الحلقة الثالثة من حوار خاص ومعانا ( morshooo ) ( الجزء الثانى )

[عاشق متيم]

بسم الله الرحمن الرحيم الجزء الثانى من حوار خاص مع العضو المتميز ؛ مشرف يوميات الأعضاء morshooo المنتدى 1- اسباب ترك مورشو الاشراف ؟؟ كنت عايز ارتاح فعلا من اليوميات وارتاح من الالتزام بالقسم رغم انى مكنتش بعمل مجهود كبير لانى مش من النوع الى بيلف فى المنتدى ولكن كنت حابب اسيب القسم فترة ودا كنت قولته قبل كدا لطارق من كام شهر. وسبب رجوعه ؟؟؟ سبب رجوعى ان اسيل مشرفه القسم عرفت انها اتصابت ودا من كلام نور فى توبيك فقولت طالما اتصابت يبقى مش هتدخل فترة فمسك القسم ودخلت بعديها بيوم تقريبا بس دلوقتى بقالها اسبوع مش بتدخل . 2- الغرض من عرض ظواهر المنتدى ؟؟ ان الاعضاء تقول رئيهم فى اعضاء كتير بتكون عايزة تقول او تعلق على موقف معين فى المنتدى ومش عارفه تقول فين ولو عرفت هتقول فين ياترى كلامها هيوصل والا لا . فاعتقد ان لما ينزل موضوع زى كدا الادارة هتشوف ردود الاعضاء ودا حصل فى توبيك ساحر لما عمل استفتاء عن سبب حظر الاعضاء ودى ظاهرة كنت اكلمت عنها قبل كدا . 3- سبب اصرار مورشو على معرفة اسباب الحظر ؟؟ وشعورك بعد ما عرفت نتيجة التصويت ؟؟ منعا للكلام الكتير احنا فى منتدى وانا عارف كويس الى بيحصل ايه لما عضو ياخد حظر ممكن يكون واخد حظر لخلافه مع ادارى او مراقب وفجاة تلاقى الاعضاء مطلعه كلام فى كل مكان ^_^ دا كان بيقول لفلانه هاتى رقمك دا بعت رسالة عاكس فيها فلانه دا شتمها فى رساله خاصه .... الخ لما عرفت نتيجه التصويت مستغربتش والا حاجا وقولت لنفسى كدا كدا لما حد بيتحظر كله بيعرف السبب الاساسى رغم الاشاعات 4- انت اتحظرت قبل كده ؛ ليه شايف ان لازم الادارة كلها تتفق على قرار الحظر وان القرار مش يتاخد بطريقة فردية ؟؟ انا اتحظرت قبل كدا تقريبا مرتين . والمرتين كانت بسبب مشاكل مع اداريين والمرتين كان قرارا فردى ^^ اكيد لازم قرار الحظر لما يتاخد يكون قرار جماعى ما ينفعش اكون على خلاف او اختلاف فى وجهات النظر بينى وبين ادارى فياخد بعضه ويعملى حظر او مثلا ادارى او مراقب داخل يحل مشكله بين عضوين فيدى لواحد منهم حظر مش يمكن حكمه فى المشكله مكنش عادل ودا طبيعى مفيش حد دائما بتكون وجهة نظرة صح على طول . 5- انت طالبت ان الادارة توضح المادة التى خالفها العضو فتسببت فى حظره ؟؟ انا قولت كدا فعلا واقترحت ان يتعمل توبيك يتثبت ولما عضو يتحظر الادارى يدخل يقول تم حظر فلان عشان خالف قوانين المنتدى ويكتب البند الخاص بقوانين المنتدى الى استخدمها لحظر العضو دا . ومش عايزهم يقولو هو عمل ايه عشان مايقولوش ماينفعش عشان ميبقاش فى تشهير بالاعضاء لكن قولنا دا اتحظر عشان خالف قوانين المنتدى . 6 - انت اقترحت عمل قسم لذوى الاحتياجات الخاصة ؛ والادارة قالت ان تنزيل المواضيع يكون فى التنمية البشرية ؟؟ فلجأت انك تعمل حملة فى اليوميات ؛ هل ستستمر فى ذلك ؟؟ وهل ستحاول مرة اخرى تجديد اقتراحك ؟؟؟ بص انا من البدايه اصلا كنت هعلن عن الحمله فى اليوميات بس من قوانين المنتدى ان لازم الاقتراحات تكون فى صوت الاعضاء وكدا كدا هو قسم مش متشاف للاعضاء فنزلت التوبيك فى صوت الاعضاء الاول وبعد كدا اعلنت عن الحمله طبعا حكايه اننا ننزل المواضيع دى فى التنميه البشريه هيكون زى ما بنزل التوبيكات دى فى اليوميات ^^ يعنى ذوى الاحتياجات الخاصه المفروض ان مالوش اى علاقه بالتنميه البشريه خالص . كان ممكن يعملو قسم فرعى مكنش هيبقى فى مشكله لكن المهم يكون قسم لوحدة مستقل سواء فرعى او رئيسى مش مشكله . انا تقريبا بنزل كل يوم توبيك خاص بذوى الاحتياجات فى اليوميات لحد ما الاسبوع ينتهى سواء الادارة وافقت او لا على انشاء القسم المهم ان الواحد قدم فكرة ومش شرط انها تتنفذ بس المهم يكون الرفض جماعى برضو مش فردى او مش عشان اتقال يبقى فى قسم التنميه يبقى خلاص قرار الادارة هو دا ان المواضيع تنزل فى التنميه زى ما ساحر فى توبيك ساب رد وقال ان منه قالتلك التوبيك ينزل فى التنميه المهم يكون شايف ان فعلا دا مكان مواضيع ذوى الاحتياجات الخاصه . 7- هل علاقتك توترت باسيل بسبب اختلاف ارائكم السياسيه ودخولكم فى نقاش قوى وردودكم على بعض خلال استضافتك للدكتور طارق ؟؟ لا بالعكس هى كانت فترة وعدت صحيح كان فى خلاف بينا بس مكنتش هتوصل اننا نكرة بعض او اننا نبقى اعداء لبعض كل واحد ولية رئيه ومقتنع بيه وكفايه انها لما الامور هديت معاها واعصابها ارتاحت خلاص الامور رجعت لطبيعتها والعلاقة بينكم كمشرفين عامله ازاى ؟؟؟ زى الفل مفيهاش اى خلافات بس لسه مشتغلناش فى القسم وفى افكار ان شاء الله هنشط القسم قريب 8- افضل حوار عملته مع عضو وكان ايه السبب ؟؟ كل الحوارات بالنسبالى كانت مميزة اكيد وبيكون وراها حاجا عايز اوضحها للاعضاء . 9- هل فى عضو معين كان موجود وترك المنتدى وتتمنى انه يرجع ؟؟ قلم بلا حبر من الاعضاء الى ليهم وجه نظر مميزة جدا وليه مواضيع مهمه جدا ودماغه شغاله على طول ان شاء الله نشوفه قريب 10- شايف اقبال الاعضاء على قسم يوميات الاعضاء ازاى ؟؟ الحمد لله كبير جدا والاقبال على المواضيع كويس جدا ودا مهم جدا وقسم اليوميات بقاله فترة كبيرة بيتصدر انشط الاقسام حتى فى تقييم الادارة للقسم الحمد لله دائما بيكون فى المراكز الاولى . 11- بتذعل لما تشوف حد من الاعضاء عمل موضوع عن ظاهرة فى المنتدى ؟ وخصوصا انها فكرتك ؟؟ لا بالعكس بكون مبسوط جدا لسبب بسيط اكيد كل واحد وليه وجه نظر وكل واحد بيعرض حاجا مختلفهيعنى مش شرط ان لما اعرض ظواهر تكون هى دى بس الى موجودة . 12- انت لم يعجبك ان نور عمل الاستفتاء فى قسم النقاش ؛ وقلت لو الاستفتاء اتعمل فى قسم اليوميات؛ قسم اليوميات هو اللى هيكسب ؟ اكيد هيكسب لسبب بسيط انا عامل استفتاء فى قسم يعنى الى هيدخل يشوف التصويت واحد من المهتمين بالقسم فطبيعى هيصوت للقسم الى فيه الاستفتاء او اكيد هياخد تصويت اعلا وعلى فكرة انا اعتراضى كان كمان على وجه المقارنه اعتقد ما ينفعش اقارن بين النقاش واليوميات والا النقاش وقلم الاعضاء هو بس نور كان عايز يقولكم النقاش شغال واحتمال كان عايز يدى لنفسه دفعه عشان يكون احسن من ماهو عليه . بامانه شايف ان قسم اليوميات انشط قسم فى المنتدى ؟؟؟ بص انا مش بقتنع بموضوع انشط قسم فى المنتدى ولكن من انشط اقسام المنتدى مفيش حاجا اسمها انشط قسم لو بالنشاط يبقى قسم الالعاب ممكن تلاقيه انشط قسم بردود الاعضاء فيه . 13- الاعضاء بيقولوا على مدونتك انها مدونه ساخرة ؟؟ انا تابعت مدونتك وشايف ان اسلوبك اتغير فى الكتابه عن البدايه ؟ ( السبب ) يعنى الواحد لما بيكون عايز يقول حاجا بيقولها انا ماليش فى جو الشعر والرومنسيه وبحبك وحياتى والكلام دا لكن بعرض موقف بقابله فى الشارع مثلا فبقوله فى المدونه . 14-انت دخلت قبل كده نائب مع الماجيك ومع رحال ؛ هل لو فى انتخابات ادارية ممكن نشوفك تترشح ؟؟؟؟ اعتقد ان الانتخابات الاداريه صعب تتعمل دلوقتى الادارة فيها 5 اعضاء دلوقتى ومتواجدين فصعب يتم اعلان الادارى المنتخب حاليا . فعشان كدا مش فى دماغى بصراحه ان ارشح نفسى او لا لو الانتخابات اتعملت . 15- بداياتك كانت فلاشات وكنت ماسك القسم ( كنت ساعتها بتعطى انشط عضو توقيع فلاشى هديه ) وبعد كده اتجهت لليوميات ؛ ليه مش بنشوف لك نشاط فى الفلاشات بجانب اليوميات ؟؟؟؟ انا مكنتش عالمى فى الفلاش ^_^ بس القسم اول لما اتعمل طارق بعتلى امسك القسم وكنت رافض ساعتها بس قالى خليك مشرف عليه وبعد كدا نشوف حد وفعلا وافقت وكان كل شغلى على القسم عمل توقيعات للاعضاء وكنت منزل توبيك عن طلبات الاعضاء والاعضاء كانو مبسوطين بالتوقيعات الفلاشيه بس دلوقتى خلاص الاعضاء اتجهت لعمل التوقيعات بنفسهم ودا كويس انهم اتعلمو عمل التوقيعات . سياسة 1- مصر تعيد الى قطر وديعة بمليارى دولار ؟؟؟ فى داهيه وديعتهم وفلوسهم 2- استقاله البرادعى بعد فض اعتصام رابعة ؟؟؟ هو قال عشان الدم الى حصل اومال كنت فين لما امريكا ضربت العراق بحجه النووى . بس هرجع واقول هو حر فى قرارة 3- مع او ضد سحب الجنسيه المصريه من القرضاوى والهجوم الذى تعرض له القرضاوى فى زيارته للكويت ؟؟ انا ضد سحب الجنسيه من اى حد ولكن القرضاوى عليه علامات استفهام كبيرة جدا بسبب مواقفه الغريبه ضد مصر . 4- شايف ان لجنة الخمسين قادرة على عمل دستور توافقى ؟؟ ان شاء الله هيحصل دا انا ميهمنيش مين فى لجنه الخمسين الى يهمنى شكل الدستور هيكون ايه ودا الى كلنا مستنينه . 5- موقف الدول العربيه مع مصر ؟ دا بيعرفنا الفرق بين الزعماء العرب المسلمين الى بيعرفو ربنا ورسوله وبيعرفنا زعماء الغرب بتوع حقوق الانسان الى هم اصلا اخر ناس بتطبق حقوق الانسان فى بلدهم . 6- موقف قطر وتركيا وامريكا مع مصر ؟ اقولهم عفوا شعب مصر لا يقبل بالمصالح 7- العمليات الامنية التى تقوم بها وزاره الداخلية ؟ كان لازم تقوم بيها من بعد ثورة يناير كان لازم الى بيحصل دلوقتى دا كان يحصل انتو الى ساعدو على دخول الاسلحه لان مفيش رقابه منكم كانت الامور مباحه للجميع كل الى بتعملوة دلوقتى انتو السبب فيه ومطالبين بعودة الامن مرة تانيه ولكن . عودة الامن للشعب مش ليكم انتو . رياضة 1- رأيك فى ما فعله الوايت نايس امام نادى الزمالك ومطالبتهم باستقاله مجلس الاداره ؟ قله ادب لما شوية عيال اكبرهم لسه بياخد مصروفه من ابوة ويقتحم النادى ويكسر ويخرب يبقى قله ادب مشكله العيال دى انها اخدت اكبر من حجمها الامن بيخاف يتعامل معاهم عشان كدا فاكرين ان البلد سايبه وهيعملو الى عايزينه . 2- هتافات جماهير الالتراس ضد لاعبى الاهلى مما تسبب فى الغاء المران وهتافاتهم ايضا ضد اللاعبين فى المطار قبل السفر لجنوب افريقيا ؟؟ قله ادب بص انا كنت فخور جدا فى فترة من الفترات بالالتراس ودلوقتى بجد بقيت اتمنى انهم يغورو فى داهيه وانا مع الاعبين وموقفهم ضد الالتراس . بجد لو عايزين البلد دى رياضيا تبقى كويسه وتوصل كاس عالم لازم العيال دى تعرف حجمها كويس تعرف ان علاقتها بالرياضة تشجيع فقط مش اتخاذ قرارات . 3- فرص مصر فى الوصول لكأس العالم ؟؟ ومبارتنا مع غانا ؟؟ ان شاء هنوصل وعندى احساس كبير جدا وقولت دا فى توبيك فى اليوميات . طالما هنلاعب فريق كبير يبقى فرصتنا كبيرة ان شاء الله . لان طبيعه الاعب المصرى كدا عارف لو كنا قابنا فريق صغير كنت هخاف جدا وعمرى ما بنسى ( سيراليون ) لما خرجتنا من التصفيات قبل كدا وفى فرق كتير جدا صغيرة كانت سبب فى عدم وصولنا لكاس العالم . 4- فرص الاهلى فى الفوز بدورى ابطال افريقيا ؟( قبل مباراة اورلاندو) من وجهة نظرى لو الاهلى صعد اول المجموعه فرصتنا كبيرة جدا فى الفوز بالبطوله . فرص الاهلى فى الفوز بدورى الابطال ( بعد ما الاهلى صعد كأول للمجموعة ) انا قولتلك لو الاهلى صعد اول المجموعه يبقى ان شاء الله هياخد البطوله واعتقد ان دلوقتى الاهلى هو الاقرب صحيح معانا الترجى بس الاهلى بيعرف يتعامل مع الفرق العربيه كويس خاصه الفرق التونسيه . 5- سبب اخفاق الزمالك فى دورى الابطال ؟؟ مجلس الادارة بصراحه . لما فريق يستغنى عن ( صبرى رحيل و سيسيه و رزاق ) وغيرهم بس مش فاكرهم بصراحه اكيد لازم يفشل فريق الزمالك مالوش اى ملامح وحلمى طولان معزور وانا كنت ضد انه يوافق انه يمسك الفريق الفترة دى الزمالك عايز مدرب صاحب شخصيه قويه ومعتقدش ان فى مدرب مصرى دلوقتى ينفع مع الزمالك . 6 - مع او ضد ان الجهاز الفنى للمنتخب يعفو عن عصام الحضرى ويرجع المنتخب ؟؟؟ ضد وكنت دائما بضايق من ( حسن شحاته ) بسبب كدا المدرب الى بيفهم ما ينفعش يقف مع لاعب ضد ناديه يعنى ما ينفعش لاعب يكون متمرد على النادى او يهرب من النادى واخليه يلعب باسم ( مصر ) ودا كا بيحصل دائما من ( حسن شحاته ) . ( برادلى ) مدرب محترف اعتقد لو كان مدرب المنتخب وقت هروب الحضرى من الاهلى مكنش وافق ياخدة عموما الحضرى اعتقد انه خلاص مبقاش احسن حارس فى مصر حاليا ومايستحقش التواجد فى المنتخب . وحركته فى مباراة شيلى وقال انا اعتزلت دولى وهجومة على ضياء السيد وذكى غبدالفتاح 7- شايف ان الاعلام الرياضى هوسبب الفتنة بين الجماهير وفساد الكورة ؟؟؟ اكيد عليهم دور كبير فى فساد الرياضه لما مذيع يطلع فى برنامج يقعد كل يوم مش اقل من ( 3 ساعات ) وفى ايام كان بيطلع يقعد بالـ ( 6 ساعات ) عايز منه ايه هههههههه ؛ دا بيكونو شغالين فى قناة واحدة وبيهاجمو بعض ودا يشجع الالتراس ودا ضدهم عشان بيعاند زميله الاعلامى . 8- مباراة مصر وغانا هتتلعب فى الدفاع الجوى بجمهور ؛ شايف ان الملعب مناسب ولا كنت تفضل ملعب اخر زى ستاد القاهرة او برج العرب ؟؟ ورأيك فى مطالبة البعض باقامة اللقاء خارج مصر ؟؟ وتقديم عرض من الامارات ؟؟؟ اكيد لو استاد القاهرة او برج العرب هيكون افضل خارج مصر دا صعب اكيد انا عندى يتلعب هنا فى ستاد بيشيل 20 الف احسن ما العبه فى استاد فيه 50 الف فى الامارات . 9- سبب حبك لنادال وشعورك لما كسب امريكا المفتوحة من دييوكوفيتش وتتويجه للمرة الثانيه فى تاريخة ب ( فلاشينج مدوز)؟؟ بص انا بحب جدا ( التنس ) بطوله امريكا المفتوحه الاخيرة تابعتها كلها من اولها لاخرها وحظى الحلو ان المباريات كانت بليل واشتراكى فى الجزيرة كان مسهلى المشاهدة نادال من احسن الاعبين فى العالم صحيح هو كان متاخر فى التصنيف بس مايمنعش انه افضل لاعب فى العالم حاليا وكنت مبسوط جدا بفوزة رغم انه يومها نايمنى الساعه 3 على ما المباراة خلصت ^_^ 10- مع او ضد اعتزال روجر فيدرر وتفسيرك لعدم احرازه غير بطوله واحدة كبرى فقط اخر 3 سنوات ؟؟ فيدرير انا بحبه جدا وكنت حاطه فى الرمزيه من كام شهر ^_^ تابعته فى بطوله امريكا المفتوحه الاخيرة اعتقد اعتزاله دلوقتى افضل . السن برضو فى لعبه التنس بيفرق مع الاعب خاصه ان التنس بيحتاج ياقه بدنيه عاليه جدا انتا عارف المباريات بتفضل بالـ 3 او 4 ساعات ودا عايز مجهود كبير جدا فيدرير بقى صعب مع تقدم عمرة يتعامل مع المباريات زى الاول . فى مباريات بتستمر 6 ساعات زى مباراة ديوكوفيتش ونادال في نهائي بطولة استراليا المفتوحة 2012 ؛ ومباراة ايسنر وماهو فى ويمبلدون 2010 استمرت 11 ساعة واتلعبت على 3 ايام ؛ دا فى مجموعة واحدة ( المجموعة الخامسة ) استمرت 8 ساعات خلصوها وكملوا لعب تانى يوم .... انا بفضل ان فيدرر يعتزل ويعمل مباراة خيرية وتبقى زوجى بين فيدرر ونادال وديوكوفيتش واندى موراى ...... خبر وتعليق الضيف عليه 1- لاعب كرة قدم يحتفل بهدفه بتناول قطعة بيتزا داخل الملعب احتفل اللاعب الغاني دومينيك أودورو بعد تسجيله هدفاً بتناول قطعة بيتزا داخل الملعب. وعمد لاعب فريق كولومبوس كرو عقب تسجيله هدفاً في مرمى فريق شيكاغو فاير بالدوري الأمريكي إلى ما اعتبره البعض سلوكاً غريباً نوعاً ما، إذ بدلاً من القفز على السياج أو السقوط على الأرض والتفاف زملائه حوله، أو دوران ولف الملعب وتبادل الأحضان، أو غير ذلك من ردود الأفعال المتعارف عليها في مثل هذه المواقف، فضل الاتجاه لأحد المتفرجين لأخذ قطعة بيتزا وتناول جزءاً منها.ومن المتوقع أن يُصنف هذا السلوك الأغرب في تاريخ أشهر لعبة في العالم. ^_^ دروجبا اكل ( موز ) فى الملعب هو تصرف غريب اكيد بس السؤال هل الاعب كان واخد باله ان المشجع بياكل بيتزا والا شافه وهو بيحتفل بالهدف فقال لما اخدها منه ^^ اكل الموز حاجة عاديه وموقف دروجبا شوفناه فى كأس الامم 2008 لما اتصاب وطلع يتعالج بره والدكتور اعطاه صابع موز ومعروف عن دروجبا انه بياكل موز قبل المباراة وبين الشوطين لان الموز بتعطي طاقة علشان كده بنشوف لاعبى التنس بياكلوا موز فى الاستراحة وفاكر اللقطة دى شيكابالا فى مباراة الجونة فى الكاس لما اتلعب وقت اضافى لكن لاعب ياكل بيتزا دا لاعب قصده الشهرة لانها حركة غريبة 2- هندي يشرب كوباً من دم زوجته يومياً ليزيد من قوته! ذكرت جريدة التايمز الهندية أن ديبا أهيروار ذهبت للشرطة لحمايتها من زوجها الذى كان يستخدم حقنة ليسحب الدم من جسدها ثم يفرغه فى كوب ليشربه مضيفة أنها لم تسطع أن تخبر أحدا بما يفعله زوجها حتى ولدت طفلها الأول قبل عدة أشهر مشيرة إلى أنه كان يسحب الدم من ذراعيها حتى أثناء الحمل الأمرالذى كان يجعلها تشعر بالضعف والغثيان .واستطاعت ديبا أن تهرب إلى بيت والديها لتخبرهم عن مأساتها والذين قرروا إبلاغ الشرطة التى وجهت له تهمة تعذيب زوجته جسديا، ومن جانبه اعترف الزوج ماهيش أهيروار أنه كان يضرب زوجته إذا قاومته وحاولت منعه من سحب دمها موضحا أنه كان يشرب دمها ليزيد من قوته . تصرف غريب اكيد وبعدين استحملت ليه كل دا االا لو كانت مبسوطه بالى بيحصل ^_^ 3- بريطاني يأكل 49 رأسا من الثوم خلال 5 دقائق فاز رجل بريطاني بأول مسابقة عالمية سنوية في أكل الثوم، بعدما تمكن من التهام 49 رأساً منه خلال فترة خمس دقائق. وفاز بكأس المسابقة إلى جانب جائزة مالية مقدارها 100 جنيه استرليني، أي ما يعادل نحو 160 دولاراً.يشار إلى أن الرقم العالمي سجله رجل في نيبال عام 2009، حين أكل 34 رأساً من الثوم خلال دقيقة واحدة ... دا تلاقيه صحته زى الفل دا اكيد ^_^ اوتوجراف الاعضاء silver spectra ستار المنتدى ^_^ طبعا دا المنتدى من غيرة فى الضياع هو بس يبطل ام الاختراعات بتاعته هو والادارة ويسيبو المنتدى شغال كويس وبجد يعنى واحد من احسن الاعضاء الى اتعاملت معاهم فى المنتدى . ( مستنى الادارة بعد الكلمتين دول ) ساحر الاحزن عم ساحر ( القلب الطيب ) ساحر من الاعضاء الى ليهم تواجد جميل فى المنتدى استحق الادارة بجدارة واتمناله التوفيق حرف هجاء ( المغيبه ) هى بتحب اللقب دا لما بقوله لا بجد من العضوات الى لما بتكون موجودة بتعمل شغل كويس فى المنتدى بس مشكلتها انها دائما عامله فيها مشغوله مكنش محل متر فـ متر الى واخداة وفاتحاة اتيليه . بيج بوص ( الدينامو ) طبعا من انشط الاعضاء حاليا بس مستعجل شويه واد حبيب ( حاحا ) حبيبى ^_^ هو بس يبطل بحبك وحبك وحبايب وحبيبه وحبوب وحبوبه وهنلاقى خواطرة محدش فاهم منها حاجا احضان الحبايب ( الفيلسوف ) نفسى يخرج من الصفحات وهخرجه بحوار قريب شكلى ^^ K A S E M ( حمدالله بسا ) طبعا بقاله فترة كبيرة مش بيدخل والحمد لله انه رجعلنا مرة تانيه Lost Pearl ( الشحرورة ) لوست من المراقبين المميزين جدا لما بتكون موجودة بتاخد بالها من شغلها كويس ودا مميزها محمد شاهين ورم من كتر الحظر ^^ ربنا يرجعه بالسلامه شخصيات عامة محمد مرسى باى باى واشوفك فى الاخرة ان شاء الله وخلى الشرعيه تنفعك ^_^ خيرت الشاطر مع حبيبك الى فوق نفس الكلام محمد البلتاجى اللومبى مسيرك تتحط مع نخنوخ فى مكان واحد صفوت حجازى بقيت شيك بعد ما سبغت بجد حبيت النيولوك بتاعك جدا ( شنكوتى ) عبدالفتاح السيسى تسلم الايادى محمد ابراهيم ( وزير الداخليه ) يمكن ربنا نجاك من محاوله الاغتيال عشان تجيب حق الشهداء وترجع الامن والامان للشعب المصرى امير دوله قطر عميل امريكا وبكده يكون خلص الحوار بشكرك يا مورشو على تلبيه الدعوة انا الى بشكرك وسعيد جدا بالحوار واتمنالك التوفيق دائما انتظروا الحلقة القادمة مع المتميز بيج بوص دمتم فى امان الله

[big bốss]

حلقه جميله مع ضيف مميز

مش عارف انت مش مقتنع ليه ان النقاش من انشط الاقسام

و انا واثق لو الاستبيان اتعمل فى اى مكان هياخد اعلى الاصوات

و متشكرين يا عم انا الدينوموا ^_^

و اسيل قلتلك انا انها هتبقى مشغوله مش هتفضى للمنتدى

ربنا يكون فى عونها

شغل عالى يا عاشق موفق

و تم التثبيت لعيونك يا غالى

[SiLver Spectra]

اقتباس 7- شايف ان الاعلام الرياضى هوسبب الفتنة بين الجماهير وفساد الكورة ؟؟؟ اكيد عليهم دور كبير فى فساد الرياضه لما مذيع يطلع فى برنامج يقعد كل يوم مش اقل من ( 3 ساعات ) وفى ايام كان بيطلع يقعد بالـ ( 6 ساعات ) عايز منه ايه هههههههه ؛ دا بيكونو شغالين فى قناة واحدة وبيهاجمو بعض ودا يشجع الالتراس ودا ضدهم عشان بيعاند زميله الاعلامى .

الاعلام الرياضي المصري هو الاعلام الوحيد اللي بيتكلم في الاقتصاد و السياسة و اي حاجه تلاقيه شغال فيها
مافيش دوري اصلا و عادي جدا تلاقي المذيع بيطلع كل يوم بال3 ساعات
ممكن يفتحها طبيخ

و راي في الالوتراس زي رايك ..هما سبب التعصب الكروي
و الامن بيخاف منهم ! و مش بس الامن حتى الاعلام ..ماحدش بيقدر يفتح بؤه ضدهم
مش هقولك على موضوع نادي الزمالك اهو ادارته متنيله
هقولك حرق مقر الاتحاد ..مسخره بصراحة و كلوا ساكت ..اعلام و دولة
كأن مافيش اي حاجه حصلت !!

-------------
عاشق متيم ليك مستقبل في الاستضافات
لو استمريت مش بعيد تسحب البساط المرشدي
اسلوبك قوي و واضح انك بتذاكر كويس قبل ما تطرح الاسئلة على الضيف
انا بشك انك عضو قديم و جاسوس

[™Amiliya]

لقاء فريد من نوعه فعلا

عاشق احييك ع ادراتك للحوار

[كوين ميرو]

حلقه جميله احمد من الناس اللى ليها بصمه خاصه

خلطه غريبه طيب على شرير دمه خفيف وتقيل بردو تبقى محتار وانت متابعه ^_^

مجهود راااائع منك عاشق

وليك مستقبل كامذيع

فى انتظار جديدك

[✿ Celiηα]

حلقة مميزة واولاً بيعجبني فحوار حضرتك
انه مش شوية اسئلة لكل الاعضاء وخلاص لا ده لكل عضو
اسئلة خاصة بيه وواضح ان بيبقى فيه قبليها متابعة قوية

ومورشو منور الاستضافة ^^

[جبل عالي]

بصراحة رأيي لن يختلف عن آراء كل السابقين

ماشاء الله عاشق ربي يوفقك

ومورشو من الشخصيات التي لها طابع خاص

زي ناس كتير جدا هنا

تحيتي وتقديري للجميع

[ساحر الأحزان]

اسلوب لوى الدراع دة مش حلو انى اقدم مساعدة لدولة

وبعد كدة أقلة أنا بمن عليك

ومالة لما نعمل شوية تقشف زى اليونان ونام نص يطن

أية ألى حيحصل يعنى

حنموت من الجوع

محدش ببات وهو زعلان

نورت الاستضافة مرشو

مع عاشق حوار دسم

سياسة رياضة منتدى

تحياتى يا شباب

[عاشق متيم]

اقتباس المشاركة الأصلية كتبت بواسطة SiLver Spectra انا بشك انك عضو قديم و جاسوس

انا مش عضو قديم انا عضو برونزى

اقتباس جاسوس

عرفت ازاى !!!!!!!!!!!!!!!!!!!!!!!!

انا هعترف لك بالحقيقة بس خليها بيتى وبينك
كان فى فترة فى المنتدى كل ما تدخل مدونة يقولك انا فخور انى ارهابى ..
ويقولك بما انى بيتقال عليا ارهابى
لدرجة انهم عملوا مجموعة لوحدهم ؛ وكل ما عضو تابع للمجموعة
يعمل مشاركة يدخلوا يعطوا لايك ...
حتى مورشو عمل موضوع عن الظاهرة دى .......
حتى لما كان بيردوا على تقييمات بعض يقولوا اهلا بالارهابى
ساعتها (Central Intelligence Agency (CIA
قلقت جدااااا ؛ وقالت ان فى ارهابيين فى المنتدى ؛ وخافت انهم يقوموا بعمليات تفجيرية
فارسلت ليا رسالة مشفرة وطلبت منى انى اتابعهم ؛
وفعلا بقيت بتابع الاعضاء دى

نورت الموضوع يا دكتور
وبشكر كل المرور
وبشكر اخى احمد ( مورشو ) على تلبية الدعوة وبدعوا الله ان يرزقه بذريه صالحة طيبة مباركة تقر بها اعينهم
وربنا يوفقه فى شغله وحياته

[morshooo]

اقتباس المشاركة الأصلية كتبت بواسطة big bốss حلقه جميله مع ضيف مميز مش عارف انت مش مقتنع ليه ان النقاش من انشط الاقسام و انا واثق لو الاستبيان اتعمل فى اى مكان هياخد اعلى الاصوات و متشكرين يا عم انا الدينوموا ^_^ و اسيل قلتلك انا انها هتبقى مشغوله مش هتفضى للمنتدى ربنا يكون فى عونها شغل عالى يا عاشق موفق و تم التثبيت لعيونك يا غالى

اموت واعرف مين قالك انى مش مقتنع بانه قسم نشيط

من ضمن اقسام المنتدى .

وانا متاكد ان الاستبيان لو اتعمل فى اليوميات

او صفحات مكشوفه او الخواطر او الهوايات او الابداعات

مش هياخد انشط قسم ^_^ لسبب بسيط وقولته فى التوبيك

بتاع التصويت .

ان لو اتعمل التصويت فى قسم من الى قولتلك عليهم الاعضاء الى هتصوت

هيكونو الاعضاء المهتمه بالقسم الى فيه التصويت يعنى لو عملت

فى اليوميات الاعضاء المهتمين بالنقاش هيعرفو منين .