ايه رايك في الجمله دي

[Şα3Đ..♥]

الجملة دي بسمعها بتتقال كتير من أشخاص كتير و فـ مواقف مختلفة..

ممكن تسمعها في لحظة مواساة..
لما يجي حد يواسيك يقولك:
(( ياعم ماتزعلش أوووي كده..الحياة مابتوقفش على حد ))


وممكن تسمع شخص بيقولها في لحظة لا مبالاة:
(( وإيه يعني إللي يحصل يحصل..الحياة مابتوقفش على حد ))


وممكن نسمعها في مواقف كتير:
(( الحياة مابتوقفش على حد..هو أنا يعني هموت من غيره ما أنا عايش آهو ))
!

بس أنا حاسس إن الجملة دي مالهاش أي أساس من الحقيقة
وإن إحنا بنقولها بس عشان نصبر بيها نفسنا

بس الحقيقة فعلا إن حياتنا ممكن أوووي توقف على حد

أقرب أمثلة من الواقع..

لما تحس إن حياتك وقفت على إنسان غالي عليك فارقك
لما تحس إن حياتك وقفت على إنسان غالي عليك إتوفى
لما تحس إن حياتك وقفت على إنسان غالي عليك خسرته في لحظة لأي سبب
لما تحس إن حياتك وقفت على إنسان غالي عليك خايف تخسره أو تفقده لأي سبب
لما تحس إن حياتك وقفت على إنسان غالي عليك باعك أو خدعك
لما تحس إن حياتك وقفت على إنسان غالي عليك بعيد عنك
لما تحس إن حياتك وقفت على إنسان غالي عليك مريض جدا وخايف يموت

لما تحس إن حياتك وقفت على إنسان بتحبه
على أخ بتخاف عليه
على صديق بتحتاجله
على أب وأم نفسك تساعدهم وتسعدهم

.......... وغيره وغيره وغيره كتيرررررر


هيجي واحد يقولي:
(( لا طبعا حياتي ماوقفتش على أي حد فيهم لأني لسه عايش ماموتش ))


هاقول له:
(( هو معنى إن أنت عايش بس في حاجة مكسورة جواك أو مفتقدها بسبب حد معين..
إن حياتك كده ماشية ؟!!! ))


هي إيه حياتك أصلا..

عقارب الساعة إللي بتمشي وبيزيد عمرك فيها مع كل دقيقة؟
ولا إحساسك إللي بيمشي وبتحس بأيامى فيها مع كل إحساس؟


تخيل بقى لما عمرك يمشي واقف على حد..
هل معنى كده إن حياتك ماشية لمجرد إنك عايش وبس؟


امممممممم ما أفتكرش بصراحة


هو ممكن حياتك تكون شغالة ومستقبلك شغال وناجح كمان
بس إحساسك نفسه واقف على حد

ولو إحساسك واقف على حد..أكيد حياتك هتكون واقفة معنويا
حتى لو كانت ماشية عمليا
وبكده ممكن نصحح الجملة دي ونقول:
(( الحياة مابتوقفش على حد عمليا..لكن بتوقف على حد معنويا )

وتقبلو خالص تحياتي

[Just G!rl]

كده الجمله بقت أحلى بكتير وأصح كمان

بجد تسلم إيديك وجهة نظر جميله

بانتظار جديدك

[حنـــــون]

اقتباس ولو إحساسك واقف على حد..أكيد حياتك هتكون واقفة معنويا حتى لو كانت ماشية عمليا

بجد يامحمد الجمله دى فعلا اصابت الحقيقه جداااااااااااااا

احنا اكيد حياتنا مش هتوقف يعنى هنعيش وهنشتغل

ونقابل ناس بس اكيد احساسنا بالحياه هيقف معناه بالنسبه

لينا هيتغير اكيد وهنبقى عايشين من غير روح

وعلى فكره الاصعب ان تخسر انسان باردتك

فعلا دى اصعب حاجه بحيك جدا جدا جدا يامحمد على الموضوع

الاكثر من رائع وعلى اسلوبك الجميل فى طرح الفكره بجد عجبنى جدا

تحيااااااااااااتى وفى انتظار جديدك اختك حنون

[لوليتا المصريه]

عندك حق يا محمد

كل كلمه قولتها صح

فعلا الجمله دى بنصبر بيها نفسنا انما احنا من جوانا مش مقتنعين بيها

اكيد لما مثلا بنخسر شخص معين شخص قريب مننا اووى مهما كان سبب الخسارة

بيوجعنا فراقه اوووى وخسارته بتقتل جوانا حاجات كانت عايشه بيه ومعاه

وفى لحظه

الشخص دة مش موجود احساس وحش اوووى والله

وبيوجع اووى

محمد بجد بشكر كتير على الموضوع الجامد دة

ودايما منتظرة جديدك

[بانسيــــــه]

صحيح الحياة مبتقفش عند حد سواء بفراقه او بغيابه او سفره او حتى موته

لكن زى ما قلت ان الحياة جوانا هي اللي بتقف

الحب والامل اللي كان جوانا بيموت

الرغبة في الحياة بتتقتل وتموت

كل حاجة حلوة بتروح من جواك

بتكون عايش في الدنيا زى بالظبط اللي بياكل علشان يقدر يعيش مش علشان يحس بالحياة

بتحس انك بتعمل كل حاجة من منطلق ان دا واجب عليك مش علشان انتا نفسك تعمل كدا او بتحب تكون كدا

بس يا جماعة عارفين لو احنا من جوانا اتسلحنا بالايمان بالله وعرفنا واتاكدنا ان كل حاجة ربنا بيعملها اكيد ليه حكمة فيها وخير لينا حتى لو كان الظاهر العكس وحتى لو معرفناش الخير دا فين لكن صدقونى ربنا مبيعملش حاجة فيها ضرر لينا ابدا

ومتفكروش انى بقول كدا لانى مجربتش الاحساس دا

بالعكس جربت الاحساس بمرارة فراق الحبيب وموته
جربت الخيانة

جربت سفر عزيز عليا

جربت الخوف علي حد غالي عليا اوى ومريض وخايفة يفارقنى ويموت

في النهاية الانسان مهما كان ضعيف صحيح بس الاهم انه ميخليش ضعفه دا يكسره او يهزمه

وفي مقولة بعتز بيها جدا ( الصدمة التى لا تكسرنى تقوينى )

بتمنى مكنش طولت عليك

لكن فعلا موضوعك جميل جدا وشدنى للكتابة فيه

شكرا ليك مرة تانية