عمليات التجميل بين الأصولية و الواقع العلمي

[SiLver Spectra]

كان في موضوع نقاشي طرحته الأميرة رودي عن عمليات التجميل اللي بيعملها الشباب
مبدئيا
أنا مش بفكر اني أعمل عملية تجميل و لا عمري اهتميت بحاجه زي كدا
لكن دافع حديثي هنا متعلق بانتقادات غير موضوعية و بخلط و تدليس عام و شامل بدون أي عقلانية ما بين فكرة التجميل بصفة عامة و بين الافراط في استخدامها

و عامة كثرة الانتقاد بتشعرني دائما بالتميز وسط مجتمع مليء بالتناقضات و الاضرابات و الشيزوفرينيا!


صفة الجمال مطلوبة عند الجنسين
و للوصول اليه بتحتاج لعناية و مساعدات و من النادر أن يكون جمالك لا يحتاج اليها

من واقع خبرتي الحياتية اكتشفت ان الشخص اللي بيعمل عملية تقويم ماحدش بيلومه او مش بتتاخد عليه صفة سيئة
في حين لو الشخص نفسه عمل اي عملية اخرى في وجهه بتؤخذ عليه بالذم
بالرغم من ان الاتنين هدفهم واحد (تحسين المظهر و تصحيح العيوب)

فتسأله عن السبب..يقولك اصلك بتغير خلقة ربنا !
المشوه بس اللي بيعاني من ضرر صحي ماشي ((يعني لازم يكون بيتوجع و بيقول اه او عربية خطبته في الشارع و شوهت منظره ))
طب ما المشوه لما تعالجه فانت بتغير في خلقة ربنا المشوهه !
و بعدين ما علاج التشوه عملية تجميل يا ابني !!

فتلاقيه طلع يجري ينقل كلام من على النت كوبي و بيست

السؤال هنا : ماهو مقياس التشوه عند حضرتك اصلا ! اللي على اساسه هتديله الرخصة ؟

"""""

ركز بقى معايا بالراحة واحده واحده
و هبدأ بمجال الأسنان


حظي إن بعد النقاش على طول و أنا قاعد عالقهوة كان برنامج عرب جوت تالنت شغال ..فلفت نظري واحد عنده سنة مش مظبوطه كان مشترك في المسابقة
و لما روحت حملت الحلقة مخصوص عشان اجبلكم صورة له







لاحظ هنا الناب ناحية اليمين
اللي هو في طب الاسنان بنختصره بالشكل دا



و بتنطق
upper left canine
((شوية فزلكه))

بالعامية الناب اللي فوق ناحية اليمين (الشمال بالنسباله)

ملاحظ هنا هو ان عنده حالة بنسميها Macrodontia
و دي بتعني ان اسنانه أكبر من حجمها الطبيعي . و دا تلاحظه بالمقارنة مع الناس اللي كانت واقفه في صفة و اسنانها اصغر
و كمان من منظر الناب اللي مش لقى مكان يطلع فيه

طيب اشمعنا الناب اللي اتعلق كدا ؟
أولا هو ان اسنانه حجمها كبير فأخدت مكان الناب
ثانيا هو ان الناب في الفك العلوي بيطلع متأخر عن الاسنان اللي أدامه و اللي وراه لأن مسار نموه بيكون معقد و طويل (أطول جذر سنة في الفكين)

الملاحظ هنا كمان هو ان الجانب الآخر مافيش فيه ناب تقريبا
و قد يكون موجود في مكانه الصحيح ..الصورة مش موضحه بشكل كاف ..بس حسب تدقيقي فشخصيا أتوقع انه مش موجود بالأساس
و هنا في احتمالين
اما ان الناب معرفش يطلع ..بسبب انه برضو مالوش مكان ..و فضل مستخبي تحت اللثة (و الاحتمال دا بتسبعده لأن غالبا دا هيتسببله في الم شديد نتيجة ضغط الناب على جذور الاسنان اللي واخده مكانه ..و الألم دا عمره ما هيروح غير بالجراحة و ساعتها كان هيروح للدكتور و هيشيله الاتنين )

الاحتمال الثاني اللي أنا برجحه هو ان الناب بتاعه في الجهة الأخرى سقط
و هنا الاشعة هما اللي هيحددوا و هيظهروا في ناب مستخبي تحت اللثة أو لأ

نشد خط و نخش في الكلام المهم
------------------------------------

طيب ..هل الناب اللي خارج ال occlusal plane أو مستوى الاطباق له اي فائدة ؟
بمعنى أدق ..الناب مستواه خارج مستوى الاسنان ..لأنه يعلوهم
هل هو كشخص بيستفيد من الناب بتاعه دا ؟
الإجابة : لأ
مش بيفيده في اي حاجه ..لا مضغ و لا غيره لأنه خارج مستوى الاطباق زي ما ذكرنا ..فالناب مش بيلامس اسنان مقابلة غير ان مستواه مرتفع

طيب ..هل الناب بيتسببله في الم ؟
ما اعتقدش لأن زي ما ذكرنا لو كان بيعمله وجع كان خلعه و اتصرف فيه

طيب تفتكروا ليه مش راح لدكتور يظبطه ؟
أعتقد ان السبب مش عقائدي هنا ..السبب قد يكون عدم حبه للذهاب الى أطباء الأسنان أو عدم اهتمامه بيها ..و دا حال ناس كتيره جدا مش بس الحالة دي

طيب و هل السنة بتشكله أي ضرر ؟
التشخيص اللي هيحدد بإجزام بس غالبا مافيش اضرار حسب تصوري الشخصي الا ضرر واحد فقط
و هو ال bad esthetic
بالعربي . المظهر السيء

في طب الأسنان عموما من أهم المشاكل و الصعوبات اللي بتواجه أي طبيب هو تحقيق مظهر جيد و طبيعي للأسنان الأمامية و هي الاسنان ال12 اللي بتظهر مع الضحك و اثناء الكلام (اربع قواطع و نابين في الفك الواحد)

تمام لحد كدا ؟

طيب ..نخش بقى في المفيد


هو محتاج ايه الراجل دا ؟
محتاج عملية جراحية لازالة الناب ..ثم متابعة للآثار اللاحقة و معرفة ما اذا كان محتاج تقويم بعدها أو لأ

و دا بيندرج تحت مسمى (التجميل)

علم ال orthodontics ترجمته بالعربي : علم تقويم الأسنان المعوجة
كلمة تقويم بحد ذاتها = تصحيح
و التصحيح هو تجميل

يبقى احنا لما تجيلنا حالة زي كدا هيكون أدامنا خيارين

الأول هو اننا نعالج الحالة و نحسن من مظهره السيء بخلع الناب و عمل تقويم ان استلزم

الخيار الثاني هو اننا نطرده من العيادة و نقوله ان دا تجميل يا فاسق

طب بص في الصورة تاني و قولي مين الخيار الانسب




الشخص دا غالبا منذ الصغر بيتعرض لمشاكل نفسية من الاطفال (العيال بتهيص في التريقة) و حتى بعد كبره ..اقل خناقة على طول هيتشتم بمظهره
و بالتالي فحاجه زي كدا بتاثر على عامل الثقة بالنفس ..و ليك انك تتخيل بنت منظرها كدا ..اي شاب لو سألته عايز تتجوز بنت عامله ازاي هيقولك : يكون منظرها مقبول ..بالاسنان دي فالمظهر اكيد اقل من المقبول

----------


نرجع بقى و نتكلم عن التجميل بصفة عامة

العلم اتطور ..و تطور العلم خلانا ندرك اشياء كانت مبهمة و ماكنش يعرفها اي حد من الأجيال السابقة .. اللي كانت كل حاجه بتفسرها بمنطق : ربنا عايز كدا و نقطة
يعني يلاقي مطر بينزل مايعرفش سبب الظاهرة فيقول ربنا اللي بينزله
مايعرفش سبب المرض ..فيقول ربنا اللي عايز كدا
مايعرفش سبب ضعف اسنانه فيقول ربنا اللي عايز كدا

و بالفعل كل شيء مقدر من عند ربنا ..بس ربنا عملك الكون بنظام عشان تكتشفه مش عشان تتفرج عليه و تقول دي خلقة ربنا و سيبها زي ماهي !!

((فكروني ابقى اجبلكم فيديو لناسا و هي بتعمل غيوم و امطار صناعية))

المهم
من ضمن الاكتشافات دي هو اكتشاف علم الجينات
و العلم دا من خلاله اتوقع انهم هيقدروا يحسنوا من صفات البشر و يتخلصوا من العيوب الخلقية الى الأبد (في الشعوب المتقدمة طبعا) لكن دا هياخد عشرات بل مئات السنين لأن الموضوع معقد جدا
ازاي بيتم ؟ بانتقاء الجينات الجيدة في الحيوان المنوي و البويضة قبل الاندماج

و هنشرح الموضوع بتعمق أكثر

هل فكرت قبل كدا : ليه الاخوات مش بيكونوا متطابقين في الشكل ؟
بمعنى ..انت ابوك و امك خلفوك زي ما خلفوا اخوك ..طب ليه شكلك مش بيتطابق مع أخوك بالملي ؟
أكيد هيكون في تشابهات و اللي هيشوفك هيشبه على انك اخوك فلان ..بس مافيش تطابق . كل واحد له شكل مختلف و متباين عن الآخر
سألت نفسك ليه السبب ؟
أنا سألت نفسي السؤال دا من و أنا صغير ..و لاقيت اجابته بعد كبر
الإجابة بترجع للجينات ..ملايين الجينات بينتج عنها مليارات الاحتمالات
شكلك بينتج من احتمالات محدده من المستحيل في علم الرياضيات ان اخوك ياخد نفس الاحتمال

على سبيل المثال ..تخيل اني اديتك رقم من واحد لمليون و قولتلك كوني نمرة من مليون رقم من الارقام دي و شامله التكرار
عارفه هيطلع عندك كام احتمال ؟
ملايين المليارات من الاحتمالات
و بالتالي فمن المستحيل ان اخوك يطلع شبهك بالملي الا لو قدرت تتحكم في احتمالات الجينات !
و دا زي ما ذكرت ادامه مئات السنين

طيب بالنسبة للتوأم ؟
التوأم زي ما أخدتوا في الأحياء ..في توأم متشابه و توأم غير متشابه
التوأم المتشابه بينتج من حيوان منوي واحد و بويضة واحده ..بعد مرحلة الاندماج (و اختيار الاحتمالات الجينية) بيحصل انقسام للمشيج او لكتلة الخلايا ..و بينتج شخصين متشابهين في الشكل بدرجة كبيرة جدا ..
دا لان النمو حصل بعد ما عملية الاحتمالات تمت

أما التوأم الغير متشابه بينتج من تخصيب حيوانين منويين لبويضتين ..و بالتالي بينتج هنا شخصين باحتمالات جينية مختلفة ..و النتيجة هو ان الاتنين شكلهم مش بيكون متطابق لكن متشابه (زي الاخوات العاديين) كأن كل واحد اتولد لواحده

طيب أنا ليه بتكلم في الكلام العلمي المعقد دا ؟
ببساطة عشان أعرفك ان التشوه أو المظهر السيء له سبب و السبب هو الجينات


الخلاصة هنا : شكلك عامل زي المرض ..له سبب
تقدر تعالج السبب قبل حدوثه . و تقدر تعالجه بعد حدوثه


لو كنت متقدم في علم الجينات زي ما تقدمت في علوم أخرى مثل محاربة الأمراض الفيروسية على سبيل المثال شلل الأطفال ..قدرنا اننا نتفادى المرض دا قبل حدوثه و هو عن طريق تطعيم الطفل بفيروس ضعيف عن طريقه الجسم بيكون مناعة ضد الفيروس القوي و بيمنع اصابة الجسم بيه

أما في علم الجينات فانت متأخر , دا غير انه علم معقد ..و بالتالي لحاد اللحظة مش بتقدر تتفادى العيوب الخلقية اللي بتنتج من طفرات الشفرات الجينية و ايضا ظهور الصفات المتنحية


.......

عشان كدا الشخص اللي شوفتوه في الصورة فأنا بعلمي الضعيف ماكنتش هقدر امنع الناب بتاعه من الظهور بالشكل السيء دا
لأن العلم لسه مش توصل للجين المسؤول عن (كبر حجم الاسنان أو ال macrodontia)

لكن أنا أقدر أعالج حالته بعد حدوثها زي ما ذكرنا ..بعملية جراحية يخلع فيها الناب و من ثم عمل تقويم

حال الاسنان هو برضو حال شخص مناخيره الغضروف بتاعها كبير ..بتقدر تعمل عملية جراحية و تشيل الزوائد
الغضروفية..و سبب كبر الغضروف بيرجع الى الجينات سواء طفرات جينية او جينات وراثية

تساقط الشعر كمان ..في اللي بيقدر يمنع المرض قبل ما بيحصل ..عن طريق انه بيكون عارف ان عيلته بتحمل صفة تساقط الشعر ..و بيستخدم مواد كيماوية تحد من عملية غلق مسام الشعر اللي بتتسبب في التساقط
و في اللي بيزرع شعره بعد التساقط لتحسين مظهره

في البنت اللي حواجبها بتكون لازقه في بعضها و بتكون مشعره
و دا مش بيكون حلو للبنت ..ممكن بتروح تعمل عملية ليزر تقفل فيه مسام الشعر دا في اي جزء من جسمها عموما

في اللي بيبقى تخين و بيعمل عملية شفط لتحسين مظهره
و التخن قد يكون بسبب عوامل وراثية او عوامل سلوكية في طريقة الاكل السيئة

في كمان البنت اللي بتحب تروح تكوي شعرها عن الكوافير (تجميل في الشعر)

في اللي بيغسل شعره ببلسم (عشان يقويه) كمان تجميل في الشعر


------------
المهم بعد الليلة دي كلها
انا مش عايز حد يجبلي منقولات من ناس كانت عايشه في عصور وسطى و مفكرين ان الأرض منبسطة !

اللي عايز يرد يرد بشكل نقاشي و يستحسن يكون بشكل علمي زي ما كتبت الموضوع

العلم نور ..


أحب اضيف نقطة أخيرة ..أنا ضد المبالغة في اي شيء مش بس في التجميل
يعني لما تبقى ممثلة و عامله 150 عملية تجميل مثلا في وشها ! . انا مش مع حاجه زي كدا مش لسبب ديني .
بس الاوفرة في اي حاجه بتكون مش حلوة و فيها نوع من التبذير

لكن تيجي تقولي واد زي اللي في الصورة دا و ان حرام اظبطله اسنانه هقولك متشكرين على نصيحتك اشتغلها على حد تاني دماغه على أده ..

[~♥ Queen sozan♥~]

انت عندك حق فى حالات كتير بيكون لازم التجميل فيها اللى الجنسين
وفى ناس بتحب تكون اوفر حتى فى الجمال فا بتعمل عمليات
هو سلاح ذو حدين

نيجى اللى الشاب اللى انت جبت صورتة هو هيكون اجمل لو عمل العملية دى
بس هو فى المسابقة نجح غض النظر عن اى حاجة
فى هنا مش كل حاجة بتكون على حسب الجمال ...

توبيك مميز يا دكـــــ

[احلام بلا اجنحة]

كلام جميل . ومن الناحية الشرعية فيه انقسام بين العلماء وانا بميل لاباحة العمليات التجميلة .

[اميره الشعر الشجين]

موضوعك قمه الروعه فعلا بس عمليات التجميل للا نسان الا محتا جها فعلا زى ما قولت مثلا تقويم الاسنان دى عادى شخص

عمل حادثه اتحرق طب ما الحرق بيتعالج بعمليات التجميل فى الحاله دى مش حرام

بس بقى عشان المنظره ذى اليومين دول بقى تغير واجه العين والشفايف والمنخير وغيره بقى للجنسين ده الا فعلا اعتراض على خلقه ربنا لانها مكنتش محتاجه او محتاج لكده وممكن تقول حاله نفسيه من شده التريقه او انو يبص للناس ويشوف انو ااقل منهم فبيلجئ لكده

بجد موضوع قمه الجمال يدوم التميز اخى ^_^

[SiLver Spectra]

اقتباس المشاركة الأصلية كتبت بواسطة اميره الشعر الشجين موضوعك قمه الروعه فعلا بس عمليات التجميل للا نسان الا محتا جها فعلا زى ما قولت مثلا تقويم الاسنان دى عادى شخص عمل حادثه اتحرق طب ما الحرق بيتعالج بعمليات التجميل فى الحاله دى مش حرام بس بقى عشان المنظره ذى اليومين دول بقى تغير واجه العين والشفايف والمنخير وغيره بقى للجنسين ده الا فعلا اعتراض على خلقه ربنا لانها مكنتش محتاجه او محتاج لكده وممكن تقول حاله نفسيه من شده التريقه او انو يبص للناس ويشوف انو ااقل منهم فبيلجئ لكده بجد موضوع قمه الجمال يدوم التميز اخى ^_^

الموضوع لو لهدف الغرور او التكبر و التباهي فكدا دا واخد منحنى آخر شخصيا ضده
و ماينفعش نلوم الفكرة كلها بسبب تصرفات افراد

لكن غير كدا ..واحده بتتجمل لزوجها أو بتحسن من عيوب واضحه فيها بتاثر عليها نفسيا مثلا مش شايف فيها اي مشكلة
و حد هيقول للجمال لأ

نورتي ..

[اميره الشعر الشجين]

اقتباس المشاركة الأصلية كتبت بواسطة silver spectra الموضوع لو لهدف الغرور او التكبر و التباهي فكدا دا واخد منحنى آخر شخصيا ضده و ماينفعش نلوم الفكرة كلها بسبب تصرفات افراد لكن غير كدا ..واحده بتتجمل لزوجها أو بتحسن من عيوب واضحه فيها بتاثر عليها نفسيا مثلا مش شايف فيها اي مشكلة و حد هيقول للجمال لأ نورتي ..

اكيد بس التجميل ده يحدث فى حاله لازمه بمعنى ومثلا زى ما بتقول لو وحده بتحثن من نفسها عشان جوزها وايه المانع فى كده ولا اى حاجه لانو هو الوحيد الا هيشوفها انما بصراحه اليومين دول كلو شغل غرور

وتلاقى الجو ده فى عالم التمثيل

[Angel Smile]

اقتباس لكن غير كدا ..واحده بتتجمل لزوجها أو بتحسن من عيوب واضحه فيها بتاثر عليها نفسيا مثلا مش شايف فيها اي مشكلة و حد هيقول للجمال لأ

دلوقتى فعلًا العمليات دى اشتهرت اووى حاليا بسبب الحوار ده .. علشان ترجع ثقة جوزها :\
و عمليات شفط الدهون و ألخ !
بس هو لو هى هترجع ثقته من المنظور ده ! الكلمة حتى فيها تقليل كبيير من شأنه
يعنى اومال فين الدين و ان لازم نرضى بكل اشى .. يعنى مهى ممكن تعمل العملية من هنا
و ربنا يريد و تعمل حادثة تانى .. مش ممكن يكون شكلها مش مقبول علشان زوجها نظرته تتحسن :\
و من نظرة تانية مفيش حد مش جمييل بالعكس لكن درجات الجمال العالية بقى و انى انظر ليها بتخلينى اشوف كل شىء
فالخلف انه قبح :\ ..

بس كدة


------------------------------------------------

تانى اشى بقى هنا

اقتباس اولا انا عارف ايه الحلال وايه المنكر ؛ ومعايا 7 اجازات فى روايه حفص ؛ واتعلمت على يد شيوخ اخركم تشوفوهم فى التلفاز ومش عاوز اتكلم على نفسى لانى مش بحب كده ؛ ومبحبش انى اتكبر ... ثانيا انت عندك صندوق الوارد وصندوق الصادر

انا مش عارفة بس عيد نظر فكلام حضرتك تانى
انا مش عاوزة أجرح فالكلام

بس كان فى حديث كدة كذا داعية ذكره فبرامج
بيتكلم عن جامع الناس بتروح فيه بعثات تعليمية تقريبا
و فيه كذا مجلس لكذا شيخ .. و انت مهاجر و بتروح تختار ال تجلس معاه
و تتعلم من خبراته ( انا مش فاكرة الحوار بالظبط بس ذاكرتى ضعيفة شوية معلش )
فاتنين راحوا لأول شيخ و قاله كلمة مش تمام تقريبا فالشيخ زعق فيه و قاله انت مين اصلا وانا الشيخ هنا
فانتقلوا لشيخ تانى و نفس الحوار و كان الرد مختلف .. و اتاسف لو ان بشريته و نفسه ظهر منها اى اشى يخلى الناس تقول عليه كدة

مش بحب اقول حاجات دينية بالطريقة دى بس معلش بقى ^^

فانك تبقى عارف فالدين .. ده فخر طبعًا لاى نفس بشرية
بس الطريقة
الرسول صلى الله عليه و سلم مكنش بيستهون بالكفار و هكذا

انا شايفة ان نظرتك اكنك مؤمن بربنا و الباقى كلهم كفرة
او مش زيك
و فعلا لو هتكمل دراسة .. لازم تغير النظرة

و ااه اكييد حاليا نسبة كبيرة من الشباب ميعرفوش اشى عن دينهم
بس لما نوجهلهم الكلام بالمنظور ده ! هنبعدهم اكتررر
فازاى بقى ربنا حطنا خلفاء الارض
و بنعمل كدة فعباده !!
بدل منكلمهم من منطقهم و نوريهم ان الدين جمييل
و بيشمل جميع الشخصيات
حتى فمنطقة القصاص
ربنا ذكر ان لنا فالقصاص حياه و ذكر التسامح و العفو
فان النفسويات تختلف مش معناه ان الدين يختلف :\\

انا مش عارفة طريقتى شكلها ايه
بس فعلا النظرة دى بتخلى الناس تبعد عن الدين اكتر

فحبيت اسجل اعتراضى بس من كتر ضيقتى مش اكتر :|
و اسفة لو كنت ادخلت

[SiLver Spectra]

انجل سمايل
الرضى مش بيكون بمعنى انك تسيب نفسك فاشل مثلا دراسيا
نفس الفكرة ..الاهتمام بالشكل بيكون كويس . في حالة انه كان مش زائد عن حده
و بالتالي ماينفعش تبقى القاعدة بتاعتنا هي اننا يا نسيب نفسنا يا نغير كل حاجه فينا
خليك وسط ..
و برضو انا مؤمن بان مافيش انسان كامل و عمري ما هعمل عملية تجميل مع ان فيه عيوب
حتى عندي تجمع كالسيوم تحت الجلد في ظهر ايد (نفخة كدا بسيطه) ..بس مش ظاهر كويس . و ماحدش بياخد باله منها غير لو قولتله و تنيت ايدي ...كتير نصحوني اشيلها و قالولي على حالات مشابه و اتشالت .. بس انا مطنش
شايفها مش باينه اصلا و مش مأثره عليه في حاجه
غير كدا كنت شيلتها طبعا

بس مش معقولة مثلا بنت عندها وحمة في ايديها كبيرة و ظاهره و مديه منظر مش كويس و نقول سيبها اصلها مش بتضرها في حاجه !
طب ليه طيب ما تعملها جراحة ايه المشكلة !
الوحمة ناتجة كمان من جينات تسببت في زيادة الميلانين تحت الجلد في منطقة معينة
و علاجها مش صعب

نورتي ..

[روح صامتة]

طب هوة مش فيه بنات بتعمل ازالة لاثار حب الشباب بالليزك ..
وفيه بيعملوا ترميم بشرة .. وسبحان الله حب الشباب دا مرض مش مؤذي
بس بيسيب اثار ظاهرية ع الجلد .. مرض الصدفية .. بيسيب اثار في الجلد
مع انه مش مرض معدي .. عادي يعني ..
اللي عاوز يعمل عملية هيعمل و اللي مش عاوز ما يعملش ..
ناهيك ان العمليات كتير بيمتنعوا عنها عشان معندهمش مقدرة مالية عليها
وانا شايفة ان عيبها انها بقت تجارة ..
وبعدين فيه حاجة اسمها ادمان عمليات التجميل .. وفيه قصص لناس اصيبت بالمرض دا
بس هوة الموضوع متوسع لان العمليات دي ليها ضررها وليها نفعها ..
ليها بردو مساوئ ومخاطر بس هية الفكرة لتحسين حاجة معينة ف الجسم مش غلط ابدا ..
وشكرا ..
ارق تحياتي

[✿ Celiηα]

مش حابة اضيف حاجة على كلامي امبارح


وكل اللي حضرتك ذكرته فالموضوع بردو ذكرته امبارح ورديت على حضرتك فيه

،