اشعار الخال ( الابنودي )

[max2010]

مجموعه رسايل الاسطى حراجى لزوجته
الجوهرة المصونه والدره المكنونه
زوجتنا فاطنه أحمد عبد الغفار
يوصل ويسلم ليها
في منزلنا الكاين في جبلايه الفار

أسوان ... الرسالة 1

أما بعد
لو كنت هاودت كسوفي ع التأخير
سامحيني يا فطنه في طول الغيبه عليكم
وأنا خجلان . خجلان .
وأقولك يا زوجتنا أنا خجلان منكم من هنا للصبح ..
شهرين دلوقت ..
من يوم ما عنيكي يا فاطنه .. بلت شباك القطر ..
لسوعتي بدمعك ضهر يديَ
لحضتها قلت لك :
قبل ما عوصل عتلاقي جوابي جي ... نهنهتي .. وقلتي لي بعتاب:
النبي عارفاك كداب .. نساي
وعتنسى أول ما عتنزل في أسوان حسيت واليد بتخطفها يد الجدعان
بالقلب ف جوفي ما عارف ان كان بردان .. دفيان
والبت عزيزه والواد عيد
قناديل في الجوف .. زي ما بتضوي .. بيقيد ..
والقطر إتحرك ..
وقليبي بينتقل من يد لإيد .
والقطر بيصرخ ويدَودِو
اتدلدلت بوسطي من الشباك ..
( خذي بالك م الولد .. راعي عزيزه وعيد )
والقطر صرخ ورمح لكإنه داس على بصة نار ..
ولقطت الحس قريب .. قد ما كنتي بعيد :
(قلبي معاك يا حراجي هناك في أسوان ..)
...........................
ورميت نفسي وسط الجدعان .. وبكيت ..
وبلدنا اللي كنا بنمشيها ف نص نهار
كان القطر في لحضه .. فاتها بمشوار .
سامحيني يا فطنه على التأخير ..
ولو الورقه يا بت الخال تكفي
لأعبي لك بحر النيل والله بكفيِ
وختاماً ليس ختام ..
بابعت لك ِ
ليكي ولناس الجبلايه ولبتي عزيزه والواد عيد
ألف سلام
زوجك ... لوسطى حراجي

***

أسوان
زوجي الغالي
لاوسطى حراجي القط
العامل في السد العالي

جبلاية الفار


اراكم في الرسائل القادمه

[رايقه وأكشر ليه]

هههههه بجد ناس زى العسل انا بجد بعشقهم وبعشق الابنودى

وعلى فكره زوجته اسمها فاطمه
هو اللى كان بيصعب عليه النطق ويقول فطنه
والملاحظه دى قالها الجميل عبدالرحمن فى برنامج ليه

[الجوهري]

أب نوديا وام لم تنادي ( وتبقين حتي القيامة بالابتسامه)
ونكشر ليه ............................. الحياه حلوه ...