برنامج "ذكريات طفوليه رمضانيه "

[stairway to heaven]

فكرة جميلة بجد
فكرتونى بذكرياتى فى رمضان كل اما افتكرها اضحك
منتظرين اول ضيف

[҉ آنينُ صمتـﮯ ҉]

فكرة جمييييييييلة أأأوي

وبنتظاار اول حلقة

بالتوفيق

[ياسمينااا]

اقتباس المشاركة الأصلية كتبت بواسطة Ŗăήćy فكرة جميلة اوى يـآ ياسمينا تسلم ايدك يآقمرى بإنتظار اول حلقة بئا

تسلمي مرام
خليكي متابعه معانا بقا
نورتي حبيبتي

[ياسمينااا]

اقتباس المشاركة الأصلية كتبت بواسطة angel smile برنامج جمميل منتظريين بقى ان شاء الله يسلمواا

تسلمي حبيبتي
الأجمل مرورك
إن شاء الله
نورتي التوبيك

[ياسمينااا]

اقتباس المشاركة الأصلية كتبت بواسطة دمعه حائره فكره جميله وهاتابع معاكى ان شاء الله كل عام والامة الاسلاميه كلها بخير

تسلمي منه
خليكي متابعه بقا معانا بإذن الله
وكل عام وإنتي بخير
نورتي التوبيك

[ياسمينااا]

اقتباس المشاركة الأصلية كتبت بواسطة الكبيرة اوى فكرة جميلة بجد فكرتونى بذكرياتى فى رمضان كل اما افتكرها اضحك منتظرين اول ضيف

تسلمي حبيبتي
اوك إعملي حسابك إنك هتكوني معانا إن شاء الله
عشان تحكيلنا عن ذكرياتك
خليكي متابعه معانا بقا
وكل عام وإنتي بخير
نورتي يا قمر

[ياسمينااا]

اقتباس المشاركة الأصلية كتبت بواسطة ҉ آنينُ صمتـﮯ ҉ فكرة جمييييييييلة أأأوي وبنتظاار اول حلقة بالتوفيق

تسلمي حبيبتي
إن شاء الله
خليكي متابعه بقا
وكل عام وإنتي بخير
نورتي التوبيك

[همسه الجوارح]

رمضان كريم
وان شاء الله تكون حلقات رائع
بضوف عساسيل زيك ياقمر
فى انتظار ضيوفك
واولى حلقاتك
رمضان كريم

[ياسمينااا]

أهلا بكم أعضاء منتدي بنات مصر موعدنا وأول حلقه من برنامج "ذكريات طفوليه رمضانيه " ضيفي رغم عدم تعاملي معاه من قبل إلا إنه بجد شخصيه محبوبه من الجميع ودا اللي أنا شيفاه بيدي الكتير من جهده للمنتدي وأكيد طبعا هو غني عن التعريف إسمحولي أرحب بضيفي Mahmoud Kamel أهلاً بحضرتك معانا تحب تشرب إيه بما إن الحلقه هتنزل بعد الفطار أهلا بيكي يا ياسمينا ونور الحاضرين يعني لو أمكن شويه قمـر الدين بما انه بمناسبه رمضـان ^_^ إتفضل بقا ونبدأ معكم الأسئله :- 1* فاكر أول مرة صمت؟ كان عندك كام سنـة؟ اه طبعا فاكره اول يوم جدا كانه امبـارح .. يعني كان عنـدي 5 سنين كان تشجيع من الحاج بس كنت بصوم لغايه العصر بس كـ بدايه وإنت عندك 5 سنين بدأت تصوم تعالي شوف دلوقتي الأطفال بتصوم من إمتي 2* إيه كان نظام صيامك اللى بدأت بيه (يعنى مثلا أول مرة صمت صمت رمضان كله ولا نصه..ولا كام يوم كدا يعني ؟ يعني انتي عارفه واحنا صغيرين الاهل كانو بيشجعونـا يغرونا بقي نصوم اول يوم من اول الفجر لغايه الضهر مثلا او العصر كده يعني .. انا صومت الشهر كله في اول سنه ليا بس كان لما كنت بقول للحاج ها الضهر اذن يقولي لو صومت للعصر كمان هجبلك مش عارف ايه كانت دماغنا صغيره ههههههه بس كملت الشهر معظمه للعصر واوقات للضهر . 3* مين أول حد من الكبـار شجعك على الصيام فى الشهر المبـارك؟ الحاج (والدي) ربنا يخلهولك يارب 4* متي أول مرة صمت رمضان كله كاملا؟؟ كان تانى سنه ليا صومت رمضان كله للمغرب يعني اول سنه حكيتها فوق تانى سنه كنت بتعب اه بس كنت بستحمل واكمل اليوم 5 * أول فانوس جالك كان شكله ايه؟ بالشمعة وللا لمبة ولآ ايه؟ اول فانوس جالي كان من عمي الكبير ربنا يشفيه كان معمول من الصاج وبشمعه مكنش فيه لسه موضوع اللمبه و الحجر والكلام ده بس كان جميل جدا ان مثلا نستني نور عمود النور يطفي و اولاد الجيران عندنا نطلع ونولع الشمع ونلعب هههههه ربنا يشفيه يارب 6* إيه اجمـل حاجة كنت بتحبها فى رمضـان وانت صغيـر؟؟ كنت بحب جدا الوقت اللي قبل المغرب ما يأذن .. كنتي تحسي الناس فرحانه جدا ان المغرب هياذن وهيتمو صومهم الحمدلله والشارع والناس فعلا كنت بحس انه في حاجه حلوه تفرح ايه هي مش هعرف اقولك لكن كنت بحس بفرحه كبيرة وقتها .. برضه لما كنا بطلع مع اي حد عند الراجل بتاع القطايف والكنافه كنت بحب جدا اقف جنبه وهو بيرش الكنافه = )) 7* إحسـاسك أول اما تعرف إن رمضـان جاى كان إزاى؟؟ ودلوقتى إحساسك بيبقى إزاى؟؟ يا الله فرق شاسع جدا .. زمان الناس كانت بتستني رمضان باللهف لانه كان كله بركه دلوقتى الناس شايله هم انها ازاي تصوم في الحـر ؟؟ غير زمان كانت الناس بتود بعضها دلوقتى في الشارع مبتسمعيش كلمه غير خناق والواحد يقول اسكت بدل ما افطر عليك والناس تمسك في بعضها فعلا بحجه انها مش مستحمله الصيام وبتتخنق علي بعض حاجات كتير اتغيرت باختصار البركه راحت من الايام الكريمه دي مش زي زمان معاك حق والله تحس إن دلوقتي الواحد بيتلكك علي أي حاجه هايفه ويقول أنا زهقان عشان الصيام رغم إن بردو أكيد زمان كانو بيصومو في الحر بس مش كانو بيعملو كدا خالص ممكن لإننا مبقناش متمسكين بدينا ذي الناس بتوع زمان وإيه الفرق بين إحساسك برمضـان زمـان ودلوقتـى؟ والله بالنسبالي انا بفرح من جوايا بس الفرح مبيكملش لما بشوف اللي حكيته فوق فـ رمضـان بـ حاول يـا اكون في الجامع اكمل يومي هناك وبرجع بعد المغرب في الايام اللي مش فيها شغل .. وفي الايام اللي بيبقي فيها شغلي بطلع شغلي من الصبح و بشوف الحاجات اللي حكيتها دي وبحاول مسمعهاش حتي أحسن بردو أعمل نفسك مش سامع وخلاص 8* ذكـرى مع رمضـان وانت صغيـر لا تنسـاها؟ احنا بيت عيله بس دلوقتى مش كده كل عم له بيت دلوقتى وبقي له عيله من اولاد ولاده .. انا الذكري اللي مش بقدر انساها وقت المغرب لما كانت بتبقي في لمه وزمان في الصعيد مكنش في حاجه سفره والحاجات دي لالا لو هتعرفي اسمها يعني هي اسمها طابليه زي اللي بتيجي في المسلسلات الصعيد كده .. كنا بنتلم عليها كلنا جدي الله يرحمه واعمامي كان الواحد بياكل مع ابن عمه وعمه في طبق واحد مش زي دلوقتى ممكن تلاقي ابن ابن عمك في الشارع ميعرفش اساسا انك عمه يلا الحمدلله ربنا يرحم يجدك ويجمعك معاه في الجنه إن شاء الله آه طبعا عارفه الطابليه الحياة بتلهينا حتي عن أقرب الناس لينا وكل واحد بيبقي مشغول بحياته 9* إيه اجمل الحاجات اللى بتتعمـل فى مضـان كنت بتحبها أوى (فى الأكل يعنى ) ؟؟ يعني حاجات كده بالنسبه للشرب التمر ده طبيعي شرب واكل اول ما يقول الله اكبر يعني ع السنه .. الحلويات كنت بحب القطايف لكن بالعجوه والكنافه بس بطريقه أمي هي بتعملها فاكرها اسمها علي ما اعتقد مفروكه هو أنا مش كنت أعرفها فعلا بس رمضان اللي قبل اللي فات حد قالي عليها وعملتها فعلا طعمها جميل *وإيـه اكتـر حاجة فى الأكل مش بتحبهـا ؟؟ لا لو كتبت اللي مش بحبه هيكون كتير ههههههههه فـ بلاش السؤال ده اجاوب عليه اساسا ليه مش بتاكل ولا إيه 10* فاكر أكتر اغنية كنـا بنسمعهـا واحنا أطفـال عـن رمضـان وكنت بتحبهـا؟؟ قلنـا هى إيـه؟ اغنيه مشهورة كانت بتيجي اوول ما المفتي يطلع ويقول رمضان بكرة وهي بتقول رمضان جانا دي كنت بحبها اوي مش عارف مين بيغنيها .. واغنيه طلعت ع ايامي بتقول اهو جه ياولاد ههههه تقريبا اللي بيغني أغنية رمضان جانا محمد عبد المطلب 11* إيه اكتر حاجة كنت بتحب تتفرج عليها فى التليفزيون فى رمضـان ونفسك ترجع تيجـى تانى دلوقتى؟؟ كنت بحب اتفرج علي سمير غانم فطوطه .. بكار .. فوازير شيرهان الف ليله وليله .. واديني عقلك اول ما اتعمل زمان هو و برنامج ابراهيم نصر دلوقتى في رمضان ولان مفيش زي زمان مبحبش اتابع حاجات كتير ممكن برنامج لرامز جلال كده يعني . 12* ذكرى طريفة فى رمضـان وانت صغيـر؟؟ يعني موقف كده فاكرة كانت بنت عمي مبتستحملش الصوم هههههه فـ كانت بتقـولي تعالى ناكل ومحدش يعرف قولتلها ماشي ادخلي وانا جاي ندهت عمي قلتله ياعمي بنت عمي عماله تقولي تعالى افطر ومحدش هيعرف و زودت في الكلام هههههه المهم جـه بالخرزانه دخل عليها لسوعها لقاها بقي شايله سندوتشات بقي الله اعلم جيباها منين وجايبه لوليته و مايه ساقعه وعامله مائده الرحمن جوه بس اللي معرفوش لدلوقتى جابت الحاجات دي كلها منين شكلي فتن عليها كده وهي متجوزه ومخلفه ربنا يكرم ومحدش يشوف الكلام ده ويوصله لها = )) لا طبعا دي مش تعتبر فتنه خالص دي فتنه بس هههههه مش تقلق يا محمود مفيش حد هيقولها يا جماعه أي حد يعرف بنت عمه دي يقولها محمود شردك حكي كل حاجه ههههههه 13* لو هتقـارن بين رمضـان بالنسبه ليك وانت طفـل ورمضـان دلوقتى.. زمـان كان بيمثلك إيـه ودلوقتى إيـه؟ مفيش مقارنه بصراحه الخير والحب وود الناس كان زمان دلوقتى الله المستعان معاك حق والله الواحد بيتمني أيام زمان ترجع تاني 14* وأخيـرا كنت بتبقى حاسس بإيـه فى آخر يومـ فى رمضـان لما تعـرف إن العيـد بكرة؟؟ بصراحه لو اعرف ان الايام دي جايه كده مكنتش فرحت زمان بـ اخر ايام رمضان علشان نجيب لبس العيد .. كنا مبنمش يوم وقفه العيد ونفضل سهرانين ونظبط لبسنا الجديد يعني النقطه دي عايزه مقال هههههه كلنا كدا وإحنا صغيرين يا محمود بس الوضع بختلف تماما لما بنكبر ههههه كفايه كدا بلاش المقال ميرسي لحضرتك ع قبول الإستضافه نورتنا ربنا يخليكي يا ياسمينا وانا اتشرفت بدعوتك وبالاجابه ع اسئلتك اللي فكرتني فعلا بايام جميله نورك ونور الموجودين تسلم وأنا فعلا إستمتعت بالحلقه وإن شاء الله الأعضاء هي كمان تستمتع بالحلقه أتمني إن الحلقه تنال إعجابكم دمتم بحفظ الرحمن

[gold rose]

الله حلقة جميلة جداً والله .,
فعلاً استمتعت بيها .,
ذكريات الطفولة في رمضان حاجة حلوة أوي .,
بجد كانت حلقة حلوة
ومحمود منور .,