ثورة 30 يونيو

[big bốss]

بسم الله الرحمن الرحيم

من غير مقدمات

انا شفت القناص الاخوانى الى كان فى مكتب الارشاد و كانوا بيضربوه المتظاهريين و كان المنظر رهيب

قعدت اعيط علما شفت المنظر

لييييييييييه ؟

علشان مسلم مع انه قاتل و يجب القصاص منه بس مش بالطريقه دى

علشان مصرى مهما كان مينفعش نضربه من غير رحمه و لا دين ولا انسانيه

علشان هو بشر مينفعش نهين آدميته كدا و نستبيحه آلمه و عذابه


مع انى انا ضد الاخوان


بس مش معند انى ضد حزب او ضد شخص يبقى أتخلى عن كل مبادىء و قيمى

مش معنى كدا ان ألغى عقلى و ضميرى

مش معنى كدا ان ألغى تعاليم دينى و أنسانيتى


ثورة 30 يونيو

قامت ضد نظام له أنصار بيدون له بالولاء و الطاعه

أنصاره شيفينه صح

بس فى غالبيه من الشعب شيفينه غلط خلاص المعادله تنتهى و يتم تجديدها


اقولها بصدق

ليس هناك شرعيه تستحق سفك الدماء من أجلها مهما كانت


ليس هناك شرعيه تستحق ان ننقسم من اجلها مهما كانت


ليس هناك شرعيه فيما يخالف الشرعيه الاسلاميه و استباحة القتل


لماذا التعصب ؟ لماذا التطاول ؟

ابكانى كثيرآ

ان ارى مصريين ينعتون الشعب المصرى بأبشع الالفاظ و الشتائم

ان ارى التطاول على الشعب مصرى و تشبيهه بأزل الوصف

ان ارى التهجم على المصريات و سبهم بالعاهرات


ارجو ان نفكر بعقل

و بحكمه


ذهب من ذهب و لن يعود و انتهى الامر


دعونا ننظر الى غد افضل !

لعل الله يرحمنا و يولى من يصلح حال بلادنا و نرى ما كنا نطمح اليه

و لا ننظر الى الخلف و الماضى فقد حدث و مات

اتمنى أن لا اجد او أقرى اى حرف و ليس لفظ

ضد الشعب المصرى و الثوره المصريه لانهم خارج اى تهكم او أبتذال


ارجو ان لا اجد اى أخوه غير مصريين يتدخلون فى شئوننا و ينعتون الشعب المصرى


للجميع مطلق الحريه فى التعبير عن الراى

و لكن هناك خطوط حمراء هى الامه المصريه و الثوره المصريه


و ارجو ان يظل تقسيم الامه المصريه

الى مسلم و مسيحى فقط

و ليس الا مسلم متأسلم و مسلم حقيقى و مسيحى


و اللهم جمعنا و لا تفرقنا


و اتمنى ان اجد الاعضاء المعارضين و المؤيدين هنا دون استثناء




و تحيا مصر

[✿ Celiηα]

معاك حق والله
فين حتى الانسانية فين قلوبكم
فين وفين ؟
احنا بشر زينا زيكم
مش معنى اننا مختلفين فالرأي
يبقا نقتل بعض بقا
احنا لازم اصلا نبقى مختلفين عشان نعيش
مينفعش تلاقي كل الناس بتفكر بطريقة واحدة
او رأيها واحد او عايزة حاجة واحدة
بجد المناظر فظيعـة ومفيش قلب يستحملها

ربنا يهدي الناس ويحفظ مصر
شكرا للطرح ~

[gold rose]

فعلاً أنا معاك في كل حاجة .,
ما عدا الغالبية من الشعب مش عاوزينه دي .,
أنا مش شايفة كدا خالص .,
ربنا يستر على مصر وشعبها .,
وإن شاء الله أزمة وهتعدي .,

[جبل عالي]

والله يانور عايزين بجد نفوووووق

الله المستعان

تسلم الايادي

[حلم عمري]

معاك حق في كل كلمة قلتها
بجد احنا كنا بنزعل علي اي مصري يتوفي من اي طرف
لان كلنا مصريين وكلنا اخوات منرضاش ابدا يضيع مننا بني ادم
وبنرفض بشدة اعمال العنف اللي حصلت الحمد لله عدت علي خير
ربنا يرحم الشهداء اللي ماتو
بجد اتمني من المؤيدين انهم يحطو ايدهم في ايدينا ونبني مصر من جديد
انا والله كنت اتمني لمرسي انه ينجح لان نجاحه نجاح لمصر بس للاسف
لازم كلنا نعرف ان اللي قام الثورة دي شباب محترمة وشعب عظيم بجد
شهد العالم كله بمدي تحضر ورقي هذه المظاهرات
ياريت ننسي الشماتة وننسي الانتقام وندعي لمصر ربنا يحفظها وكل واحد يحاول يعمل اللي يقدر عليه عشان مصلحة البلد دي وربنا يحفظ مصر ويولي من يصلح
موضوع رائع جدااا
شكرا نور

[عاشقة ذكر الله]

أقولك على حاجه جتنا القرف فعلا
اه و الله
ايه اللى احنا بنهببه دا بنشكك بعض فى كل حاجه دا كافر و دا مسلم
بقينا احنا اللى بندى لكل واحد ديانته مش عارفين ان الحاجه دى الوحيده اللى يحكم بيها ربنا بس مش احنا
نقول دا بيقول علينا كذا و التانى يقول لأ دا بيقول كذا
خلينا نرحم نفسنا شويا بئه و كل واحد يخلى حكمه لنفسه كل واحد يحكم هو ايه بالنسبه لنفسه ملوش دعوه بحد
و بعدين انت مالك يكفر و لا يسلم ؟!!!
بجد فعلا محتاجين كلنا نعيد القيم بداخلنا نتعلمها الأول و بعدين تبقى تحكم على الخلق

رأيك صح فى الجزيئه دى اى واحد يموت فى البلد دى هو مصرى قبل مايكون اخوانى او علمانى مسلم أو مسيحى مع اعتراضى على بعض النقاط فيها و لكن
لازم ناخد بالنا من بعض و نحب بعض بجد و نخاف على بعض مش حد يموت يقول فى داهيه ماهو يستاهل

اللهم احمى مصر من الفتن

[استـثـنـائـيـة]

عـزل مرسـى واجراء انتخابـات رئيسية مبكـرة أصبح أمر واقع

بناءاً على رغبـة معظـم الشعب

مـن المُفتــرَض إن الكـل يسلـم بيـه ويتعامـل على أساسـه .

ومن المفتـرض ان الكل يبقى عارف

ان كـل اللى بيحصـل حاليـا مش هيغيـر من ده فى حاجة

الا انه هيزيـد نسبة الاحتقان والانقسـام فى الشـارع المصـرى

ويزيـد من الفتن بين الناس

ولا قـدر الله يزيد مـن قوائـم الشهداء !

ربنــا يحفظ مصـر وأهلها ...

[مُنـــــايا]

نقول ايه بقيتا حاجه تقرف ... بقينا احنا اللي بنكفر ونسينا ان رب العباد هو اللي ليه الحق في ده

مين احنا عشان نكفر ونقول ده مسلم وده كافر مين عطانا الحق ده ...

بقي دمنا رخيص اوي وعامل زي الميه . بدل ما نقف في وش العدو بنقف في وش بعض ونقتل في بعض

والله حاجه تفرح ...

كل مصرى يتمنى الخير لبلده ويتمنى ان يرجع الامن والاامان =لكل معارض و مؤيد=

انسوا انكم مختلفين فى الراى ومدو ااديكم لبعض وكفاايه سخريه من بعض تعالوا

نسامح بعض وبلاش نخلق شىء بنا مش مووجود فى دينا ولا فى بلدنا افتكروا بس

رب العباد انه وصانا بـ التآخى والترابط لأستمرار الحياه بإذن الله اللي جاي احسن

وأجمل بإذن رب العالمين ، ومصر ستكون أروع بلد في العالم و على الجميع

التفاااااؤل التام وهو بيدعى االرحمن اللهم احفظ مصر واحفظ شعبها من تشتت الامر

[big bốss]

اقتباس المشاركة الأصلية كتبت بواسطة ✿ celiηα معاك حق والله فين حتى الانسانية فين قلوبكم فين وفين ؟ احنا بشر زينا زيكم مش معنى اننا مختلفين فالرأي يبقا نقتل بعض بقا احنا لازم اصلا نبقى مختلفين عشان نعيش مينفعش تلاقي كل الناس بتفكر بطريقة واحدة او رأيها واحد او عايزة حاجة واحدة بجد المناظر فظيعـة ومفيش قلب يستحملها ربنا يهدي الناس ويحفظ مصر شكرا للطرح ~

أيوا يا سيلينا


كلنا واحد مش علشان اختلافنا يبقى خلاص كل واحد عايز ينفذ رايه

على جثث و قتلى التانى

انتهى الامر و خلاص

يبقى نبدأ من جديد مش نستمر نقتل و نهين بعض و نفرج العالم علينا

[big bốss]

اقتباس المشاركة الأصلية كتبت بواسطة gold rose فعلاً أنا معاك في كل حاجة ., ما عدا الغالبية من الشعب مش عاوزينه دي ., أنا مش شايفة كدا خالص ., ربنا يستر على مصر وشعبها ., وإن شاء الله أزمة وهتعدي .,

يا رنا

خلاص 80 مليون مصرى عايزين مرسي

و 10 مليون بس مش عيزينه

المهم حصل الى حصل و انتهى الامر

و نحاول نصل ما فات و بدل ما تعصبنا زى ما هو

و كرهنا يزيد و انقسمنا يزيد

خلاص النظام راح و انتهى و دا امر واقع