بلا حبر]

بسم الله الرحمن الرحيم

السلام عليكم

,, مفيش يأس ان شاء الله

امبارح كتبت بوست على الفيس ده كان مضمونه

اقتباس مليونية تأييد لمرسى يوم السبت ,,,, فى عز اعتصام كل القوى السياسيه فى التحرير ,, قرار غير مسؤول من اشخاص غير وطنيين

لقيت شاب اخوانى اقتنع بيه وأيده وده كان رده ,, وللامانه لما بناقش اخوانى انا فى الغالب عارف انى بناقش (( حجر )) لانه مغسول دماغه بمبدأ السمع والطاعه وحتعرفوا ده اكتر لما اكمل القصه

اقتباس لالالا انا صحيح اؤيد قرارات الرئيس كلها واؤيد الاخوان في الدعوة لمليونية حاشدة ولكن ارفض كل الرفض انها تكون في التحرير فعلا قرار غير مسؤول

فبصراحه مبقتشى مصدق عينى ,, ايه دا ,, اخوانى بيشغل عقله ,, دى معجزه

ولقيته بعد شويه عامل الصوره دى ومشيرها



بقيت بجد مستغرب وفرحان فى نفس الوقت ,, لحد ما اتصدمت ببنقاش بينه وبين اخوانى صاحبه ,, عايزكم تركزوا قوى وانتم بتقروا الكومنتات دى علشان تفهموا العقليات اللى بنتعب نفسنا فى نقاشها وهى فى النهايه (( صم بكم عمى فهم لا يعقلون )) وده ارجو انه ميتاخدشى على انه سخريه هو توصيف لحالة اللاوعى واللادراك اللى استنتجتها من كلام الاخ ده

اقتباس (اخوه وثقه وطاعه ) دعائم قامات عليها جماعه الاخوان المسلمين ومش ينفع بأى شكل م الاشكال يابشمهندس البوست الى حضرت عامله حتى لو رأيك الشخصى مش ينفع ابدأ تعمل مينشن للناس عليه ده المفروض مش يطلع حتى بره نفسك لحد ما تلاقى ليه تفسير إن شاء الله ,,, انا اسف جدا يابشمهندس لو الكومنت مش عجبك لكن كان لازم يتقال وانا فعلا اسف للمره التانيه

اقتباس ياريس انت بتقول رايك الشخصي دلوقتي فمش محتاج تتاسف وانا احترم رايك جدا ولكن انا لا اعترض علي الاخوان واثق في القرارات بشكل مطلق ولكن تخوفا من حدوث اي مشاكل لازم نبادر بمثل هذه الاراء . وارجوك تتقبله كراي شخصي ايضا

اقتباس اكيـــــــــــــد يابشمهندس . بس برده انا واثق جدا ان زى ماده اول حاجه تبادرت لذهنك ان ف معتصمين ف التحرير وده ظاهريا لينا كلنا هيبقى غلط اكيد برده الى اتخذوا القرار فكروا ف كده الف مره واكيد لقوا الف سبب لكده برده الاكيد ان مش جماعه الاخوان بتضحى بالناس بتوعها يعنى ف الميدان وبتسعى لأن المواجه والمشاكل تظهر وفى الاول والاخر ربنا يستر والله

اقتباس ياعم مهو عشان التفكير الي بييجي في ذهننا ده كان المفروض يكون في مكان تاني غير التحرير الاماكن مالية البلد ياعم . وربنا مايجيبش وحش ان شاء الله ومتاكد انهم مش هيعملوا حاجة تضر البلد وربنا يوفق الدكتور محمد مرسي ان شاء الله

اقتباس ههههههههههههههههههههههه تقريبا حضرتك اساسا مش هاترعف يعنى ايه قرار زى ده يتاخد يعنى ادرس قبله خمسين مره واتقال فيه الف اقتراح لما تنزل حضرتك التحرير وتشوف الاشكال الى فيه تبقى تقول معارضين ع العموم ده كان توضيح بس وخلاص بقى ,,, اخلوا الميدان فقد اشتاق للساجدين اخلوا الميدان فقد اشتاق لسماع الاذان اخلوا الميدان فقد اشتاق لقراءة القرأن اخلوا الميدان فقد اشتاق لله اكبر كالزلزال

يا نهار اسود ,,,, يعنى لا تفكير لا عقل لا ادراك ,,, تلات حاجات مطلوبه منك علشان تكون اخوانى

ولو عقلك وزك على انك تفكر فوقفه لحد ما تروح للعقل اللى بيفكر للشعبه بتاعتك يظبطلك تروس عقلك من جديد ويرجعك كائن اخوانى فعال وليك صوت (( سمعنا واطعنا - سمعنا واطعنا - سمعنا واطعنا ))

طبعا من الحوار واضح قوى انهم مهندسين ,, اللى ناشر صورته ده اعرفه معرفه شخصيه لكن الشخص التانى اللى واضح انه قائد شعبه الله اعلم والا ايه ده معرفوش

بس لو ناس متعلمه والمفروض مثقفه واتعمل ليهم غسيل مخ وصلهم للدرجه دى من التبعيه فى التفكير ,, يبقى ايه وضع من كان اقل علما وثقافة ,,,

احنا بنواجه تنظيم سرى بقواعد وقوانين مريبه وغامضه ,, نفس الحال مع كل الجماعات السريه حول العالم ,, زى فرسان الهيكل والماسونيه ,, ومحدش يقولى مينفعشى تشبه من يقول لا اله الا الله بناس زى دول

حقوله انا بقصد الغموض والسريه وغسيل المخ اللى بيتعمل تحت شعارات مزيفه ,, منطوقها خير لكن الفعل من وراها مفيهوش ريحة الخير خالص

و حقوله برده ان التانيين على فكره واخدين الدين ستاره لافعالهم فوارد جدا انك تلاقى جوا كل ديانه جماعه بتوظف الدين لحساب مصالحها الشخصيه ,, والدين بعيد كل البعد عنها وعن افكارها وعن تعاليمها الغامضه دى

سؤال لكل اخوانى ,,, انت فاهم يعنى ايه حريـــــــــــــــــــــــــــــــــــــــــــــــ ـــــــــــه ؟؟

يعنى انا العبد الفقير لله السيد غريب ,, اقدر أأيد مرسى فى وقت ما انا عايز واعارضه وقت ما انا عايز على حسب قناعتى انا الداخليه اللى حيحاسبنى عليها ربنا ,, امتى اقيمه صح وامتى اقيمه غلط

علشان كدا قلت فى عزله للمجلس العسكرى ضربة معلم ,,, وفى موقفه من سوريا ,, استاذ ,, وفى اعلانه الدستورى ,, ديكتاتور

بالله عليك مش دى المفروض الفطره التى فطر الله الناس عليها

ان اى بنى ادم بيصيب وبيخطئ ,, وانك لازم تأيده لما يكون صح وتعارضه لما يكون غلط

قمة متعة الحياه انك تحس بعقلك ,, حتى لما تعبد ربنا تعبده بعقلك وبذاتك انت ,, مش تطيع غير الله فى سبيل نيل رحمة الله


طاعتك للناس دى بالشكل اللى شوفناه فى الكومنتات مش حيدخلك الجنه لانه ضد الفطره اساسا

وافتكر ان كفار قريش كانوا بيقولوا على الاصنام (( ما نعبدهم الا ليقربونا الى الله زلفى ))

حتقولى بس انا مش بعبدهم ,, حقولك (( لا طاعة لمخلوق فى معصية الخالق )) وانت لما تنزل التحرير وتحدث فتنه ويقع فيها قتلى من الطرفين علشان مبدأ الطاعه فى الجماعه يبقى انت كدا شاركت فى فتنة قتال المسلمين ,, ولو حتحاول تثبت لنفسك ان اللى فى التحرير كفره ,, فحتبقى أثمت مرتين ,, قلت بما ليس لك به علم ,, والتانيه شاركت فى اطاعة مخلوق فى معصية الخالق

ياترى اى نوع من التربيه والاخلاق بيعلموه الاخوان لاولادنا واخواتنا واصحابنا

ياترى اى فكر مشوه بيحملوه بداخلهم علشان كدا اتخذوا من الاسلام ستاره واستغلوا مبدأ (( السمع والطاعه )) مع ان الخلفاء الراشدين نفسهم متعاملوش مع الامه بيه , سيدنا عمر ابن الخطاب قال (( ان أصبت فاعينونى وان اخطأت فقومونى )) مقالشى تسمعونى وتطيعونى بدون نقاش

حتقول زى الاخ اللى فى الكومنتات قال

اقتباس تقريبا حضرتك اساسا مش هاترعف يعنى ايه قرار زى ده يتاخد يعنى ادرس قبله خمسين مره واتقال فيه الف اقتراح

ولما هو مش عارف عايزين منه طاعه ليه ,, ليه متسمعوش منه ولو هو عارف ان ده ضد دينه ووطنه ليه تجبروه عليه بحجة السمع والطاعه ,, ,, ولو افترنا ان اغلبية الجماعه موافقه هل ده حيعصمه من حساب ربنا يوم القيامه

احب افكرك بقوله تعالى

(( إِذْ تَبَرَّأَ الَّذِينَ اتُّبِعُواْ مِنَ الَّذِينَ اتَّبَعُواْ وَرَأَوُاْ الْعَذَابَ وَتَقَطَّعَتْ بِهِمُ الأَسْبَابُ * وَقَالَ الَّذِينَ اتَّبَعُواْ لَوْ أَنَّ لَنَا كَرَّةً فَنَتَبَرَّأَ مِنْهُمْ كَمَا تَبَرَّؤُواْ مِنَّا كَذَلِكَ يُرِيهِمُ اللّهُ أَعْمَالَهُمْ حَسَرَاتٍ عَلَيْهِمْ وَمَا هُم بِخَارِجِينَ مِنَ النَّارِ ))


انا عارف ان كتير مننا سمع عن مبدأ السمع والطاعه ,, بس اول مره يشوفه عملى وحقيقى

طبعا لينك البوست والكومنتات موجود معايا ,,, لو عايزينه انا ممكن انزله

بس احتمال بصراحه يكون بينا كادر اخوانى كبير او قريب من كادر اخوانى كبير يأذى الراجل اللى اعرفه هههههههههههههههه ,,

دى جماعه يا عم عامله زى افلام الرعب


بس برده الحمد لله ,,, ان بعد العسر يسرا ,,, وفعلا البشمهندس دا اصر على موقفه وده اللى خلانى اكتب البوست دا وانا كلى قناعه ان ده اللى حيحصل فى المستقبل ان شاء الله

اقتباس خرج من بين القوى المدنيه ,, شباب طاهر نقى امن بالعدل والحريه والحق ,,, بعد ان اصبحت الدوله المدنيه وبالا على الشعب كله سيخرج ايضا من بين التيارات الاسلاميه المتعجرفه ,, شبابا يؤمنون بالعدل والحريه والحق بعد ان أصبحت الدعوات الجهاديه تحمل بين طياتها الوبال الاكبر على مصر ليؤسسوا لدوله خاليه من التعصب والتحيز والعنصريه ,,, وتحمل التقدير والاحترام لكل الفئات والطوائف علشان كدا الرسول صلى الله عليه وسلم قال (( وهم فى رباط الى يوم الدين ))

وبكره حفكركم ان كل التيارات الظلاميه دى حتختفى ومش حيفضل الا الانقياء اللى على فطرتهم مش بصنفهم ولا عمرى حصنفهم ,,

بس اللى اقصده انهم حيكونوا بيفكروا ,,, وعارفين ايه هى وظيفة العقل فى جسم الانسان

وده حصل فعلا ,, فى حزب التيار المصرى ودا مجموعه من شباب الاخوان انشقوا على الجماعه بعد ثورة 25 يناير

فى النهايه لو تسألونى عن اللى حيحصل يوم السبت اقولكم

انها مجرد فرقعه من جماعه تحترف النفاق ,,, للتغطيه على دستور تم سلقه

لكن مجرد التفكير فى حاجه زى كدا كشفت لنا الوجه القبيح للفكر دا

انا مكتبتش الموضوع نكاية فى اعضاء الاخوان اللى موجودين فى المنتدى وربنا يعلم باللى فى القلوب

انا عملت كدا وكلى امل من ربنا ان البشمهندس حسام كنموذج يتكرر هنا مع ناس انا بعتز بوجودى بينهم من زمان

شكرا ع المتابعه

بالتوفيق

[SiLver Spectra]

هههههههههه
فكرتني بايام التعديلات الدستورية
كان واحد سلفي مطلع عيني برضو عالفيس و يقولي انتوا بتمشوا ورا ناس فاسقة و تقولوا (لا)
اقوله انا مالي بالناس انا دا قرار اخذته بقناعة و تفكير
يقولي الشيخ فلان و الشيخ علان اجمعوا كلهم على (نعم)
اقوله يعني ايه ؟ انت رايك ايه في الموضوع
يقولي راي زيهم طبعا دول علماء و اكيد استشاروا ناس بتفهم في الدستور
و قلبها خناقة :d

و بعد التعديلات لقوا مواد تانيه خارج التعديلات استغربوا انها موجوده !
مافهموش ان الي حصل كان ترقيع للدستور و انك بتوافق على التعديلات فقط و القديم زي ماهو

مشكلة ان ناس ما تفكرش و تكون راي بقناعتها و يبقى مجرد تابع مش اكتر
و بدل ما يكون مؤثر بيبقى مؤثر عليه

حلو الموضوع يا سيد

[نجم الحبيب]

يا سيد هوه اللي عوز ينطم للاخوان بيعمل ايه ؟
امس كان فيه حوار لمرسي بيقول فيه الشعب كله راضي عن التعديل الدستوري
وكل واحد له حق التظاهر بس بدون خراب في الدوله والاماكن العامه
طيب عوز اعرف ليه مكنش في تصويت علي الاعلان الدستوري ده؟
شوف يا عمل سيد والله الاخوان همه اللي هيخربو البلد اي حاجه بيقولها مرسي هما معاه فيها
عوزين يعملو مظاهره هتكون فيها مشاكل كتير وهيكون فيها ناس بتموت معلش في اللفظ علشان الاخوان مش بيفهمو خالص
ربنا يستر عليكي يا مصر من يد الاخوان
الحبيب

[Mahmoud Mohie]

ليا واحد صاحبى اخوانجى ..
لما مرسي شال حكم العسكر قلتله فعلا حاجه كويسه
بعيدا عن المساوامات اللى كصلت بس انا مبسوط
قالى احنا جايلنا تعليمات نعتصم فى الميدان ونأيد القرار
قلتله يابنى عندنا امتحان بكرا قالى لازم انزل
قلتله ياعم سيبك يعنى حد هيحس بوجودك من عدمه
قالى مينفعش نرفض اى اوامر حتى لو مش عجبانا
وراح الواد الميدان ومحضرش الامتحان :-d
وده ككله ليه ؟ ؟ عشان مبدأ الطاعه العمياء


شكرا ع الموضوع الرائع يا حج سيد :-d
كيب أب ف الموضوع ده :-d

[جبل عالي]

على الرغم أن لي إخوة وأخوات إخوانجية بالفعل وممن ولدتهم أمي

إلا إن بالفعل عندما أتناقش معهم ...نصل إلى جملة واحدة بالنهاية

الله المستعاااااااان

أخي المحترم .. بتتبع أحداث التاريخ على مر العصور نجد أن الدين يعتبر

جهة مركزية عالية التأثير بل ربما المتحكمة أحيانا في مقدرات الشعوب

حتى وإن لم تظهر على السطح .....فقد كانت تدار إمبراطوريات ودول وممالك

بإسم الدين ............. ولا حاجة للسرد ..... ولكن بالنهاية

أعاننا الله على ما نحن مقدمين عليه بالفعل ..... فما يحدث بنظري

هو محاولة مستميتة للعودة إلى تلك العصور بشتى الطرق

فمن قديم الأزل دائماً ...كان المعتقد أن التقرب والخضوع والخنوع

لتلك الفئة المتحكمة والمتمرسة بأمور الدين ... هو عين الصواب وهو تصريح

للدخول فى رحمة الله .............. ولا حول ولا قوة الا بالله


لم يعد هناك ذلك الجهل الثقافي والديني ....لم يعد ذلك الخضوع والركوع

الا لرب العالمين ...... حربهم يا سيدي شعواء ... وللأسف الشديد

أصبحت أساليبهم عقيمة .... ولا أجد تفسيراً إلا ..... وكأنهم أصحاب سفينة نوح

فمن ركب فقد نجا .................... لا إله الا الله

اللهم أنر قلوبنا ولا تزغ أبصارنا و إرحمنا فوق الأرض وتحت الأرض

ويوم العرض عليك ............. أشكر موضوعك وتحليلك الذى كثيرا

ما أمر ولا أترك إلا مجرد إعجاب ......... الله المستعان

[قلم بلا حبر]

اقتباس المشاركة الأصلية كتبت بواسطة SiLver Spectra هههههههههه فكرتني بايام التعديلات الدستورية كان واحد سلفي مطلع عيني برضو عالفيس و يقولي انتوا بتمشوا ورا ناس فاسقة و تقولوا (لا) اقوله انا مالي بالناس انا دا قرار اخذته بقناعة و تفكير يقولي الشيخ فلان و الشيخ علان اجمعوا كلهم على (نعم) اقوله يعني ايه ؟ انت رايك ايه في الموضوع يقولي راي زيهم طبعا دول علماء و اكيد استشاروا ناس بتفهم في الدستور و قلبها خناقة :d و بعد التعديلات لقوا مواد تانيه خارج التعديلات استغربوا انها موجوده ! مافهموش ان الي حصل كان ترقيع للدستور و انك بتوافق على التعديلات فقط و القديم زي ماهو مشكلة ان ناس ما تفكرش و تكون راي بقناعتها و يبقى مجرد تابع مش اكتر و بدل ما يكون مؤثر بيبقى مؤثر عليه حلو الموضوع يا سيد

بس يبك انت ,, عليا النعمه نماذج زى دى فى 2012 قمة الفكاهه

انا كنت متخيل مثلا السمع والطاعه دا فى الامور العاديه اللى هو انك تقول رايك فى كذا ,, انك تساعد فى العمل الميدانى ومترفشى

اتح انه اساسا البعيد مالوش عقل ,,, وتعتبر جريمه وخروج عن السياق لو حس ان عقله بيهتز وبدا يفكر

وتقريبا بيبقوا متابعين بعض علشان اللى يحصله كدا وعقله يزن انه يبقى زى اصحابه بيفكر وبيقرر من نفسه تلاقى واحد من وراه جاى بيفكره السمع والطاعه يا اخونا


لا بجد دى مهزله ,, ويطالبونا اننا نتبع اليات الديمقراطيه فى الحوار

ومعظم اللى بيناقشوا هنا فى المنتدى انا بجد كنت مفكر ان دى وجهات نظرهم وبناءا عليه كنت بكمل نقاش عادى لحد ما زى ما انت عارف يروح يغيب شهرين ويرجع تانى ,, كانه بيمسح اثار المناقشه

انت عارف لما تفضل تشاور لواحده وتلاقيها بتبتسم ومعلقه عينيها عليم وانت بقى تزيد فيها وفجأه تروح علشان تكلمها تلاقيها للاسف مصابه بالعمى

اهو دا اللى حسيته ,,, انى بكلمك وانا مفكر انى بناقشك واتضح انى بناقش انسان الى ,, مرتبط بمناطق محظوره

قعدت مع حد عنده دلوقتى 45 سنه كان اخوانى فى شبابه وسابهم ومه عرفت الية اصدار الاعلان الدستورى

يا ابنى اتضح ان بخلاف السمع والطاعه انت ملكشى حق تعرف الا فى حدود مركزك ,, يعنى لو عضو جديد يبقى اخرك هنا ,, لو بقيت رئيس شعبه يبقى اخرك هنا ,,

ويقولك الماسونيه مش عارف ايه ,,, دول ربوا الماسونيه بالجزمه فى التنظيم والسريه يا عم

بجد الناس بتغسل عقول شبابنا ,, دى الخلاصه من غير تزويق

منور والله يا طارق انت والراجل السلفى بتاعك ,,,

[قلم بلا حبر]

اقتباس المشاركة الأصلية كتبت بواسطة واد حبيب يا سيد هوه اللي عوز ينطم للاخوان بيعمل ايه ؟ امس كان فيه حوار لمرسي بيقول فيه الشعب كله راضي عن التعديل الدستوري وكل واحد له حق التظاهر بس بدون خراب في الدوله والاماكن العامه طيب عوز اعرف ليه مكنش في تصويت علي الاعلان الدستوري ده؟ شوف يا عمل سيد والله الاخوان همه اللي هيخربو البلد اي حاجه بيقولها مرسي هما معاه فيها عوزين يعملو مظاهره هتكون فيها مشاكل كتير وهيكون فيها ناس بتموت معلش في اللفظ علشان الاخوان مش بيفهمو خالص ربنا يستر عليكي يا مصر من يد الاخوان الحبيب

اللى يخلى رئيس دوله بحجم مصر يقول لبلد انقسمت نصين ,,, حبوا بعض واحضنوا بعض

يبقى مستنى ايه

والله يا محمد اخر ذرة احترام للراجل طيرها امبارح ,, وربنا يعدى ال 4 سنين بتوعه على خير

[قلم بلا حبر]

اقتباس المشاركة الأصلية كتبت بواسطة mahmoud mohie ليا واحد صاحبى اخوانجى .. لما مرسي شال حكم العسكر قلتله فعلا حاجه كويسه بعيدا عن المساوامات اللى كصلت بس انا مبسوط قالى احنا جايلنا تعليمات نعتصم فى الميدان ونأيد القرار قلتله يابنى عندنا امتحان بكرا قالى لازم انزل قلتله ياعم سيبك يعنى حد هيحس بوجودك من عدمه قالى مينفعش نرفض اى اوامر حتى لو مش عجبانا وراح الواد الميدان ومحضرش الامتحان :-d وده ككله ليه ؟ ؟ عشان مبدأ الطاعه العمياء شكرا ع الموضوع الرائع يا حج سيد :-d كيب أب ف الموضوع ده :-d

هااااااااار اسود ,, طب متصلشى ليه بالظابط المسؤول عنه فى الجماعه يستأذن منه علشان الامتحان ههههههههههههه

تصدق بالله الجيش بتاعنا بالميرى اللى فيه ارحم واطهر وانضف من البلاوى اللى بيعملوها دى

بقى لو فى عسكرى عنده امتحان مش حينزل امتحانه , ده لو الوحده فيها تفتيش قائد الوحد برده بينزله عادى

يخربيت العقول

[حبرالقمر]

السلام عليكم
اخي الكريم مش كل الناس زي بعض مش كل السلفيين قالب واحد ولا كل الاخوان قالب واحد انا مش اخوان بس علاقتي قريبه بيهم اوي نظرا لان كليتنا فيها ناس كتير ممنهم حضرتك انا عمري مشفت منهم السمع والطاعه ده بالعكس شفت الشورى ده مبدا اساسي عندهم حضرتك انا كنت اعده معاهم يوم الخميس كانو بيتكلمو عن ان في قيادات كبيره في الحزب اقترحت تغيير المكان من ميدان التحرير وهما الشباب الصغيرين دول الي لسه متخرجوش من الجامعه القيادات بتعملهم اعتبار وكل شهرين تقريبا بيجتمع بيهم قيادي ويقولهم القرارات ويسمع اعتراضتهم ويااما ياقنعهم ياما هما يقنعو وخلوني مره احضر معاه عشان اشوف ده بعيني والقيادات بتععتبر الشباب دول اهم عنصر هما ايديهم الي في الجامعات والاماكن الي حبين يوصللوولها وكتير من صحابي الي اعرفهم رفضين فكرة التحرير ومش مسافرين التحرير المراضي حيكتفو بمسيرات هنا في اسكندريه بالرغم من المرات الي فاتت كانو بيسافرو لما يكون في مليونيه مفيش بني ادم يقدر يلغي تفكيره مجرد شهاده حبيت اقولها نظرا لوجودي قريبه من الناس ديه والي عمري محكون منهم مش لانهم وحشين بالعكس لاني بحب اكون مش ملتزمه بحد مثلا نزلو رئيس معجبنيش انا مش مضطره اختاره بس هما مضطرين يرضوبيه ويختاروه وحيحبو لانه منهم بس كده وبشكر حضرتك واكيد ديه حاله ولكل قاعده شواذ

تقبل م روري اختك حبـــر القــمـــر

[حبرالقمر]

ده ميمنعش ان في ناس تانيه مقتنعه انهم لازم يروحو التحرير عشان يبقو مع المليونيه ويظهروها بالشكل الي هما حبينه وشيفين ان المفروض المعارضين يخلو الميدان للمليونيه بما نهم سبولهم كل الايام ديه يعترضو فيها ومحدش دايقهم ولان عددهم اكبر