حلقة جديدة من ( اجمد عضو ) معانا ( كوين ميرو )

[morshooo]

بسم الله الرحمن الرحيم

اهلا بيكم جميعا

وحلقه جديدة من برنامجكم

أجمد عضو

كلنا تابعنا خلال الايام الى فاتت احداث

( الخصوص ) والفتنه الطائفيه

كلنا كمصريين عمرنا ما وصل بينا الحال

للى بنشوفه حاليا وفتن طائفيه من لا شيىء

الى يقول طرف ثالث يقول الى يقول دا الاعلام الفاسد يقول

المهم اننا وصلنا لحاله اننا اصبحنا متقبلين فكرة الفتنه الطائفيه

النهاردة معايا العضوة المتميزة /

كوين ميرو

تعالو نشوف الضيفه قالت ايه فى الحوار

س / اهلا بيكى كوين ميرو فى اجمد عضو ؟

اهلا بيك يااحمد واتمنى متكونش شرير كعادتك

س / طبعا الاستضافه بخصوص الفتنه الى حصلت فى الخصوص ؟

للاسف احداث مؤسفه وحلقه من حلقات مسلسل الفتنه فى مصر

س / شايفا ان خلاص احنا كمصرين اخدنا على موضوع الفتنه دا ؟

للاسف زى ماقولت انه مسلسل وكل يوم ليه حلقه جديده باحداث

مختلفه بس اصلها واحد

وطالما مفيش قانون رادع او يمنع حدوث الفتنه هتفضل موجوده

س / مش ملاحظة ان اسباب الفتنه الى بيتم الاعلان عنها كل مرة بتكون مش مستهله ان يحصل الى بيحصل دا ؟ والا شايفا ان الاعلام بيخفى الحقائق ؟

لا مش كل مره بتبقى مش مستهله فى مرات كتير بتكون الاسباب كبيره
بس يمكن اللى بيحصل اننا غير الاول يعنى الاول مكنش بنحس
لان كل محافظه كانت مقفوله على نفسها لكن الاعلام حاليا خلانا
كلنا فى قريه واحده وخلانا نعيش الحدث نفسه مش نسمع عنا
بعد مايخلص زى الاول

س / شايفا ان الاقباط المصريين مش واخدين حقهم فى مصر ؟

بص يااحمد المصرين كلهم مش واخدين حقهم لا فى معيشه ولا تعليم ولا صحه
ولا كرامه لاخره ده مش هنختلف عليه بس زيد على كل ذكرته الاقباط
مظلومين فى دينهم بمعنى انهم مش بس الفصيل المظلوم بس هما عندهم
قضيه زياده مظلومين فيها وده طبعا بسبب اهمال متوارث او مقصود
من الحكومات لان مفيش لحد انهارده قانون يقدر يحافظلهم على حقهم
فى حريه ممارسه عقيدتهم او قانون يدين اى معتدى على دور العباده الميسحيه

س / ( مصر ليست وطن نعيش فيه بل وطن يعيش فينا ) دا فى توقيعك الكلام دا قاله البابا شنودة ؟

لا الكلام ده قاله وزير ماليه سابق فى الخمسينات اسمه مكر عبيد بس
اشتهر بالجمله دى البابا شنوده لانه كان دايما يكررها على مسمعينا
سوء فى وعظاته او حوارته التلفزيونيه

س / منين مؤمنين بالمقوله دى وعايزين تسيبو البلد وتخرجو منها ؟

بص لكل واحد قوه احتماله وصبره يعنى دلوقتى اللى عايزين يسيبو البلد
مسلمين وميسحين بس الفرق ان الميسحين بقيت اسهل ليهم لان فى دول
كتير فتحت الجوء الدينى للاقباط بسبب الاجداث المتكرره

س / ليه اسرائيل اعلنت فتح ابوابها قدام اقباط مصر ؟ وكان ايه رد فعلكم ؟

ليه دى اااااكيد حركه سياسيه قصدها بيها تفرق الشعب المصرى
ورد فعلنا مظنش فى حد اقدم على كده انا مسمعتش يعنى لحد دلوقتى
حد من الاقباط هاجر لاسرئيل لان الشعب المصرى كلها ليه نفس
الموقف من الكيان الصهيونى ولو حصل وحد قبطى سافر يبقى
تصرف فردى مش ظاهره يعنى

س / البابا تواضروس شايفا انه كان الانسب لخلافه البابا شنودة ؟

بص يااحمد الحقيقه انا كنت بتمنى حد تان من المرشحين بس اختيار
ربنا للانبا توضروس كلنا كاميسحين راضين عليه تماما لان زى ماشوفت
وكل المصرين شافو اخر خطوه فى اختيار البابا اختيار ربانى بحت
لان زى ماشوفت ده كان بناء عن قرعه هيكليه على مراء ومسمع العالم
كله وطالما ربنا اختاره يبقى اكيد بدون شك هو الانسب لخلافه
معلم الاجيال البابا شنوده

س / انا معتقدش ان هيجى حد فى حكمه وزكاء البابا شنودة وانتو تقريبا كنتو حبينه جدا ؟

طبعا كلنا كنا بنحب البابا شنوده مش بس الميسحين لا ومسلمين كمان
ومصر كلها حزنت على فراقه وخصوصا انه فى وقت صعب كنا محتاجين
فيه حكمته وقدره احتواءه بس طبعا ميغلاش على ربنا وزى ما
البابا شنوده كان خلف البابا كيرلس السادس وبردو كان البابا كيرلس
قامه كبيره للميسحين وقديس عظيم بس البابا شنوده قدر يحتوينا
وقدر ياخد مكانه كبيره فاكلنا ثقه فى اختيار ربنا للبابا توضروس

س / مش حابب اوديكى لحته رئيك فى الاخوان عشان محدش يقول حاجا بس عايز اعرف منك رئيك فى اداء الحكومه المصريه حتى الان ؟

وليه متاخدنيش فى الحته دى هو مش من حقى اقول راى كامصريه
وخصوصا ان الاخوان دلوقتى بقى ليها ذراع سياسى
وهو حزب الحريه والعداله يعنى من حقى اقيمها واقول راى ببساطه
وبمنتهى الصراحه الحزب اثبت فاشله سياسيا اما عن راى فى الحكومه
ده عايز موضوع لوحده واللى كلنا شايفينه ولمسينه على ارض الواقع
انها حكومه فاشله فشل ذريع وحال مصر من سئ لاسوء بمراحل
مش هنقول انها بس معندهاش انجازات لا دى كمان بتدهور احوال البلد

س / ليكى حق التعبير بس مفيش مسيحى هيقول ان الاخوان او السلفيين ناس كويسين لانهم كارهين الاقباط زى ما انتو كرهنهم ؟

بص يااحمد انت مش قادر متكونش شرير ^_^ طيب ياسيدى سيبك
من الاقباط ورأى الاقباط انت كامصرى مسلم شايف انهم مش فاشلين
شايف انهم بيلعبو سياسه صح طيب شاايف اى تقدم فى البلد على
ايديهم او اى انجاز انا دلوقتى بنتقدهم وبقول راى كامصريه سيبك
بقى انى مصريه قبطيه
وبعدين لو هما بيكرهو الميسحين يبقى هما نفسهم بينقضو نفسهم علشان
دى مش تعاليم دينيهم وساعتها لازم انت قبلى كامسلم تمنعهم يتكلمو
باسم الدين اللى هما ماشين عكس تعاليمه !!!!
اما بقى كرهنا ليهم زيه زى كرهنا للنظام السابق علشان شايفين الاقباط
الحلقه الضعيه واى فرقعه او شوشره بتحصل الميسيحن بيكونو
هما كبش الفدا فيها وحقنا ضايع علشان هما حابين يفضل تحت ايديهم
كارت رابح عايز تلهى الناس وتنسيهم اى حاجه اعمل فتنه طائفيه
والناس هتنسى اى حاجه ومش هيركزو ويفكر غير اللى بيحصل ده

س / حاسه ان فى تفرقه بين المسلم والمسيحى فى البلد ؟

زى ماقولتلك فوق فى اجابتى ان الشعب كله مظلوم ومحطون بس الفرق
بينا اننا عندنا قضيه زياده مظلومين فيها

س / ايه اهم طلباتكم كـ اقباط فى مصر وعايزين يتم تحقيقها ؟

كاقباط بصفحه خاصه طلب اظن كلنا عارفينه من كتر ما اتكلمنا عنه
وهو قانون يحمى ويعاقب المعتدين على دور العباده وقانون يوحد بناء
دور العباده لان ده اصل الخلاف كل مره يطلع واحد شبيح الحق دول
بيبنو كنيسه الحق دول بيصلو فى البيت وعملوه كنيسه الحق دول هيبنو
سور بدل اللى اتكسر ببساطه لو فى قانون بدور العباده 50%
من المشاكل اللى بتحصل هتختفى وال 50% الباقى عايز مجهود اجتماعى
بقى لترسيخ مبادئ الوحده الوطنيه

س / انتو عايزين قانون يحميكم او يحمى الكنيسه لو فى اعتداء يعنى انتو شايفين ان الحكومات الحاليه او السابقه مش قادرين يحميكم ؟

ياراجل قول كلام غير ده انت شايف عكس كده يااحمد شايف ان الاقباط
محمين طيب امال فى النظام السابق من اول الكشح لحد كنيسه القديسين
وبينهم طبعا فى احداث كتيره كلنا شوفنها وكلها احداث بشعه لا تمس
الانسانيه باى صله والدم اللى سال وفى النظام الحالى من تهجير الاقباط
فى العمرانيه وفى سينا لحد احداث الخصوص والحدث اللى يعتبر
كارثه فى تاريخ مصر ضرب الكاتدرائيه عارف يعنى ايه الكاتدرائيه تضرب
لا والمحزن كمان تضرب من مين بلطجيه ومساعده الداخليه طيب
انا مش هحكم احكم انت ياسيدى !!!!!!!!

س / لو فرض ان مفيش فى الاسلام قانون يديكم الحق لتحقيق مطالبكم بما انكم عايشين فى دولة اسلاميه وقانون اسلامى برضو هتعترضو لتحقيق مطالبكم ؟

بص اسئلتك طيب اقول عليك ايه ليه هفرض حاجه مش موجوده جر
شكل يعنى وخلاص بنتعامل مع واقع وحقى كامصرى قبطى الدين الاسلامى
بيكفله ابسط حقوقى حريه العقيده ( لكم دينكم ولى دينى )

س / هنا فى المنتدى حاسه ان فى اعضاء بيعملوكى بطريقه مش كويسه بما انك مسيحيه ؟

لا خااااالص بالعكس تماما وخصوصا فى الاحداث الخيره شوفت تضامنى
وروح اخوه جميله يمكن من الاسباب اللى خففت عنى حزنى بسبب
الاحداث الروح اللى شوفتها هنا واللى حسستنى ان فى امل فى اشعب المصرى

س / صايمين انتو اليومين دول طبعا ؟ عايز اعرف منك ايه صيامكم وبيكون كام يوم وبتاكلو والا لا وصيامكم كام ساعه ؟

الصيام اللى احنا فيه حاليا اسمه صيام عيد القيامه وده 8 اسابيع وده مختلف
شويه عن بقيه اصومنا لانه روحانى اكتر بمعنى اول اسبوع ده اسمه اسبوع
هرقل وسبب التسميه محتاج شرح كبير وبعدين 40 يوم صامهم
السيد المسيح فى خلوته على الجبل والاسبوع الاخير اسمه اسبوع الالام
وده اهم اسبوع لان فيه اتعذب السيد المسيح والصيام ده زى ماقولتلك
مختلف فاصيامنا فيه بيكون انقطاعى من 12 بليل لحد 3 او 5 اخر النهار
تانى يوم ولما بنفطر بنفطر على اكل صيامى بيكون بزيت بس مش بناكل
لحوم بانواعها كلها ولا اللبن ومشتقاته ولا سمن ولا بيض

س / ناويه تسيبى مصر وتهاجرى او لو جاتلك الفرصه دى هتعمليها والا لا ؟

انا جاتلى الفرصه وجاتلى هجره لامريكا وسافرت من كام سنه بس
هما شهرين تلاته ورجعت ولحد دلوقتى ممكن اسافر انا وجوزى وولادى
بس احنا قاعدين ومش بنفكر فى السفر مش هنكر بعد كل مشكله
نقول يلا ناخد حالنا ومالنا ونسافر بس عند التنفيذ مش بنقدر

س / تحبى تقولى ايه لاقباط مصر ؟

هقولهم ايه من الكتاب المقدس معزيه جدا بتقول
( فى العالم سيكون لكم ضيق لكن ثقو انا قد غلبت العالم )
لازم نتمسك بوعد ربنا ودى بلدنا مينفعش نبدل وطن بوطن الاوطان
مبتتبدلش كلنا مصرين ولازم نحط ايدينا فى ايد بعض علشان منخسرش كلنا

س / تحبى تقولى ايه لمسلمين مصر ؟

احب اقولهم انى قريت فى الاسلام ايات واحاديث بتحس على الوحده
والالفه والمعامله الحسنه ياريت تتمسكو بدينكم اكتر وتطبقوه وبلاش نسمع
عن الدين وجهه نظر حد ونطبقه اقرا انت واعرف دينك متخليش حد يسقيه
لك ويحط وجهه نظره والمسلم من سلم الناس لسانه
كلنا مصرين ولازم نحط ايدينا فى ايد بعض علشان منخسرش كلنا

س / لو فى حاجا كتبتيها بما انك صاحبه قلم مميز عن الفتنه الطائفيه نزليها نشوفها ؟

كل اللى بكتبه بنزله هنا فى المنتدى مفيش جديد يعنى

س / اخيرا تحبى تقولى ايه لاعضاء منتدى بنات مصر ؟

اقولهم خلو بالكم الشاكل كترت فى الفتره الاخيره وده بيخلينا نعيد حسابتنا
ايه اللى حصل
وزى اى تجمع فيه مشاكل وخلافات بش شاطرتنا نحاول نحلها بمحبه واخويه
فى روح جميله هنا بينكم روح اخوه حاولو تكبروها وتبعدوها عن الخلافات



وبكدا بتخلص حلقه النهاردة

انتظرونى وحلقه جديديدة من

اجمد عضو

[۩۩ elMagic ۩۩]

انا اول مره اعرف ان كوين ميرو مسيحيه
كويس اهوو مش عم سامي بس
طبعا دينا الاسلام وصى بالاديان الاخرىَ وحرية العقيده
واللى بيحصل دا ملهوش اى علاقه بالدين
دا شغل همج ونااس لا عندها دين ولا فاهمه اى حاجه
ربنا يصلح حال البلد فعلا
لان حالها دلوقت مش عاجب اى حد مصـرى
سوا كان مسلم أو مسيحي
نورتى أختــى ميرو الحلقه
تسلم ي ابو حمييد للمجهود
مودتــــــى ,,

[აα∂ Ԑγεა]

في البداية يمكن سر اعجابي الاكبر بالحلقة دي هو
ان اجمد عضو مش هو العضو بتاع المشاكل كالمعتاد !
لان مفهوم اجمد عضو الحقيقي مكنش متطبق قبل كدة اجمل من اليوم

,,

مسلمين او مسيحين كلنا مصريين وكلنا شعب ووطن واحد
اسباب الفتنة كتير جدا ويمكن اهمها بعيدا عن مشاكل دور العبادة والكلام دا
هو الاعلام السيئ جدا , من الطرفين
اما تلاقي قناه متأسلمة يخرج فيها ناس تتدعي انها شيوخ
وبكلامهم يثيرو الفتنة اللي رسولنا الكريم قال عنها اشد من القتل
ويقولو علي اي حاجة تخرج ضد الحكم " دول مسييحيين ومش عاوزين حكم اسلامي "
بيقولوها فقط لمصلحتهم علشان يجمعو الشعب حوليهم باسم الدين !
ومش عارفين انهم من خلالها بيقتلو بلد وشعب عاش طول عمره واحد وهيبقي اتنين !
اما تلاقي كلام بيثير فتنه ومشاكل وخلافات والدولة بتتفرج وبتسكت !

اما تلاقي قناة مسيحية زي قناه " الحياة "
واحد برامجها المسيئة جدا " سؤال جرئ "
ومزيع " مستفز " وقس اسمه زكريا بطرس "
شغالين دايما وابدا هجوم هجوم بكدب و كلام فارغ غير حقيقي علي الاسلام
محاولة كذابه لايجاد اخطاء و متضادات ف القرآن !
غير موجودة بالمرة وبيخرجوها فقط من خلال قراءه خاطئة جدا للقرآن
وتلاقي القناه دي موجودة وبتتذاع علي القمر " نايل سات " !

تعرف ان الاعلام والدولة هما السبب !!
يمكن عايزين المشاكل والفتنيه تستمر ؟ لمصالح سياسيه !

بس قبل وبعد كل دا مصر لكل المصريين
الرسول عليه افضل الصلاه والسلام قال عن اقباط مصر
إذا مَلَكتم القِبط فأحسنوا إليهم ، فإن لهم ذمة ورحما .
وعن اهل مصر عموما
(إنهم في رباط إلى يوم القيامة).

فكلام ووصية الرسول واضح جدا جدا ومش محتاج شرح
والحديث الثاني بيوضح ان مفيش خوف
ان بإذن الله مفيش تفرقه وهيفضل مسيحي ومسلم شعب واحد ووطن واحد ليوم الدين

للاسف في اوقات بتم فتنه وبتحصل مشاكل لكننا في الاول والاخير شعب واحد
مسيحين ومسلمين مفيش فرق والدليل التعامل في قري و صعيد مصر
حيث الجيران والاصدقاء اصبحو اقرب لاسرة وعزوه واهل
بيتهنو في اعيادهم وبيهنوا في اعياد المسلمين بيزورا وبيتزاروا
وبيتعاملو من غير تفرقه دين ابدا !

فالاخير الدين اكيد لله والوطن اكيد للجميع وان شاء الله مصر قادرة
انها تتخطي المرحلة دي علي خير
ويرجع يتلم شمل الشعب المصري من جديد

,,

اجاباتك رائعه جداا يا ميروو
وانا كمان اول مرة اعرف انك مسيحية من خلال البرومو الخاص بالبرنامج
ودا عمره ما هيفرق في اي حاجة هنا
لان المنتدي هنا هو مثال للشعب الحقيقي , كلنا اخوه
وكفايه تشوفي كمية الحب والود بين سامي والراحل محمد وكلامهم عن بعض
وتعرفي ان مصر والدنيا بخير وهتفضل بخير

نورتي الحلقة بوجودك وبعتذر عن الاطالله
حلقة جامدة زي دي محتاجة رغي كتير وانا مش بتوصي :d
تسلم يا مورشو للحلقة الجميلة

[Arco Baleno]

حلقه وجعتني كثير والله حسيت كوين تتكلم من اعماق قلبها وفي كل كلامها مصدقيهوصراحه وحزن عميق تعرفت على حجات كثير من رودك واتعرفت على عادتكم المسيحيه ووصيامكم
_________
الديانات تتعدد لكن الوطن واحد
الدين شي روحاني لا علاقه له بالوطنيختلف تماما عن مشاعرنا تجاه اوطاننا

والدين يكون متنقل معنا في اي وطن نذهب اليه
لكن الوطن احاسيس مختلفه تحمل ذكريات ومشاهد وحب وانتمى
لذلك كل من يحاول فصل الدين عن الوطن
والتفرقه بين المسيح و المسلمين وهم ابناء وطن واحد باسم الدين
هولا هم اعداء الحياه وهم من لايملكون لادين ولا وطنيه
لانهم جاهلين
فعلا حلقه رائعه حبيتها كثير لامست فيها الصدق والصراحه والادب والذوق والاخلاق
الله يوفقك حبيبتي ويصلح احوال مصر يارب

[حنـــــون]

حلقه مميزه جدا
بصراحه ماعنديش اى تعقيب عليها
لانى متفقه معاكى جدا فيها
المشكله مش فى الفتنه ولا اننا كارهين بعض
المشكله فى اهداف الناس الى بتحكمنا والى من
مصلحتهم انهم يلهوا الناس فى فتنه ولا اى كارثه من كوارثهم
ربنا يصلح حال البلد وان شاء الله مصر دايما هتفضل
بلد الجميع بكل اديانهم ومعتقادتهم
نورتى ياميرو حقا ^^
شكرا ع الحلقه الجميله يااحمد

[SiLver Spectra]

حلقة حلوة يا مرشد
و كوين ميرو شخصية عاقلة و هادية و مثال راقي للأخلاق

عندي سؤال ليكي : مين الفصيل اللي بتشوفي انه متشدد و بيكرهك في دينه بسبب الاساءات و التطاول اللي بيخرج منه على دينك ؟
و ايه شعورك كمسيحية لما تسمعي الاساءات دي ؟

و السؤال دا سببه في ان بعض الاشخاص اللي بينسبوا انفسهم للاسلام بيفكروا انهم بيعملوا كدا نصرة للاسلام ! مع اني بشوفه تدمير للاسلام لان نصرته بتكون في بث المحبة و جذب الناس مش العكس

في انتظار اجابتك عن السؤال عشان نعرف من خلاله مين هما اشد الناس عداوة للاسلام من المسلمين انفسهم !

[Words Whisper]

راجعة هنا تاني بئا ان شاء الله ..

[العاشق الذى لم يتب]

أولاأشكرك أخى أحمد شكرخاص وكبير
لأان برنامجك يجعلنى نتعرف على مكون الضيف وبنغوص فى أعماقه من خلال أسئلتك وإجاباته
فحقابرنامج ناجح بكل المقاييس
وللأخت كوين كل التحية والتقدير والمودةوالمحبة كامستوى شخصى حيث تابعت لهاالكثير والكثير من كتاباتها ومقالاتها سواء كانت أدبية أو ثقافية
وأناأعلم أنها مسيحية
وبماأن شعادر المسيحية المحبة وهذا أعلمه جيدا ولقد أطلعت على الكثير من الكتاب المقدس والعهدالقديم والعهدالجديد وقدلاحظت الكم الهائل من خلال آيات الأنجيل والقصص التى وردت به والأسفار مملوءة بالمحبة والتسامح
وكما أستدلت هى بقول ربنا(لكم دينكم ولى دين)
أقول لها حرية العقيدة لاإرغام فيها لأحد على وجه الأرض فكل يعتنق الدين الذى يراه الأصوب والأنسب له
وفى النهاية كل الدين من عندالله ولله وكلها أديان سماوية نزلت من السماء لايحق لأى كان أن ينكرها
وفى النهاية الكل ذاهب إلى ربه وهو وحده يعلم من كان يعبده ومن كان يكفره ومن كان مؤمنا ومن كان لايؤمن
لاحرج فى ذلك
المهم كل الرسالات التى نزلت من السماء أمرت أن بنى البشر جميعهم لهم حقوق وعليهم واجبات ومن نقص حق أحد فهوكافر ويستحق أشد العقاب
ولى تحفظ بعض الشيئ على بعض مماجاء فى كلام أختى الفاضلة
حيث أشارت أن الأقباط لايمارسون عقائدهم بحرية
وأناأقول وهى تعلم وكل يعلم منذ أن أدركت الحياة لم أر أو أسمع أن أى مسيحى فى أى مكان فى مصر منع أن يدخل الكنيسة أو أن قرية قامت بإصدار أوامر للمسحيين بمنعهم من العبادة هذا أولا
كماأشارت أن دور العبادة المسيحية قليلة أى عددالكنائس
صحيح لاأنكر أن فى العهدالسابق كانت لاتبنى كنائس إلا بتصريح وماأدراك ماالتصريح
ومع ذلك مارأيت أن المسحيين لايجدوا كنايس للصلاة
وأنا أسكن بقرية أسمها البياضية مركز البدارى أسيوط وأنا هنا ذكرت الأسم والعنوان بالضبط ولك الحق أن تسألى وتتأكدى من كلامى بمعرفتك
أن عددسكان القرية ثلاثة أرباعها مسلمين والربع مسيحى
ومع ذلك يوجدفى تلك القرية أرع كنائس ومسجدواحدفقط
نيجى للأهم
مارأيت أحدا من سكان قريتى مسلم أضر بمسيحى
والعكس صحيح
بل والله أن من المسلمين مخاصم أخوه المسلم ولم يتخذ غير جاره المسيحى أخ له يتعامل معه فى كافة أمور الحياة
وأنا شخصيا لم أرى وأعلم غير أخ لى هو كان لى أعزصديق وفى وصديق حبيب فعل معى مالم يفعله أشقائى وكل أقاربى
ولم أفرق يوما معه فى المعاملة
ومامرعيد من أعيادكم إلا وكنت أنا وزوجتى نكون أول المهنئين له وزوجته وهوكذلك يفعل
والكل عندى متساوى ولم تكن هناك أبدا نظرة دونية لأى واحد مسيحى الكل يحترم الكل
وحكاية فتنة طائفية أنالاأعترف بها أبدا إلا بعض المشاكل والتى يصنعونها هم أصلا لادين لهم ولاإيمان
وكم أنا أعز وأحترم أخى الفاضل سامى ودائما أبحث عنه
أختى الفاضلة أنت وزوجك وأبناؤك لك كل الحق فى مصر ليس منة ولا كرم وإنما تلك بلدك ووطنك تمرحين فيها وتعيشين ودعك من حكاية الهجرة دى
ربنايخليك أختى ويبارك فيك ويفرحك بزوجك واولادك
معلش أناآسف طولت عليكم
مودتى

[نجم وزهره ومسافات فراق]

حلقه موفقه
في وقتها تماما
وطبعا اختنا كوين ميرو غنيه عن التعريف

ربنا يهدي الاحوال
دمتم بكل خير

[الأميرة رودي]

أجمل حلقه انا شوفتها لبرنامج أجمد عضــو
كوين دي حبيبتي وصديقتي الآنتيم
شخصيه راااائعه بحق وأخلآقها فوق الوصف
متزنه وكل تصرفاتها وارائها عقلآنيه جدااا
زى ماقولتى لازم المفروض يتوحدو دايما لان الخساره هتيجي على الكل
مش على الاقباط فقط .
نورتى حبيبتي عجبتنى اجاباتك الجميله جدااا وعمرنا مافرقنا هنا بين مسلم ومسيحي
واذا كان فيه قله قليله عاوزه تدمر العلآقه دي اكيد هيجي اليوم وهيبان فيه كل حاجه
وهيرد كيدهم ..
اوعى تسيبي مصر ابداااا دى بلدك زى ماهى بلدنا ..
حلقه مميزه جدا يااحمد أستمتعت بالحوار وكنت أتمنى يكون أطول من كده

موفقين دايما يارب