سؤال لولبي

[Mo chahin]

فكرتيني بالعصر الحجرى .. الجاهليه ..

معتقدش ان التفكير دا لسه مسيطر على العائلات دلوقتى ..

لان كل ام بتهمها مصلحه بنتها من حيث العيشه الهنيه والآمنه ..

مانا ممكن اجوز بنتى دكتور ومعاه فلوس ومستواه زى الفل .. بس يطلع عين ابوها ..

يبقى خدنا ايه من الجوازه دى غير قله القيمه ؟

دلوقتى كل التفكير مُصب عن ان البنت تعيش عيشه مرتاحه وبس ..

لكن برده مفيش ما يمنع ان الوالده تجوز بنتها لواحد مستواه العلمى عالى ..

موفقه يا سهر ..

[big bốss]

ههههههههههههه

اجى اتقدم يا سهر يعنى

وانا مطمأن ^^

بصى يا ستى هو الموضوع دا بطل من زمان لان الظروف بقيت زفت

اما الى بيتمسك بيه هيندم بعد فوات الاون ( زى ما قلتى هتخلل بنتها زيها )

و بعدين الناس دلوقتى مش بتبص الا الى معاه فلوس و بس

مش التعليم

شكرا يا قمرعلى طرحك

[سيدة القصر]

شوفى غاليتى
الزواج فيه اساسيات زى ما كل الدراسات العلمية بتقول كده
التكافؤ دا شئ مهم
سواء تكافؤ علمى أو إجتماعى أو مادى أو دينى طبعاً
الحكم بقى بعد موضوع التكافؤ ده بيكون للنصيب
يعنى خلاصة كل الحكايات دى اعقلها وتوكل
تاخدى بالأسباب يعنى تفكرى فى الموضوع من جميع الجوانب
ممكن واحد أقل منك تعليم لكن يسعدك وممكن طبعاً يخيب أملك
وتبقى خسرتى كل شئ
يعنى على رأى المثل " رضينا بالهم والهم مش راضى بينا"
وممكن تتجوزى شخصية لها مكانة علمية مرموقة أو حتى مادية وتكونى سعيدة جداً معاه أو العكس
الموضوع كله صدقينى يرجع للنصيب
وللأمانة يعنى من خلال اللى شفته " التعليم بيفرق كتير فى التفكير ^^
يعنى كلما كان الإنسان أكثر ثقافة كلما كان من السهل التفاهم معاه
وبالنهاية
كل الدعوات الخالصة لكل بنات المسلمين بالزيجات الصالحة
أرق التحايا لكِ غاليتى
وباقة بنفسج

[Sєяєєη●•ʚɞ]

بما انى نفسى اعرف مين كتموتوا دى او اسمك الاول كان ايه يابنتى
لما بتغيروا الاسماء بنحتاس
مش هقولك غير نصيحة واحدة بس
اوعى تتجوزى غير الانسان اللى هتكونى مقتنعة بيه
مش علشان ماما عاوزاكى تتجوزى شهادة كذا يبقى اتجوزة عشان الشهادة
وانتى اللى هتعانى ف الاخر خصوصا لو حد مش مقتنعه بيه
وهتلاقى الشهادة وقتها اسم للناس وبس
دة برضوا مايمنعش ان لازم يكون فيه توافق فكرى وثقافى واجتماعى وتعليمى
ومع ان الشهادات تكون متوافقة ومايكونش فرق كبير يعنى مش دبلوم وبكالوريوس
التعليم بيفرق فى التفكير واهم حاجة الفكر يكون متقارب
اما بالنسبة لكلام الناس
فالناس كدة كدة بيتكلموا
وكلامهم لابيقدم ولا بيأخر
وهما اللى بيكونوا حاطين قواعد وعادات وتقاليد غريبة فى المجتمع المصرى
كل واحد هو اللى بيختار حياتة اللى ناوى يعيشها مع الانسان اللى بيكون من اختيارك انتى
لانك طالما اختارتى واقتنعتى هتتحملى الحياة دى بحلوها ومرها لانها اختيارك مش اختيار غيرك

[سهـــر]

اقتباس المشاركة الأصلية كتبت بواسطة زهره الشتاء ، هو بيختلف من تفكير لـ آخر ف ناس بتتقبل عادى الوضع وناس تقول لا بنتى مش اقل من فلانه عشان تاخد اقل منها وهيا تستاهل وهكذا لكن الاهم والاساس ف كل ده الرآحة والقبول مش المؤهل يعنى ايه مهندس او دكتور وانا مش طايقاه ولا بتقدري تفهميه ولا قادره تعيشي معاه الانسسان بعقله مش بمؤهله هو لى ركن بس مش اساسى وانا اعرف ناس بردو بنتها دكتورة واتجوزت لـ واحد معاه دبلوم وعايشين احلى عيشة والله والناس طلما بتفكر بالتفكير ده وحطت الناس قصادها فـ مش هتعرف تعيش كويس ولا ف راحة .. تسسلمى ع الموضوع وان شاء الله مع الوقت التفكير هيتغير مش هتخليكى تخللى جنبها يعنى لو هتلاقى حد مناسب هترتاح منك متخفيش <<بهزر تسسلمى ي قمرى دمتى بخير

ايوة بالظبط بنتي مش اقل من فلانه دي بسمعها كتير أوي
وبجد والله كلمه ازاي هي مهندسه وتتجوز مدرس بسمعها كتير لدرجه ان بنت عمي رفضت العريس بسبب كدا
مع انه كان محترم جدا وابن ناس وغلبان كدا وبيصلي

...

بالنسبه للتخليل هههه
بطريقه ماما دي احب اقلك اني هخلل وربنا
ههههههههه

[Words Whisper]

هو التوافق الفكري والاجتماعي مهم جداااا
ودا مش معناه الكلية وإنما الوضع الفكري و الاجتماعي
عندنا مشكلة في المجتمع اسمها عقدة الدال و الميم ( دكتور - مهندس )
مع ان ممكن يكون دكتور وثقافته الفكرية = صفر
وممكن يكون مهندس وأخلاقه = صفر
وممكن يكون خريج تجارة وفكريا واجتماعيا مناسب ليها
يعني ممكن هي تكون دكتور و هو مثلا في مركز مرموق
هنا تحقق التكافؤ الاجتماعي
بس العقدة اللي عندنا بئا وحاجة كمان
للأسف العقدة دي متضخمة
وكواقع لما بنت بيكون مستواها التعليمي والاجتماعي أعلى من الولد
غالبا بتحصل مشاكل كتييير جدا بسبب انه ع طول حاسس بالـ نقص
مع ان ممكن لانقص ولا حاجة وتلاقي لما ييجي يتناقشوا ف حاجة عادي جدا
دماغه تروح ( اه هي دكتورة بئا وعايزة تعمل نفسها عليَّ )
يعني موضوع مركب مابين فكر مجتمعي انتقل للأفراد
بس لما بيتحقق التوافق الاجتماعي المشكلة بتتحل
وبعدين واقعيا يعني بكالريوس تجارة اللي شغال في مركز مرموق
ماديا هو أفضل من الدكتور اللي بيتخرج وتتطلع عينه عشان لسه يبدأ يجيب دخل ..


تسلمي ياجميلة
دوام التوفيق ..

[زهرة الياسمين]

فعلا والله عندك حق
حاجة غريبة جدا
انا ماما جات تقولي اتقدملك مدرس ايه رايك نجوزهولك ونخلص؟هههههه
المهم قولتلها مالك بتقوليها كدة من غير نفس
قالتلي ده مدرس هتعملي بيه ايه
طب ياستي انتي شوفتيه عرفتي عنو حاجة لسة
هههههههه بجد حاجة تخنق جدااااا

تقبلي مروري ومشاركتي
زهرة الياسمين