الحلقة الثانية من حوار خاص ومعانا ( ۩۩ elMagic ۩۩ )

[عاشق متيم]

بسم الله الرحمن الرحيم النهاردة معايا فى حوار خاص ضيف غنى عن التعريف معايا المراقب العام ( ۩۩ elMagic ۩۩ ) اهلا بيك يا ماجيك اهلا بيك يا معلم ثاانكس لإستضافتكـ نبدأ الاسئله اولا البطاقة التعريفيه للعضو احمد 20 سنه تالته تجاره إنتظام جامعة سوهاج إنضمامي لبنات مصر كان فى آخر مارس 2010 وإتعرفت عليه عن طريق أخويا اللى مسجل فيه قبلي ونقول الهوايه الديزاينز .. حياتك 1- الصفة اللى عندك وعاوز تتخلص منها ؟؟؟ والصفة اللى عندك وعاوز تنميها ؟؟؟ ممكن الكسل ،، العند 2- حياتك قبل وفاة الوالدة ( رحمها الله ) وحياتك بعدها ؟؟ دا انت ذاكرت المدونه كويس اهو قبل انا كنت فى حضانه اكيد مش فى حالة إدراك كامله بس طبعا الواحد كان حاسس بدفئ مع والدتي واخويا ووالدي كان بره مصر ساعتها .. بعد بقآ الواحد كان بدأ يكبر وطبعا والدي كان موجود كانت الايام صعبه شويه فى البدايه بس مع الوقت الحياه بتمشي الحمد لله .. 3- انت ذكرت ان والدك اقرب حد ليك ؛ هل بتبوح له بكل الاسرار ؟؟ ولا فى حاجات لا تذكرها ؟؟؟ اكيد مش كل الاسرار بتتقال ولكن نسبه كبيره جدا منها هو يعرفهــا ،، انا ووالدي أصحاب .. 4- علاقتك مع الوالد والاخوات فى البيت ؟؟ وهل حدث خلاف قبل كده ؟؟ واتحل ازاى ؟؟ مفيش بيت مفيهوش خلافات ولكن بتتحل طبعا بالتفاهم أو ممكن بناخد فتره كده وبعدها بنرجع نتكلم كأن مفيش اى حاجه حصلت عادي .. 5- اخر فتره لاخوك فى الجيش عدت عليك ازاى ؟؟؟؟ تقريبا كانت أصعب فتره بالنسبالنا إحنا فى البيت لانه مخلص من أقل من 20 يوم وحال البلد كل الناس عارفاه والجنود الكتير اللى كانت بتموت بس الحمد لله عدت على خير وخلص بس هو لسه مجابش شهادة التجنيد مشوار مصـر من البلد صعب 6- فى حلم كان نفسك تحققه ولما قربت توصله الظروف كانت اقوى منك ؟؟ ايه هو الحلم ؟؟ والسبب كانت الظروف ولا منك ؟؟؟ إنى أدخل كلية هندسه والسبب مني مفيش اى ظروف تمنعك من تحقيق حلمك إلا نفسك .. رغم إنى قفلت الرياضه 2 بس ضيعت معظم المواد التانيه مني فاشل من يومي 7- ليه اخترت ان مرحله الطفوله افضل مرحله فى حياتك وبتتمنى انها ترجع تانى ؟؟ دايما أفضل مرحله لناس كتير بتبقى الطفوله مرحلة مفيهاش اى مسؤليه وكلها لعب وبراءة الطفوله رغم إني كنت شقي بس بريئ بردوا 8- كان نفسك تتدخل كليه التجارة ؟؟ ولا المجموع هو اللى اجبرك ؟؟؟ هو حد نفسه يدخل تجاره قولت فوق إني كنت عايز ادخل هندسه من صغري بيقولولي يا مهندس اصلا بس النصيب .. الحمد لله ع كل حال 9- علاقتك مع اصحابك عامله ازاى ؟؟ وهل قطعت علاقتك بصديق ؟؟ كان ايه السبب ؟؟؟؟ لا تمااام كل أصحابي اللى بأحب اتعامل معاهم هما أصحاب قدام من المراحل السابقه وانا بأستبعد إنى أقطع علاقتي بأى حد ممكن بس الاسلوب بيختلف وبيبقى تعامل سطحي شويه ولكن مبأقطعش الصداقه خالص حاطط إحتمال إني ممكن فى وقت ما أحتاجله فى حاجه .. 10- ايه اكتر حاجة ممكن تعصبك وتضايقك ؟؟؟ إنى أكون مدي معاد لحد وانا ألتزم به فى حين إن هو ميلتزمش به دا بينرفزني جدا .. 11- مواصفات فتاه احلام الماجيك ؟؟؟ بإختصار تكون متدينه وفيه مشاعر متبادله وكل شئ بيبقى نصيب فى الاول والاخر .. وجهة نظر 1- رأيك فى ارتفاع ايرادات الافلام الهابطة ؟؟ سوق التجاره يعمل أكتر من كده 2- تفسيرك لانتشار برامج المسابقات وايه الفرق بين الصورتين واكسب 10 الاف دولار والحاجات3دى؟؟ وهل حاولت تتصل بالبرامج دى ؟؟ تضييع وقت والحاجات دي لا يمكن تنتشر الا وهى عليها تفاعل كبير من الناس والمصيبه إنهم بيبقوا عارفين إنها نصب فى نصب بس تعمل ايه فى الدماغ الحلوه لا محاولتش قبل كده .. 3- مصر تحتل المركز الرابع عالميا من حيث الدخول علي المواقع الإباحية والثاني عربيا مراهقه متاخره يا عم الشعب هرموناته زايده عن اللازم 4- الامن فى مصر وانتشار البلطجة والسرقات والانتهاكات الامن ضايع من بعد ثورة يناير وضعف الامن هو اللى أدي لإنتشار السرقات والانتهاكات والافعال الغير قانونيه فى البلد .. ربنا يصلح الحال 5- مع او ضد الخطوبه طويله المدة التى قد تمتد 5 سنوات بحيث يخطب الشخص الفتاه فى اولى ثانوى وينتظر حتى الجامعة ؟؟ وايه العواقب التى ممكن تحدث للفتاه اذا قام الشخص بخطبه الفتاه لمدة 4 سنوات ثم تركها ؟؟؟ ممكن انت تلاقي الحاله دي بتحصل مع الاقارب خصوصا الصعيد الجواني بتلاقي الاجداد قاريين فاتحة ولد وبنت لسه اطفال وصغيرين ولما يكبروا يتجوزوا لو مش بيحبوا بعض او الحب من طرف واحد مبيقدروش يرفضوا وبيبقى الامر واقع قدامهم .. انا ضد اى إرتباطات تحصل لفرد لم يتخطي سن الرشد سواء كانت خطوبه او زواج لان العقل بيبقي لسه عيل وطفولي الى حد ما القرارات دي بتبقى مصيريه مينفعش تتاخد الا والانسان فى كامل رشده ولازم كمان يكون بالاتفاق وبتراضي الطرفين .. بالنسبه للعواقب فا لو بتتكلم عن شخصين مخلصين جامعه اكيد بتبقى صدمه للبنت خصوصا لو كانت بتحبه وهنا الخطأ جاى من الولد هو اللى مطلعش راجل بس دي مش تبقى نهاية العالم والصدمه تاخد وقتها وتعدي وترتبط بواحد تاني يقدرها ويحبها .. 6- معظم المشاكل فى حياة بعض الاشخاص ومعظم حالات الاكتئاب تكون بسبب فشل علاقات الحب ؟؛ العيب فى الحب ولا العيب فى الاشخاص اللى مش عارفين معنى الحب واختيارهم الخاطىء ؟؟ الحياه مسخره علشان تتعلم منها مفيش حد هيمشي طول حياته ميغلطتش لازم هيغلط ويتعلم من خطاه علشان ميقعش فيه مره تانيه والحب كيان ثابت اكييد العيب بيكون فى الاشخاص .. 7- التقليد لمجرد التقليد بمعنى فنان او مغنى لبس حاجه يبقى لازم الشباب تلبس زيها ؛ مطرب عمل قطع فى حاجبه !! كل الشباب تعمل زيه ؟؟ حد لبس فسفورى او فيزون ؟؟ البنات تقلدها ؟؟ رأيك ايه فى التقليد الاعمى ؟؟ وهل ممكن تلبس حاجه علشان حد انت بتحبه لبسها ؟؟؟ التقليد الاعمي غباء وجهل وانا مبلبسش غير اللى انا شايفه مناسب لشخصيتي وجسمي 8- انت طالب جامعى ؛ شايف التعليم فى الجامعة ازاى ؟؟ ورأيك فى معامله الدكاترة للطلبه ؟؟؟؟ التعليم فى مصر عموما زباله خالص للأسف مفيش اى اهتمام من قبل المختصين والتعليم من اهم الاشياء اللى لازم يكون فيه إهتمام بيه وتتطور بشكل دائم بحيث إنها تواكب العصر لكن انت عندكـ منهج ثابت دش فى دش ومدرسين بيجروا ورا الدروس والفلوس وطلبه إتربت على الدروس الخصوصيه وإن المدارس دي اماكن للترفيه فقط ! كل الحاجات دي اكيد مش هأتطلع غير جيل معندوش لا وعي ولا فكر سليم ويدخل الجامعه وهو لسه دماغه صغيره والدكاتره فيه كتيير منهم مش بيهتم بالمحاضرات اصلا .. ماهو خلاص بقى دكتور قد الدنيا وفرصه يطلع اللى إتعمل فيه وهو طالب فى الطلبه اللى بيدرسلهم ! دا غير طبعا تجارة الكتب اللى هيشتري الكتاب هينجح واللى مش هيشتريه مش هينجح حتى لو الحل بتاعه فى الامتحان يأهله للنجاح ! مشكلتنا علشان تتحل لازم تظبط الاساس " مصادر التعليم " لان مادام إنت الاساس بتاعكـ مش تمام يبقى عمركـ ما هتقدر تظبط باقي الاسس .. رياضة 1- فرصة مصر للوصول لكأس العالم ؟؟ ومباراة مصر مع غانا ؟؟؟ دا بيبقى توفيق من عند ربنا وطبعا إن شاء الله الفوز يكون للمنتخب الوطني وانا عندي مصر تلعب ضد غانا أفضل من إنها كانت هتعلب ضد الجزائر خصوصا والقرعه الاخيره كانت بتتوقف فقط على الاربع فرق " مصر والجزائر وغانا وبوركينا فاسو " وياسلام بقى لو كانت وقعت معانا بوركينا فاسو .. 2- فرصة الاهلى فى الفوز بدورى الابطال الافريقى والوصول لكأس العالم للانديه ؟؟ بإذن الله كبيره بس عارف إنت عيب اى لاعب مصـري إنه اول ما يكون قرب يوصل لهدفه بيقل نشاطه اوى فى الملعب ظناً منه إن خلاص الفوز مضمون ويتصدم بالواقع ! فا ربنا يستر والاهلي يكمل زي ماهو شغال كده .. 3- الدورى اتحدد له نصف نوفمبر ؛ شايف ان الدورى هيرجع فى الميعاد ؟؟؟ ولا ممكن يتأجل ؟؟ ومصر والصومال البدان الوحيدان اللى مش عندهم دورى ؟؟؟؟ والله دي حاجه فى علم الغيب بس إن شاء الله الامور تكون إتعدلت الى حد ما علشان دايرة العمل تكمل البلد حالها واقف ليها فتره طويله ودا مش حلو طبعا خصوصا وإن مصـر جمهوريه كبيره مش زي اى بلد تانيه.. 4- مع او ضد اقامه المباريات بدون جمهور ؟؟ وشايف محتاجين ايه علشان جمهورنا يكون زى اوربا ؟؟؟ منع الجماهير من الحضور دا قرار بيبقى نتيجة الخراب والدمار اللى بيحصل فى الملاعب شعب لسه فيه أدمغه كتير متخلفه وفكرها متعصب محتاجين شوية إنتماء وحب للبلد .. 5- رأيك فى خروج الزمالك من دورى ابطال افريقيا ؟؟ وبعض المناوشات التى حصلت بين اللاعبين فى مباراه الاهلى والزمالك ؟؟؟ انا واحد من الناس اللى تقريبا مشوفتش ولا مباراه للدوري حتى الاهلي والزمالك متفرجتش على المباراه وخروج الزمالك فا هو معندوش لا حظ ولا توفيق من عند ربنا واكيد بيبقى فيه تقصير من اللاعبيبن المفروض إن دي كوره ودماغنا تترقي شويه .. خبر وتعليق العضو عليه 1- بريطاني يكسر الرقم القياسي و يبقي بلا نوم لمدة 11 يوماً ( توني رايت 42 عاماً كسر الرقم القياسي العالمي للبقاء من دون نوم لمدة 264 ساعة والمسجل في موسوعة غينيس باسم الطالب الامريكي راندي غاردنر عام 1964 وساعده احتساء الشاي الاخضر والسباحة والتحدث الى اصدقائه ايضا على مقاومة الارهاق. وكانت موسوعة غينيس للارقام القياسية قد اعلنت انها ألغت الجزء الخاص بالبقاء دون نوم بسبب المخاطر الصحية التي قد يسببها ) طيب ما ياخد منوم ويعمل العكس ونشوف هينام كام ساعه ايه العبط دا 2-.بريطاني يستعيد محفظته المسروقة بعد 35 عاماً ( قالت صحيفة "ديلي تليغراف" البريطانية إن ريتشارد لين (58 عاماً)، تأثر كثيراً حين سرقت محفظته من جيبه عام 1978، وعثر عامل بناء على المحفظة وسط مواد مرمية وراء جدار في مركز رياضي حيث كان يعمل. وأضافت أن عامل البناء نشر إعلاناً في صحيفة محلية عن العثور على محفظة مفقودة واسم مالكها كونها احتوت على بطاقة باسمه. وقال لين "العثور على المحفظة كان أمراً مدهشاً فعلاً، ولم يكن يتخيل مطلقاً هذا الأمر، وتلقى اتصالات عديدة من أصدقاء وأقارب وحتى والدته لإبلاغه بالنبأ". وأضاف لين أن "لصاً سرق المحفظة من جيبه، وكانت تحتوي وقتها على ما يصل إلى 15 جنيهاً إسترلينياً، وقام برميها بعد أن أخذ المال منها" يااااه مال حلال 3- حزب الحمير العراقى يطالب بمحاكمه جنائيه دوليه لقتله حمير سوريا ( عمر كلول رئيس حزب الحمير العراقى طالب بمحاكمة دوليه جنائيه دوليه لبعض الجنود السوريين الذين اعدموا مجموعة من الحمير ؛ وقال كلول ان الحمار هو الحيوان الذى يعمل ويشقى ويتحمل الكثير وهو الذى انقذ الكثير من السياسين والقاده بالهروب على ظهره وسط الجبال ) الرأفه بالحيوان يا جماعه مش كده المنتدى 1- رأيك فى الاستايل الجديد التجديد مطلوب 2- هل بتقدر تعبر عن اللى جواك من خلال مدونتك ؟؟؟ اه بنسبه كبيره 3- العلاقة بينك وبين ملك جبال الاحزان تقول عنها ايه ؟؟ إشمعنا الواد داا لا علاقه حلوه وزي الفل هو فيه زي الواد محمود 4- هل حدث خلاف بينك وبين اى عضو قبل ذلك ؟؟؟ اه اكيد حصلت خلافات بس بنكبر عادي مفيش حاجه مستاهله إحنا فى منتدى .. 5- ليه اخترت قسم الفوتوشوب انشط قسم ؟؟ وهل انت شايف انه انشط قسم ؟؟؟؟ بالعِنـد فى نور وحياتكـ النقاش قسم جاامد بلا ادني شك زي ما كمان شايف إن الفوتوشوب نشاطه بقآ مختلف عن الاول .. 5- شايف النشاط فى قسم السوتش ماكس ازاى ؟؟ مش راضي عنه مشكلة الفلاشات إن مش اى حد بيقدر يشتغل فيها وكمان اللى ليهم فى الفلاش بيبقى فيه حالة ركود وكسل لان الفلاش دا عايز دماغ علشان تظبط التصميم لو الواد محمود بيجي كتير انا كنت أخدت قرار إنى أشيل نفسي من القسم لاني مقصر فيه حتى لو كنت بألبي كل الطلبات اللى فيه فا دا اكييد مش كفايه .. ربنا يسهل بقآ ونلاقي حد كويس يمسك القسم .. 6- احد الاعضاء ذكر ان الماجيك نشاطه مش بقى زى الاول ؟؟ هل نشاطك قل فعلا ؟؟ اه اكيد قل منها شوية ملل انا واحد ليا 3سنين ونص فى المنتدي وكمان المهام الرقابيه يعني انا بيبقى ليا نشاط محدش بيشوفه ماهو فيه ناس كتير فاكره إن النشاط فقط مقتصر على التفاعل والظهور فى مواضيع الاعضاء ! بس الواحد اهو بيحاول يرد فى مواضيع كتير .. 7- تفسيرك لحاله الملل التى اشتكى منها بعض الاعضاء ؟؟؟ زي الروتين اليومي إنك تدخل المنتدى متلاقيش فيه اى جديد فا طبيعي بتمل ولكن انا شايف دلوقت التفاعل بدأ يرجع تاني والمسابقات بدأت تظهر والناس تتفاعل وتشتركـ إن شاء الله اللى جاى أفضل .. 7- تفسيرك لغياب بعض المراقبين وقيام الطاقم الادارى بدورهم ؟؟؟ اوقات كتير الظروف بتبقى أقوى من الانسان يعني فيه من المراقبين ناس النت عندها مقطوع وامور الحياه محدش بيقدر يتحكم فيها وبعدين الفكـره مش في إن مفيش مراقبين الفكره في إن المهام الرقابيه دي قايمين بالواجب فيها ولا لاء وانا شايف إن الحمد لله مفيش اى تقصير رقابي ولا اداري ،، اى حد موجود بيتابع وبيشتغل .. 8- العلاقة شايف العلاقة بين الطاقم الادارى ككل عامله ازاى ؟؟؟ تماام مفيهاش اى مشاكل اوتوجراف خاص الوالد يخليك لينا يا حج الوالده ( رحمها الله ) وحشني حضنك الاخ ربنا معاك وتعمل اللى انت عايزه الاخت اما نشوف اخرتها معاكي الاصدقاء ككل شباب زي الفل والله من المنتدى silver spectra ما تظبط مسابقه جديده يا عم بلاش حوار اخر مسابقه داا او تبدأ تعمل الشروحات اللى إتاجلت ايام ما حصل عطل فني فى المنتدى والناس تطبق وتتحدى بعض انت عارف انا مش بتاع سيناريوهات mahmoud kamel غير رابعه يا محمود وحط صوره خمس صوابع او صوباع واحد زي بعضه ساحر الاحزان نفسي اشوفك مره وانت عصبي ملك جبال الاحزان شهادتي فيه مجروحه الحقيقه جبل عالى إستمري بعطاءكـ يا أستاذه امل طمطم البت دي راسمه على هجره غير شرعيه من المنتدى وبعدين يا كوته هاغلس على مين من بعدك الرحال المتمرد عاجبني هدوءه إستمر يا معلم سيلينا من الناس اللى قدرت تثبت وجودها فى فتره قصيره جدا إستمري بقآ وربنا معاكي فى دراستكـ يا بتاعت الثانوي شخصيات عامة حسنى مبارك امتى هتتوكل على الله يا حج حبيب العادلى المشير طنطاوى ربنا يصلح حالكوا احمد شفيق يا واد يا فلول حمدين صباحى انت مش انت وانت وطني محمد البلتاجى عصام العريان عيد الضحيه قرب اوباما امير دوله قطر خليك فى حالك اخر سؤال النصيحة اللى تحب تقولها للاعضاء الجداد والزوار اللى مش سجلوا ؟؟ للاعضاء الجدد متبخلوش على المنتدى باى جديد خاص بيكوا تأكد ان هيكون فيه مقابل لعطاءكـ للزوار يا بخت من زار وسجل وبكده تكون انتهت الاسئله بشكرك على تلبيه الدعوة شكرا على الدعوه الجميله إحترامــي وتقديري لشخصك الكريم ,, وفى نهايه الحلقة احب اشكر مبدعة الهوايات Arco Baleno على تصميمها الهيدر والخلفية والبنر وانتظروا الحلقة القادمة مع المشرف المتميز ( مورشو ) وهنزل برومو للحلقة قريبا دمتم فى امان الله

[big bốss]

هههههههههههههه

لا بجد حركه جامده مع الماجيك
و عجبنى انك اخترت الفوتوشوب بالعند فيا ^_^

و ربنا يوفقك يا صعيدى

و استضافه جميله يا عاشق كالعاده

تقيمى + نجومى + التثبيت

[♥SaRa]

لابجد حلقة جآآآمدة اوي
عثل يا ميدو والله
ودمكـ خفيف كاعادهـ
واجمل جملة عجبتني عيد الاضحية قرب
بجد جامد جـدي جدي جدي
والاستضافة جامدة جدي جدي
تسلم عاشق احلي الاستضافة الجآمدة دي ^^
نجومي ...

[ساحر الأحزان]

انا بقالى فى المنتدى خمس سنين ومن يوم ما جيت وانت يا ماجيك

فى كلية التجارة انت حبيتها يابنى ولا اية

وما قادر على بعادها

شفت بقى انت عصيتنى على شان اريحك

نورت يا ماجيك الحوار مع عاشق

جميل الحوار عاشق

وننتظر الضيف القادم

[Sea Pearl]

حوار ممتع مع ضيف مميز ومحاور رائع
وفى انتظار الحلقة الجديدة
وبالتوفيق

[CAN _ 7LM]

حوار مميز مع مع محاور رائع
فى انتظار الحلقه القادمه.

[Angel Smile]

استضافة جمييلة كتيير
بالتوفيق بقى ليكم
فى انتظار الحلقة الجديدة بقى ^^

[نور ونار]

حوار جميل واجابات موفقه
تدل على روح جميله
تسلم ياعاشق على الحلقه
فى انتظار بقيه ضيوفك

[دمعه حائره]

حورا رائع مع اخ غالى ومحترم كلنا بنقدر وجوده ومجهوده الكبير
دايما بيساعد الكل ومش بيتاخر عن اى طلب
ونشاطه الرقابى واضح جدا
ربنا يرحم والدتك ويخليلك والدك واخواتك
نورت الحلقه يااحمد وان شاء الله سنه دراسيه موفقه ليك
شكرا عاشق مجهود عالى

[الأميرة رودي]

حلقه جميله
ماجيك اجاباته هاديه كعادته
وبالنسبه لحلمك اللى متحققش بدخول هندسه فأنتممكن تحقق احسن منه فى مجالك حاليا
ربنا يوفقك فى دراستك وفى حياتك العمليه بعد كده
ويخليلك اسرتك الصغيره الجميله دي
ويرحم والدتك يارب

اسئله متنوعه عاشق وبرنامجك ممتاز حقيقي
بس انت بتذاكر من المدونات وتسأل الاعضاء
يعني مفروض تدفع ضريبه على كده

أمتعتونا بحواركم الراقي ربنا يوفقكم
تسلم عاشق ف انتظار الحلقه القادمه