حلقة جديدة من ( اجمد عضو ) معانا ( حنــــون )

[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

( أجمد عضو )



طبعا كلنا عارفين مين ضيفه حلقه النهاردة

بس قبل ما نشوف الحلقه افكركم ان الحوار

الى هنشوفه دا كان جزء منه قبل انسحاب

ضيفتى من الادارة وجزء اخر بعد انسحبها من الادارة

ضيفتى النهاردة /

حنــــــــون

ودلوقتى تعالو نشوف الحوار

س / اهلا بيكى فى اجمد عضو ؟

اهلا بيك ياصديقى
احمد الحلقه دى لو جرلها حاجه انا مش هاجى هنا تانى ههههههههه
فاكر الحلقتين الى ضاعو ههههههه

س / اخبار المنتدى ومشكله ايه معاكى ^_^ ؟

حاجه زى الفل
كل ماكان طالما اتواجد فيه ناس بافكار واراء وشخصيات مختلفه
لازم يكون فيه مشاكل

س / طيب الفترة الاخيرة بعض الاعضاء شافت حنون ( متعصبه ) دائما فى ردودها او بيقال انك بقيتى بتتعصبى فى ردودك على الاعضاء ؟ ايه الحكايه ؟

انا متعصبه شمعقوله ابدا ابدا حتى اسال اى حد اولهم سورارا
هتقولك انها نايمه صاحيه متعصبه هههههههه
والله مش حكايه متعصبه
اوقات بيتفهم ردى على انو عصبيه مع انى بكون عادى او مثلا
بكون بكلم جد من غير اى هزار او كدا بيفكروا انو عصبيه
ولكن انا ما انكرش انى بتعصب بس علشان انا اصلا طبعى مش بحب المشاكل ولما بلاقى شد كتير بأثر عليا وببئه عاوزه انهيه باى شكل
فاد ممكن بيظهر فى شكل عصبيه

س / الخلافات الفترة الاخيرة فى الفترة كلنا تابعناها شايفا ان الادارة اتصرفت صح مع المشكلات ؟

والله الاداره بتحاول تعمل اقصى مافى وسعها عشان الكل
يكون راضى ومبسوط وحاسس انو واخد حقه بس
مافيش حد بيرضى عن كل شئ
ولازم عشان تحكم فى شئ حد هيطلع مش راضى
لان فى اغلب الاوقات ماحدش بيشوف نفسه غلط
فا حقا بنحاول نرضى الجميع على اد مانقدر كل واحد
بيحكم ضميره لان مافيش وصى غير كدا

س / الفترة الاخيرة شوفنا تدخلات من بعض مراقبين المنتدى مع مشرفين الاقسام ؟ انتو كا أدارة كان ايه دوركم فى حل الخلافات دى ؟

بص يااحمد احنا كلنا لازم نفهم انها منظومه واحده مشرف
مراقب ادارى كل واحد بيكمل التانى وبيحاول يسد اى خطأ
مقصود او غير مقصود كون ان المراقب يعدل ع المشرف
ولا يظبط حاجه فى القسم دى مافهاش مشكله ولكن
لاننا تيم واحد المفروض بيكون فى كلام بينهم وانو
يشوف الغلط دا وينبه المشرف وعليه بيتم التصرف بعد كدا
دورنا كأداره بنحاول نسد اى خلاف من النوع دا وبنفهم
الطرفين انهم بيكملوا بعض وماحدش يزعل لو حد صحح
لتانى خطأ طالما النيه مش ترصد اخطأ وانما هى خوف
ع المصلحه العامه ودا الى انا قولتله فى اخر موضوع
من النوع دا

س / فى حلقه الاميرة رودي فى اجمد عضو دخلتى حزفتى 3 ردود مع انك وافقتى بعديها ان ماتركس يكون ليه حق الرد فى التوبيك ؟ اية الى اتغير وخلاكى توافقى ؟

اه فعلا حصل
حذفتهم لان شوفتهم مستفزين ولان الردود كانت هتكتر
وهتتقلب خناقه فاحذفتهم عشان لما يهدوا يتناقشوا
بطريقه ماتكونش مستفزه لا ليهم ولا للى بيقرا ودا مش
معناه انى قولت ان ماتركس مالوش الحق انو يرد انا
تحفظى على اسلوب الرد والى عليه كان ردود اعضاء تانين
لكن من حق ماتركس يرد عادى طالما متوجهله نقد
بس بطريقه ماتكونش تزعل اى حد

س / ايمن ( الرحال المتمرد ) ليه دائما الاعضاء شايفينه العضو المدلل للادارة ؟

هههههههههه مش عارفه والله لو انت عارف قولى
الرحال عضوه زيه زى باقى الاعضاء زى ماليه زى ماعليه
مش عارفه ايه الفكره العجيبه دى ؟؟

س / كمان قسم الابداعات بعض الاعضاء شايفن انكم مميزينه عن الخوأطر دا عشان برضو ( الرحال ) مشرف عليه ؟

ماطبيعى لازم يكون قسم مختلف ومميز لانو قسم بيضم
كل جديد وحصرى للمنتدى
قسم الخواطر طول عمره قسم كبير وليه رواده
بس كمان طول عمره
بيجمع ما بين المنقول وبين الى بقلم العضو او مثلا
بيكون بقلم العضو بس مش حصرى بيكون نزل فى
منتديات تانيه
عشان كدا جت فكره اننا نعمل قسم يضم بس الى بيكتبه
العضو للمنتدى وانو يكون حصرى ودا عشان نشجع الاقلام
انها تكتب باقلامها
ومش تتعود ع النقل
ايه دخل رحال بئه فى الموضوع الحكايه كلها لرقى المنتدى واعضائه مش اكتر



س / انتو بتقبلو النقد والا لا كا أدارة ؟

انت شايف ايه اعتقد ان مافيش حد بيتم نقده اد الاداره
وبنرد وبنوضح وبنسيب كل واحد يعرض وجه نظره
ودا لاننا مش فى موقع منصب واعلى واقل دا لاننا
كلنا منظومه واحده والى شايف غلط بيقوله عشان
المنتدى دايما يكون احسن
انما بئه المشكله بتكون فى النقد الى لمجرد النقد
يعنى مثلا تلاقى الى يقولك مواضيع الادارين حتى لو
مش بتناسب القسم بتتساب
والنبى فى حاجه اسمها كدا وقتها بئه بقول ان دا نقد
لمجرد انك تنقد وخلاص وتكون متمرد وبس مش بتستند
على دليل يعنى
انما غير كدا كل واحد يقول مايشاء بدون تجريح
او تشكيك فى الاخرين

س / الفترة الاخيرة شوفنا مشرفين كتير جدا بيطلبو التخلى عن اشرافهم ؟ شايفا ان الجو العام للمنتدى يشجع ان المشرفين يشتغلو ؟

والله دى ظاهره غريبه جدا
بس معظمهم بيكون ملل مش اكتر وعاوز يجدد مثلا
وبتلاقيه رجع تانى او ممكن ظروف دراسه
كل واحد ادرى بئه بظروفه دا شئ مالناش ذنب فيه

س / هنشوف ترقيات جديدة الفترة الجايه والا مفيش اى اخبار عن الترقيات ؟

اه هنشوف طبعا فى ترقيات قريبه جدا واسماء كتير
فى تميز ومراقبه وكل اشراف وكل تحبوا ^^

س / شايفا ان فى تعاون بين الادارة وبين حوراء بما انها من ضمن الطاقم الادارى ؟

اعتقد فيه حوراء لما بتشوف حاجه بتقولها لو حبت
تسالنى عن حاجه بتسال وانا لما بحب استفسر منها
بقولها ولما بتاخد قرار بتستشير فيه
واهى ماشيه يعنى ^^

س / فترة حوراء افضل والا فترة محمد مرسى ^_^ ؟ جوبى عليه بجد هههه

ايه ياعم المقارنه العجيبه دى
احب اقولك انها طبعا افضل ع الاقل حوراء عملت انشطه
عملت ترقيات بتسمع الاعضاء مابتحبش تزعل حد
انما مورسى بيدينا على دمغنا ويطلع يقولك اهلى وعشيرتى
ويهدد ويقولك انا لما النور بيتقطع بحس انى فى الضلمه
ماشاء الله نبيه جدا ههههههههههههه

س / ايه سبب تخليكى عن ادارة المنتدى ؟


اهو كيفى كدا هههههههههه
والله انا كنت بفكر كتير اوى فى الموضوع بس بصراحه
ماكنش هاين عليا
وبعدين كنا بنتكلم انا وطارق عن المنتدى والتطورير وكدا
وقولتله انى هنسحب من الاداره وكفايه وكدا
وهو بينقاشنى انا دخلت اللوحه وشيلتنى
بس كنت تقيله اوى الحقيفه هههههههههه
السبب بئه ان اانا فعلا تعبت اوى من المشاكل وتعبت
اكتر من محاولات الارضاء لانى اكتشفت انك مستحيل تكون
فى منصب او مسؤل عن شئ وتعرف تكسب كل الى حواليك
لازم يكون ليك معارضين وناس بتكرهك وناس بتحبك
وانا بطبعى مابحبش اكون موجوده فى مكان واحسن
ان حد زعلان من احكامى ولا تصرفاتى
كمان ما احبش التشكيك لانى فى كل الاحول بحكم بالى
بشوفه من وجه نظرى فقظ لاغير
ومن هنا جاء قرار الانسحاب


س / فى اعضاء ممكن تربط التوبيك الى طارق نزله عشان يعرف مين هيرشحه للادارة عشان يكون بديل ليكى ؟ الكلام دا صحيح ؟

والله انا ماتقليش حاجه زى كدا ممكن تساله
بس عمتا لما اكلمنا هو ماقليش كدا
وبعدين ياكبير انا مافيش ليا بديل هى حنون واحده ههههههههه
شويه غرور ع الماشى

س / اعتقد انتى كدا فاضيه يعنى لازم تنتشرى فى المنتدى ^_^ ؟

انا نشاطى على حسب ما احس انى عاوزه اشارك
طول عمرى فى المنتدى كدا ما بشاركش غير فى المواضيع
الى تشدنى او احس انها متعوب فيها ومابكتبش واضيع
غير لما يكون فى شئ عاوزه اكلم عنه وسيطر عليا ساعتها بحس انى عندى رغبه للكتابه

س / تفتكرى فى حد من الاعضاء هيتغير معاكى فى المعامله يعنى بما انك خلاص مبقتيش اداريه وبقيتى عضو عادى ؟

تفتكر انت حاجه زى كدا
انا حاسه ان فى كام عضو اتغير وناويه اموتهم هههههههه
والله ماعتقدتش وبعدين الى كان يعرفنى لمصلحه ما
فا تاكدا انى عمرى ماعرفت حد لاى مصلحه فا انا
بالنسبالى الكل
كنت بعرفهم من طريق الصداقه ولما كان حد بيكلمى
ولا بيطلب حاجه كنت بنفذها على حسب الحاجه غير كدا
انا اصلا كل علاقتى فى المنتدى
محدوده والى اعرفهم مقربين جدا وماعتقدتش انه كدا



س / انتى ازاى عضوة بس بتدخلى قسم المشرفين ؟ دا تكريم ليكى من الادارة ههههه ؟

اه قدر ربنا بئه هههههههههه
يعنى هو بعد العشره دى وكمان مش عاوزين اى
امتيازاتدا انتو جبارين
ع العموم عشان الكل يطمن دا مجرد رؤيه فقط
بس انا مسلمه كل صلاحياتى قبل ما اخلع الاحمر عشان لو حد
كدا ولا كدا سال واخد بالك ياموحا ههههههههههه

س / مش ناويه تعملى توبيك والا حاجا فى اليوميات ؟

ان شاء الله ناويه اعمل توبيك وما استضفش حد غيرك
عشان اطلع عليك القديم والجديد ههههههههههه

س / تحبى تقولى ايه لاعضاء منتدى بنات مصر ؟

انا بقالى سنتين فى الادارة
وانا بجد قضيت هنا فى المنتدى اجمل ايام
ولحظات كتير اوى كنت مبسوطه واكيد كان فى العكس
ماعرفتش حد عشان مصلحه طول عمرى بتعامل بمنتهى
الحب للجميع وربنا يشهد
اتمنى ماحدش يكون زعلان منى ولا اكون جيت على حد
لانى عمرى ما قصدت اظلم حد ولا اجى على حد
حقا اتعاملت باخلاص مع الجميع
واتمنى الكل يكون دايما سعيد ومبسوط وان قرارى دا يكون
فرح ناس لو كانو مديقين من وجودى
ولو حد زعل فا نا حقا ما يهونش عليا زعل حد ^*



وفى الختام حابب اهدى اغنيه لضيفتى النهاردة

يمكن تتأثر بيها وتعود للادارة ^_^

وهى اغنيه ( عودى يا ( حينان ) قصدى بليه ) ^_^





وبكدا بتخلص حلقه النهاردة

انتظرونى وحلقه جديديدة من

اجمد عضو

[big bốss]

هههههههههههههههههههههه

بجد حلقه جميله جدآ

وحنون انسانه محترمه انا اعرفها من زمان بس بصراحه ليها هيبه فى الاحترام

و بجد انا زعلت انها سابت الاداره و هى عندها حق مفيش الا حنون و احده لا بديل لها

و ربنا يوفقها ان شاء الله

و انت يا مورشو مصيبه بجد ما شاء الله عليكى برنس

بتعرفنا الى بيحصل وراء الكواليس ههههههههههههههه

[دمعه حائره]

حنون انسانه طيبه وهاديه مسالمه جدا ومابتحبش المشاكل
الفتره الاخيرة كانت مدايقه فعلا
من المشاكل اللى بتحصل بين الاعضاء
وبقالها فتره بتفكر تسيب الاداره
وانا لحد دلوقتى رافضه قرارك ده واتمنى ترجعى تانى
لان محدش هايقدر يملى مكانك
فأرجعى بالزوق احسن مانعمل اعتصام
حلقه جميله حنونتى وربنا يوفقك
شكرا موروشو على الاستضافه

[DESERT]

جميل الحوار وحنون انسانة جميلة وطيبة وانا على المستوى الشخصى
بحترمها جدا وفعلا عملت اللى عليها جدا نسلم يا مورشو حلقة موز

[حَرفُُ هجآءّ]

حلقة جميله اووووى
وخصوصا ان حنون فيها
منوره الحلقة
حنون من زمان بحس بهدوئها فى المنتدى
وعقليتها جميله اوووى
واكيد الادارة هتخسرك
ربنا يوفقك

تسلم ياحمد على الحلقه الجامده

[الرحــاال المٌتَمرد]

في البدايه حلقه كما المتوقع ,, أكتر من رائعه ,,
وبنشكر الضيفه وكٌنتِ منوره يا حنوون .

لكن عاوز أسئل , هو أنا ليه بكون ضيف شرف فـ كٌل حلقات كدا في الفتره الأخيره :d:d .
بالنسبه لــ إني عضو مٌدلل كٌنت بتمني تٌذكر موقف كان في مٌجامله ليا وواضحه مِن الإداره ..
وتوضيح بسيط بخصوص قسم العاميه ,,
الإداره فـ الفَتره الأخيره أضافت بعض الأقسام وكان مِنها العاميه
إللى كان إقتراحي وطالبت بيه مِن فتره طويله .
أظٌن إن أفضل قسم كـ نَشاط مِن بين الأقسام إللى تم إضافتها فى الفتره الأخيره هو قسم العاميه ,, "يعني كان إضافه مِش مٌجامله"
أما بــ النِسبه لــ إنطباع البَعض إني مٌدلل أو في تَمييز ليا عَن باقي الأعضاء
فـ هِنا نقول سؤال ,, طالما مَبدء المٌجامله موجود ليه الإداره مكنتش نَجحتني بالمَره في الإنتخابات الإداريه .
كٌل عضو بيحكم عَقلٌه وبيفكر شويه هيشوف إن دي فكره غلط .
مَفيش مسئول هيجامل شخص على حساب الصالح العام ,,
ودا بشكل عام ,, سواً في العَمل أو في أى مجال .
وقِسم العاميه لو كانت فِكره فاشله مكنتش إتنفذت .. لكن الفِكره نجحت الحمد لله .
أما عَن مٌجامله العاميه على حساب الخواطر فــ في مٌناقشات كتير تمت بيني وبين طارق ومِش كٌل إللى إقتراحتٌه تَم ,, طارق نَفذ إللى هو شايفٌه أصلح .
وكفايه تداول القِصه دي فى كٌل حلقه مَع أى طرف مٌمكن يكون لٌه علاقه بالموضوع حَتي لو مِن بعيد .


شٌكراً مٌرشد ,, وبالتوفيق دايماً
وفي إنتظار حلقات أٌخري قادمه

[morshooo]

اقتباس وكفايه تداول القِصه دي فى كٌل حلقه مَع أى طرف مٌمكن يكون لٌه علاقه بالموضوع حَتي لو مِن بعيد .

عند فيك بقى يا ..... مش هقول اسمك دلوقتى وانتا عارف ليه ^_^

هعمل حلقه كل شهر عنك لوحدك ^_^

لو فى اعتراض والا حاجا فى توبيك اسمه

اعضاء فى الصورة هتشرفنا يا .......

اظن الرساله وصلت .

[haytham ali]

حوار فل يا معلمة بلية

[۩۩ elMagic ۩۩]

ياختى ايه الاجابات العسل دي
لو نعرف كده كنا طلبنا من زماان انك تسيبي المنصب
اه انا من الناس اللى إنبسطت جداااااا لما سيبتي الاداره
طوبعا بهزر مع نونا اوختشي الكبيره
اكييد الاداره خسرتكـ ي حنان < اه عاجبني الاسم دا فاااكره :d >
هو صحيح كنتى فى بعض الاوقات
جاامده شويه فى إسلوبكـ بس عاادي يعني كله بيعدي
واحنا هنا كلنا أخوات وأصحاااب بمجرد ما المشكله بتنتهي
خلاص النفوس بتتصافى ومبيبقاش فيه اى مشكله
فا لو فيه فرصه انك ترجعي مره تاااانيه وتلبسيلنا الفسان الاحمر مره تانييه
يبقى مش تترددي وتلبسه علطـــول بقآآ
اكييد هو حلو عليكــي ي نونااا
مجهود جميل ي مروشو
وحلوه أغنية عودي ي بليه دي

[براءة حلم]

جميييله الحلقه وصراحه انا معرفهاش كتيير غير من خلال الردود واقدر اقول من خلال ردودها انها طيوبه واللي بقلبها ع لسانها
يسسلمو يامورشو حلقه جامده كالعاده