مــــــــــــذكــــــــــــرات ســـــمــــــيــــن

[Şα3Đ..♥]

مــــــــــــذكــــــــــــرات ســـــمــــــيــــن ___________________ ” خد ياض يا عِجل , مالك يابنى بقيت مكعبِل كدة ؟ , آة ماهى الدهنة اللى على جتتك دى هى اللى هتموتك إن شاء الله , أنت هتخس امتى ؟ , ما تبطل أكل بقى , ايه يا وحش رايح فين ؟ , أنت كانوا بيرضعوك فتة ؟ , تصدق أنت كُلك مخابئ , مخك زى جسمك , أنت لما بتجوع بتعمل ايه , مين هترضى بيك لما تيجى تتجوز ؟ …إلخ .. ” .. و حافظ أكتر من كدة كمان .. ساعات بمشى أقولهم فى سرى و أنا ماشى ..أصلى متعود .. من و أنا عيل بشخه لحد ما بقيت شحط و انا بسمع الكلام ده .. سمعته من ناس كتير .. أبويا و امى و اخواتى .. صحابى … زمان و أنا عيّل فى الابتدائية كانوا العيال لما يحبوا يروّشوا على واحد .. كانوا يخلونى واقف و يضربونى على قفايا و يجروا ..عشان عارفين انى مش هقدر أجرى ورا واحد فيهم . مرة و أنا فى أولى اعدادى كنت ماشى فى الحوش فى الفسحه ..حسيت ان فيه واحد جايلى من ورا يضربنى بالقفة , اخدت وضع الاستعداد و أول ما قرّب منى و لسه هيضرب رحت لاففله فى حركة بذلت فيها مجهود لا بأس به و مسكته و نيمتة على الأرض و قعدت فوقية ..الواد كان بيفطس ..و مكنش حد هيقدر يقوّمنى من فوقية .. بصيت فى عنيه حسيت برعبة منى ..رعب منى أنا ..طب ازاى و انا اغلب من الغلب ..هو التُخن بيخوفهم منى اوى كدة ؟ …صعِب عليا رحت قايم من عليه .. فابعد ما سبتة و أديتله الامان راح ناتشنى ألم على ودانى و جرى و قاللى سلام يابو لوغد هههههه .. قبل كدة بردو الأستاذ بتاع الكيميا فى أولى ثانوى طلّعنى أمسح السبورة ..مسحتها و قعدت أنهج كتير ..و الفصل كله قعد يضحك عليا .. و أنا أضحك معاهم و أخبط على كرشى و أبصلهم و أقولهم محدش معاه سندويتش بس اصلى جعان أوى ..و أضحك .. و أضحك .. بس من جوايا كنت بتقطع .. فى مرحلة المُراهقة كنت بكلم بنات كتير أوى .. و الله كنت بكلم البنات اللى اجمد شباب ساعتها مكنوش بيعرفوا يعملوا معاهم حاجة .. هأ قال يعنى أنا اللى كنت بعمل … بطبيعة الحال كانوا البنات دول بيكلمونى كأخ ليهم ..أو كابيبى فيس ..أو واحد مش محسوب على الشباب .. أو بمعنى أصح محدش هيتكلم على واحدة فيهم و يقول دى واقفة مع شاب بتصيع .. لانى من الآخر ميتصعش معايا !! .. أنا كنت فاهم ده كويس .. و عارف قدر نفسى .. لحد ما محيت من بالى فكرة إنى أُعجب بواحدة .. مع ده كله كنت بحاول أستمتع و أنا واقف مع أجمل بنات مدينتى أو مدرستى ..كنت دايماً أقول انا من الآخر شاب جامد .. و سنيين بتمُر يابنى آدم بتدوق المُر يابنى آدم .. و خلاص نويت أتجوز … أخدت أبويا و أمى فى أيدى .. و قعدنا فى صالون العروسة .. و الأب بيرحّب بينا .. و فى نظرة سريعة مش محسوبة عينة وقعت على جسمى ..مش على عينى ..و حسيت بإرتباك منه .. مُأحرجتش ساعتها منا أصلى خبرة 25 سنة .. حسيت بس بخيبة الأمل جيّالى على جمل .. و أم العروسة دخلت فى أيديها العروسة .. بصيت للعروسة فى عينيها بحاول أكسفها يمكن تبعد عينيها عنى و متبصش على جسمى من أول دخلة .. بس أكيد عنيها وقعت عليا و شافتنى كويس و ملّت عنيها منى كمان .. أخدنا واجبنا و روّحنا و وصلنا بالتليفون ان كل شئ قسمة و نصيب .. الكل بيقولى قلل أكلك شوية .. أعمل ريجيم .. روح لدكتور .. أجرى , ألعب رياضة .. يا جدعان هوا أنا فرحان بنفسى كدة ؟ …هوا أنا ساكت ؟ ..منا عملت ده كله .. يا جدعان و ربنا أنا مريض .. عندى حاجة فى الغُدد .. لــ محمود طنطاوي

[gold rose]

تسلم إيدك على الموضوع .,
بجد جميل أوي .,

[ملاك صعبة الإمتلاك]

في النهاية بردوا ده تفكير العرب
المظاهر وبس ,, واخر همهم الجوهرة من جوا
صحيح السمنة مشكلة بس اكيد مش بارادتنا
احنا بنسمن ,, وزي ما قلت ده تفكير العرب المتخلف
اعذورن على لفطي بس انا انقهرت جدا
ومش عارفة اقول ايه ,, تسلم ايدك

[ĄȟϻЄɖ Ṇᶐβϊɭ]

ربنا يشفي الجميع
لا التخين الناس سيباه ولا الرُفيع الناس سيباه
موضوع رائع
تسلم الآيادي

[العاشق الذى لم يتب]

متهيلئلى انك كنت واد مشاغب زمان
تسلم على التوبيك الرائع
دمت بخير
مودتى