مسلم في صندوق | muslim in box

[الحان الورد]

السلام عليكم ورحمة الله وبركاته


الواحد بقاله كتير مكتبش مواضيع ، فـ مش عارفة أبدأ بـ إيه
ندخل في الموضوع على طول ...
العنوان عبارة عن اسم لفيديو ع اليوتيوب

[youtube]https://
وهي نقاط عمومية ،، يعني مجرد فكرة أو كلمة حد قالها وعجبتني

#
أول حاجة لفتت انتباهي ، انه كان بيسأل الناس سؤال :
تعرف ايه هو الاسلام ؟
هو عبارة عن إيه يعني ؟
تقريباً محدش عرف ،، والإجابة التلقائية اللي بتيجي في بالك
الإسلام هو دين
هو فعلاً قال كدا ، وقال برضو إن الإسلام هو أسلوب حياة
أسلوب حياة !
تعبير دقيق وشدني الحقيقة
لما نقعد نفكر كدا مع نفسنا ليه ربنا خلق الأديان ومن ضمنهم الدين الإسلامي ؟
هنلاقي إن ربنا حددلنا الطريقة الأمثل اللي نعيش بيها
انتِ لما تلاقي لعبة مثلاً وعايز تعرف تشغلها او تتعامل معاها ، هتسأل مين ؟
أكيد اللي صانعها هو أدرى بيها
هي نفس الفكرة - ولله المثل الأعلى طبعاً -
ربك هو اللي خالقك وهو الوحيد اللي هيعرق الطريقة الأفضل لحياتك .


#
كل ماتحارب حاجة أوي وتسعى بكل الأشكال انك تمنعها ، دا دليل طبيعي ومنطقي انك خايف منها !
حد كان قال الجملة دي كـ تعبير او وصف لحاربة أمريكا للإسلام ،،
لو فكرنا برضو هنلاقيها حاجة منطقية جداً
انت في حياتك لو خايف من حصول حاجة معينة ، هتلاقيك بتسعى بكل الطرق انك تمنع حدوث الحاجة دي ..
وكل مازاد خوفك منها ، زادت جهودك في محاولة منعها ،،
السؤال اللي ممكن نسأله هنا
طب ليه أمريكا خايفة من الإسلام بالشكل دا ؟
وبتحاول تشوهه - وإن كانت أفعال بعض المنتمين ليه هي اللي بتشوهه -
وبتربط صور الإرهاب بيه ؟
جاوبوني ع السؤال دا


#
التلفزيون - الإعلام وتأثيره
في جملة إتقالت كويسة جداً
" العقل البشري مثل جهاز الكومبيوتر ، بغض النظر عن مدى كفاءته
صحة معلوماته تعتمد على صحة المعلومات التي تدخل إليه "

الواحد مكتشتفش فعلاً خطورة الإعلام إلا في الفترة دي ،
انت تيجي تتناقش مع حد تلاقيه بيسمعلك كلام التلفزيون ، ويكأنك بتشيل دماغ الشخص دا وتحط الدماغ اللي انت عايزها ، دي وظيفة الإعلام في الفترة الأخيرة

" مش المفروض تصدق الإعلام ، لإن كل إعلام بيتبع منهج خاص بيه "
جملة لبنت إيطالية جت في الفيديو .


#
التطرف في كل حتة
دي حقيقة ،، زي مافي مسلمين متطرفين
في ناس تانية لاتنتمي للدين الإسلامي ، ومتطرفين برضو
وكل واحد منهم شايف نفسه هو الصح فقط لا غير ، ومش قادر يتقبل وجود الآخر
هو في الحقيقة انت مش هتقدر تقول لحد ماتبقاش موجود
عشان هو هيكون موجود غصب عنك ، الأفضل تدور على طريقة تتعايش بيها معاه


#
" لازم نتعرف على الناس بشكل فردي ، بدون أن نعمم بالأشكال والمناظر "
البنت الإيطالية برضو

الجملة مش محتاجة تعليق .


#
التعاليم الصغيرة بتاعت الدين اللي بتغيب عننا وأحاديث الرسول
زي
بسم الله الرحم الرحيم اللي مفروض نقولها قبل أي عمل هنعمله
" الراحمون يرحمهم الله "
قصة المرأة والقطة
" القتل محرم علينا جميعاً وهو من الكبائر "
" السلام وإفشاؤه وكونه سبب في محبة الناس لبعضهم "
" إنما بُعثت لأُتمم مكارم الأخلاق "

انت ممكن تمسك كل وحدة من دول وتطلع بـ فوائد آد كدا
حاجات يمكن لو طبقناها بجد في حياتنا ، الحياة هتختلف


#
النقاط المشتركة
كان الشاب اللي عمل الفيديو بيسأل الناس إزاي نقدر نحقق السلام في العالم ؟
اسأل نفسك السؤال دا الأول وفكر تجاوب عليه ..

الشاب جاوب وقال بإننا نعرف الأشياء المشتركة بيننا قبل الخلافات
أي حد مهما اختلفت معاه ، هتلاقيك بتتفق معاه في حاجات
ممكن تكون حاجات صغيرة زي أكلة بتحبها أو فريق بتفضله
إيجاد الأشياء المشتركة بينك وبين الناس سبب من أسباب الألفة والمحبة


#
" مستحيل تعرف الحقيقة إلا إذا تحدثت مع أصحاب الشأن "
جملة لراجل كدا ^^

القيل والقال ، وفلان قال وعلان مقالش
وكلام الناس اللي بيودي في داهية ،،
حاجة محتاجين نعيد النظر فيها برضو .


#
" لو صعبت الموضوع على نفسك هيكون صعب ، لكن لو اعتدلت هيكون سهل ومريح "
جملة لبنت صغيرة محجبة ،،

قيس الموضوع دا على كل حاجة في حياتك .


#
" قدم السلام للجميع ، مهما كانت الجنسية أو الديانة "

أعتقد ان مفيش أرقى من انك تكون إنسان ، والانسانية مش لناس معينة
الانسانية للبشر كلهم ،، وحط نفسك دايماً في مكان اللي قدامك
وشوف انت تحب الناس تتعامل معاك إزاي .

حاجة بمناسبة الانسانية =)

[youtube]https://


وبس
الفيديو كله تجربة مفيدة ، اتفرجوا عليه وقولوا رأيكو عموماً
لو حد حابب يعلق على أي نقطة من اللي فوق مفيش مشاكل ^^

وسؤال في الآخر بقى ،،
إيه أهم الأسباب اللي خلت شكل الإسلام في الغرب مشوه ؟
ليه الغرب معظمهم ميعرفش حاجة عن الدين دا ؟
وإزاي نحل مشكلة زي دي ؟

أعتقد ان لكل واحد الحرية في حياته ، تختار دينك حياتك بالشكل اللي يريحك
ازاي ناس تختار الاسلام مثلاً وتتم محاربتهم ؟
او تختار المسيحية ؟
هو مين اللي بيحاسب ؟
مش ربنا اللي بيحاسب ، طب انت بتحاسبهم بأي أساس ؟
ليه ماتتعاملش معاهم كـ بشر في المرتبة الأولى
وتسيب المحاسبة لـ ربنا ،،
زي ماانت تحب انك تدافع عن دينك وتمارسه بحريتك
سيب غيرك يعمل نفس الموضوع

" لا إكراه في الدين قد تبين الرشد من الغي "
" إدعُ الى سبيل ربك بالحكمة والموعظة الحسنة وجادلهم بالتي هي أحسن "
" ولو شاء ربك لآمن من في الأرض كلهم جميعاً أفأنت تكره الناس حتى يكونوا مؤمنين "
" وقل الحق من ربكم فمن شاء فليؤمن ومن شاء فليكفر "

- بعض آيات القرآن الكريم -


الأفكار كانت كتير وأنا بكتب الموضوع وحاولت ألمها على قد ماقدر
والموضوع مش ديني عموماً على قد مانا عايزاه يبقى نقاشي ،،
مستنية رأيكم وإضافاتكم بقى
وشكراً

[big bốss]

انتى سردتى نقاط كتير للنقاش

اولآ الاسباب الى أدت الى تشوه الاسلام فى الغرب

- اولآ هما عايزين كدا لانهم خايفين منه لانه بينشر الحق و العدل و المساواه

بيحدد حرية كل انسان على كل حريتهم الى سداح مداح بيعملوا الفواحش حسب مزاجهم

- تفكيرهم غير تفكير الاسلام هما عندهم الطمع و العيش على حساب الاخريين

و الاسلام بيمنع كدا يعنى بيكبت جماح اطماعهم .

- ثالثآ فيه مسلميين متتطرفيين فعلآ هما الى بيشوهوا صورة الاسلام بأرهابهم

و أفعلهم و انهم لا يقدروا برىء و لا مظلوم و لا طفل و امراه و دى نقطه

بيستغلها الغرب جدآ

- رابعآ فيه عقول غبيه عندنا علشان كدا الغرب بيستغلها جدا فى انه يغير صورة الاسلام

فى عقولنا


- خامسأ فيه نقطه مهم جدآ ان العرب و المسلميين ارضهم كلها خير يعنى لو اتحدوا

وراء راية الاسلام هيسيطروا على العالم و الغرب بيخاف من كدا

عايز يبقى هو المسيطر .


- طبعآ لازم نتمسك بالاسلام و نحاول نحسن صورته قدام الشعوب الغربيه

مش قدام الحكومات لانها مش هتقتنع عايزه تغير واقع لمصلحتها و بس

و دا يتم بأفعالنا مش بكلام مرسل و خلاص

بتنمية دولنا و العيش فى سلام و تمتعنا بالاخلاق و الاستقامه


موضوع جميل الحان الورود

أثار اعجابي

ودى و تقديرى لك ،،،،

[جبل عالي]

موضوع في قمة الروعة وبصراحة مستوفي كل حاجة

وكل نواحي النقاش كمان .... لكن منقدرش نجادل ولا نقول آراء

غير اللي موجود ببعض الردود منك هنا ...يعني انتي جايبة النقطة

ورادة عليها ماشاء الله ...... مطلوب مننا طبعا نوجد حلول

حسب رؤيتك وحسب مغزى الموضوع ....



وسؤال في الآخر بقى ،،
إيه أهم الأسباب اللي خلت شكل الإسلام في الغرب مشوه ؟

زي ماشرحتي لأن في فئات كتير بتتطرف وده بيكون ضد الإسلام بشكل أو بآخر
خصوصا بقا لما يكون كمان مش مطلوب إنه ينتشر ودي قضية باقية منذ الأزل


ليه الغرب معظمهم ميعرفش حاجة عن الدين دا ؟
مين قال ميعرفوش ؟ اومال بيحاربوه إزاي ؟ إلا لو عارفينه كويس جدا
ودارسينه دراسة مستفيضه كمان والكلام ده بشهادتهم هم بنفسهم وده
حصل قدامي والله من ناس كتير جدا وعلى درجة من الثقافة كمان عالية


وإزاي نحل مشكلة زي دي ؟
نحلها لو حصل عندنا نوع من الإدراك الواعي لنوعية تلك الحرب
الى جانب التحمل الكبير لمصاعب غاية فى الخطورة والصبر على إستعادة
هوية الإسلام القوية وفرضها بكل قوة وأعتزاز بكل نواحي تفكيرنا وتصرفاتنا
حتى مع الغرب وهو فى الاساس منبع الحرب على هذا الدين


أعتقد ان لكل واحد الحرية في حياته ، تختار دينك حياتك بالشكل اللي يريحك
ازاي ناس تختار الاسلام مثلاً وتتم محاربتهم ؟
او تختار المسيحية ؟
هو مين اللي بيحاسب ؟
مش ربنا اللي بيحاسب ، طب انت بتحاسبهم بأي أساس ؟
ليه ماتتعاملش معاهم كـ بشر في المرتبة الأولى
وتسيب المحاسبة لـ ربنا ،،
زي ماانت تحب انك تدافع عن دينك وتمارسه بحريتك
سيب غيرك يعمل نفس الموضوع

هي دي الثقافة اللي ناقصانا جدا ... ده غير ان العقول كلها حصل لها
نوع من الغسيل اللارادي وأصبحنا نصطبغ بصبغة الغرب بشكل رهيب
فحصل هذا الصراع الدموي بدءاً من نفوسنا نحن حتى طغى على كل نواحي معيشتنا
وأنسانا هويتنا الحقيقية فأصبحنا بهذا التخبط وبهذا التناقض الذي جعلنا
لقمة سائغة لأي فتن ولأي حروب وتشويه ............. الله المستعان


أحييكِ من كل قلبي لروعة طرحك

ولقيمة فكرك الراقي

[معذب القلب]

موضوع مميز رغم ان الكلام فيه كثير لكن حضرتك طرحتى القضيه وايضا الاجابه
دمت بود

[تيتشر نفشه ツ]

موضوعك حلو جداً ولامم نقاط كتيره وموجزه ومهمه
كنت من فتره بسيطه بس بقول ان فعلا الدين دا اسلوب حياه
واكتشفت دا فعلا
طول منتا قاعد في يومك وانت بتطبق الدين
بتدخل الحمام تقول دعاء الدخول تلقائي ، بتوقع من ايدك حاجه تلاقيك تلقائي بتقول بسم الله
اي حاجه تدايقك تلقائي بتصبر عليها وتستنى الفرج
تدور تلاقي كل حياتك عباره عن دين انتَ بتطبقه من صُغرك ..
الدين اسلوب حياه فعلا ..

من الحاجات الي مستغرباها فعلا
انك ممكن تلاقي الغرب بيشوهوا في الاسلام
لكن ماسمعتش مره ان الغرب شوّهوا في المسيحيه او اليهوديه
او اي ديانه تانيه ..
دا بيثبت ان الاسلام فعلا صحيح في كل حاجه ..
لدرجه تخليهم عايزين يغلّطوه بأي شكل ، ويوحّشوه ..

في دوله بريطانيا او ايطاليا تقريبا
فيها مركز للصحه والحاجات دي
كاتبين في مدخل المركز ..
" من أقوال محمد ، ثلثٌ لطعامك , وثلثٌ لشرابك ، وثلثٌ لنفسك "
هما مش مقتنعين بوجوده ، بس مقتنعين بكلامه ..
ماتفهميش ازاي بئا :d

اما بالنسبه للأسئله ..
إيه أهم الأسباب اللي خلت شكل الإسلام في الغ
رب مشوه ؟
وزيدي عليهم سؤال
اشمعنى الاسلام دونا عن جميع الاديان ؟
وهاتي حد يجاوب بئا :d

ليه الغرب معظمهم ميعرفش حاجة عن الدين دا ؟
مش عارفه بس بحس الغرب مش بيتطبق عندهم الدين دا بكثره
ف تلاقي معظمهم بيجهله ..
وانك تشوف حاجه بتتطبق قدامك وانت متعرفهاش وبعدين تبتدي تتعرف عليها
دي من الحاجات الي بتساعد ان الحاجه دي تنتشر وتتعرف ..
ف بيتهيألي عدم تطبيق الاسلام هناك بشكل واسع
خلّى الناس مش عارفه حاجه عنه
ونادر لما تلاقي حد شغوف بأنه يتعرف على حاجه ويبحث عنها زي الدين ..


وإزاي نحل مشكلة زي دي ؟
مش عارفه بردو
لأني سهل اقولك بنشر حملات التوعيه والكلام دا
لكن غالباً صعب انك تحلي مشكله عالميه زي دي ..
والحملات حتى وان كثرت وسندت شويا ، برضو مش هتوفي التوعيه الي احنا عايزين نوصلها ..
احنا علشان نحل مشكله زي دي ، محتاجين حاجه نقدر نوصل بيها للناس ..
مش عارفه هتبقى ازاي بس محتاجين حاجه تفهّم الناس ان الدين دا حياه ..
ومش اي حياه ، وسهل تتعاش ، بس محتاجين يعرفوها عشان يعيشوها ..

رغيت كتير
بس موضوعك حلو وشيّق فعلا ..
تسلم ايدك وشكراً ^^